4–10 ni Sepiteba

1 Korinica 14–16

“ Sa Sega ni Vu ni Veisei na Kalou, sa Vu ni Vakacegu Ga.”

Vola na veika o vakauqeti kina ni o wilika na 1 Korinica 14–16. Masulaka na veika e sa vakavulici iko kina na Yalo, ka kerea vua na Tamada Vakalomalagi kevaka e tiko tale eso na ka e vinakata o Koya mo vulica.

Vola na Veika o Vakauqeti Kina

Baleta ni se ka vou na Lotu kei na kena ivunau ena vanua o Korinica, sa kilai vinaka tu ni ra na sotava na veilecayaki o ira na Yalosavasava e Korinica. A vakatavulica taumada vei ira o Paula na dina bibi ni kosipeli: “ni sa mate na Karisito ena vuku ni noda ivalavala ca … ni sa bulu talega, ka ni sa tucake talega e nai katolu ni siga” (1 Korinica 15:3–4). Ia eso na lewe ni lotu era sa tekivu me vakatavulica ni “sa sega na tucake tale mai na mate” (1 Korinica 15:12). A vakamasuti ira o Paula me ra “taura tiko ga na” dina era sa vakatavulici kina (1 Korinica 15:2). Ni da sotava na veivakasama e veisaqasaqa baleta na dina vakosipeli, e vinaka meda nanuma ni “sa sega ni vu ni veisei na Kalou, sa vu ni vakacegu ga” (1 Korinica 14:33). Na noda vakarogoci ira na italai lumuti ni Turaga ka taura matua na dina era vakavulica vakawasoma ena rawa ni vukei keda meda kunea na vakacegu ka “dou tudei ena vakabauta” (1 Korinica 16:13).

Vakasama Eso ni Vuli iVolanikalou ni Tamata Yadua

1 Korinica 14

Au rawa ni vakasaqara nai solisoli ni parofisai.

Na cava na isolisoli ni parofisai? Sai koya nai solisoli ni tukuna na veika e se bera ni yaco? E sa baleti ira ga na parofita? Se na rawa ni dua ga e ciqoma nai solisoli oqo?

Vakasamataka vakatitobu na veitaro oqo ni o vulica na 1 Korinica 14:3, 31, 39–40. E rawa talega mo wilika na Ai Vakatakila 19:10 kei na “Parofisai” ena iDusidusi ki na iVolanikalou (scriptures.ChurchofJesusChrist.org). Yavutaki ena veika o sa vulica, o na vakamacalataka vakacava na isolisoli ni parofisai? Na cava beka e tukuna tiko o Paula ena gauna e sureti ira kina na kai Korinica me ra “gadreva me ra dau parofisai”? (1 Korinica 14:39). Ena rawa vakacava mo ciqoma na veisureti oqo?

Raica talega na Joeli 2:28–29; Alama 17:3; Vunau kei na Veiyalayalati 11:23–28.

1 Korinica 14:34–35

E yaga vakacava na itukutuku me baleti ira na marama ena veitikina oqo nikua?

Ena gauna nei Paula, a duidui na nanamaki me baleta na nodra vakaitavi na marama ena itikotiko raraba, oka kina ena veisoqoni ni lotu. Se cava ga na ibalebale ni 1 Korinica 14:34–35 ena gauna nei Paula, e sega ni dodonu me nanumi ni sega ni rawa vei ira na marama mera vosa ka veiliutaki ena Lotu nikua (raica na iVakadewa i Josefa Simici, 1 Korinica 14:34 [ena 1 Korinica 14:34, ivakamacala e ra b]). E kaya o Peresitedi Russell M. Nelson vei ira na marama ena Lotu nikua: “Eda … gadreva na nomu kaukauwa, nomu saumaki mai, nomu ivakadinadina, nomu rawa ni veiliutaki, nomu yalomatua, kei na domomu. Na matanitu ni Kalou e sega ka na sega ni rawa ni taucoko kevaka e sega na marama era cakava nodra veiyalayalati ka bulataka, o ira na marama era na rawa ni vosa ena kaukauwa kei na lewa ni Kalou!” (“Dua na Kerekere vei Ira na Ganequ,” Liaona, Nove. 2015, 96).

1 Korinica 15:1–34, 53–58

E qaqa vei mate o Jisu Karisito.

Na Tucake tale mai na mate i Jisu Karisito e tiki bibi ni vakabauta Va-Karisito, ena rawa beka ni tukuni ni kevaka e sega ni yaco ena sega na vakabauta Va-Karisito—me vaka na vosa nei Paula, “sa qai ka walega na neitou vunau, a ka wale talega na nomudou vakabauta” (1 Korinica 15:14). Ia eso na Yalosavasava mai Korinica era sa tekivu me vakatavulica ni “sa sega na tucake tale mai na mate” (1 Korinica 15:12). Ni o wilika na vosa nei Paula ena 1 Korinica 15, taura e dua na gauna mo vakasamataka vakatitobu ena duatani vakacava na nomu bula kevaka o sega ni vakabauta na Tucaketale (raica na 2 Nifai 9:6–19; Alama 40:19–23; Vunau kei na Veiyalayalati 93:33–34). Na cava nai balebale ni malanivosa oqo “Kevaka sa sega ni vakaturi cake tale na Karisito, sa sega ni yaga na nomudou vakabauta” vei iko? (tikina 17).

Sa yaga talega me kilai ni o Paula e vakatoka na papitaiso ena vukudra na mate me ivakadinadina ni sa dina na tucaketale (raica na 1 Korinica 15:29). E sa vaqaqacotaka vakacava na nomu vakabauta na ivunau ni tucake tale mai na mate na cakacaka ni valetabu kei na tuva kawa?

Raica talega na Vunau kei na Veiyalayalati 138:11–37.

1 Korinica 15:35–54

Na yago sa tucake tale mai na mate e duidui mai na yago oqo.

O sa bau vakananuma e vakacava tu beka na yago sa tucake mai na mate? Ena 1 Korinica 15:35, era vakataroga na veika oqo eso na kai Korinica. Wilika na isaunitaro nei Paula ena tikina e 36–54, ka toqa toka na vosa kei na veimalanivosa era vakamacalataka na duidui ni yago oqo kei na yago sa vakaturi mai na mate. Ni ko cakava, sa rawa mo veidutaitaka na tikina 40–42 kei na Vunau kei na Veiyalayalati 76:50–112. Na cava e vakuria na ivakatakila oqo vua na Parofita o Josefa Simici ki na veika mo kila vinaka? (raica talega na iVakadewa i Josefa Simici, 1 Korinica 15:40 [ena 1 Korinica 15:40, ivakamacala e botona a]). Na cava e bibi kina vei iko na dina oqo?

Raica talega na Luke 24:39; Alama 11:43–45; Vunau kei na Veiyalayalati 88:14–33.

“Sa duatani nai ukuuku ni matanisiga” (1 Korinica 15:41).

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

1 Korinica 15:29.Eda vulica mai na tikina 29 ni o ira na Yalosavasava ena gauna makawa era a vakaitavi ena papitaisotaki ni mate, me vaka eda vakayacora ena gauna oqo. Eda na vakamacalataka vakacava vei ira eso na vuna eda papitaiso kina ena vukudra na tubuda? Na cava eda sa cakava tiko vakamatavuvale me vakarautaki kina na cakacaka vakalotu ni valetabu me baleti ira na tubuda era sa mate ni ra sa gadreva? E rawa ni o kunea eso tale na ivurevure ena ulutaga oqo ena itukutuku ni Ulutaga vakosipeli “Baptisms for the Dead” (topics.ChurchofJesusChrist.org) kei na FamilySearch.org.

1 Korinica 15:35–54.Na iyaya se iyaloyalo cava eda rawa ni vakaraitaka me vukea nomu matavuvale me ra kila vakavinaka eso na vosa e vakayagataka o Paula me vakamacalataka na duidui ni yago oqo mai na yago e vakaturi cake mai na mate? Me vakaoqo, me vakaraitaka na duidui e tiko ena vuca kei na sega ni vuca (raica na tikina e 52–54) e rawa ni o vakaraitaka na kaukamea e sa veveka kei na kaukamea e sega ni veveka. Se rawa ni o vakatauvatataka e dua na ka e malumalumu kei na dua na ka kaukauwa (raica na tikina e 43).

1 Korinica 15:55–57.E dua na veitalanoa me baleta na veitikina oqo ena rawa ni vakaibalebale cake kevaka e kila na nomu vuvale e dua e sa takali yani. E rawa ni ra vakadinadinataka na lewe ni vuvale na nona kauta tani o Jisu Karisito na “bati gaga ni mate” (tikina e 56).

1 Korinica 16:13.Me vukea na nomu lewe ni vuvale me ra raici ira ena tikina oqo, e rawa ni o droinitaka e dua na wirini e ra ka tukuna vua e dua na lewe ni vuvale me “tudei” e loma ni bobo tiko na matana. Era na qai tovolea tale eso mera biliga se dreti koya tani mai na iwirini. Na duidui cava ena yaco ke tadola tiko na mata i koya na tamata ka tiko e loma ni iwirini ka rawa ni “raica” na ka e yaco tiko? Na cava eda rawa ni cakava meda “tudei” ena gauna eda temaki kina meda digidigi cala?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Sere vakaturi: “Sa Tucake!,” Serenilotu, naba 114.

Vakatorocaketaki ni Vuli ni Tamata Yadudua

Vakaraica na ivakarau. Ena ivolanikalou eda raica kina na ivakarau e vakayacora kina na Turaga na Nona cakacaka. Nai vakarau cava eso o kunea ena 1 Korinica 14 ena rawa ni vukei keda meda veitataki vakai keda?

A Cava Ko Sa Tagi Kina, © Simon Dewey 2021. Vakayagataki ena veivakadonui mai na Altus FineArt/www.altusfineart.com