E vosa tiko o Jisu vua e dua na gonelailai

18–24 ni Sepiteba

2 Korinica 8–13

“Ko Koya sa Solia ena Marau sa Vinakata na Kalou”

Na vakasama vinaka duadua ni nomu vakavulici ira na gone ena nomu kalasi ena yaco mai ni o vulica ena masumasu na 2 Korinica 8–13 ka vakasamataki ira tiko. E rawa ni kune ena ituvatuva oqo na ikuri ni vakasama ni veituberi.

ivakatakilakila ni veiwasei

Sureta na Veiwasei

E dua na sala vinaka me sureti kina na veiwasei vei ira na gone oya mo vakananuma vei ira e dua na ka o a sureti ira me ra cakava ena dua na lesoni i liu. Kerea me ra wasea na veika era sotava.

ivakatakilakila ni veivakavulici

Vakavulica na iVunau: Gone Sobu

2 Korinica 9:6–7

Au rawa ni solika ena yalomarau vei ira na vakaleqai.

E vinaka me da dau veiqaravi vei ira na tani, ia e vinaka cake sara me da veiqaravi ena yalomarau. Vakasamataka na cava ena uqeti ira na gone yadua me ra dau “solia ena marau.”

iTaviqaravi e Rawa ni Caka

• Sureti ira na gone me ra tokaruataka na malanivosa “Ko koya sa solia ena marau sa vinakata na Kalou” (2 Korinica 9:7). Na cava na kena ibalebale mo “solia ena marau”? Vakaraitaka e dua na iyaloyalo ni mata mamarau kei na mata rarawa, ka taroga vei ira na gone o cei vei rau e vaka na irairai ni solia ena marau.

• Lagata vata vakavica e dua na sere baleta na veiqaravi, me vaka na “Ni Da Dau Veivuke Tu” (iVolanisere ni Gonelalai, 108b). Ena imatai ni gauna, kerei ira na gone me ra lagata ena yalomarau; oti qai kerei ira me ra lagata ena ivakarau ni yalo duatani, me vaka na yalorarawa, oca, cudru, se rere. Vakananuma vei ira na gone ni vinakata na Tamada Vakalomalagi me da dau vukei ira na tani ena yalomarau. Qai lagata tale na sere ena yalomarau.

• Vukei ira na gone me ra cakava na iyaloyalo eso ni matadredredre kei na matacudrucudru. Kerei ira me ra taura cake na nodra iyaloyalo ni matadredredre ni ra rogoca na vosa marau se dredre ni ra lagata na “Dredre Sara Mai” (iVolanisere ni Gonelalai, 128). E rawa ni ra vakayacora talega vakakina ena iyaloyalo ni matacudrucudru kei na vosa matararawa kei na mataca. Vukei ira na gone me ra kila na mata cava e mata mamarau kei na kena e sega. Vakamacalataka ni dua na sala me da marau ka qaravi ira na tani sa ikoya me da matadredredre ka vukei ira na tani me ra matadredredre.

• Tuva e dua na itaviqaravi vakalasi mo ni qarava e dua, me vaka e dua na gone e sega ni dau lako mai ki na Lalai se dua na lewe ni tabanalevu se itokani e leqa tu. O na tuva beka mo ni sikova nona vale na tamata oya, vola eso na ivola vinaka se droinitaka eso na iyaloyalo, se kauta na kakana mo ni kania vata.

• Sureti ira na gone yadua me ra tuva e dua na ivalavala ni veiqaravi mamarau me baleta e dua na lewe ni nona matavuvale. Ena kalasi ni macawa ka tu mai, kerei ira me ra wasea na veika era cakava.

2 Korinica 12:7–10

Na Tamada Vakalomalagi e dau sauma na masu, ia e sega ena veisala kece eda dau namaka.

Na veika e sotava o Paula ena nona masulaka me kau tani na “voto ni kau sa vakalauti kina na lewena” e vakavulica vei keda ni so na gauna e dau vakaukauwataki keda ga na Kalou ena noda vakatovolei ka sega ni kauta tani.

iTaviqaravi e Rawa ni Caka

• Vakaraitaka vei ira na gone e dua na kau vakavotona (se dua na kena iyaloyalo). Vukei ira me ra raitayaloyalotaka na veika era na vakila ni lauta tu na lewedra e dua na votonikau me dua na gauna balavu. Vakamacalataka vakalekaleka na 2 Korinica 12:7–10 vei ira na gone, ka vakamacalataka ni nona “voto ni kau sa vakalauti kina na lewena” o Paula e a dua na veivakatovolei, e dua na ka dredre ena nona bula. E dina ga ni a kerea o Paula vua na Kalou me kauta tani na veivakatovolei, a sega ni vakayacora na Kalou. Ia, a vakavulici Paula na Kalou ni rawa ni vukei keda na bolebole eso ni vulica me da yalomalumalumu ka nuitaki Koya. Ena qai vakaukauwataki keda na Kalou.

• Vakadinadinataka ni kila tu na Tamada Vakalomalagi na ka e vinaka vei keda, ka na solia vei keda o Koya na ka eda gadreva, kevaka sara mada ga e duatani mai na ka eda nanuma ni da gadreva. E rawa talega ni o wasea e dua na gauna a saumi mai kina na nomu masu ena dua na sala se ena dua na gauna e duatani mai na ka o a namaka. E dua na italanoa me vaka na “The Diabetes Dilemma” (iTokani, Sepi. 2019, 4–5) se “Please Bless Ace” (iTokani, Nove. 2019, 32–33) e rawa talega ni veivuke.

• Lagata vata kei ira na gone e dua na sere baleta na loloma i Tamada Vakalomalagi me vaka na “Tamaqu Mai Lagi” (iVolanisere na Gonelalai, 6). Taroga vei ira na gone na cava era na kaya vua e dua ka vakananuma tu se dau rogoca ka sauma na Tamada Vakalomalagi na masu. Lagata tale na sere, ka dusia na qaqana e vakamacalataka na nona nanuma na Tamada Vakalomalagi baleti keda.

ivakatakilakila ni veivakavulici

Vakavulica na iVunau: Gone Qase Cake

2 Korinica 9:6–9

Au rawa ni solika ena yalomarau vei ira na vakaleqai.

A vinakata o Paula me vakauqeti ira na Yalododonu me ra solia nodra veika e vuqa me vukei ira na dravudravua. O rawa ni vakayagataka vakacava na nona vosa mo vakauqeti ira kina na gone me ra qaravi ira na tani?

iTaviqaravi e Rawa ni Caka

• Vola na vosa ni 2 Korinica 9:7 ena papa, ka vakalala tu na vosa bibi eso. Sureti ira na gone me ra vakilakila na vosa era yali tiko. Qai laiva me ra wilika na tikina ena ivolanikalou ka me ra vakatawana na vanua lala eso. Na cava na kena ibalebale me da solika ena “voraki, se ni sa vakasaurarataki”? Na cava na kena ibalebale mo “solia ena marau”?

• Sureti ira na gone me ra vukei iko ni vakaraica na iyaloyalo eso ni iVakabula ni qaravi ira tiko na tani (e vica e tiko ena Lako Mai, Mo Muri Au—Me Baleti Ira na Tamata Yadua kei na Matavuvale). Tarogi ira se cava era raica ena iyaloyalo eso oqo ka vukei ira me ra kila ni o Jisu a dau qaravi ira na tani ena loloma. Tuva vakalasi e dua na inakinaki me da vaka io ni ra kerei keda na lewe ni matavuvale se so tale me da veiqaravi ena macawa ka lako mai, me vaka na veivuke e vale se qaravi ira na tani.

• Vukei ira na gone me ukutaka eso na vatu lalai. Vakamacalataka ni oqo na “vatu ni veiqaravi” me rawa ni ra kauta voli ena nodra taga ena macawa oqo me vukea me ra nanuma me ra dau qaravi ira na tani ena yalomarau.

• Lagata vata e dua na sere baleta na veiqaravi, me vaka na “Na Lagasere ni Marau” (iVolanisere ni Gonelalai, 129b). Vukei ira na gone me ra vakasamataka na veitikina vou ki na sere e vakamacalataka na sala duidui eso mera qaravi ira kina na tani.

2 Korinica 12:7–10

Na Tamada Vakalomalagi e dau sauma na masu, ia e sega ni dau solia vei au o Koya na veika kece au kerea.

A kerea o Paula vua na Kalou me kauta tani nona malumalumu, ia a kila na Kalou ni nona malumalumu o Paula ena vakayalomalumalumutaki koya ka na vakaukauwataki koya kina na Kalou.

iTaviqaravi e Rawa ni Caka

• Sureti ira na gone me ra veidutaitaka na 2 Korinica 12:9–10 kei na Ica 12:27. Na vosa se na malanivosa cava soti e tokaruataki? Na cava era vakavuvulitaka tiko na veitikina oqo? (O na gadreva beka mo vakamacalataka ni a vakatauvatana tiko o Paula na nona bolebole kei na votonikau e kulina.) Na cava a vakavulica na Kalou vei Paula baleta na veivakatovolei?

• Sureti ira na gone me ra vola eso na veivakatovolei era sotava tu na tamata ena nodra bula. Vukei ira me ra vakasamataka na sala e rawa ni vuli kina e dua mai na nona veivakatovolei ka vakalougatataki mai kina.

• Wilika vata kei ira na gone “The Diabetes Dilemma” (iTokani, Sepi. 2019, 4–5). Sureti ira na gone me ra wasea na veika era sa sotava ena nodra masulaka e dua na ka era qai sega ni ciqoma. Kerei ira mera wasea na veika era a vulica mai na veika oqori. Ena tu beka eso na ka o sa sotava mo wasea talega. Wasea nomu ivakadinadina ni dau sauma na Tamada Vakalomalagi na noda masu ena sala kei na gauna eda na vakalougatataki vakalevu duadua kina.

ivakatakilakila ni vuli

Vakauqeta na Vuli e Vale

Sureti ira na gone me ra dau solika ena marau e nodra vale ena macawa oqo ka me ra vakavakarau mai ki na kalasi ena macawa ka tarava me ra tukuna na ivakarau era a qarava kina e dua ka leqa tu.

Vakatorocaketaki Noda Veivakavulici

Sotava na vakasausa ena loloma. “Eso na gauna na nona ivakarau e dua na gone e rawa ni vakacacana nodra vuli na vo ni kalasi. Ni yaco oqori, mo dau vosota, yalololoma, ka veiciqomi ena bolebole eso ena rairai sotava tiko na gone oya. … Kevaka e vakaleqai tu nona bula na gone e vakasausa tiko, veitalanoa kei na kenadau ena tabanalevu se iteki baleti ira na vakaleqai tu se sikova na [disability.ChurchofJesusChrist.org] mo rawa ni kila na ivakarau me sotavi kina na gagadre eso oqori” (Veivakavulici ena iVakarau ni iVakabula, 26).

tabana ni itaviqaravi: Au rawa ni solika ena yalomarau vei ira na vakaleqai