Jisu Karisito

11–17 ni Sepiteba

2 Korinica 1–7

“Mo Dou Veivinakati kei na Kalou”

Tekivuna nomu vakavakarau ena wiliki ni 2 Korinica 1–7. Lako Mai, Mo Muri Au—Me Baleti Ira na Tamata Yadua kei na Matavuvale e rawa ni vukei iko mo vulica na veiwase oqo, ka rawa ni solia vei iko na ituvatuva oqo eso na vakasama ni veivakavulici.

ivakatakilakila ni veiwasei

Sureta na Veiwasei

Eso na gone ena nomu kalasi era a vola beka na ivola ena macawa oqo me baleta na sala e ivakaraitaki vinaka kina ni tisaipeli i Jisu Karisito e dua na lewe ni matavuvale (raica na ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale). Ke ra sa cakava, kerei ira ni se bera na kalasi me ra mai wasea e dua na ivola. Se kerei ira na gone me ra wasea e dua tale na ka era a vulica.

ivakatakilakila ni veivakavulici

Vakavulica na iVunau: Gone Sobu

2 Korinica 1:3–4

Na Tamada Vakalomalagi e dau vakacegui au, ka’u rawa ni vakacegui ira na tani.

O na vakataudeitaki ira vakacava na gone ni na vakacegui ira na Tamada Vakalomalagi? O na vakauqeti ira vakacava me ra vakacegui ira na tani?

iTaviqaravi e Rawa ni Caka

• Vakaraitaka vei ira na gone eso na iyaya dau veivakacegui, me vaka na itutuvi se ivadreti. Tarogi ira na gone se cava e dau vakacegui ira ni ra rarawa se rere se sotava eso tale na leqa. Wilika vata kei ira na gone na 2 Korinica 1:3–4 , ka vakamacalataka ni “sotavi dredre” e sa dua tale nai cavuti ni leqa bibi eso. Wasea eso na sala sa vakacegui iko kina na Tamada Vakalomalagi, ka vakadinadinataka ni na vakacegui ira tale ga vakakina na gone.

• Vakaraitaka na kedra iyaloyalo na tamata era papitaiso (raica na iVola ni iYaloyalo Vakosipeli, naba 103–4) ni o wilika tiko na 2 Korinica 1:4 vei ira na gone. Vakamacalataka ni gauna eda papitaiso kina, eda sa yalataka me da vakacegui ira na tani. Eda na muria vakacava na ivakasala i Paula me da “vakacegui ira na vakaleqai tu ena dua na ka”?

2 Korinica 2:7–8, 10

Au rawa ni vosoti ira na tani.

Digidigi mai na itaviqaravi eso oqo—se bulia ga na nomu—me vukea na vaqaqacotaki ni nodra gagadre na gone me ra vosoti ira na tani.

iTaviqaravi e Rawa ni Caka

• Vakamacalataka vei ira na gone ni a vinakata o Paula vei ira na Yalododonu mai Korinica me ra vosota e dua na tamata ivalavala ca. Wilika na 2 Korinica 2:7–8, 10, ka sureti ira na gone me ra biuta na ligadra e utodra ena veigauna era rogoca kina na vosa kua ni cudruva kei na sega ni cudrutaka.

• Sureti ira na gone me ra dramataka na sala era rawa ni sausaumi kina ena ituvaki eso e caka cala kina e dua. Me ra veivukevuke ni kaya “Vosoti au” kei na “Au sa vosoti iko.” Eda na vukei ira vakacava na tamata me ra kila ni da sa vosoti ira? Vakamacalataka ni dua beka na sala oya me da “vakadinadinataka noda loloma,” se vakaraitaka vei ira na loloma (2 Korinica 2:8).

2 Korinica 4:1–2

Au vakabauta meu dau yalodina tu ga.

E vakavuvulitaka o Paula ni o ira na italai i Karisito era sa “biuta na veika vuni e veivakamaduataki.” Vakananuma titobu na ivakarau eso o rawa ni vaqaqacotaka kina nodra gagadre na gone me ra dau dina ena ka kecega.

iTaviqaravi e Rawa ni Caka

• Vukei ira na gone ni cavuqaqataka na malanivosa “Keimami vakabauta ni sa kilikili me da dau dina tikoga” (Yavu ni Vakabauta 1:13). Vola na malanivosa oqo ena qato pepa eso me ra ukutaka na gone ka daramaka tu. Vakamacalataka na yalodina tikoga e okati kina na tukuni ni ka dina.

• Kerei ira na gone me ra laveta na ligadra ni o tukuna e dua na ka dina ka biuta sobu ni o tukuna e dua na ka e sega ni dina. Cavuta na yatuvosa eso e rawarawa ka matata, me vaka “Nikua na Sigatabu” se “E tolu tu na ucuqu.” Cakava vakavica na itaviqaravi oqo, ni ra veivukevuke na gone me ra cavuta na itukutuku dina kei na kena e lasutaki. Cava na vuna e vinakata kina na Tamada Vakalomalagi me da dau tukuna na ka dina?

• Vakaraitaka na vidio “A Visit with Elder Ulisses Soares” (ChurchofJesusChrist.org). Na cava a vulica o Elder Soares ni a se gone me baleta na yalodina? Vakauqeti ira na gone me ra vakavakarau ki na nodra veiyalayalati ni papitaiso ena nodra yalodina.

ivakatakilakila ni veivakavulici

Vakavulica na iVunau: Gone Qase Cake

2 Korinica 1:3–4

Na Tamada Vakalomalagi e dau vakacegui au, ka’u rawa ni vakacegui ira na tani.

Na nanumi ni Nona dau vakacegui keda na Kalou e sa vakauqeti keda ni dolea na veivakacegui vei ira na tani.

iTaviqaravi e Rawa ni Caka

• Ni o wilika na 2 Korinica 1:3–4, kerei ira na gone me ra vakarogoca e dua na isau ni taro “Na cava e dau cakava na Kalou ena vukuda?” Vukei ira na gone me ra vola na sala eso e dau vakacegui keda kina na Kalou. Sureti ira na gone me ra wasea na gauna eso era a rarawa se lomaleqa se rere kina ka qai vakacegui ira na Kalou.

• Sureti ira na gone me ra wasea na sala eso eda rawa ni maroroya kina na noda veiyalayalati ni papitaiso me da vakacegui ira na tani (raica na Mosaia 18:9). Solia vei ira na gauna me ra vakasamataka e dua era kila e gadreva tu na vakacegu ka tuvatuvaka me ra dolele yani kivua na tamata oya.

2 Korinica 2:5–11

Au rawa ni vosoti ira na tani.

E rawa ni dredre me da vosoti ira na tani ni ra dau caka ca vei keda. Ia era na vakila na gone o vakavulica na loloma, na vakacegu, kei na marau ni ra vulica me ra veivosoti.

iTaviqaravi e Rawa ni Caka

• Tukuna vei ira na gone ni dua mai Korinica a ivalavala ca ka “ia na veivakararawataki” vei ira na Yalododonu (raica na 2 Korinica 2:5). Kerei ira na gone me ra vaqaqara ena 2 Korinica 2:7–8 me ra raica na ka a vinakata o Paula me ra cakava na Yalododonu.

• Wasea e dua na gauna o a vosota kina e dua—se vosoti iko e dua—kei na ka o a qai vakila e muri. Se wasea na vidio “The Goal: A Story of Faith, Friendship and Forgiveness” (ChurchofJesusChrist.org). Sureti ira na gone mera wasea na veika era sotava ena veivosoti.

2 Koronica 5:6–7

Au sa “lako voli ena vakabauta, ka sega ga ena raica.”

Vakasamataka na sala o na vakayaloqaqataki ira kina na gone mera muria na vunau ni Kalou ni ra se bera tiko mada ga ni raica na veivakalougatataki era gadreva tu oqo.

iTaviqaravi e Rawa ni Caka

• Wilika na 2 Korinica 5:6–7 kei na Alama 32:21 vata kei ira na gone, ka kerei ira me ra vakaraica na vosa kei na malanivosa eso e vukea me vakamacalataka na vakabauta. Kerei ira me ra vola mai ka qai veiwaseitaka vakai ira.

• Sureta e dua na gone me bobo, ka kerei ira na vo ni gone me ra dusimaki koya me vukea nona vakaotia e dua na cakacaka me vaka na tara ni dua na vale cecere ena buloko, se taubale kosova na rumu. Ena vukei keda vakacava na itaviqaravi oqo me da kila na ibalebale ni “lako voli ena vakabauta” na Kalou?

• Vakaraitaka na vidio “Reunited by Faith” (ChurchofJesusChrist.org), ka tarogi ira na gone se a lako vakacava na cauravou ena vidio ena vakabauta. Wasea e dua na gauna o a lako voli kina ena vakabauta, ka vakauqeti ira na gone me ra wasea na veika era sotava.

2 Korinica 7:8–10

Na rarawa va-Kalou sa vakavuna meu veivutuni.

Sa matau tu me da dau madua se veilecayaki ni da tobo ni da cakava voli e dua na cala. Vukei ira ni veidutaitaka na yalo oqori mai na rarawa sa vaka na loma ni Kalou, ka dau vakavuna na veivutuni.

iTaviqaravi e Rawa ni Caka

• Vakamacalataka ena 2 Korinica 7:8–10, a tukuna kina o Paula e dua na ivola a vola taumada vei ira na Yalododonu, ka vakaroti ira kina vakadoudou ena vuku ni nodra ivalavala ca. Wilika vata na veitikina oqo. Cava na vuna a marau kina o Paula ni ra sa rarawa na Yalododonu? Vakaraitaka ni mataqali rarawa vakaoqo e sa vakatokai na rarawa vakalou.

• Kerei ira na gone me ra vakasamataka e dua na gauna era a caka cala kina ka vakararawataka na lomadra. Sureti ira me ra tarogi ira vakai ira, “Cava na vuna au lomaca kina?” ka qai wasea na nodra isaunitaro. Vola na nodra isaunitaro ena papa ni volavola (me ivakaraitaki, “Au a rere ni’u na sotava na leqa” se “Au kila ni’u sa vakararawataka na Tamada Vakalomalagi” se “Au a vakatagica e dua”). Na isaunitaro cava so ena papa ni volavola sa vaka na “rarawa vakalou”? (2 Korinica 7:10). Cava na vuna e vinaka cake kina na rarawa vakalou mai na veimataqali rarawa tale eso eda rawa ni vakila ni da sa caka cala oti?

ivakatakilakila ni vuli

Vakauqeta na Vuli e Vale

Sureti ira na gone me ra wasea ki na nodra matavuvale e dua na itaviqaravi mai na kalasi nikua, ena gauna beka ni lotu vakamatavuvale.

Vakatorocaketaki Noda Veivakavulici

Vakaraitaka e dua na ivolanikalou. Digitaka e dua na tiki ni ivolanikalou e vakaibalebale vei iko, ka vakaraitaka ena nomu valenivuli era na rawa ni raica wasoma kina na gone. Rawa ni ra veivukevuke beka na gone ena digitaki ni dua na ivolanikalou me vakaraitaki.

tabana ni itaviqaravi: Au vakabauta ni yalodina tu