E vola tiko o Paula e dua na ivola

7–13 ni Okosita

Roma 1–6

“Na Kaukauwa ni Kalou Me Vakabulai Kina ko Ira Yadua”

Na veivakauqeti cava e yaco vei iko ni o wilika na Roma 1–6? Na veivakauqeti oqo e rawa ni vukei iko mo digidigi mai na vakasama eso ni veivakavulici oqo se vakarautaka ga na nomu vakai iko.

ivakatakilakila ni veiwasei

Sureta na Veiwasei

Sureti ira na gone me ra wasea na veika era sa cakava me baleta na veisureti o a solia vei ira ena lesoni ni macawa sa oti.

ivakatakilakila ni veivakavulici

Vakavulica na iVunau: Gone Sobu

Roma 1:16–17

Au rawa ni vakaraitaka noqu vakabauti Jisu Krisito ena noqu muri Koya.

E vakavuvulitaka o Paula ni tu ena kosipeli na kaukauwa me ia na veivakabulai vei ira kece era bula ena vakabauti Jisu Karisito. O na vukei ira vakacava na gone me ra vakaraitaka nodra vakabauti Jisu Karisito ena nodra muri Koya?

iTaviqaravi e Rawa ni Caka

• Wilika na Roma 1:17 vei ira na gone, ka vukei ira me ra cavuqaqataka na malanivosa “Ena bula ena vakabauta ko koya sa yalododonu.” E rawa ni o lesia vei ira yadua na gone e dua na vosa ena malanivosa oqori ka kerea me ra cavuta mai ni o dusi ira yani. Vakamacalataka ni ibalebale ni malanivosa oqo ni sa dodonu me da vakabauti Jisu Karisito. Tarogi ira na gone kevaka era kila na cava na vakabauta. Vakaraitaka e dua na iyaloyalo kei Jisu Karisito ka vakamacalataka ni da vakabauta ni tiko dina o Koya dina ga ni da se bera ni raici Koya. Oqo na vakabauta—na noda vakadinata e dua na ka dina ga ni da se bera ni raica.

• Vakamacalataka ni da vakaraitaka noda vakabauti Jisu Karisito ena noda talairawarawa Vua. Vunitaka wavoki ena rumu na kedra iyaloyalo na tamata era cakava tiko na veika sa kerea o Jisu me da cakava. Me ra veivukevuke na gone me ra vaqara ka vakamacalataka na iyaloyalo eso. Na cava eda rawa ni cakava meda muri Jisu kina?

• Kerea e dua na gone me bobo na matana qai tuberi koya yani takosova na rumu ki na dua na iyaloyalo kei Jisu. Ke levu na gauna, me ra qai veivukevuke na vo ni gone. Vukei ira na gone me ra kila ni sa rawa me ra muria na ivakavuvuli nei Jisu me vaka ga nodra muria na nomu veituberi.

Roma 6:1–11

Noda papitaiso e vaka ni da sa yaco me dua na tamata vou.

O ira na gone o vakavulica era sa vakarau tiko me ra papitaiso. Na cava e rawa ni ra vulica me baleta na papitaiso mai na Roma 6?

iTaviqaravi e Rawa ni Caka

• Sureti ira na gone me ra tokaruataka na malanivosa “Me da sa ivalavala vakatalega kina ena bula vou” (Roma 6:4). Tukuna vei ira na gone na kena ibalebale oqo vei iko. Me ivakaraitaki, e rawa ni o wasea na vakanananu eso me baleta na siga o a papitaiso kina ka veivosakitaka na sala sa vukei iko kina na nomu papitaiso mo vakataki Jisu Karisito vakalevu cake. Vakayagataka na tabana ni itaviqaravi ni macawa oqo me vakavulici vei ira na gone ni na vukei keda na papitaiso me da tamata vou.

• Kevaka eso vei ira na gone e sa tiko oti ena dua na papitaiso, sureti ira me ra wasea na veika era sotava. Se vakaraitaka e dua na itaba ni dua e papitaiso tiko (raica na iVola ni iYaloyalo Vakosipeli, naba 35, 103–4). Vukei ira na gone me ra kila ni ena papitaiso eda cakava na yalayala eso meda vakataki Jisu kina. Sureti ira me ra droinitaka na kedra iyaloyalo ni ra sa papitaisotaki tiko ka wasea na veika e rawa ni ra cakava me ra vakavakarau ki na nodra papitaiso.

• Lagata vata kei ira na gone e dua na sere baleta na papitaiso, me vaka na “Vaqara Drodrolagi Ni Bula Vesu No” (iVolanisere ni Gonelalai, 53). Na cava eda vulica baleta na papitaiso mai na sere oqo?

papitaisotaki e dua na gone

Na papitaiso e ivakatakarakara ni sa tekivu e dua na bula vou vakatisaipeli i Karisito.

ivakatakilakila ni veivakavulici

Vakavulica na iVunau: Gone Qase Cake

Roma 1:16–17

Au rawa ni vakaraitaka noqu vakabauti Jisu Karisito ena noqu muri Koya.

E vakavuvulitaka o Paula ni tu ena kosipeli na kaukauwa me ia na veivakabulai vei ira kece era bula ena vakabauti Jisu Karisito. Vakabauta na Turaga o Jisu Karisito sa ikoya na imatai ni ivakavuvuli ni kosipeli. E vakauqeti keda me da talairawarawa ki na ivunau. O na vukei ira beka vakacava na gone me ra kila vakavinaka cake na vakabauta?

iTaviqaravi e Rawa ni Caka

• Kerea e dua na gone me vaqarai Roma mai ena dua na mape. Vukei ira na gone me ra kila ni ena loma ni vica na macawa mai oqo, era na vuli mai na ivola eso a vola o Paula vei ira na lewe ni Lotu ena veivanua eso, tekivu ena nona ivola vei ira mai Roma.

• Vola na tikina mai na Roma 1:16 ena papa, ka vakalala toka na vanua e dodonu me tiko kina e vica na vosa. Kerei ira na gone me ra cega na ivolanikalou ka vakalewena na vanua era lala tu. Sureti ira na gone me ra wasea na ibalebale ni “Ni’u sa sega ni maduataka na itukutuku‑vinaka kei Karisito” vei ira.

• Sureta e dua na gone me wilika i cake na Roma 1:17, ka kerei ira na vo ni gone me ra vakarogoca e dua na vosa e tokaruataki. Cava na kena ibalebale me da “bula ena vakabauta”? Vukei ira na gone me ra raica e dua na ivakamacala ni vakabauta ena dua na ivurevure me vaka na iDusidusi ki na iVolanikalou, “Vakabauta” (scriptures.ChurchofJesusChrist.org). Ena duatani vakacava beka na noda bula kevaka eda sega ni vakabauti Jisu Karisito?

• Vakaraitaka vei ira na gone e dua na itei kei na dua na sorenikau, ka taroga se da na vukea vakacava e dua na sorenikau me yaco me dua na itei. Vakamacalataka ni ena noda tea ka vakasuasuataka tiko e dua na sorenikau, eda sa vakaraitaka tiko ni da vakabauta ni na tubu. Eda vakaraitaka vakacava ni da vakabauti Jisu Karisito? Vakasamataka mo lagata e dua na sere baleta na vakabauta, me vaka na “Vakabauta” (iVolanisere ni Gonelalai, 50), me tiki ni itaviqaravi oqo.

Roma 3:23–24

Eda gadrevi Jisu Karisito taucoko me rawa kina ni bokoci noda ivalavala ca.

A vinakata o Paula me ra kila na kai Roma ni na yaco duadua ga na veivakabulai ena vukui Jisu Karisito kei na Nona loloma soliwale. Vakasamataka vakatitobu na sala mo vakavulica kina vei ira na gone na dina oqo.

iTaviqaravi e Rawa ni Caka

• Solia vei ira yadua na gone e dua na malanivosa mai na Roma 3:23–24, ka volai ena dua na tiki ni pepa. Sureti ira na gone me ra tuva vakadodonu na malanivosa eso ka wilika vata na veitikina oqori. Taroga vei ira na gone na veika era vulica mai na veitikina oqori. Vakamacalataka ni “loloma” ena tikina e 24 e kena ibalebale na isolisoli ni loloma kei na loloma cecere ni iVakabula, ka rawa kina ni vosoti na noda ivalavala ca me da vinaka cake.

• Vakaliliga e dua na iyaloyalo e cake sara ena lalaga se ena dua tale na vanua ka ra na sega ni yacova rawa vakataki ira na gone. Me ra qai tovolea me ra yacova, ka vakatauvatana oqo ki na ivakavuvuli nei Paula ena Roma 3:23. Qai vukei ira me ra yacova rawa. Na cava sa cakava ena vukuda na iVakabula ka da sega ni rawa ni cakava vakai keda ga? Sureti ira na gone me ra wasea na veika era nanuma baleta na iVakabula ni ra vakasamataka na veika sa cakava oti ka se rawa ni cakava o Koya ena vukudra.

Roma 6:1–11

Noda papitaiso e vaka ni da sa yaco me dua na tamata vou.

A vakavulica o Paula ni papitaiso e vakatakarakarataka na mate kei na Tucaketale i Karisito. E ivakatakarakara talega ni vakaturi cake me da “sa ivalvala vakatalega kina ena bula vou” (Roma 6:4). Eda vakavouia noda yalayala me da lako ena bula vou ena veigauna kece eda vakayagataka kina na sakaramede.

iTaviqaravi e Rawa ni Caka

• Sureta e dua na gone me wilika na Roma 6:3–6. Na cava a tukuna o Paula ni papitaiso sa “tautauvata kei na”?

• Veivosakitaka se vakatakarakarataka vakacava na mate kei na tucaketale na papitaiso. E rawa ni veivuke me vakaraitaki e dua na iyaloyalo ni papitaiso se vakaraitaka e dua na vidio me vaka na “The Baptism of Jesus” (ChurchofJesusChrist.org). Na cava beka erau ivakatakarakara vinaka kina ni veika e yaco ni da papitaiso na mate kei na tucaketale?

• Wilika vata na masu ni sakaramede (raica na Vunau kei na Veiyalayalati 20:77, 79). Vakananuma vei ira na gone ni gauna eda taura kina na sakaramede, eda sa vakavouya na yalayala meda muri Jisu Karisito eda cakava ena gauna eda a papitaiso kina. E vukei keda vakacava na sakaramede me da “sa ivalavala vakatalega kina ena bula vou”?

• Sureti ira na gone me ra droinitaka na iyaloyalo eso e vakaraitaka se cava na kena ibalebale vei ira me da “sa ivalavala vakatalega kina ena bula vou” E rawa ni ra qai vakaliliga tu ena nodra rumu na gone me vukei ira me ra nanuma me ra dau digidigi vinaka.

ivakatakilakila ni vuli

Vakauqeta na Vuli e Vale

Vakatura me ra kerea na gone na nodra lewe ni matavuvale me ra vakatakila vei ira na gauna era cakava tiko kina e dua na ka e vakaraitaka na vakabauta.

Vakatorocaketaki Noda Veivakavulici

Tara cake nodra yalodei na gone. Vakacaucautaki ira na gone ni ra vakaitavi ena kalasi. Oqo e dua na sala me tarai cake kina na nodra yalodei ni rawa ni ra vulica na kosipeli.

tabana ni itaviqaravi: noda papitaiso e vaka ni da sa yaco me dua na tamata vou