E veivakavulici tiko o Paula ena delana

24–30 ni Jiulai

Cakacaka 16–21

“Sa Kacivi Keitou na Turaga me Keitou Vunautaka Vei Ira na iTukutuku Vinaka”

Ni wiliki oti na Cakacaka 16–21, muria na veivakauqeti ni Yalo ka okata na vakasama eso ena ituvatuva oqo ni o vakavakarau mo veivakavulici. Raica na “Sotava Nodra Gagadre na Gone Sobu” ena ivolavakarau oqo me ikuri ni veivuke.

ivakatakilakila ni veiwasei

Sureta na Veiwasei

Sureti ira na gone me ra tukuna vei iko na veika era kila me baleta na veika a sotava o Paula ena wasei ni kosipeli. E rawa talega ni ra veitalanoataka eso tale na daukaulotu era kila se na veika era sa sotava ena nodra wasea tiko na kosipeli vua e dua tale.

ivakatakilakila ni veivakavulici

Vakavulica na iVunau: Gone Sobu

Cakacaka 16:25–34

Era dau vakavulici ira na tamata me baleti Jisu o ira na daukaulotu.

Era sa kila beka na gone o vakavulica na ka era dau cakava na daukaulotu? O na vukei ira vakacava na gone me ra kila ni sa rawa ni ra wasea na kosipeli vei ira na tani?

iTaviqaravi e Rawa ni Caka

• Vukei ira na gone me ra matanataka na Cakacaka 16:25–34 ni o vakalekalekataka na kedrau itukutuku o Paula kei Sailasa ena vunautaki ni kosipeli ena valeniveivesu (raica talega na “Wase e 61: O Paula kei Sailasa e Valeniveivesu,” e Na iTukuni ena Veiyalayalati Vou, 158–60, se na kena vidio ena ChurchofJesusChrist.org). Vakamacalataka ni o ira na daukaulotu nikua era dau vakavulici ira talega na tamata me baleti Jisu ka vukei ira ena nodra vakavakarau me ra papitaiso.

• Cakava na itokaniyaca ni daukaulotu eso me ra dara na gone, ka vukei ira me ra vola na yacadra ena itokaniyaca. Vakavulici ira na gone ena veimalanivosa rawarawa vakaivunau e rawa ni ra wasea vei ira na tani, me vaka na “Au sa dua na luve ni Kalou,” “Sa dau vosa mai na Kalou vua e dua na parofita bula,” se “O Jisu Karisito sa noda iVakabula.” Vakananuma vei ira na gone ni sega ni gadrevi vei keda e dua na ivakatakilakila ni yaca ni daukaulotu me da wasea na kosipeli vei ira na tani.

Cakacaka 17:10–12

Na ivolanikalou e vakadinadinataki rau na Tamada Vakalomalagi kei Jisu Karisito.

Dina beka ni so na gone o vakavulica era se bera ni wilivola rawa, e rawa ni o vukei ira me ra taleitaka cake na ivolanikalou ka raica na ivakarau era vakadinadinataka kina na iVakabula.

iTaviqaravi e Rawa ni Caka

• Vukea e dua vei ira na gone me wilika na malanivosa “A ra … sa dauvakasaqaqara ena ivolanikalou ena veisiga” (Cakacaka 17:11). Sureti ira na gone me ra dusia na veisiga yadua ni macawa ena ivolanivula ni ra tokaruataka vata kei iko na malanivosa oqo. Lagata vata e dua na sere e vakavulica na veivakalougatataki ni wiliki ni ivolanikalou, me vaka na “Vaqaqara ka Masu” (iVolanisere ni Lalai, 66).

• Me rawa ni ra vakavulici kina na gone ni sa dau vakadinadinataki Tamada Vakalomalagi kei Jisu Karisito na ivolanikalou, vukei ira me ra cega ki na dua na wase ena ivolanikalou, vaka na Cakacaka 17 se 18, ka vakaraica na vosa eso vaka na Kalou, Turaga, se Jisu. (O na vinakata beka mo vakatakilakilataka rawa toka na vosa eso oqo me rawarawa nodra raica na gone.) Ena veigauna kece era kunea kina e dua vei ira na vosa oqo na gone, sureti ira me ra wasea e dua na ka era kila baleti Tamada Vakalomalagi kei Jisu Karisito.

Cakacaka 17: 22–31

Au sa dua na luve ni Kalou.

Ena Vanua-cecere nei Arisi, a vakavulica o Paula na dina taumada baleta na ivakarau ni Kalou, oka kina na dina ni o keda na Luvena ka ni o Koya sa “sega ga ni yawa vei keda yadua” (Cakacaka 17:27). O na vukei ira vakacava na gone me ra voleka cake kivua na Tamadra Vakalomalagi?

iTaviqaravi e Rawa ni Caka

• Sureti ira na gone me ra tokaruataka na malanivosa “Ni da sa kawa ni Kalou” (Cakacaka 17:29), ka vakamacalataka ni kawa e kena ibalebale na luvena. Wasea nomu ivakadinadina vei ira yadua na gone, vakayadua, ni o koya e dua na luve ni Kalou. Sureti ira me ra wasea se cava na nodra nanuma me baleta na Tamadra Vakalomalagi.

• Vakaraitaka na kedra iyaloyalo na gone kei na nodra matavuvale (kevaka e rawa, vakayagataka na kedra iyaloyalo na gone ena nomu kalasi). Kerei ira na gone me ra dusi ira na itubutubu ena iyaloyalo. Vakamacalataka ni o keda na luvedrau na tinada kei na tamada, ka da sa luvedrau vakayalo kece na noda iTubutubu Vakalomalagi.

• Lagata e dua na sere baleta na Tamada Vakalomalagi, me vaka na “Sa Bula Na Kalou” (iVolanisere ni Gonelalai, 8). Ena nodra veivuke na gone, vola na vosa se droinitaka na iyaloyalo eso ena papa e matataka na veika eda vulica mai na sere me baleti Tamada Vakalomalagi

• Wilika vei ira na gone na veivosa oqo mai na Cakacaka 17:27: “Sa sega ga ni yawa ko koya vei keda yadua.” Tukuna na gauna eso o a vakila kina nomu volekata na Tamada Vakalomalagi, ka sureti ira na gone me ra kitaka vakakina.

turaga e taura tu na goneyalewa lailai

Na tamata yadua sa luve ni Kalou.

ivakatakilakila ni veivakavulici

Vakavulica na iVunau: Gone Qase Cake

Cakacaka 16:14–15, 25–34; 18:7–8, 24–28

Au sa rawa ni daukaulotu ena gauna oqo.

O rawa vakacava ni vukei ira na gone me ra vakataki Paula ka wasea vei ira na tani na veika era sa vulica tiko me baleta na kosipeli?

iTaviqaravi e Rawa ni Caka

• Sureti ira na gone me ra wilika na Cakacaka 16:14–15, 25–34; 18:7–8, 24–28 ka vola na yacadra na tamata erau a wasea vei ira na kosipeli o Paula kei Apolosa. Qai sureti ira me ra vola na yaca ni tamata e rawa ni ra wasea kina na kosipeli. Me ra qai matanataka na gone na sala me ra tukuna kina vei ira na tamata oqo me baleti Jisu Karisito se sureti ira mai ki lotu. E rawa talega ni o sureti ira na gone me ra vola itukutuku ena wasei ni ivakadinadina ni dua na dina vakosipeli vei ira na tamata oqo.

• Sureti ira na daukaulotu tudei era veiqaravi tiko, o ira sa lesu mai na kaulotu, se daukaulotu ni tabanalevu me ra sikova mai na kalasi ka tukuna na veika era sotava ena nodra wasea na kosipeli. Vakayaloqaqataki ira na gone me ra taroga na ivakarau e rawa ni ra wasea kina na kosipeli vei ira na tani.

Cakacaka 17:2–4, 10–12; 18:28

Na ivolanikalou e vakadinadinataki Jisu Karisito.

O ira kece na parofita era vakadinadinataki Jisu Karisito. O na vakavulici ira vakacava na gone me ra kunei Koya ena ivolanikalou, ena gauna mada ga e sega ni cavuti tu kina na Yacana?

iTaviqaravi e Rawa ni Caka

• Me ra wilika na gone na Cakacaka 17:2–4, 10–12; 18:28, ka sureti ira me ra vaqara na veika e tautauvata kina na veimalanivosa oqo. Mai na veitikina oqo, na cava a vukei ira na tamata me ra vakabauta na kosipeli i Jisu Karisito? Sureti ira na gone me ra wasea nodra italanoa taleitaki baleti Jisu era sa vulica mai na ivolanikalou.

• Ena veitikinipepa eso, vola na veitiki ni ivolanikalou e vakavulica me baleta na iVakabula (e rawa ni o kunea eso ena iDusidusi ki na iVolanikalou, “Jisu Karisito,” scriptures.ChurchofJesusChrist.org). Vunia wavoki ena rumu na veitikinipepa ka sureti ira na gone me ra vaqara. Sureti ira na gone me ra vakaraica na idusidusi era sa kunea, ka kerei ira me ra veiwaseitaka na ka e vakavuvulitaka na ivolanikalou me baleti Jisu.

Cakacaka 17: 22–31

Au sa dua na luve ni Kalou.

O na vukei ira vakacava na gone mera nanuma tiko ni ra sa luve ni Kalou?

iTaviqaravi e Rawa ni Caka

• Vakaraitaka vei ira na gone e dua na vatu, ka vakamacalataka ni ena gauna nei Paula, era dau qarava na tamata na kalou e caka ena vatu kei na veika tale eso. Kerei ira na gone me ra wilika na Cakacaka 17:27–29. Na cava eda vulica baleta na Kalou mai na veitikina oqo? Vakamacalataka ni kawa e kena ibalebale na luvena. Tarogi ira na gone se vakaevei na nodra nanuma ni ra kila ni ra sa luve ni Kalou.

• Kerei ira na gone me ra wilika na Cakacaka 17:27. Sureti ira na gone me ra vola se droinitaka na iyaloyalo ni sala eso e rawa ni ra “vakayayamo beka” se toro volekata kina na Kalou. Na gauna cava beka era a vakila kina ni “sa sega ga ni yawa ko koya vei [ira]”?

ivakatakilakila ni vuli

Vakauqeta na Vuli e Vale

Vakauqeti ira na gone me ra vaqara e dua na ivolanikalou ena macawa oqo ka vakavuvulitaki Jisu Karisito (e rawa ni yaco oqo ena nodra gauna ni vuli ivolanikalou yadua se vakamatavuvale). Ena macawa mai oqo, sureti ira me ra wasea na veika era sa kunea.

Vakatorocaketaki Noda Veivakavulici

Vukei ira na gone mera daunivuli vinaka cake. Na nomu inaki ni vakavulici ira na gone e sega walega ni kena wasei na dina vei ira. Sa dodonu talega mo vukei ira me yaco me ra bularawati-ira ena vakasaqarai ni dina. Me vaka oqo, mai na kena tukuni walega vei ira na gone na italanoa ni nona vunau voli o Paula ena Vanua cecere nei Arisi, sa rawa ni o tuva na itaviqaravi eso, me vaka era vakaturi ena ituvatuva oqo, ena vukei ira ni raica vakataki ira na dina eso ena italanoa.

tabana ni itaviqaravi: Au sa dua na luve ni Kalou