Vosa tiko o Jisu vei Pita e matasawa

Vakani Ira na Noqu Sipi, mai vei Kamille Corry

26 ni June–2 ni Julai

Maciu 28; Marika 16; Luke 24; Joni 20–21

“Sa Tucake Tale ko Koya”

Na gone era vakadinadinataka na dina ena veiwase oqo era taukena e dua na yavu dei ena tarai cake kina na nodra vakabauta. O na sureta vakacava na Yalotabu me vakadinadinataka na veidina oqo?

ivakatakilakila ni veiwasei

Sureta na Veiwasei

Na raici ni dua nai yaloyalo sa rawa ni vukei ira na gone ni nanuma na veika era a vulica e vale se ena ituvaki tale eso. De na vinaka mo vakaraitaka nai yaloyalo ena ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale ka kerei ira na gone me ra wasea na ka era kila tu me baleta na italanoa e vakaraitaki tu enai yaloyalo.

ivakatakilakila ni veivakavulici

Vakavulica na iVunau: Gone Sobu

Maciu 28; Marika 16; Luke 24; Joni 20:1–23

Au na bula tale ni’u sa mate oti, me vakataki Jisu ga.

Na Veisorovaki i Jisu Karisito, oka kina na Nona Tucaketale, sa vakayacoka bibi duadua ni veigauna, ka sa yavu ni vakabauta va-Karisito. Ni o wilika na veika baleta na Tucaketale, vakasamataka matua na sala o na vukei ira kina na gone me ra tara cake na nodra vakabauti Jisu Karisito.

iTaviqaravi e Rawa ni Caka

• Tukuna nai talanoa ni Tucaketale i Jisu ena nomu vosa ga. (Ke gadrevi tu, vakayagataka na “Wase e 54: Sa Tucake Tale o Jisu,” e Na iTukuni ena Veiyalayalati Vou, 139–44, se na kena vidio ena ChurchofJesusChrist.org.) Vakamacalataka ni gauna sa mate kina o Jisu, a biuta na Yagona na Yalona. Ni sa tucake tale o Koya, sa cokoti vata tale na Yalona kei na Yagona. Kerei ira na gone me ra veivukevuke ni tokaruataka lesu tale vei iko na italanoa. Tarogi ira na gone se na vakacava beka na nodra nanuma kevaka era a raici Jisu ni sa bula tale.

• Vakaraitaka na vidio “What Happens after We Die?” (ChurchofJesusChrist.org), ka tukuna me baleta e dua o kila ka sa mate. Wasea na nomu ivakadinadina ni tamata kece ena tucake tale ena dua na siga. Sureti ira na gone mera wasea na nodrai vakadinadina.

• Lagata e dua na sere me baleta na Tucaketale ni iVakabula, vaka na “Ko Jisu Ni Sa Bula Tu” (iVolanisere na Gonelalai, 45). Kerei ira na gone me ra raitayaloyalotaka se na vakaevei tu na ka era na vakila ni ra raici Jisu. Me ra wasea ki na kalasi na nodra nanuma.

Joni 20:24–29

Au rawa ni vakabauti Jisu Karisito dina ga ni’u sega ni raici Koya tu.

Vakasamataka na sala o rawa ni vukei ira kina na gone me ra kila matua na cava na vakabauta kei na sala era rawa ni cakacakataka kina na vakabauta kivua na iVakabula.

iTaviqaravi e Rawa ni Caka

• Vakaraitaka nai yaloyalo Christ Approaches Thomas (ChurchofJesusChrist.org) ni o tukuna tiko na ka a sotava o Tomasi ena Joni 20:24–29. Tokaruataka nai talanoa, ia na gauna oqo kerea na gone me ra wasea eso na kena matailalai.

• Vakaraitaka e dua na bola ka tiko iloma e dua nai yaya era sega ni rawa ni raica na gone, ka vakamacalataka nai yaya vei ira na gone. Tarogi ira ke ra vakabauta ni tiko dina iloma ni bola nai yaya kei na vuna. Qai vakaraitaka vei ira nai yaya, ka vakamacalataka ni vakabauta sai koya na vakadinati ni veika eda sega tu ni raica. Na vakabauta bibi duadua eda rawa ni taukena sai koya na vakabauti Jisu Karisito.

Vakaraitaka tu o Jisu na ligana vei ira nai Apositolo

Raica na Ligaqu, mai vei Jeff Ward

Joni 21:15–17

Au rawa ni vakaraitaka na noqu lomani Jisu ni’u qaravi ira na tani.

O na vakauqeti ira vakacava na gone me ra lomani ka vukei ira ka tu wavoliti ira?

iTaviqaravi e Rawa ni Caka

• Wilika na John 21:15–17, se vakaraitaka na vidio “Feed My Sheep” (ChurchofJesusChrist.org). Vukei ira na gone me ra kila na veika a vinakata o Jisu me cakava o Pita: wasea na kosipeli ka sureti ira na tamata kecega me ra vakabauti Jisu. Solia ki na gone yadua e dua na sipi pepa, ka kerei ira me ra vola se droinitaka kina e dua na ka era rawa ni cakava me vukea e dua era kila me toro voleka mai vei Jisu.

• Vukei ira na gone me ra vakasamataka na veika era sa cakava tiko me ra lomani ka qaravi ira kina na tani. Na cava tale eda rawa ni cakava me da vakaraitaka kina na noda loloma?

• Vola na yacadra yadua na gone ena nomu kalasi ena tikinipepa eso e koti tu vaka na sipi, ka qai biuti ira wavoki na sipi ena rumu. (Okata na yacadra na gone era sega ni dau tiko wasoma.) Sureti ira na gone me ra sokumuna na sipi ena qarai ni dua e tiko kina na yacadra. Vukei ira na gone me ra vakasamataka na sala eso era rawa ni sudra yani kina vua e dua na itokani ka sega ni dau lako mai lotu.

ivakatakilakila ni veivakavulici

Vakavulica na iVunau: Gone Qase Cake

Maciu 28; Marika 16; Luke 24; Joni 20:1–23

Ni sa vakaturicaketaki tale tu o Jisu, ena vakaturicaketaki tale na tamata kecega.

Sa matau tu me ra vakananuma na gone na ka e dau yaco ni da sa mate oti. Vakasamataka nai walewale o rawa ni vakavulica kina na Tucaketale ena sala ka na tara cake na nodra vakabauta.

iTaviqaravi e Rawa ni Caka

• Sureti ira na gone me ra bobo ka raitayaloyalotaka ni ra dabe tikiva toka na ibulubulu i Jisu ni o wilika na Joni 20:1–17 se vakalekalekataka nai talanoa ni Nona Tucaketale (raica talega na “Wase e 54: Sa Tucake Tale o Jisu,” e Na iTukuni ena Veiyalayalati Vou, 139–44, se na kena vidio ena ChurchofJesusChrist.org). Na cava na kena ibalebale me da tucake tale? Ena vakaevei beka na ituvaki ni noda raica na iVakabula vakaturicaketaki?

• Kerea na gone yadua me vulica na ka a sotava e dua ka raica na iVakabula vakaturicaketaki ka wasea vei ira na vo ni kalasi na ka sa vulica.

• Sarava kei ira na gone e dua se levu na veividio oqo: “Jesus Is Laid in a Tomb,” “Jesus Is Resurrected,” “Christ Appears on the Road to Emmaus,” kei na “The Risen Lord Appears to the Apostles” (ChurchofJesusChrist.org). Sureti ira na gone me ra wasea na vuna e bibi kina vei ira na Tucaketale ni iVakabula.

Joni 20:24–29

Au rawa ni vakabauti Jisu Karisito dina ga ni’u sega ni raici Koya tu.

O na vukei ira vakacava na gone me ra vaqaqacotaka na nodra vakabauti Jisu Karisito?

iTaviqaravi e Rawa ni Caka

• Sureti ira na gone me ra wilika na Joni 20:24–29. (Raica talega na vidio “Blessed Are They That Have Not Seen, and Yet Have Believed” ena ChurchofJesusChrist.org.) Eda rawa vakacava ni kila ni bula tiko o Jisu Karisito, ke da sega mada ga ni raici Koya tu?

• Vola na vosa yadua ena malanivosa “Sa kalougata ko ira era sa sega ni raica, ka ra sa vakadinata” ena veitiki ni pepa duidui. Sureti ira na gone me ra tuva vakadodonu na vosa eso oqori. Sureti ira me ra tukuna na veika era sotava ka ra a vakila kina na loloma ni iVakabula ke ra sega mada ga ni raici Koya tu.

• Sureti ira na gone me ra droinitaka nai yaloyalo ni veika era rawa ni cakava me vaqaqacotaka na nodra vakabauta ena macawa oqo. Kerei ira me ra wasea na ka era droinitaka, ka wasea na ka o sa cakava me vaqaqacotaki kina na nomu vakabauti Jisu Karisito.

Joni 21:1–17

Au rawa ni vakaraitaka na noqu lomani Jisu ena nodra vakani na Nona sipi.

Era rawa ni veivakayarayarataki vakalevu na gone vei ira na wavoliti ira tu. O rawa vakacava ni vakauqeti ira mera vaqaqacotaki ira na tani ena kosipeli?

iTaviqaravi e Rawa ni Caka

• Wilika vata na Joni 21:1–17. Ni o wilika na tikina e 9–13, kerei ira na gone me ra vakasamataka e dua na gauna a vakani ira kina ena kakana taleitaki e dua, ka sureti ira me ra vakasamataka na sala eso e vakani keda kina vakayalo o Jisu. Ni o wilika na tikina e 15–17, sosomitaka na yacai Saimoni ena yacadra na gone. O cei na sipi i Jisu? E rawa vakacava meda vukei Koya ni vakani ira?

• Wasea vata kei ira na gone e dua nai vakalomavinaka rawarawa. Ni ra sa kana tiko, tarogi ira na sala cava e sa vakataka kina na nodra vakani na wasei ni kosipeli kivua e dua.

ivakatakilakila ni vuli

Vakauqeta na Vuli e Vale

Sureti ira na gone me ra vakayagataka na itaviqaravi ni macawa oqo me ra vakavulica kina na nodra matavuvale ena Tucaketale ni iVakabula.

Vakatorocaketaki Noda Veivakavulici

Talemuria na veisureti eso mo cakacakataka. Ni o sureti ira na gone me ra cakacakataka na ka era sa vulica tiko, talemuria na nomu veisureti ena kalasi ka tarava. Oqo e vakaraitaka vei ira na gone ni o kauwaitaka na sala e sa vakalougatataka tiko kina na nodra bula na kosipeli. Ni ra wasea na veika era sotava, era na vaqaqacotaki ka ra na veivukei vaka i ira ni bulataka na kosipeli.

tabana ni taviqaravi: ni sa vakaturicaketaki tale tu o Jisu, ena vakaturicaketaki tale na tamata kecega