Saumaki mai ena iLakolako ki Tamasiko, mai vei Michelangelo Merisi da Caravaggio

10–16 ni Jiulai

Cakacaka 6–9

“A Cava Ko Ni Sa Vinakata Me’u Cakava?”

Tekivu ena nomu wilika na Cakacaka 6–9. Na ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale sa rawa ni vukei iko mo kila na veiwase oqo. Na itaviqaravi me baleti ira na gone sobu ena ituvatuva oqo e rawa ni moici me ganiti ira na gone qase cake, se kena veibasai.

Sureta na Veiwasei

Vola ena papa na yacadra eso na tamata mai na Cakacaka 6–9, me vakataki Saula, Sitiveni, kei Tapaica. Sureti ira na gone me ra wasea na veika ga era kila baleti iratou na tamata oqo.

Vakavulica na iVunau: Gone Sobu

Cakacaka 6–7

Au rawa ni muri Jisu Karisito ena noqu tutaka na dina.

Na cava e rawa ni ra vulica na gone mai vei Sitiveni me baleta na muri Jisu Karisito?

iTaviqaravi e Rawa ni Caka

• Vukei ira na gone me ra bulia eso na ivukivuki me salavata kei na dua na sere baleta na digitaki ni dodonu, me vaka na “Me da dina” (iVolanisere ni Gonelalai, 81). Vakayagataka na Cakacaka 7:51–60 mo vakavulica vei ira na gone ni o Sitiveni a vakavuvulitaki Jisu Karisito, dina ga ni a vakacudrui ira vakalevu na iliuliu ni Jiu (raica talega na “Wase e 57: Vakamatei Sitiveni o Ira na Tamata Ca,” e Na iTukuni ena Veiyalayalati Vou, 150–51, se na kena vidio ena ChurchofJesusChrist.org). A tutaka vakacava na dina o Sitiveni?

• Solia vei ira na gone e vica na ituvaki ni gone eso era a vakayacora na digidigi dodonu se cala. Tarogi ira na gone na cava era na cakava me ra tutaka kina na dodonu.

Cakacaka 8:26–39

E vakauqeti au na Yalo Tabu meu wasea na kosipeli vei ira na tani.

A muria o Filipe na veivakauqeti ni Yalo ka vukea e dua na kai Iciopea a dredre tiko nona kila na ivolanikalou. Na lesoni cava e tiko ena italanoa oqo me baleti ira na gone o vakavulica?

Vakavulica tiko na kai Iciopea o Filipe, mai vei RobertT. Barrett

iTaviqaravi e Rawa ni Caka

• Dreta vata mai e rua na idabedabe me vaka e dua na kareti. Sureta e rua na gone me rau dabe ena kareti, dua me matataki Filipe kei koya kadua na kai Iciopea. Qai talanoataka nona a vakavulica o Filipe na kosipeli vua na kai Iciopea.

• Wasea e dua na gauna o a vakila kina na Yalo Tabu ni tukuna vei iko mo wasea na kosipeli vua e dua. Vakadinadinataka ni rawa ni vukei keda na Yalo Tabu me da tukuna vei ira na tani me baleti Jisu.

Cakacaka 9:1–20

E sureti au na Tamada Vakalomalagi meu veivutuni ka veisau.

Ni a tukuna o Jisu vei Saula me muduka na nona vakacacana tiko na Lotu ni Turaga, a veivutuni saraga o Saula ka veisau. Ena vukei ira vakacava na gone o vakavulica na itukutuku oqo ni gadreva me ra veisau vakatotolo ni ra cakava e dua na cala?

iTaviqaravi e Rawa ni Caka

• Vakalekalekataka na italanoa ni veisau nei Saula, kunei ena Cakacaka 9:1–20 (raica talega na “Wase e 59: Vulica o Saula na Veika Baleti Jisu,” e Na iTalanoa ena Veiyalayalati Vou, 154–55, se na kena vidio ena ChurchofJesusChrist.org).

• Veitalanoa vata kei ira na gone me baleta na veika e dau veisau, me vaka e dua na luveniboto, ka veisau ki na dua na boto, se dua na banuve, ka veisau ki na dua na bebe. Vakaraitaka na iyaloyalo eso ke rawa. A veisau vakacava o Saula ni sikovi koya o Jisu Karisito?

• Droinitaka e dua na gaunisala basoga ena papa. Sureti ira na gone me ra cavuta na vanua eso era via sikova, ka volai ira ena dela ni dua na gaunisala. Cava ena yaco kevaka eda goleva na gaunisala cala? Vakatauvatana na veivutuni ki na noda lesuva tale na sala dodonu.

• Kerei ira na gone me ra tokaruataka na ka a kaya o Saula vua na Turaga: “A cava ko ni sa vinakata meu cakava?” (Cakacaka 9:6). Na cava e vinakata na Turaga me da cakava?

Vakavulica na iVunau: Gone Qase Cake

Cakacaka 6–7

Au na dua na ivakadinadina i Jisu Karisito.

E rawa vakacava ni o vukei ira na gone o vakavulica me ra vuli mai na ivakaraitaki nei Sitiveni ni a tu vakaivakadinadina i Jisu Karisito?

iTaviqaravi e Rawa ni Caka

• Wilika na Cakacaka 6:5–15 kei na 7:51–60 vata kei ira na gone. Na cava a yaco kina me dua na ivakadinadina kaukauwa i Jisu Karisito o Sitiveni? Sureta e dua se levu na gone me ra vakatotomuri Sitiveni ka wasea na vuna era vakabauti Jisu Karisito kina.

• Sureti ira na gone me ra wilika na Cakacaka 6:3–10, ka vaqara na veika vinaka a tu vei Sitiveni ka a vukei koya me tubu.

• Kerei ira na gone me ra vukei iko ni vakasamataka na ituvaki eso e rawa ni ra vakadinadinataki Jisu Karisito kina kei na Nona kosipeli. Vukei ira me ra matanataka eso na ituvaki oqori. Sureti ira na gone me ra wilika na Mosaia 18:9. Dusimaka ni ivakadinadina kei Jisu Karisito e sa okati ena yalayala eda cakava ena papitaiso.

Cakacaka 8:9–24

Na matabete sa dua na isolisoli tawavoli rawa mai vua na Kalou.

E dau tukuna o Setani ni veika vakayago e kauta mai na marau vei keda. O na vakayagataka vakacava na italanoa kei Saimoni me vukei ira na gone ni taura vakabibi na veika vakayalo me vaka na matabete kei na kena veivakalougatataki?

iTaviqaravi e Rawa ni Caka

• Vakalekalekataka na italanoa kei Saimoni, kunei ena Cakacaka 8:9–24 (raica talega na “Wase e 58: O Saimoni kei na Matabete,” e Na iTalanoa ena Veiyalayalati Vou, 152–53, se na kena vidio ena ChurchofJesusChrist.org). Na cava eda sega ni rawa ni ciqoma kina na matabete ena kena voli? E dau ciqoma dina vakacava e dua na lewa ni matabete? (raica Na Yavu ni Vakabauta 1:5).

• Vakaraitaka na iyaloyalo eso ni sakaramede, valetabu (me matataka na veivakalougatataki ni valetabu), papitaiso, kei na veivakalougatataki tale eso eda ciqoma mai na matabete. Vakamacalataka ni isolisoli eso oqo ni Kalou era sa sega ni voli rawa ena ilavo. Na cava na vuna era yaga vakalevu cake kina mai na veika kecega eda rawa ni volia? Eda na ciqoma vakacava na veivakakalougatataki eso oqo?

Cakacaka 9:1–20

E sureti au na Tamada Vakalomalagi meu veivutuni ka veisau.

Ni a tukuna o Jisu vei Saula me muduka na nona vakacacana tiko na Lotu ni Turaga, a veivutuni saraga o Saula ka veisau. E rawa ni vukei ira vakacava na gone o vakavulica na itukutuku oqo ni gadreva me ra veisau vakatotolo ni ra cakava e dua na cala?

iTaviqaravi e Rawa ni Caka

• Sureti ira na gone me ra lobika veimama e dua na tikinipepa. Kerei ira me ra vola Ni se bera ena dua na veimama kei na Ni sa oti ena veimama kadua. Wilika vata kei ira na gone na Cakacaka 8:1–3; 9:1–2; kei na 9:17–22, ka kerei ira mera vola na vosa se malanivosa e vakamacalataki Saula ni se bera ka vakakina ni sa oti nona raica na Turaga.

• Sureta e dua na lewe ni tabanalevu me wasea na nona italanoa ni veisau kei na kena sa veisautaka nona bula na nona lewena na Lotu, me vaka na veisau ni bula nei Saula.

• Droinitaka e dua na “gaunisala ki Tamasiko” ena papa. Sureti ira na gone me ra wilika na Cakacaka 9:6, 11, 18, 20–22, ka vaqara na ka a cakava o Saula me veivutuni ka vuki kina vei Karisito, ka vola na veika oqori ena gaunisala. Na cava eda vulica mai vei Saula me baleta na noda rawa ni yaco me vakataki Karisito vakalevu cake?

• Sureti ira na gone me ra droinitaka na nodra tikina taleitaki ena italanoa ni veisau nei Saula ka wasea na nodra droini ki na kalasi.

Vakauqeta na Vuli e Vale

Vakauqeti ira na gone me ra tukuna ki na nodra matavuvale na nodra itaviqaravi taleitaki ena kalasi nikua kei na ka e vakavulica vei ira.

Vakatorocaketaki Noda Veivakavulici

Vukei ira na gone mera vuli mai na ivolanikalou. Era na rairai sega ni wiliwili rawa na gone sobu, ia o se rawa tikoga ni vakaitavitaki ira ena vulici ni ivolanikalou. Me ivakaraitaki, e rawa ni o wilika e dua na kena iwase ka sureti ira na gone me ra tucake se laveta na ligadra ena gauna era rogoca kina e dua na vosa se malanivosa bibi o vinakata mo vakanamata kina.