Saumaki mai ena iLakolako ki Tamasiko, mai vei Michelangelo Merisi da Caravaggio

10–16 ni Julai

Cakacaka 6–9

“A Cava Ko Ni sa Vinakata Meu Cakava?”

Tekivu ena kena wiliki na Cakacaka 6–9. Na veika e vakaturi ena idusidusi oqo ena rawa ni vukei iko mo kila mai eso na ivakavuvuli bibi ena veiwase ni vola oqo, e dina ga o na rawa ni kunea eso ena nomu vuli tiko vakataki iko.

Vola na Veika o Vakauqeti Kina

Kevaka e dua e sega ni nanumi me na rawa ni saumaki mai, sai koya beka oqori o Saula—e dua na Farisi e kilai levu ni dau vakacacani ira na lotu Va-Karisito. Ena gauna e tukuna kina na Turaga vei Ananaiasa e dua na tisaipeli me vakasaqarai Saula ka me laki masulaki koya, e a via tu vakasuka o Ananaiasa. “Turaga,” a kaya o koya, “era sa lewe vuqa au sa rogoca kina nai tukutuku ni tamata oqo, na levu ni ca sa kitaka vei ira na nomuni tamata yalosavasava” (Cakacaka 9:13). Ia a kila na Turaga na lomai Saula kei na veika ena rawa ni rawata, ka sa tiko ena Nona vakasama nai lesilesi nei Saula: “Ko Koya oqo na tamata digitaki vei au, me kauta na yacaqu ki na matadra na veimatanitu tani, kei ira na tui eso, kei ira na luvei Isireli” (Cakacaka 9:15). A qai vakaio o Ananaiasa, ka ena gauna sa kunei koya kina na dauveivakacacani e liu, a kacivi koya “na wekaqu Saula” (Cakacaka 9:17). Kevaka a rawa ni veisau vakataucoko o Saula ka rawa ni kidavaki koya ena marau o Ananaiasa, ena dodonu beka meda nanuma ni na sega ni rawa ni veisau e dua—oka talega kina o keda?

Vakasama Eso ni Vuli iVolanikalou ni Tamata Yadua

Cakacaka 6–8

Sa gadrevi me “dodonu na yaloqu e mata ni Kalou.”

Na lotu e tubu tikoga sa kena i balebale talega na tubu cake ni kena gadrevi me ra veiqaravi na tisaipeli ena matanitu. Ena Cakacaka 6:1–5, na cava e so nai vakarau ni bula eratou vasaqara na Tinikarua na iApositolo vei ira era na mai veiqaravi vata kei iratou? Ni o wilika na Cakacaka 6–8, raica nai vakarau ni bula eso oqo, kei na so tale, era vakaraitaka na tamata vakataki Sitiveni kei Filipe. Na cava e yali tiko vei Saimoni, ka cava eda rawa ni vulica mai vei koya me baleta na gagadre me veisau?

E tiko beka e dua na ka o vakauqeti kina mo veisautaka me vakadeitaka me “dodonu na yalomu e mata ni Kalou”? (Cakacaka 8:21–22). Ena rawa beka vakacava ni vakalougatataki iko na veisau oqo ni o qarava tiko na Kalou?

Cakacaka 6–7

Na vorata na Yalo Tabu ena rawa ni veimuataki me cakitaki na iVakabula kei ira na Nona italai.

A nodra itavi na iliuliu ni Jiu me ra vakarautaki ira na tamata me baleta na nona lako mai na Mesaia. Ia era a sega ni kila na Mesaia ka cati Koya. A yaco vakacava oqo? E rawa ni kunei e dua na tiki ni isaunitaro ena vosa nei Sitiveni: “Dou sa dau vorata tikoga na Yalo Tabu” (Cakacaka 7:51). Na cava o nanuma na ibalebale ni vorata na Yalo Tabu? Ena rawa vakacava ni vakavuna meda cakitaka na iVakabula kei ira Nona parofita na noda vorata na Yalo Tabu?

Ni o wilika na Cakacaka 6–7, vakasaqara eso tale nai tukutuku e vakatavulica vei ira na Jiu o Sitiveni. Na itovo cava a tukuna tiko o koya me ra qaqarauni kina? O sa kidava beka eso na itovo vakaoqo vei iko? Na cava e vakavulica vei iko na vosa nei Sitiveni me baleta na isau ni vorati na Yalo Tabu? Ena rawa vakacava ni o qaqarauni ka dauvakamuria na veivakauqeti ni Yalo Tabu ki na nomu bula?

Cakacaka 8:26–39

Ena vukei au na Yalo Tabu meu dusimaki ira na tani vei Jisu Karisito.

Na cava o vulica me baleta na kena wasei na kosipeli mai na itukutuku ena Cakacaka 8:26–39? A vukei Filipe vakacava na Yalo Tabu? E tautauvata vakacava na wasei ni kosipeli vei ira eso kei na dua na dauveituberi? (raica na Cakacaka 8:31).

E kaya o Elder Ulisses Soares ni itukutuku oqo “sa dua na veivakananumi ni ituvatuva vakalou eda na saga taucoko meda vulica ka veivakavulici vakai keda ena kosipeli i Jisu Karisito. … Ena so na gauna eda sa vakataka na kai Iciopea—eda gadreva na veivuke ni dua na qasenivuli yalodina ka veivakauqeti; ka da sa vakataki Filipe ena so na gauna—eda gadreva me da vakavulici ira ka vaqaqacotaki ira na tani ena nodra saumaki mai” (“Meu Kila Vakacava?,” Liaona, Me 2019, 6). Sa rawa mo wilika na vo ni itukutuku nei Elder Soares ka vakasamataka vakatitobu na sala e rawa ni vukei iko kina na Yalo Tabu mo dauvuli vinaka cake ka qasenivuli vinaka cake ni kosipeli.

Cakacaka 9

Ena gauna au vakayacora kina na loma ni Turaga, sa rawa niu iyaya ni cakacaka e Ligana.

Na saumaki mai nei Saula a vaka me vakasauri, a lako tani vakatotolo mai na nona vesuki ira na lotu va-Karisito ki na vunautaki Karisito ena veivale ni lotu. Ni o wilika na kena italanoa, vakasamataka vakatitobu na cava a vakavuna na nona yalorawarawa vakalevu me veisau. (Me wiliki nai vakamacala nei Saula baleta na nona saumaki mai, raica na Cakacaka 22:1–16 kei na 26:9–18. Me kilai tiko ni itukutuku oqo, a kilai tu o Saula me ko Paula [raica na Cakacaka 13:9].)

E dina ni sega ni dau yaco beka vakawasoma na veika e yaco vei Saula—vei ira e vuqa na tamata, e dua na ka balavu na ikabakaba ni saumaki—e tiko beka e dua na ka o rawa ni vulica mai na saumaki i Saula? Na cava o vulica mai na nodratou itovo ni raica na saumaki nei Saula o Ananaiasa kei ira tale na tisaipeli eso? Na cava o na cakava mo vakayacora kina na ivakavuvuli oqo ena nomu bula? Ena rawa ni o tekivu ena nomu vakataroga ena masu, me vaka e vakayacora o Saula, “Na cava ko ni sa vinakata me’u cakava?”

Ni o wilika na Cakacaka 9:36–42, vakasamataka na sala sa iyaya ni cakacaka kina ena liga ni Kalou o Tapaica. Na cava e veivakauqeti vei iko me baleta na nona ivakaraitaki?

Raica talega na Dieter F. Uchtdorf, “Wawa Toka Ga Ena Gaunisala i Tamasiko,” Liaona, Me 2011, 70–77.

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Cakacaka 6:8; 7:51–60.Vakatauvatataka na itukutuku nei Sitiveni ena Cakacaka 6:8 kei na Cakacaka 7:51–60 ki na itukutuku ni Vakabula ena Luke 23:1–46. A vakamuria vakacava o Sitiveni na ivakaraitaki ni Vakabula?

Cakacaka 7:51–60.E vakalougatataki Sitiveni vakacava na Yalo Tabu ena gauna esa vakacacani tiko kina? Ena gauna cava eda sa ciqoma kina na kaukauwa mai na Yalo Tabu ena veigauna dredre eda lako curuma?

Cakacaka 9:5.Na mata ni moto e dua na imoto gagata sara e vakayagataki me muataki ira na manumanu. Vakawasoma era na dau teke lesu na manumanu ena gauna e laucoka kina, ka vakavuna na kena curu yani vakatitobu ki na lewe ni manumanu na imoto. Ena yaga vakacava vei keda ena so na gauna na vosa vakatautauvata oqo? Na cava eda rawa ni cakava me da ciqoma vakavinaka cake kina na veivakadodonutaki mai vua na Turaga?

Tapaica Tucake Mai, mai vei Sandy Freckleton Gagon

Cakacaka 9:32–43.Sa rawa mo sureti ira na lewe ni nomu vuvale me ra droinitaka na iyaloyalo ni italanoa ena Cakacaka 9:32–43. Na cava eda vulica baleta na bula vakatisaiplei dina mai na italanoa eso oqo? E rawa vakacava vua e dua sa “sinai ena cakacaka vinaka” me vakataki Tapaica, me vukei ira eso mera vakabauta na Turaga? (raica na Cakacaka 9:36; “Wase 60: Sa Vakabulai Tapaica Mai na Mate o Paula” (ena Na iTukuni ena Veiyalayalati Vou, 156–57, se na kena vidio ena ChurchofJesusChrist.org).

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Serenilotu vakaturi: “Au Lako Ke Ko Ni Lewa,” Sere ni Lotu, naba 164.

Vakatorocaketaki ni Vuli Yadudua

Vakatauvatataka na ivolanikalou ki na nomu bula. Ni o wiliwili, vakasamataka e rawa ni yaga vakacava ki na nomu bula na italanoa kei na ivakavuvuli ni volanikalou. Me ivakaraitaki, na madigi cava soti e tu vei iko mo qaravi ira kina na tani, me vaka a cakava o Tapaica ena Cakacaka 9:36–39?

“A ra sa vakaviriki Sitiveni ena vatu, ni sa masu tiko ka kaya, kemuni na Turaga Jisu, taura na yaloqu” (iVakadewa i Josefa Simici, Cakacaka 7:59 [ena Cakacaka 7:59, ivakamacala e ra c]).