Siga ni Penitiko, mai vei Sidney King

3–9 ni Julai

Cakacaka 1–5

“Dou na Qai Dautukuni Au”

Ni o vulica tiko na Cakacaka 1–5, na Yalo Tabu ena rawa ni vakauqeti iko mo kunea na dina e veiganiti ki na nomu bula. Toqa toka na veitikina era vakauqeti iko, ka vakasaqara na madigi mo wasea na veika o vulica tiko.

Vola na Veika o Vakauqeti Kina

O sa bau vakananuma tu se cava beka e vakasamataka ka vakila tiko o Pita ena gauna e tiko kina kei ira na iApositolo, “ni ra sa rai matua ki lomalagi” ni sa lako cake vei Tamana o Jisu? (Cakacaka 1:10). Na Lotu a tauyavutaka na Luve ni Kalou esa tu oqo ena veiliutaki nei Pita. Na itavi me liutaka na sasaga me “vakalotutaki ira na lewe ni veivanua kecega” sa tu oqo ena lewa nei Pita (Maciu 28:19). Ia kevaka e a vakila ni malumalumu se rere, eda sega ni raica e dua na kena ivakadinadina ena ivola ni Cakacaka. Na veika ga eda kunea sai koya nai vakaraitaki ni ivakadinadina qaqa kei na saumaki, na cakamana ni veivakabulai, nai vakaraitaki vakayalo, kei na tubu vakalevu ni Lotu. Oqo se nona Lotu tikoga na iVakabula, se liutaki tiko ga mai Vua. E dina sara, na nodra ivola ni Cakacaka na iApositolo e rawa talega ni vakatokai me Cakacaka i Jisu Karisito mai vei ira na Nona iApositolo. Dusimaki tiko ena sovaraki mai ni Yalo, o Pita sa sega tale ni gonedau lecaika a raici koya o Jisu ena baravi ni Wasawasa o Kalili. Sa sega talega ni tamata yalobibi ka ena vica ga na macawa ki liu a tagi yaso tu baleta ni a cakitaka ni kilai Jisu na kai Nasareci.

Ena ivola ni Cakacaka, o na wilika kina e dua na itukutuku kaukauwa me baleti Jisu Karisito kei na Nona kosipeli. O na raica talega na kena rawa ni veisautaka na tamata na kosipeli—oka kina o iko—mo vakataka na tisaipeli qaqa sa kila tu na Kalou.

Vakasama Eso ni Vuli iVolanikalou ni Tamata Yadua

Cakacaka 1:1–8, 15–26; 2:1–42; 4:1–13, 31–33

E dusimaka na Nona Lotu o Jisu Karisito mai vua na Yalo Tabu.

Na ivola ni Cakacaka e volai tu kina na nodra sasaga na iApositolo me tauyavutaki na Lotu i Jisu Karisito ni oti na Lako cake ni iVakabula. E dina ga ni a sega ni tiko e vuravura o Jisu Karisito, e a liutaka o Koya na Lotu ena ivakatakila mai na Yalo Tabu. Vakasamataka na sala sa veidusimaki kina na Yalo Tabu vei ira na iliuliu vou ni Lotu i Karisito ni o railesuva na veitikina oqo: Cakacaka 1:1–8, 15–26; 2:1–42; 4:1–13, 31–33.

Ni da lewena na Lotu i Karisito nikua, sa noda itavi yadua meda vakaitavi ena cakacaka ni veivakabulai kei na bula vakacerecerei—meda bulataka na kosipeli i Jisu Karisito, kauwaitaki ira era vakaleqai tu, sureti ira na tani mera lako mai vei Karisito, ka vakaduavatataka na matavuvale me tawamudu (raica na iVoladusidusi Raraba, 1.2). Na cava o vulica mai na veika era sotava na iApositolo ni veigauna e liu me baleta na nomu rawa ni vakararavi vua na Yalo Tabu me dusimaki iko?

Raica talega na iDusidusi ki na iVolanikalou, “Yalo Tabu.”

Cakacaka 2:36–47; 3:12–21

Na ivakavuvuli kei na cakacaka vakalotu ni kosipeli e vukei au me’u lako mai vei Karisito.

O sa bau vakila ni “laucoka [na] yalomu,” me vakai ira na Jiu ena gauna ni Penitiko? (Cakacaka 2:37). E dua beka na ka o veivutunitaka ni o sa cakava, se o sa vinakata ga mo veisautaka nomu bula. Na cava mo cakava ni o vakila na veika oqo? Na nona ivakasala o Pita vei ira na Jiu e kune ena Cakacaka 2:38. Mo raica ka kila na cava e rawa ni cakava nai matai ni vakavuvuli kei na cakacaka vakalotu ni kosipeli (oka kina na vakabauta, veivutuni, papitaiso kei na solisoli ni Yalo Tabu—se na ka e dau vakatokai me ivunau i Karisito) vei ira era saumaki mai me vaka e volai tu ena Cakacaka 2:37–47.

Ena rawa ni o sa papitaisotaki ka ciqoma nai solisoli ni Yalo Tabu, io e rawa vakacava ni o tomana tiko ga na kena bulataki nai vunau i Karisito? Rogoca mada na ivakamacala oqo mai vei Elder Dale G. Renlund: “Ni sa rawa meda vakataucokotaki vakaveitaravi … ni cakacakataki na vakabauti [Karisito], veivutuni, vakayagataki ni sakaramede me vakavoui na veiyalayalati kei na veivakalougatataki ni papitaiso, kei na ciqomi ni Yalo Tabu me itokani tudei cecere cake. Ni da vakayacora vakakina, eda na vakataki Karisito vakalevu cake ka rawa ni vosota me yacova nai vakataotioti, kei na veika e sala vata mai” (“Era Tovolea Tiko ga na Yalododonu Edaidai,”,” Liaona, Me 2015, 56).

Cakacaka 3:19–21

Na cava na “gauna ni vakacegu” kei na “gauna ena caka tale me vinaka kina na ka kecega”?

“Na gauna ni vakacegu” e tukuna tiko baleta na Mileniumi, na gauna ena lesu mai kina ki vuravura o Jisu Karisito. “Na gauna ena caka tale me vinaka kina na ka kecega” e vakatokai ki na Vakalesuimai ni kosipeli, ka vakarautaki vuravura ki na Mileniumi.

Cakacaka 3; 4:1–31; 5:12–42

O ira na tisaipeli i Jisu Karisito e soli vei ira na kaukauwa me ra vakayacora na cakacaka mana ena Yacana.

A namaka na tamata lokiloki me rawata mai na ilavo vei ira na lako tiko mai ki na valetabu. Ia, oi rau na italai ni Turaga a solia vua na ka e levu cake. Ni o wilika na Cakacaka 3; 4:1–31 kei na 5:12–42, vakasamataka na revurevu ni cakamana e tarava a veisautaki ira na tamata:

• Na tamata lokiloki

• Pita kei Joni

• O ira na vakadinadinataka e valetabu

• O ira na bete levu kei na daunilewa

• Eso tale na Yalododonu

Na Ka Ga sa Tu Vei Au, Au Sa Solia Vei Iko, mai vei Walter Rane

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Cakacaka 1:21–26.Na wiliki ni Cakacaka 1:21–26 e rawa ni vukea na nomu vuvale me veivosakitaka na veivakalougatataki e yaco mai ni ra bula tiko na iApositolo e vuravura nikua. E rawa ni ra wasea na lewe ni matavuvale na sala era sa rawata kina e dua na ivakadinadina ni ra sa kacivi mai vua na Kalou na iapositolo kei na parofita nikua. Cava na vuna e bibi kina na noda ivakadinadina oqo?

Cakacaka 2:37.Na cava na ibalebale ni malanivosa “laucoka na yalodra”? Na gauna cava beka eda a vakila kina e dua na ka vata vakaoqo? Na cava e bibi kina meda kaya, “Na cava meda cakava?” ena gauna eda vakila kina na veika oqo?

Cakacaka 3:1–10.Eratou na marautaka beka na nomu matavuvale na kena vakatasuasuataki na italanoa ena veitikina oqo. Se e rawa ni o sarava na vidio “Erau Vakabula o Pita kei Joni e Dua na Tagane Lokiloki Mai na Gauna e Sucu Kina” (ChurchofJesusChrist.org). A duatani vakacava na veivakalougatataki a ciqoma na tamata ena valetabu mai na kena a namaka tiko o koya? Eda sa raica vakacava na kena yaco mai vei keda na veivakalougatataki ni Tamada Vakalomalagi ena sala a tawanamaki?

Cakacaka 3:12–26; 4:1-21; 5:12–42.Na cava e vakauqeti iko me baleta na nodrau yalodina o Pita kei Joni? Ena rawa vakacava meda doudou ena noda vakadinadinataki Jisu Karisito? Sa rawa mo vukei ira na gone lalai mera vakatovotovotaka na wasea na nodra ivakadinadina.

Cakacaka 4:31–5:4.Eda na vukea vakacava na noda matavuvale, tabanalevu, se itikotiko raraba me vakataka na veika e vakamacalataki tiko ena Cakacaka 4:31–37? Na cava na kena ibalebale meda “sa lomavata ka yalovata”? Ena sala cava soti eda dau “[maroroya eso]” na noda cau? Na cava na vuna e vaka kina na “[lasu] ga vua na Kalou” ni da cakava vaka o ya? (Cakacaka 5:2, 4). Eda vakacacani beka vakayalo ni da lawaki?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Serenilotu vakaturi: “Yalo Tabu Liutaka,” Serenilotu, naba 81.

Vakatorocaketaki Noda Veivakavulici

Digia e dua na ulutaga. Me ra vakaitavi na lewe ni vuvale ena digitaki ni ulutaga mai na Cakacaka 1–5 mera vulica vata.

Na Lako ki Cake, mai vei Harry Anderson