Sa vosa tiko o Jisu vei Pita e matasawa

Vakani Ira na Noqu Sipi, mai vei Kamille Corry

26 ni June–2 ni Julai

Maciu 28; Marika 16; Luke 24; Joni 20–21

“Sa Tucake Tale ko Koya”

Wilika ena masumasu na Maciu 28; Marika 16; Luke 24; kei na Joni 20–21, ka vakananuma lesu na reki o vakila baleta na Tucake tale i Karisito. O cei e rawa ni vakalougatataki ni rogoca na nomu ivakadinadina?

Vola na Nomu Nanuma

Kivei ira na lewe vuqa era sarava, na mate i Jisu mai Nasareci ena vakabeka e mai oti tu vakasakasaka e dua na bula vakasakiti. E sega beka ni o koya oqo ka vakabulai Lasarusa mai na mate? A sega beka ni o Koya a vorata na nodra via veimakamatei na Farisi ena veigauna eso? E tu Vua na kaukauwa me vakabula na mataboko, vukavuka, kei na lokiloki. Era a rogoci Koya sara madaga na cagi kei na wasawasa. Ia, oqo o Koya, sa lili tu ena kauveilatai, ka tukuna tiko mai, “Sa oti” (Joni 19:30). Eso beka a rairai kurabui dina ena vosa ni veivakalialiai “O Koya sa vakabulai ira na tani; sa sega ni vakabulai koya rawa” (Maciu 27:42). Ia eda kila ni nona mate o Jisu e sega ni icavacava ni talanoa. Eda kila ni vakadirorogo ni ibulubulu e sega ni ka tudei ka se qai itekivu ga na cakacaka ni veivakabulai nei Karisito. E sa sega ni kune o Koya nikua “ena kedra maliwa na mate” ia vei ira na bula (Luke 24:5). Ena sega ni vagalui na Nona ivakavuvuli, ni ra na vakatavulica o ira Nona tisaipeli yalodina na kosipeli ki “vuravura taucoko,” ni ra nuitaka na Nona yalayala ni na “tiko vata kei [iratou] ena veivanua kecega, me yacova na ivakataotioti kei vuravura” (Maciu 28:19–20).

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Maciu 28; Marika 16; Luke 24; Joni 20

A tucake tale o Jisu.

Ena veitikina oqo, o na rawa ni wilika e dua na ka bibi duadua e bau yaco ena itukutuku ni kawatamata: na Tucake tale nei Jisu Karisito. Ni o wiliwili, biuti iko ena vanua era tiko kina o ira era vakadinadinataka na veika e yaco ena gauna ni Tucake tale. Na cava o vulica rawa mai na veika era a sotava?

Na cava o vakila ni o wilika na veika me baleta na Tucake tale ni iVakabula? Raica na sala o sa vakayavalati kina—ena nomu raica na bula, na nomu veiwekani kei ira na tani, nomu vakabauti Karisito, kei na nomu vakabauta na veidina vakosipeli tale eso.

Raica talega na iDusidusi ki na iVolanikalou, “Tucaketale”, Ulutaga Vakosipeli, “Tucaketale,” topics.ChurchofJesusChrist.org.

Luke 24:13–35

Au sa rawa ni sureta na iVakabula me “tiko ga vei [au].”

Ni o wilika na veika erau sotava na tisaipeli dauveilakoyaki ka rau sotava na iVakabula sa tucaketale, vakaraica na tautauvata ki na veika o sotava vakadaumuri Karisito. Ena rawa vakacava mo taubale vata kei Koya nikua ka sureti Koya me “tiko ga” vakalailai tale? (Luke 2:49). O na kila vakacava na Nona sa tiko ena nomu bula? Ena sala cava e sa vakadinadinataka kina vei iko na Yalo Tabu na nona itutu vakalou o Jisu Karisito?

Raica talega “Mo Ni Mai Tiko Ga kei Au,” “Ni Tu Ga Vei Au!,” Serenilotu, naba 93–94.

Luke 24:36–43; Joni 20

Na Tucake tale sa kena cokoti vata tawamudu na yalo kei na yago.

Na itukutuku ni Tucaketale i Jisu Karisito e rawa ni vukei iko mo kila na ibalebale ni tucaketale. Me ivakaraitaki, na dina cava so o kunea ena Luke 24:36–43 kei na Joni 20 me baleta na yago sa tucaketale? Sa rawa talega mo vakadikeva na ivolanikalou tale eso me baleta na tucake tale, me vaka na 1 Korinica 15:35–44; Filipai 3:20–21; 3 Nifai 11:13–15; Vunau kei na Veiyalayalati 88:27–31; 110:2–3; 130:1, 22.

Joni 20:19–29

“Sa kalougata ko ira era sa sega ni raica, ka ra sa vakadinata.”

Ena rawa ni o vakila ena so na gauna ni o vakai Tomasi, ka kaya, “Kevaka kau na sega ni raica … au na sega ni vakadinata” (Joni 20:25). Ena nomu nanuma, na cava na vuna sa dua kina na kalougata ni ko sa vakadinata ka sega ga ni raica? (raica na Joni 20:29). Vakasamataka vakatitobu na nomu sa vakalougatataki ena nomu sa vakabauta na veika o sega ni raica rawa. Na cava e vukei iko mo vakabauta na iVakabula ena gauna sara madaga o sega ni raici Koya kina? Ena rawa vakacava mo vaqaqacotaka tiko na nomu vakabauta ena “veika e sega ni laurai, ia era sa dina”? (raica na Alama 32:16–21; Ica 12:6). Navuca mo vola ena ivolaniveisiga na veika o sotava e sa vukei iko mo vakabauti Jisu Karisito, se wasea kei na dua o kila.

Joni 21:1–17

E sureti au na iVakabula meu vakani ira na Nona sipi.

Ena rawa ni ka marautaki me vakatauvatana na Nona veimaliwai na iVakabula kei ira Nona iApositolo ena Joni 21 na imatai ni gauna e vakaroti ira kina o Koya me ra biuta na nodra lawa, me vaka e volai ena Luke 5:1–11. Na cava o kunea e tautauvata kei na cava e duidui? Na raikiloma cava o kunea me baleta na bula vakatisaipeli?

Vakasamataka na vosa ni iVakabula vei Pita ena Joni 21:15–17 e na rawa ni baleti iko. E dua beka na ka e tarovi iko tiko ena nomu veiqaravi vei ira na sipi ni Turaga? Na cava o na sauma vua na Turaga kevaka e tarogi iko, “O sa lomani au beka?” Vakasamataka vakatitobu mo na vakaraitaka vakacava na nomu lomana na Turaga.

Raica talega na 1 Pita 5:2–4, 8; Jeffrey R. Holland, “Na iMatai ni iVakaro Cecere,” Liaona, Nove. 2012, 83–85.

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Luke 24:5–6.E kaya o Peresitedi Thomas S. Monson me baleta na Luke 24:5–6, “E sega ni dua na vosa ena Matanitu Vakarisito e vakaibalebale vakalevu cake vei au me vakaoqo” (“Sa Tucake Tale o Koya,” Liaona, Me 2010, 89). Na cava na ibalebale ni veivosa oqo vei iko kei na nomu matavuvale?

Maciu 28; Marika 16; Luke 24; Joni 20–21.Ni wilika tiko nomu vuvale na veiwase oqo, raica matua na tamata era veimaliwai kei Jisu ena itukutuku yadua. Me ivakaraitaki, na cava e vakurabuitaki iko baleti ira na tamata era a sikova na ibulubulu ni iVakabula? Na cava o vulica mai na nodra vosa se ivalavala na iApositolo se mai vei rau na tisaipeli ena gaunisala ki Emeo?

Sa rawa mo dou lagata vata na “Ko Jisu Ni Sa Bula Tu?” (iVolanisere ni Gonelalai, 45). Veitalanoataka e dua e kila na nomu matavuvale e sa mate, ka veivosakitaka na sala e kauta mai kina na vakacegu na dina ena sere oqo.

E taubale vata tiko kei na rua na turaga o Jisu e gaunisala

Na Gaunisala ki Emeo, mai vei Wendy Keller

Maciu 28:16–20; Marika 16:14–20; Luke 24:44–53.Ena veitikina oqo, na cava a kerea tiko o Jisu vei iratou na Nona iApositolo me ratou cakava? Ena rawa vakacava ni da vakacavara na cakacaka oqo? Sa rawa ni ra wasea na lewe ni matavuvale na gauna era a vakila kina ni “sa cakacaka vata kei ira na Turaga” me rawati kina na Nona inaki (Marika 16:20).

Joni 21:15–17.Sa rawa mo dou wilika na tikina oqo ni dou kana vata tiko. Ena rawa ni vakuria na ibalebale ni vosa ni Vakabula “vakania noqu sipi.” Ni yavutaki mai na veika e vakatavulica o Jisu me baleti ira nona sipi ena Veiyalayalati Vou (raica na ivakaraitaki, Maciu 9:35–36; 10:5–6; 25:31–46; Luke 15:4–7; Joni 10:1–16) na cava e sala vinaka me vakamacalataki kina na nodra qaravi na luve ni Kalou na vakani ira na sipi? Na cava e vakavulica na vosa vakatautauvata me baleta na veika e rawa ni vakila me baleti keda na Tamada Vakalomalagi kei Jisu?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Sere vakaturi: “Ko Jisu Ni Sa Bula Tu?,” Nodra iVolanisere na Lalai, 45.

Vakatorocaketaki ni Vuli ni Tamata Yadua

Vakayagataka na sere ivakatagi me sureta na Yalo ka vulica na ivunau. Vakarogoca se lagata na serenilotu me vaka na “Sa Tu Cake!” (Serenilotu, naba 114) e rawa ni sureta na Yalo ka vukei iko mo vulica na Tucaketale ni iVakabula.

Na yalewa sa raica na Karisito sa tucake tale ena ibulubulu

Na Karisito sa Tucaketale, mai vei Walter Rane