17–23 ni Julai

Cakacaka 10–15

“Sa Tubu ga na Vosa ni Kalou me Levu Sara mai”

Wilika vakamatata na Cakacaka 10–15 ka vakatara na gauna me vakauqeti iko na Yalo ena vakasama kei na veika o rawa ni vakila. Na cava eso na ka o rawa ni vulica mai na veiwase ni vola oqo?

Vola na Veika o Vakauqeti Kina

Ena Nona gauna ni veiqaravi ena bula oqo, e dau bolei ira wasoma na tamata o Jisu Karisito baleta na ivakarau kei na vakabauta makawa sa tu vei ira. Oqo a sega ni mudu ni oti Nona lako cake ki lomalagi, ni tomana tikoga nona dusimaka na Nona Lotu ena ivakatakila. Me ivakaraitaki, ena gauna ni bula i Jisu era vunautaka na kosipeli o ira na Nona tisaipeli vei ira ga na Jiu. Ia ni oti na mate ni Vakabula a qai yaco o Pita me iliuliu ni Lotu e vuravura, a vakatakila o Jisu Karisito kivei Pita ni sa kena gauna donu me sa vunautaki na kosipeli vei ira era sega ni Jiu. Na vakasama ni wasei ni kosipeli vei ira na kai Matanitu tani ena sega ni veivakidacalataki ena gauna oqo, sa qai cava beka na lesoni vei keda me baleta na itukutuku oqo? E dua beka na lesoni sai koya ena Lotu makawa kei na gauna oqo, e dusimaki ira na Nona iliuliu digitaki na iVakabula dauloloma (raica na Emosi 3:7; Vunau kei na Veiyalayalati 1:38). Nai vakatakila e yaco tiko sa dua na ivakatakilakila bibi ni Lotu dina ka bula i Jisu Karisito. Me vakataki Pita, e dodonu meda ciqoma nai vakatakila sa yaco tiko ga mai ka bula “ga ena vosa kecega ni Kalou” (Luke 4:4), oka kina “na veika sa vakatakila oti [o Koya], na veika sa vakatakilai mai ena gauna oqo” kei na “levu tale na veika cecere ka bibi” ena qai vakatakila mai o Koya “me baleta tikoga na Matanitu ni Kalou” (Yavu ni Vakabauta 1:9).

Vakasama Eso ni Vuli iVolanikalou ni Tamata Yadua

Cakacaka 10

“Sa sega ni digitaki ira vakailoa na tamata na Kalou.”

Ena vuqa na itabatamata, era a vakabauta tiko na Jiu ni “kawa i Eparama,” se dua na kawa vakadra i Eparama, e kena ibalebale ni sa ciqomi ka digitaki e dua na tamata mai vua na Kalou (raica na Luke 3:8). Era na okati ira na tamata tale eso mera kai Matanitu tani “tawasavasava” ni ra sega ni ciqomi mai vua na Kalou. Ena Cakacaka 10, na cava e vakatavulica na Turaga vei Pita me baleti koya “sa vinaka vua”? (Cakacaka 10:35). Nai vakadinadina cava o kunea ena wase oqo ni bula nei Konilio sa vinaka vua na Turaga? Vakasamataka vakatitobu na ibalebale ni malanivosa “Sa sega ni digitaki ira vakailoa na tamata na Kalou” (tikina e 34; raica talega na 1 Nifai 17:35). Na cava e bibi kina vei iko mo kila na dina oqo?

Me vakataki ira na Jiu era raici ira sobu era sega ni kawa i Eparama, o sa bau siqema ni o dau vakalewa vakaca e dua na tamata e duatani mai vei iko? E rawa beka vakacava mo ulabaleta na itovo vakaoqo? E rawa ni ka taleitaki me caka e dua na itaviqaravi rawarawa ena vica na siga mai qo: Ena veigauna o veimaliwai kei na dua tale, tovolea mo vakasamataka e lomamu, “Qo e dua na luve ni Kalou.” Ni o vakayacora oqo, na veisau cava soti o raica kei na ivakarau ni nomu vakasama me baleta na veimaliwai kei ira tale eso?

Raica talega na 1 Samuela 16:7; 2 Nifai 26:13, 33; Russell M. Nelson, “Me Qaqa Tikoga na Kalou,” Liaona, Nove. 2020, 92–95; “Na iVakatakila nei Pita me Kauta na Kosipeli vei ira na Kai Matanitu Tani” (vidio), ChurchofJesusChrist.org.

Cakacaka 10; 11:1–18; 15

Ena vakavulici au na Tamada Vakalomalagi, ena vosa ena vosa mai na ivakatakila.

Ni raica o Pita na raivotu e vakamacalataki tiko ena Cakacaka 10, a sasaga dredre taumada me kila ka “taqaya tiko na lomana se cava [na] kena ibalebale” (tikina 17). Ia a solia na Turaga vei Pita na kila e cecere sara ni a vakasaqara o Pita. Ni o wilika na Cakacaka 10, 11, kei na 15, raica na kena vakatitobutaki na nona kila o Pita na nona raivotu ni toso tiko na gauna. O sa vakasaqara ka ciqoma vakacava na kila e levu cake mai vua na Kalou ena gauna o lomatarotaro kina?

Na Cakacaka 10, 11, kei na 15 e vakamacalataka mai na gauna e dusimaki ira kina na Nona italai na Turaga ena i vakatakila. Ena rawa ni veivuke mo vola na veika o sa vulica me baleta na ivakatakila ena veiwase ni vola oqo. Ena sala cava soti e vosa kina vei iko na Yalo?

Raica talega na Ulutaga Vakosipeli “iVakatakila,” topics.ChurchofJesusChrist.org; Quentin L. Cook, “Na Veivakalougatataki iVakatakila Tomani Tiko Vei Ira na Parofita kei na iVakatakila Yadua me Dusimaka Noda Bula,” Liaona, Me 2020, 96–100; “Na Koniferedi e Jerusalemi” (vidio), ChurchofJesusChrist.org.

Cakacaka 11:26

Koi au e dua na Lotu va-Karisito baleta niu vakabauta ka muri Jisu Karisito.

Na veika cava bibi sa tu vua e dua sa vakatokai me Lotu Vakarisito? (raica na Cakacaka 11:26). Na cava na kena ibalebale vei iko mo kilai tu ni ko Lotu Vakarisito? Vakasamataka na bibi ni yaca. Me vakataka, na cava nai balebale ni yaca ni nomu matavuvale kivei iko? Na cava e bibi kina vei iko na yaca ni Lotu? (raica na Vunau kei na Veiyalayalati 115:4). Na cava na kena ibalebale vei iko mo taura vei iko na yaca i Jisu Karisito ena veiyalayalati? (raica na Vunau kei na Veiyalayalati 20:77).

Raica talega na Mosaia 5:7–15; Alama 46:13–15; 3 Nifai 27:3–8; Russell M. Nelson, “Na Yaca Dodonu ni Lotu,” Liaona, Nove. 2018, 87–90.

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Cakacaka 10:17, 20.E sa bau dua na gauna o vakila e yalomu na veika vakayalo ka qai vakatitiqataka e muri na veika o vakila se vulica? Nai vakasala cava eda rawa ni veivakasalataki kina ka na rawa ni vukei keda kina meda uabaleta na noda vakatitiqa? (Raica na Neil L. Andersen, “Balolo ni Vakanananu Vakayalo Veivakatakilai,” Liahona, Me 2020, 18–22.)

Cakacaka 10:34–35.O na vakavulica vakacava ki na nomu matavuvale ni “Sa sega ni digitaki ira vakailoa na tamata na Kalou”? (Cakacaka 10:34). E rawa beka ni o vakaraitaka na kedra iyaloyalo na tamata mai na veivanua duidui eso kei na itovo vakavanua ni ra wilika na nomu matavuvale na veitikina oqo. Me na vakayarayarataka vakacava na noda ivalavala na dina era tiko ena veitikina oqo? (raica, me ivakaraitaki, “Meu Lako Tu Kei IKo” [iVolanisere ni Gonelalai, 78]).

Cakacaka 12:1–17.E rawa ni ratou matanataka na nomu matavuvale na italanoa kei Pita ni sa biu ki vale ni veivesu kei ira na lewe ni Lotu ena nodra soqoni vata ka masulaki koya. Na gauna cava eda sa vakalougatataki kina ena masu? E tiko beka edua na tamata eda vakauqeti meda masulaka, me vaka e dua nai liuliu ni Lotu se dua na daulomani? Na cava na kena ibalebale meda masu “ka sega ni mudu”? (Cakacaka 12:5; raica talega na Alama 34:27).

Sa Sereki mai Valeniveivesu o Pita, mai vei A. L. Noakes

Cakacaka 14.Ni dou wilika vata na wase oqo, eso na lewe ni matavuvale e rawa ni ra vola na veivakalougatataki e yaco mai vei ira na tisaipeli kei na Lotu. E rawa ni ra raica na vo ni lewe ni matavuvale na veisaqasaqa se veivakatovolei era sotava na tisaipeli. Na cava e vakatara kina na Kalou me yaco na veika dredre vei ira na tamata yalododonu?

Cakacaka 15:1–21.Na veitikina oqo e vakamacalataka e dua na duidui ena Lotu me baleta na nodra gadrevi na saumaki mai me ra muria na lawa i Mosese, oka kina na cilivi. Na cava era cakava na iApositolo me baleta na duidui oqo? Na cava eda rawa ni vulica mai na ivakaraitaki oqo me baleta na sala era dusimaka kina na iliuliu ni Lotu na cakacaka ni Lotu?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Sere vakaturi: “Meu Lako Tu Kei Iko,” Nodra iVolanisere na Lalai, 78.

Vakatorocaketaki Noda Veivakavulici

Droinitaka e dua na iyaloyalo. Na iyaloyalo e rawa ni vukea na lewe ni vuvale me raitayalotaka nai vakavuvuli kei nai talanoa ni volanikalou. Sa rawa mo sureti ira na lewe ni matavuvale me ra droinitaka na iyaloyalo ni veika o sa wilika, me vaka na raivotu nei Pita ena Cakacaka 10.

Na veika rau a sotava o Pita kei Konilio e vakaraitaka ni “Sa sega ni digitaki ira vakailoa na tamata na Kalou” (Cakacaka 10:34).