Me Qaqa Duadua ga na Kalou

Mai vei Peresitedi Russell M. Nelson

Peresitedi ni Lotu i Jisu Karisito ni Yalododonu Edaidai

O sa tuvakarau beka mo laiva me qaqa tikoga na Kalou ena nomu bula? O sa tuvakarau beka mo laiva na Kalou me dau veivakayarayarataki bibi duadua ena nomu bula?

Kemuni na taciqu kei na ganequ lomani, au vakavinavinakataka na itukutuku vakasakiti ni koniferedi oqo kei na noqu itavi dokai meu vosa vei kemuni oqo.

E sa sivia e 36 na yabaki au sa iApositolo voli mai kina, sa dau malele vakalevu tiko noqu vakasama ena ivunau ni kena vakasokumuni ko Isireli. ¹ Na veika kece e baleta sa dau vakavuna na lomatarotaro, oka kina na veiqaravi kei na vei yaca ² i Eparaama, Aisake, kei Jekope; na nodra bula kei na dui watidra, na veiyalayalati a vakayacora na Kalou vata kei ira ka qai drodrovi ira yani na nodra kawa; ³ na nodra veiseyaki na yavusa e tinikarua; kei na vicavata na parofisai me baleta na vakasokumuni ena noda gauna.

Au sa vulica na vakasokumuni, masulaka, kanamagiti mai na kena veitikina ni ivolanikalou veiwekani kece sara, ka kerea na Turaga me vakarabailevutaka na noqu kilaka.

Mo ni raitayaloyalotaka mada kina na noqu marau ena noqu tuberi ena dua na gauna walega qo ki na dua na rai vou. Ena nodrau veivuke e rua na kenadau ni Iperiu, au vulica kina ni dua na ibalebale vaka-Iperiu ni vosa Isireli sai koya “me qaqa duadua ga na Kalou.” ⁴ O koya oqo, e cavuti kina na yaca Isireli vua e dua sa tuvakarau me laiva me qaqa tikoga na Kalou ena nona bula. Na vakasama oqori e yavalata na yaloqu!

Na vosa tuvakarau e bibi sara ena ivakavakadewa oqo ni Isireli. ⁵ E dui tu kece noda galala ni digidigi. E rawa ni da digitaka me da Isireli, se kua. E rawa ni da laiva na Kalou me qaqa tikoga ena noda bula, se kua. E rawa ni da digitaka me da laiva na Kalou me dau veivakayarayarataki kaukauwa duadua ena noda bula, se sega.

Me vakalailai ga, me da nanuma lesu mada e dua na veisau ni sala bibi ena bula nei Jekope, na makubui Eparaama. Ena vanua a vakatoka o Jekope ko Penieli (na kena ibalebale “na matana na Kalou”), ⁶ a veimulomulo kina ko Jekope kei na dua na bolebole dredre. A vakatovolei na nona galala ni digidigi. Ena veimulomulo oqori, a vakadinadinataka kina o Jekope na cava e bibi duadua vua. A vakaraitaka ni sa tu vakarau me laiva na Kalou me qaqa tikoga ena nona bula. Me kena isau, a veisautaka na Kalou na yaca i Jekope me Isireli, ⁷ kena ibalebale “me qaqa duadua ga na Kalou.” A qai yalataka vei Isireli na Kalou ni veivakalougatataki kece sara a cavuti e buradelai Eparaama ena nona talega. ⁸

Ka ni rarawa, ni ra a voroka na kawa i Isireli na nodra veiyalayalati kei na Kalou. Era a vakaviriki ira na parofita ena vatu ka sega ni tuvakarau me ra laiva na Kalou me qaqa tikoga ena nodra bula. A mani veiseyakitaki ira kina na Kalou ki na iyalayala vava kei vuravura. ⁹ Ena loloma cecere, a qai yalataka e muri o Koya me vakasokumuni ira, me vaka e tukuna o Aisea: “Ia sa vakalekaleka wale na noqu biuti iko [Isireli]; ia ena loloma levu kau na vakasoqoni iko.” ¹⁰

Ni tiko ena noda vakasama na ivakamacala vaka-Iperiu ni Isireli, eda raica kina ni sa vakaikuritaki kina na ibalebale ni vakasokumuni kei Isireli. Na Turaga sa vakasokumuni ira era sa tuvakarau me ra laiva na Kalou me qaqa tikoga ena nodra bula. Na Turaga sa vakasokumuni ira era na digitaka me ra laiva na Kalou me dau veivakayarayarataki bibi duadua ena nodra bula.

Ena veisenijiuri, era sa tukuna rawa tu mai na parofita na veivakasokumuni oqo, ¹¹ ka sa yaco sara tikoga ena gauna oqo! Me vaka ni itekevu yaga sara ki na iKarua ni Nona Lako Mai na Turaga, sai koya na cakacaka bibi duadua e vuravura!

Na veivakasokumuni oqo ni bera na ikarua ni lako mai sa italanoa yadua ni vakabauta rabailevu kei na yaloqaqa vakayalo vei ira e milioni vakamilioni na tamata. Ia me vaka ni da lewe ni Lotu i Jisu Karisito ni Yalododonu Edaidai, se “Isireli ni veiyalayalati ni gauna oqo,” ¹² eda sa vakaitavitaki me da vukea na Turaga ena cakacaka bibi oqo. ¹³

Ni da tukuna tiko na vakasokumuni kei Isireli ena yasa ruarua ni ilati, eda sa tukuna vakaidina tiko na cakacaka ni kaulotu, valetabu, kei na tuvakawa. Eda sa tukuna tale tikoga na tarai cake ni vakabauta kei na ivakadinadina e yalodra o ira eda bula, cakacaka, ka veiqaravi vata. Na gauna keda cakava kina e dua na ka me vukea e dua—ena yasa cava ga ni ilati—me cakava ka maroroya na nona veiyalayalati kei na Kalou, keda sa veivuke tiko meda sokumuni Isireli.

Ena dua na gauna sa oti, a sotava tiko na dredre ni bula vakayalo na watina e dua na makubui keirau tagane. Au na vakatokai koya o “Jill.” E dina ni sa vakayacori na lolo, masumasu, kei na veivakalougatataki ni matabete sa lutusobu tikoga na bula nei tamai Jill. A rere de na vakayali rau ruarua na tamana kei na nona ivakadinadina.

Ena dua na yakavibogi, a tukuna vei au na watiqu o Sisita Wendy Nelson, na veika e sotava tiko o Jill. Ena mataka ka tarava a vakauqeti o Wendy me wasea vei Jill na noqu iwali ni nona dredre vakayalo e dua ga na vosa! Na vosa oya na raileka.

A qai tusanaka imuri vei Wendy o Jill ni taumada a veivakaleqai na noqu iwali. E kaya o koya, “Au a vakanuinui tiko ni na yalataka vei au o Tutu e dua na cakacaka mana me baleti tamaqu. Au a vakasamataka tikoga se cava na vuna a vakauqeti kina me tukuna na vosa raileka.”

Ni sa takali yani o tamai Jill, se voqa tikoga ena nona vakasama na vosa raileka. A dolava na yalona me kila vakatitobu cake ni kena ibalebale na raileka e “rawa ga ni raica na ka e tu voleka.” Sa tekivu me vuki na nona vakasama. Qai kaya o Jill, “Na raileka a vakavuna meu tu vakadua, vakasama, ka vakabulai. Na vosa oqori sa vakasinaiti au ena gauna oqo ena yalovakacegu. Sa vakananuma vei au meu vakarabailevutaka na noqu rai ka vakasaqara na tawamudu. Sa vakananuma vei au ni tiko e dua na ituvatuva vakalou ka se bula tiko o tamaqu ka lomani au ka dau vakaraici au tiko. Na Raileka sa liutaki au vua na Kalou.”

Au sa doka dina na makubui keirau vakalawa lomani ka taleitaki. Ena gauna veimuloraki vakayalo oqo ni nona bula, sa vulica tiko o Jill lomani me tugana na loma ni Kalou ena vukui tamana, ka salavata kei na dua na ivakarau ni rai e tawamudu me baleta na nona bula. Ena nona digitaka me laiva me qaqa tikoga na Kalou, sa kunea tiko kina na vakacegu.

Kevaka eda na vakatara vua, e vuqa sara na sala e rawa ni vukei keda kina na ivakavakadewa vaka-Iperiu oqo ni Isireli. Raitayaloyalotaka mada e rawa ni veisau na noda masulaki ira na noda daukaulotu—kei na noda dui sasaga ni vakasokumuni Isireli—ni tiko ena noda vakasama na ivakarau ni rai oqo. Eda dau masuta wasoma me da tuberi o keda kei ira na daukaulotu vei ira era sa vakarau tu me ra ciqoma na dina ni kosipeli vakalesui mai i Jisu Karisito. Au vakataroga, me da tuberi li vei cei ni da vakatakekere me da kunei ira era sa tuvakarau me ra laiva me qaqa ena nodra bula na Kalou?

Eda na tuberi beka vei ira era se bera vakadua ni bau vakabauta na Kalou se o Jisu Karisito ia era sa segata tiko ena gauna oqo me ra vulica na veika e baleti Rau kei na Nodrau iTuvatuva ni Veivakabulai. Eso beka era a “sucu ena loma ni veiyalayalati” ¹⁴ ia era sa gole tani mai na salatu ni veiyalayalati. Era sa vakarau tu beka ena gauna oqo me ra veivutuni, lesu mai, ka laiva me qaqa tikoga na Kalou. E rawa ni da veivuke ena noda kidavaki ira mai ena liga kei na yalo sa tadola tu. Ia vei ira eso eda na tuberi yani kina era na dau vakila tu beka e veigauna ni dua na ka e yali tiko ena nodra bula. O ira talega era gadreva tu na taucoko kei na reki e dau yaco mai vei ira era sa tuvakarau me ra laiva na Kalou me qaqa tikoga ena nodra bula.

Na lawa ni qoli ni kosipeli me vakasokumuni Isireli ni sa veiseyaki tu e rui rabailevu. E tiko na rumu vei ira na tamata yadua era na tugana sara na kosipeli i Jisu Karisito. Era na yaco o ira yadua era saumaki mai me dua na luvena ni veiyalayalati na Kalou, ¹⁵ se era sucu mai kina se ra qai mai vakubeci kina. Era sa yaco yadudua me ra vakaivotavota ena veika kece sa yalataka na Kalou vei ira na luvedra yalodina ni Isireli! ¹⁶

O keda yadua e dui tu na keda inaki vakalou, baleta ni o keda yadua eda luvena na Kalou. Eda tautauvata kece e Matana. Era sa ka bibi sara na veika e rawa ni basika mai na dina eso oqo. Taciqu kei na ganequ, yalovinaka vakarogoca vinaka na ka au sa vakarau tukuna. Na Kalou e sega ni lomana vakalevu cake e dua na matatamata mai na duatale. Na nona ivunau ena vuku ni ka oqo e matata. E sureta o Koya na tamata kecega me lako mai ki Vua, “na tamata loaloa kei na tamata vulavula, bobula kei na galala, tagane kei na yalewa.” ¹⁷

Au vakadeitaka vei iko na nomu tikina ena mata ni Kalou e sega ni vakatau mai na roka ni yagomu. Nomu tovaki se na nomu sega ni tovaki mai vua na Kalou e vakatau ena nomu yalodina vua na Kalou kei na Nona ivakaro, ka sega ni roka ni yagomu.

E mositi au ni o ira na tacida kei na ganeda loaloa e vuravura raraba era sotava tu na mosi ni veivakaduiduitaki vakawatamata kei na veivakacacani. Nikua au kacivi kemuni kina na noda lewenilotu e veivanua taucoko mo ni liu ena nomuni biuta laivi na ivakarau ni bula kei na ivalavala ni veivakacacani. Au kerei kemuni mo ni liutaka na vakarokoroko ena vukudra na luve ni Kalou kecega.

Na taro vei keda yadua, se matatamata cava ga eda lewena, e tautauvata. O sa tuvakarau beka mo laiva me qaqa tikoga na Kalou ena nomu bula? O sa tuvakarau beka mo laiva na Kalou me dau veivakayarayarataki bibi duadua ena nomu bula? Ko na vakatara beka na Nona vosa, Nona ivakaro, kei na Nona veiyalayalati me veivakayarayarataki ena veika o cakava e veisiga? Ko na vakatara beka na Domona me liu duadua mai vei ira na kena vo kece? O sa tu vakarau beka mo laiva na veika cava ga e gadreva o Koya mo cakava, me bibi duadua vei ira na nomu veisasaga kecega? O sa tuvakarau beka mo laiva me sa duavata ga na lomamu kei na Lomana? ¹⁸

Vakasamataka mada ena vakalougatataki iko vakacava na mataqali tuvakarau vakaoya. Kevaka o se bera ni vakawati ka vakasaqara tiko e dua na nomu itokani tawamudu, na nomu gagadre mo “dua na Isireli” ena vukea na nomu lewa o cei mo veigadivi kaya kei na kena iwalewale.

Kevaka o sa vakamau vua e dua na itokani ka sa voroka na nona veiyalayalati, na nomu tuvakarau mo laiva me qaqa tikoga ena nomu bula na Kalou ena rawa kina me maroroi na nomu veiyalayalati kei na Kalou. Ena vakabulai na utomu kavoro na iVakabula. Ena dolavi na lomalagi ena nomu segata mo kila na ivakarau mo toso kina ki liu. E sega ni gadrevi mo lakosese se lomatarotaro.

Kevaka e tu na nomu taro savasava me baleta na kosipeli se na Lotu, ni o digitaka me qaqa tiko na Kalou, o na liutaki mo kunea ka kila na veidina taucoko tawamudu ka na liutaka na nomu bula ka vukei iko mo tudei ena salatu ni veiyalayalati.

Ni o sotava na veivakatovolei—kevaka sara mada ga e yaco mai na veivakatovolei ni o sa oca se galili se o sega ni ciqomi—raitayaloyalotaka na ivakarau ni yaloqaqa o na rawata ni o digitaka mo laiva na Kalou me qaqa tikoga ena nomu bula vakakina ena nomu vakatakekere Vua me vakaukauwataki iko.

Ena gauna e nomu gagadre cecere duadua kina mo laiva na Kalou me qaqa tikoga, mo lewe i Isireli, sa na rawarawa cake eso na vakatulewa. E levu na veika dredre sa yaco me sega ni dredre! O kila na ivakarau vinaka duadua mo sauni iko kina. O kila na ka mo sarava ka wilika, na vanua mo vakayagataka kina na nomu gauna, kei o cei mo veitokani vata. O kila na veika o vinakata mo rawata. O kila na mataqali tamata o vinakata dina mo vaka.

Ia oqo, kemuni na taciqu kei na ganequ, e taura ruarua na vakabauta kei na yaloqaqa me rawa ni da laiva na Kalou me qaqa tikoga. E ka ni sega ni soro, cakacaka vakayalo kaukauwa me da veivutuni ka biuta tani na tamata vakavuravura ena vuku ni Veisorovaki i Jisu Karisito. ¹⁹ E taura na sasaga gugumatua e veisiga me tarai cake na itovonibula vakatamata yadua me vulica na kosipeli, me vulica vakalevu na ka e baleta na Tamada Vakalomalagi kei Jisu Karisito, ka me segata ka rogoca na ivakatakila yadua.

Ena veigauna dredre oqo a parofisaitaka na iApositolo o Paula, ²⁰ sa sega mada ga ni tovolea tiko o Setani me vunitaka na nona bololaka tiko na ituvatuva ni Kalou. Sa levu mai na doudou ena caka ca. O koya gona, na sala duadua ga me da bula kina vakayalo sai koya me da lewa me da laiva na Kalou me qaqa tikoga ena noda bula, me da vulica na rogoca na Domona, ka vakayagataka na noda igu me da veivuke ena vakasokumuni o Isireli.

Ia oqo, a cava na nona nanuma na Turaga me baleti ira na tamata era na laiva me qaqa tikoga na Kalou? A soqona sara vakavinaka o Nifai: “[Na Turaga] e lomani ira era ciqomi koya me nodra Kalou. Raica e a lomani ira na noda qase, ka veiyalayalati kei ira, io, kei Eparaama, Aisake kei Jekope; ka sa nanuma na veiyalayalati e a cakava o koya.” ²¹

Kei na cava sa tuvakarau kina na Turaga me cakava vei Isireli? Sa bolea na Turaga ni na “vala ena [noda] ivalu, na nodra ivalu na [luveda], kei na nodra na [makubuda] … me yacova na ikatolu kei na ikava ni itabatamata”! ²²

Ni o vulica na ivolanikalou ena ono na vula ka tarava, au vakayaloqaqataki kemuni mo ni tuva na veika kece sa yalataka na Turaga ni na vakayacora vei Isireli ni veiyalayalati. Au vakabauta ni ko na kurabui! Vakananuma vakatitobu na veiyalayala oqo. Veivosakitaka vata kei ira na nomu matavuvale kei na itokani. Oti qai bula ka sarava na kena vakataucokotaki na yalayala oqo ena nomu bula.

Kemuni na taciqu kei na ganequ lomani, ni o ni digitaka mo ni laiva na Kalou me qaqa tikoga ena nomuni bula, ko ni na qai kila vakataki kemuni ni noda Kalou e “Kalou ni cakacaka mana.” ²³ Ni da dua na matatamata, eda sa Nona gone ni veiyalayalati, ka da na vakatokai ena Yacana. Au sa vakadinadinataka oqo ena yaca tabu i Jisu Karisito, emeni.