Mo Dou Vakacegu
Na noda vakabauta tawayavalati rawa ena ivakavuvuli vakalesui mai i Jisu Karisito e dusimaka na noda vei kalawa ka solia vei keda na reki.
Ena iotioti ni Nona veisiga ni bula vakayago, o Jisu Karisito a tukuna vei iratou na Nona iApositolo na veivakacacani kei na veika dredre eratou na sotava. 1 A tinia o Koya ena veivakadeitaki oqo “Dou na kunea e vuravura na rarawa: ia mo dou vakacegu; au sa vakamalumalumutaki vuravura” (Joni 16:33). Oqori na itukutuku ni iVakabula ki vei ira kece sara na luvena na Tamada Vakalomalagi. Oqori na itinitini ni itukutuku vinaka me baleti keda yadua ena noda bula vakayago.
“Mo dou vakacegu” e dua talega na veivakadeitaki e gadrevi ena vuravura ka talai iratou kina na Nona iApositolo na Karisito vakaturicaketale. A kaya emuri na iApositolo o Paula vei ira na kai Korinica, “Sa buku na druadrua, ia keitou sa sega ni drigiti; keitou sa lomaocaoca ga, ia keitou sa sega ni yalolailai; keitou sa vakacacani, ia keitou sa sega ni biu laivi; keitou sa vakabalei sobu, ia keitou sa sega ni vakarusai” (2 Korinica 4:8–9).
Rua na udolu na yabaki emuri eda “sa buku … druadrua [taki] talega,” ka da sa gadreva talega na itukutuku vata ga me da sa sega ni yalolailai ia me da vakacegu ga. Sa tu vua na Turaga na loloma uasivi kei na kauwai me baleti ira na Luvena yalewa talei. E kila o Koya na veika o vinakata, nomu gagadre, kei na nomu lomaleqa eso. Sa kaukauwa duadua ga na Turaga. Nuitaki Koya.
A vakatavulici na Parofita o Josefa Simici ni “na cakacaka, kei na ituvatuva, kei na inaki ni Kalou ena sega ni rawa ni dua e tarova, ena sega talega ni ra mai tini botoilevu tu” (Vunau kei na Veiyalayalati 3:1). Na Turaga a solia vei ira na Luvena era sasaga dredre tiko, na veivakadeitaki cecere eso oqo:
“Raica, oqo na nona yalayala na Turaga vei kemudou, Oi kemudou na noqu tamata.
“O koya mo dou marau kina, ka kakua ni rere, ni’u sa tiko vata kei kemudou koi Au na Turaga, kau na tu e yasamudou; ka mo dou na tukuni au yani, io ko Jisu Karisito, ni sai Au na Luve ni Kalou bula” (Vunau kei na Veiyalayalati 68:5–6).
Sa tu volekati keda na Turaga, ka sa kaya o Koya:
“Na ka au sa vakarota vua e dua au sa vakarota vei kemudou kece, dou reki ka marau na gonelalai; niu sa tiko ena kemudou maliwa, kau sa sega ni biuti kemudou” (Vunau kei na Veiyalayalati 61:36).
“Ni sa oti na veika rarawa, ena yaco na veivakalougataki” (Vunau kei na Veiyalayalati 58:4).
Kemuni na taciqu, au vakadinadinataka ni iyalayala eso oqo, ka a soli ena maliwa ni veivakacacani kei na leqa ni tamata yadua, e kovuti kemuni yadua ena nomuni vei ituvaki dredre eso edaidai. Era sa ka talei me vakananumi keda yadua me da reki ka marau ena taucoko ni kosipeli ni da toso ki liu ena vei bolebole eso ni bula vakayago.
Na veivakatovolei kei na veibolebole eso sa veika sotavi matau ni bula vakayago. Na veisaqasaqa e sa dua na tiki bibi ni ituvatuva vakalou me vukei keda me da tubu, 2 ka ena kena maliwa oqori, e sa noda na veivakadeitaki ni Kalou ni na rai vakabalavu ni veigauna tawamudu ena sega ni vakatarai me uabaleti keda na veisaqasaqa. Ena Nona veivuke kei na noda yalodina kei na vosota vakadede, eda na qaqa kina. Me vaka ni ra sa tiki ni bula vakayago, na veivakararawataki kece era sa vakaiyalayala ga. Ena veivakaduiduile ka a liutaka mai e dua na ivalu veivakacacani, a veivakananumi kina vakayalomatua na peresitedi kei Amerika o Abraham Lincoln vei ira era vakarorogo vua me baleta na vuku makawa ni “oqo talega, ena takali yani.” 3
Me vaka o ni kila, na veivakararawataki vakayago au tukuna tiko—ka dau vakadredretaka me da yalo vakacegu—ena so na gauna dau yaco mai vei keda ni sala vata kei na vuqa tale, me vakai ira na milioni era sasaga dredre ni ra lako curuma tiko eso na revurevu veivakarusai ni matedewa totolo na COVID-19. Vakatautauvatataki, e Amerika e milioni vaka milioni era vosota dredre tiko ena loma ni dua na gauna ni veicati kei na veileti ka vaka me dau veitomani kaya na veidigidigi vaka peresitedi, ia ena gauna oqo esa qai kena e kaukauwa duadua e rawa ni ra nanuma rawa na qase duadua vei keimami.
Eda sasaga vakai keda, ena vuqa na gauna ena veidredre ni bula vakayago, me vaka na dravudravua, veivakaduiduitaki vakatamata, tauvimate, vakacegui ena cakacaka se kena inuinui matewale, ira na gone lakosese, kavoro ni vakawati se sega na vakawati, kei na revurevu ni ivalavala ca—na noda ga se nodra na tani.
Ia, ena maliwa ni veika kece oqo, esa noda na ivakasala vakalomalagi oya me da yalo vakacegu ka kune marau kina ena ivakavuvuli kei na yalayala eso ni kosipeli kei na vua ni noda cakacaka. 4 Na ivakasala oqori a sa dau tu ga mai liu, me baleti ira na parofita kei keda kece sara. Eda kila oqo mai na veika era a sotava o ira era liu vei keda kei na ka a tukuna na Turaga vei ira.
Nanuma na vei ituvaki eso ni Parofita o Josefa Simici. Ni raici ena matailoilo ni veivakatovolei, e a nona e dua na bula ni dravudravua, vakacacani, vakasevai, rarawa ni matavuvale, kei na itinitini ni nona a vakamatei. Ni vakararawataki o koya e valeniveivesu, na watina kei na luvena kei ira na Yalododonu tale eso a vosota na veikadredre tawakilai rawa ni ra a vakasavitani mai Misuri.
Ni vakamasuta na veivakacegui o Josefa, a qai sauma mai na Turaga:
“Ia na luvequ, me vakacegu na yalomu; raica sa lekaleka walega na gauna ni nomu rarawa kei na vutugu;
“Ia, kevaka ko sa vosota rawa, ena vakacerecerei iko cake na Kalou; raica ko na vakamalumalumutaki ira kecega na nomu meca” (Vunau kei na Veiyalayalati 121:7–8).
Oqori na ivakasala tawamudu me baleti koya ga, ka vukea na Parofita o Josefa me taura dei tiko na nona lewa maqosa mamarau vakaitaukei kei na loloma kei na yalodina ni nona tamata. Na vei itovo vata oqori a vaqaqacotaki ira na iliuliu kei na lewenilotu taumada ka ra a muri koya ka na rawa ni vaqaqacotaki iko talega.
Vakasamataki ira mada na lewenilotu taumada oya! Era a vakasavitani mai na dua na vanua ki na dua tale, e veigauna kei na veigauna. Emuri era a qai sotava na bolebole eso ni kena tauyavutaki vou nodra itikotiko kei na Lotu ena dua na lekutu. 5 Ni oti e rua na yabaki ni nodra yaco yani na imatai ni ilawalawa lewenilotu taumada ena bucabuca ena Great Salt Lake, na nodra tautauri matua ki na nodra sasaga bula ena vanua dredre oya a se malumalumu sara. E vuqa na lewenilotu era a se sala takoso tiko mai ena veibuca se sasaga tiko mera vakarautaki ira me vakayacora vakakina. Ia o ira na iliuliu kei na lewenilotu era a se dei tu ga ena inuinui kei na yalo vakacegu.
E dina ga ni ra se bera ni tauyavu vinaka na Yalododonu ena nodra itikotiko vou, ena koniferedi raraba ni Okotova 1849 e dua na ilakolako vou ni daukaulotu era a talai yani ki Scandinavia, Varanise, Jamani, Itali, kei na Ceva ni Pasifika. 6 Mai na ituvaki e rawa ni a nanumi me nodra itagede lolovira duadua, era a lamata cake na lewenilotu taumada ki na kena e cecere vou. Ka ni oti ga e tolu na yabaki, e dua tale na le 98 era a kacivi talega me ra tekivu me vakasoqoni Isireli sa veiseyaki tu. E dua na iliuliu ni Lotu a vakamacalataka ena gauna oya ni o ira na cakacaka ni kaulotu oqo “me vakararaba, e sega ni dede sara; e rauta beka ga me 3 ki na 7 na yabaki na kena dede me yali kina e dua na tagane mai na nona matavuvale.” 7
Kemuni na ganequ, na Mataveiliutaki Taumada e kauwaitaka na vei bolebole o ni sotava tiko. Keitou lomani kemuni ka dau masulaki kemuni. Ena gauna vata oqori, keitou dau vakavinavinakataka vakawasoma ni noda bolebole eso vakayago—ka duatani mai na uneune, kama, ualuvu, kei na cagilaba—e dau vakavuqa e lailai mai na kena era a sotava na noda lewenilotu taumada.
Ena maliwa ni veika dredre, na veivakadeitaki vakalou e sa dau “dou marau ga, niu na liutaki kemudou tiko. Sa nomudou na matanitu kei na veivakalougatataki sa koto kina, ka sa nomudou na iyau ni gauna tawamudu” (Vunau kei na Veiyalayalati 78:18). E dau yaco vakacava oqo? A yaco vakacava vei ira na lewenilotu taumada? Ena yaco vakacava ki vei ira na marama ni Kalou edaidai? Ni da vakamuri na veidusimaki vaka‑parofita, “ena sega kina ni rawai [keda] na matamata mai eli,” a kaya na Turaga ena ivakatakila ena Epereli 1830. “Ia,” a kaya o Koya, “… na Turaga na Kalou ena vakatalabusesetaka na kaukauwa ni butobuto e matamudou, ka na vakavuna me yavavala ko lomalagi ena vukumudou, me vakalagilagi kina na yacana” (Vunau kei na Veiyalayalati 21:6). “Ni kakua ni rere, na qele ni sipi lalai; caka vinaka; laivi vuravura kei eli me rau cokovata ka saqati iko, ni kevaka ko sa tarai cake ena noqu uluvatu, ena sega sara ni rawa ni ra qaqa” (Vunau kei na Veiyalayalati 6:34).
Ena yalayala eso ni Turaga, eda “reki kina ka marau” (Vunau kei na Veiyalayalati 25:13), ka “ena yaloreki ga kei na mata mamarau” (Vunau kei na Veiyalayalati 59:15), eda toso kina ki liu ena salatu ni veiyalayalati. E vuqa vei keda eda sega ni sotava na vakatulewa vakaitamera, me vaka noda biuta noda veivale me da laki lewenilotu taumada ena dua na vanua tawakilai. Na noda vakatulewa e dau vakavuqa ga ena itavi ni veisiga ni bula, ia me vaka sa tukuna vei keda na Turaga, “O koya mo dou kakua kina ni oca ena cakacaka vinaka, ni dou sa tura tiko na yavu ni dua na cakacaka cecere. Ia ena tubu mai ena veika lalai na veika cecere” (Vunau kei na Veiyalayalati 64:33).
E sa tu na kaukauwa tawavakaiyalayala ena ivakavuvuli ni kosipeli vakalesuimai i Jisu Karisito. Na noda vakabauta tawayavalati rawa ena ivakavuvuli oya e dusimaka na noda vei ikalawa ka solia vei keda na reki. E vakararamataka na noda vakasama ka solia na kaukauwa kei na yalodei ki na noda ivalavala. Na veidusimaki kei na veivakararamataki kei na kaukauwa oqo era sa isolisoli yalataki eda sa ciqoma mai vei Tamada Vakalomalagi. Ena kilai kei na vakatauvatani ni noda bula ki na ivakavuvuli oya, oka kina na isolisoli vakalou ni veivutuni, eda rawa ni yalo vakacegu ni da maroroi keda ena salatu ki na noda icavacava tawamudu—na duavata tale kei na bula vakacerecerei kei rau na noda itubutubu vakalomalagi lomani.
A vakatavulica o Elder Richard G. Scott, “O na rairai sotava tiko na bolebole veivakadrukai eso” “Ena so na gauna era sa rui cokotivata, sega ni cegu, ka o rairai vakila ni ra sa lako sivita na nomu rawa ni vakatulewataka. Kakua ni sotava duadua na vuravura. “Mo vakararavi vei Jiova ena vu ni yalomu; ka mo kakua ni vakararavi ki na nomu yalomatua’ [Na Vosa Vakaibalebale 3:5]. … E gadrevi kina me veibolei tiko na bula, e sega ni baleta mo vakadrukai kina, ia mo rawa ni qaqa ena nomu sa lako curuma.” 8
E sa tiki kece sara ni ituvatuva ni Kalou na Tamada kei na Luvena, o Jisu Karisito, o Koya au vakadinadinataka, ka’u masuta ni da na sasaga vagumatua kece ki na noda icavacava vakalomalagi, ena yaca i Jisu Karisito, emeni.