Yaco mo Vakataki Koya

Mai vei Elder Scott D. Whiting

Ena Vitusagavulu

Ena Nona veivuke vakalou duadua ga na iVakabula ena rawa meda toso kina ki liu ka yaco me vakataki Koya.

Ki vua sara mada ga e dua ka vulica vakamatata na bula kei na veiqaravi i Jisu Karisito, nai vakaro ni iVakabula meda “vinaka sara me vakataki au” ¹ e veivakadrukai ka vaka me na sega ni yacovi rawa. Ena rairai beka o vakataki au—ni matata tu vei iko na nomu malumalumu kei na cala ka o vakasamataka kina ni logaloga vinaka cake na lakovi ni dua na sala ka sega na kena cabe ka lailai kina na tubu. “Sa dina sara, na ivakavuvuli oqo e sega sara ni dina ia sa vakalevulevui ga,” eda vakaiulubale, ena noda digitaka na sala e logaloga vinaka ka lailai kina na veisaqasaqa, okoya ka da sega ni solia kina vakalevu nai gu me kauta mai na veisau e gadrevi.

Ia vakacava kevaka na noda yaco “me vakataki [Koya]” e rawa, ena keda ituvaki sara mada ga vakayago? E vakacava ke rawati edua na kena itagede ena bula oqo, ka dina sara, ni gadrevi taumada oqo meda laki tiko vata tale kina kei Koya? E vakacava ke “me vakataki Koya” e sai koya sara ga na ka e nanuma na iVakabula? Na cava e tarava mai? Nai vakatagedegede ni igu cava eda lomasoli ni solia, me sureta na Nona kaukauwa veivakurabuitaki ki na noda bula me rawa ni da veisautaka kina na keda ituvaki?

E vakavulica o Elder Neal A.Maxwell: “Nida vakananuma vakatitobu na noda sa vakaroti mai vei Jisu meda vakataki Koya, eda raica ni keda ituvaki oqo e dua ka sega ni se ca, ia e dua ka da lomalomarua ka lailai kina na lomakatakata ki na Nona inaki—ka sa noda talega! Eda vakalavelaveti koya ia e lailai ga na gauna eda vakatotomuri Koya kina.” ² E dua nai talatala gone, o Charles M.Sheldon, a cavuta na vakasama vata oqo ena nona kaya: “Na noda bula Vakarisito e taleitaka vakalevu na kena rawarawa kei na logaloga vinaka mai na noda taura cake e dua na ka e sukusukura ka bibi me vaka na kauveilatai.” ³

E dina sara, o keda kece eda vauci ena ivakaro meda vakataki Koya, me vaka ga na nona vakataka na Tamana ko Jisu Karisito. ⁴ Ni da toso ki liu, eda yaco meda taucoko mai, vakayagoyagovinakataki ka matua sara. ⁵ Nai vakavuvuli vakaoqo e sega ni yavutaki ena ivunau ni dua na lotu ia e soli vakadodonu sara ga maivua na Turaga vakai Koya. Na itovo ni rai vakaoqo e dodonu me bulataki kina na bula, vakasamataki kina na veitaratara, ka vaqaqacotaki kina na veiwekani. Sa dina sara, e sega tale na sala me vakamavotaka na kavoro ni veiwekani se dua na matatamata ka sa mavoa tu, ia, oi keda yadua ga ena noda vakatotomuria vakataucoko sara na Tui ni Vakacegu. ⁶

Meda vakananuma na sala meda tekivutaka kina edua na sasaga ena vakasama titobu, nakiti, ka lomadei meda yaco me vakataki Koya ena noda taukena nai tovo ni bula sara ga i Jisu Karisito.

Naki-ta ka Cakava

Ena vica na yabaki sa oti, o na watiqu kei au keirau a duri tu ena itekivu ni sala ki na ulunivanua cecere o Mount Fuji, e Javani. Ni tekivu me keirau kaba cake keirau a rai sara yani vakayawa ki na dela ni ulunivanua ka vakataroga se keirau rawa ni yacova.

Ni keirau toso tiko, na wawale, mosi ni viciko, kei na lailai ni cagi bula sa tekivu me vakilai. Ena neirau vakasama, sa ka bibi sara me keirau vakanamata ki na ikalawa ga ka tarava. Keirau dau cavuta, “Au na sega beka ni se yaco vakatotolo ki cake, ia au rawa ni taura nai kalawa ka tarava ena gauna sara ga oqo.” Ni toso tiko na gauna na veika ka vaka me dredre sa yaco me rawarawa mai—ena vei ikalawa yadua.

Nai matai ni kalawa ena sala meda yaco me vakataki Jisu Karisito sai koya me tiko na gagadre me da vakayacora vakakina. Na kilai vakavinaka ni ivakaro meda vakataki Koya e vinaka, ia na kila oqori e gadrevi me semati ki na dua gagadre titobu meda vakavoutaki keda, dua nai kalawa ena dua na gauna, me ulabaleta na tamata vakavuravura. ⁷ Me vakavurei na gagadre, e dodonu meda kila se ocei o Koya. E dodonu meda kila eso na ka me baleta na Nona itovo ni bula, ⁸ ka dodonu meda vakaraica na nona itovo ena ivolanikalou, ena soqoni ni sokalou, kei na veivanua tabu eso. Ni tekivu me tubu na noda kila me baleti Koya, eda na raica na Nona itovo ni bula ni ra vakaraitaka mai na tani. Oqo ena vakayaloqaqataki keda ena noda vakasaqaqara vakaikeda, ni kevaka era rawa ni rawata na tani na nona itovo ki na dua nai tagede, sa na rawa talega vei keda.

Kevaka eda dina vei keda, na Rarama i Karisito ⁹ ka tiko vei keda ena vakasolokakanataka ni tiko e dua na maliwa ena kedrau maliwa na vanua eda tiko kina me vakatauvatani kei nai tovo ni bula ka gadrevi ni iVakabula. ¹⁰ Na dina vakaoqo e bibi kevaka meda na tubu meda me vakataki Koya. E dina sara, na dina sa dua na itovo ni Nona bula.

Ena gauna saraga oqo, vei keda na doudou eda na rawa ni vakasamataka me kerea edua na lewe ni vuvale nuitaki, watida, itokani se iliuliu vakayalo se na itovo ni bula cava i Jisu Karisito e gadrevi vei keda—ka na gadrevi talega meda na tu vakarau ki na isau ni taro! Ena so na gauna eda raici keda ena iloilo ka vakatanitaka na keda irairai ka vakaraitaka vei keda nida sa rui momokiti se lila vakalevu sara mai na keda irairai dina.

O ira na itokani kei na lewe ni vuvale nuitaki era rawa ni vukei keda meda raici keda vakadodonu, ia o ira vakai ira era rawa ni raica vakatani na veika eso, dina ni ra cakava tiko ena yalo ni loloma kei na via veivuke. Me kena i lutua, sa ka bibi meda kerea talega vua na Tamada Vakalomalagi dauloloma na ka eda gadreva kei na vanua me vakanamata kina na noda i gu. Na nona rai me baleti keda e taucoko ka na vakaraitaka vei keda ena yalo loloma na noda malumalumu. ¹¹ E rairai beka o na vulica ni o gadreva na vosota vakalevu, yalomalumalumu, loloma uasivi, loloma, inuinui, gugumatua se talairawarawa me cavuti mada ga e vica. ¹²

Ena dua na gauna wale tikoga sa oti, au a sotava kina e dua na ka vakamosi-yalo, ni dua nai iliuliu ni Lotu yalololoma a vakatututaka vakadodonu ni rawa me a tiko vakalevu cake vei au e dua na mataqali itovo ni bula. Ena yalo ni loloma e a sega tale ni were ubiubi. Ena bogi oya au a wasea vei watiqu na ka au a sotava. E a yalo loloma ka veivosoti, dina ga ni a duavata kei na nona vakatutu. Na Yalo Tabu a vakadeitaka vei au ni nodrau i vakasala a vu mai vua e dua na Tamada Vakalomalagi dauloloma.

Ena rawa me veivuke vakalevu na noda vakaotiva ena loma dina na itaviqaravi ni itovo ni bula va Karisito ena wase e 6 ni Vunautaka na Noqu Kosipeli. ¹³

Ni sa oti na nomu vakayacora na vakadidike ena loma dina ka nakita mo tekivu cabeta cake na ulunivanua, ena gadrevi vei iko mo veivutuni. A vakavulica o Presitedi Russell M. Nelson ena yalo ni loloma: “Ni da sa digitaka meda veivutuni, eda sa digitaka meda veisau! Eda sa vakatara na iVakabula me vakavoutaki keda ki na keda ituvaki vinaka duadua. Eda sa digitaka meda tubu vakayalo ka ciqoma na reki—na reki ni noda vueti mai Vua. Ni da sa digitaka meda veivutuni, eda sa digitaka meda vakataki Jisu Karisito vakalevu cake.” ¹⁴

Noda yaco me vakataki Jisu Karisito ena gadrevi meda veisautaka na lomada kei na nanuma, na noda itovo ni bula sara ga, kei na noda vakayacora rawa, sa na rawa duadua ga ena loloma veivueti i Jisu Karisito. ¹⁵

Mo Kila ka Cakacakataka

Ni ko sa nakita mo veisau ka veivutuni ka sa vakasaqara na veidusimaki ena masu, vakanananu titobu ena loma dina, ka rairai veivakasalataki talega kei ira na tani, ena gadrevi vei iko mo digitaka edua na itovo ni bula ka mo vakanamata kina vakatabakidua. Ena gadrevi vei iko mo yalataka mo solia kina na igu e vakaibalebale. Na vei itovo ni bula oqo era na sega ni yaco mai vakarawarawa se vakasauri, ia ena Nona loloma, era na sosoqoni tiko mai vakamalua ni o sasaga tiko.

Na vei itovo ni bula va Karisito era isolisoli mai vua na Tamada Vakalomalagi dauloloma me vakalougatataki keda kei ira era tiko wavoliti keda. O koya gona, na noda sasaga me rawata na vei itovo ni bula oqo ena gadrevi kina na vakamamasu mai na vu ni yalo me baleta na Nona veivuke vakalou. Kevaka eda vakasaqara na vei isolisoli oqo meda veiqaravi vakavinaka cake kina vei ira na tani, ena vakalougatataki keda o Koya ena noda sasaga. Na sasagataki ni isolisoli mai vua na Kalou ena yalo ni nanumi koya ga ena tini ena vakanuinui kara kei na lomabibi.

Ni o vakanamata vakatitobu ena dua na itovo ni bula gadrevi, ka o toso tiko ki liu ena kena rawati na itovo ni bula oya, na vei itovo ni bula tale eso sa na tekivu me sosoqoni mai vei iko. Ena rawa beka vua e dua e vakanamata tiko vakatitobu ki na loloma uasivi me na sega ni tubu ena loloma kei na yalomalumalumu? Ena rawa beka vua e dua e vakanamata tiko ki na talairawarawa me na sega ni rawata na gugumatua kei na inuinui e levu cake? Na nomu sasaga vagumatua mo taukena e dua na itovo ni bula ena yaco me na laveta cake na nodra bula era tu wavoliti iko.

Vola ka Tomana Tiko

E ka bibi vei au ena noqu sasaga meu vakataki Koya, sai koya meu vola na veika au sotava kei na veika au sa vulica tiko. Ni dua na Nona itovo ni bula sa tiko e loma sara ni noqu vakanananu niu vuli tiko, na ivolanikalou sa yaco me vou niu raica na ivakaraitaki ni nona itovo ni bula ena Nona ivakavuvuli, na Nona veiqaravi, ka vei ira Nona tisaipeli. Na mataqu sa yaco talega me vakanamata vakalevu cake ena kilai ni itovo ni bula vei ira na tani. Au sa raici ira oti eso na tamata taleitaki e loma kei na taudaku ni Lotu ka tiko vei ira na Nona vei itovo ni bula. Era sa ivakaraitaki kaukauwa sara ni sala e rawa kina vei ira na itovo ni bula vaka oya mera vakaraitaki mai vei ira na tamata ena Nona loloma uasivi.

Me laurai na tubu dina, ena gadrevi vei iko mo tomana tikoga na sasaga. Me vaka ga ni gadrevi na vakavakarau ni bera na kabati ni dua na ulunivanua, na vosota kei na gugumatua ni vakacagau tiko, sa vaka kina nai lakolako oqo ena gadreva na sasaga vakaidina kei na soli bula. Na bula va Karisito dina, sai koya noda sasaga me yaco me vakataka na noda Turaga, ka dau gadrevi tu ga kina na noda igu vinaka duadua e veigauna. ¹⁶

Oqo e dua na vosa ni qaqarauni lekaleka. Na ivakaro mo yaco mo vakataki Koya e sega ni nakiti mo vakila kina ni beitaki iko na lomamu, sega ni kilikili, se sega ni lomani. Na veika sotavi kece ena noda bula vakayago e sa baleta na tubu, vakatovolea, tawa yacova, kei na rawata. Keirau na vinakata vakalevu beka kei watiqu me keirau bobo ga ka kauti keirau cake ena sala e veivakurabuitaki ki na dela ni ulunivanua, ia oya e sega ni salavata kei na inaki ni bula oqo.

O sa vinaka cake, ko sa lomani, ia e sega ni kena i balebale ni o sa taucoko sara. E tiko na cakacaka me vakayacori ena bula oqo kei na bula ka tarava. Ena Nona veivuke vakalou duaduaga ena rawa meda toso kina ki liu ka yaco me vakataki Koya.

Ena veigauna oqo, ni “na [vaka me] yavavala na ka kecega; ka … [vaka me] rere na tamata kecega,” ¹⁷ nai wali duadua ga, sai koya meda tovolea meda vakataka na iVakabula, ¹⁸ na Dauniveivueti ¹⁹ ni tamata kecega, na Rarama kei Vuravura, ²⁰ ka vakasaqarai Koya a tukuna, “Oi au na sala.” ²¹

Au kila ni noda yaco me vakataki Koya ena Nona veivuke kei na kaukauwa vakalou e rawa ena dua nai kalawa ki na dua tale. Ke sega ni vakakina, ke a sega ni solia o Koya vei keda na ivakaro oqo. ²² Au kila oqo—vakatikina baleta niu raica na Nona itovo ni bula ena vuqa sara vei kemuni. Ena veika oqo au sa vakadinadina kina ena yaca i Jisu Karisito, emeni.