Karona na Veisiga ni Mataka ena Vakabauta
Ena lagilagi na veisiga ni mataka vei ira era sa vakavakarau tu ka tomana tiko na vakavakarau me ra iyaragi ni cakacaka e na liga ni Turaga.
Sa dua dina na yakavi guigui lecavi dredre oqo. Kemuni na ganequ lomani, au doka na tiko kei kemuni nikua. Au sa dau nanumi kemuni e veigauna ena veivula sa oti yani oqo. Ko ni sa uasivi cake mai na walu na milioni qaqa. E sega walega ni ko ni lewelevu ia ko ni kaukauwa vakayalo mo ni veisautaki vuravura. Au sa raica nomuni cakava tiko o ya ena gauna ni matedewa totolo oqo.
Eso vei kemuni e kurabui ni ko ni sa vakasaqara voli na veika ni bula se dua na cakacaka vou. E vuqa era sa vakavulici ira na gone ka raici ira na tiko voleka. Eso era sa ciqomi ira totolo na daukaulotu i nodra vale e sega ni namaki, ka so sa vukica na nodra itikotiko me koronivuli ni vuli kaulotu. Ko ni sa vakayagataka na tekinolaji me sema ki na vuvale kei na itokani, qaravi ira era tiko duadua, ka vulica na Lako Mai, Mo Muri Au kei ira eso. Ko ni sa kunea na sala vou me rekitaki na Siga ni Vakacecegu. Ka ko ni sa cakava na matavulo e veitaqomaki—ka yaco na milioni na kedra liwiliwili!
Ena yalololoma, e lako na yaloqu ki na vuqa na marama e vuravura sa mai takali na nodra daulomani. Keimami lolosi vata kei kemuni. Ka masulaki kemuni. Keimami sa vakacaucautaki ka masulaki ira kece era cakacaka vagumatua me taqomaki nodra bula na tani.
Oi kemuni talega na goneyalewa ko ni sa rui totoka. Dina ga ni itukutuku raraba sa luvuci tu ena veiduidui eso, e vuqa vei kemuni sa kunea na sala mera vakayaloqaqataki eso ka wasea na rarama ni iVakabula.
Kemuni ganequ, ko ni sa yaloqaqa dina kece sara! Au qoroya na nomuni kaukauwa kei na vakabauta. Ko ni sa vakaraitaka ni ena gauna dredre, ko ni yaloqaqa tikoga ena toso ki liu. Au lomani kemuni, kau sa vakadeitaka ni Turaga sa lomani kemuni ka sa raica na cakacaka cecere ko ni cakava tiko. Vinaka vakalevu! Vakadua tale, ko ni sa vakadinadinataka ni ko ni sa inuinui dina kei Isireli!
Ko ni sa taukena na inuinui a kaya o Peresitedi Gordon B. Hinckley ena gauna a vakatakila kina “Na Matavuvale: Ai Vakaro ki Vuravura Raraba” ena 25 na yabaki sa oti ena soqoni raraba ni iSoqosoqo ni Veivukei ena Sepiteba 1995. 1 Sa ka bibi sara ni a digitaka me vakatakila na ivakaro raraba oqo kivei ira na marama ena Lotu. Ni cakava o ya, sa vauca kina o Peresitedi Hinckley e dua na veivakauqeti tawasosomitaki rawa ni marama ena ituvatuva ni Turaga.
Au taleitaka, ena gauna oqo meu kila na veika ko ni sa vulica ena yabaki oqo. Ko ni sa voleka beka yani vua na Turaga, se o vakila ni ko sa yawa mai Vua? Na cava sa cakava na veigauna nikua mo nanuma kina na veisiga ni mataka?
E ka dina, sa tukuna na Turaga na noda siga oqo ena vosa matata. A vakaroti keda ni noda siga oqo “ena kani yatedra na tamata [ena] rere” 2 ia ke rawa ke ra na vakacalai talega na digitaki. 3 A kaya vua na Parofita o Josefa Simici ni “na kau tani [mai kina] na vakacegu e vuravura” 4 kei na veika rarawa ena yaco vei ira na kai vuravura. 5
Ia na Turaga sa vakarautaka talega e dua na raivotu baleta na totoka ni itabagauna oqo. A vakauqeta na Parofita o Josefa Simici me vakaraitaka ni “cakacaka ni … iotioti ni siga oqo, sa dua e vakaitamera sara. … Na kena lagilagi e sega ni tukuni rawa, kei na kena totoka e sega ni uasiviti rawa.” 6
Ia oqo, na totoka e rairai sega ni vosa o na digitaka beka mo vakamacalataka kina na vica na vula sa oti oqo! Meda sa qai cakava vakacava na veiparofisai dina kei na ivakaro lagilagi me baleta na noda gauna nikua? Na Turaga sa tukuna vei keda na kena rawarawa, ia e kaukauwa, ni veivakadeitaki: “Kevaka dou sa vakarau vakavinaka tu, dou na sega sara ni rere.” 7
Cecere na yalayala oqo! Oqo na kena ena veisautaka dina na noda raica na noda veimataka. Au a rogoca walega oqo e dua na marama e titobu nona ivakadinadina e kaya ni mate dewa raraba, vata kei na uneune mai na bucabuca e Salt Lake, a vukea me kila ni a sega ni vakavakarau me vaka a nanuma o koya. Niu a taroga ke tukuna tiko o koya na nona maroroi kakana se nona ivakadinadina, a dredre ga ka kaya, “Io!”
Kevaka sa idola ni noda karona na itabagauna oqo kei na noda veimataka ena vakabauta na vakavakarau, eda na vakavakarau vinaka cake vakacava?
Ena veitabayabaki, era sa vakauqeti keda na parofita ni Turaga meda maroroi kakana, wai, kei na ilavo me baleta na gauna ni leqa. Na mate dewa raraba sa yaco tiko sa vaqaqacotaka na vuku ni ivakasala o ya. Au sa sureti kemuni mo ni tu yani ka vakavakarau vakayago. Ia au kauwai vakalevu cake baleta na nomuni vakavakarau vakayalo kei na vakasama.
Ena kena oqo, eda sa rawa ni vuli vakalevu mai vei Kavetani Moronai. Ni iliuliu tiko ni mataivalu ni Nifaiti, sa sotava tiko na kaukauwa veisaqasaqa sa kaukauwa cake, lewelevu, ka ca sara. Ia, sa qai vakarautaki ira na nona tamata o Moronai ena tolu na sala bibi.
iMatai, a vukei ira mera tauyavutaka na veivanua mera na taqomaki kina—na “bai ni nodra koro” a vakatoka vakaoya. 8 iKarua, a vakarautaka “na nodra vakasama na nona tamata mera yalodina tiko ga vua na Turaga.” 9 Kei na ikatolu, a sega ni muduka na nona vakarautaki ira na nona tamata—vakayago se vakayalo. 10 Meda raica mada na tolu na ivakavuvuli oqo.
iVakavuvuli Naba Dua: Vakarautaki na Bai ni Koro.
A viribaita o Moronai na koro kecega vaka Nifaiti ena bai vatu, itikotiko ni valu, kei na lalaga. 11 Ni ra sa valuti ira mai na Leimanaiti, era “kurabui dina sara vakalevu, ena nodra sa rui yalomatua na Nifaiti ena nodra viria vaqaseqase na bai ni nodra koro.” 12
Sa vakakina, ni wavoliti keda, na veika ca, sa gadrevi meda viria na bai ni noda koro, vakayago ka vakayalo. Ni yaco na nomu itikotiko me nomu vanua taqomaki ni vakabauta—e dau tiko kina na Yalo—sa yaco na nomu itikotiko me imatai ni isasabai.
Sa vakakina, na veiiteki kei Saioni era sa “ivakaruru mai na cava” 13 baleta ni ra sa liutaki maivei ira sa taura tu na idola ni matabete era cakacaka ena lewa ni matabete. Ni ko tomana tiko mo muria na nodra ivakasala sa lewa na Turaga mera dusimaki iko, o na vakila na veitaqomaki cecere.
Na valetabu—na vale ni Turaga—sa vanua ni veitaqomaki ka sega tale e dua. E kea, kemuni na marama ko ni sa vakaedaumeni ena kaukauwa ni matabete mai na veiyalayalati tabu ni matabete o sa cakava. 14 E kea, na nomuni vuvale sa vauci ki na tawamudu. Ena yabaki mada ga oqo, ni a mai yalani vakabibi na curu ki na noda valetabu, na nomuni edaumeni sa vakatara tikoga mo ni taura na kaukauwa ni Kalou ni ko doka tiko na nomu veiyalayalati kei Koya.
Sa rawa ni tukuni, na vanua ni veitaqomaki sa veivanua o na vakila kina na kaukauwa ni Yalo Tabu ka dusimaki mai Vua. 15 Ni sa tiko vata kei iko na Yalo Tabu, sa rawa mo vakavulica na dina, ena gauna mada ga ni saqati ena vakasama eso. Ka sa rawa mo vakasamataka vakatitobu na taro titobu baleta na kosipeli ena ituvaki ni ivakatakila.
Au sa sureti kemuni, na ganequ lomani, mo ni tara e dua na itikotiko sa vanua ni veitaqomaki. Kau sa vakavouia na noqu sureti kemuni mo ni toroya cake na nomuni kila na kaukauwa ni matabete kei na veiyalayalati kei na kalougata ni valetabu. Ni tiko na vanua veitaqomaki mo na laki dro kina ena vukei iko mo karona na veimataka ena vakabauta.
iVakavuvuli Naba Nua: Vakarautaka na Nomu Vakasama mo Yalodina vua na Kalou.
Sa mai vakayacori oqo e dua na cakacaka levu me balavu cake na bula kei na loma ni Valetabu e Salt Lake.
Eso era vakataroga na inaki ni kena caka na cakacaka vakaitamera vakaoqo. Ia, ena gauna a sotava kina na bucabuca e Salt Lake Valley e dua na uneune e 5.7 na kena kaukauwa ena itekivu ni yabaki oqo, na valetabu vakairogorogo oqo a sakure sara ka lutu e ra na biukila ena ivakatakarakara ni agilosi o Moronai! 16
Me vaka ga na yavu vakayago ni Valetabu e dodonu me tu kaukauwa sara me vorata rawa na tavuki ni draki, na noda yavu vakayalo e dododnu me kaukauwa vinaka. Ena gauna ni uneune vakaibalebale sa kureta kina na noda bula, sa rawa meda “tudei sara ka kakua ni yavalati rawa” baleta ni da sa vakabauta. 17
Sa vakavulica vei keda na Turaga na sala meda vakatubura kina na noda vakabauta ni da vakasaqara na “kila ka, io ena vuli kei na vakabauta.” 18 Eda sa vaqaqacotaka na noda vakabauti Jisu Karisito ni da saga meda maroroya na Nona ivakaro ka “dau nanumi koya.” 19 Me ikuri, na noda vakabauta ena tubucake ena veigauna eda cakacakataka kina na noda vakabauti Koya. Oqori na ibalebale ni vuli ena vakabauta.
Me vakataka, na gauna yadua eda vakabauta kina meda talairawarawa ki na lawa ni Kalou—ni ra beci keda mada ga na veinanuma kilai levu—se gauna yadua eda vorata kina na marau se vakasama e marautaka na voroki ni veiyalayalati, eda sa cakacakataka tiko na noda vakabauta, ka yaco oqo me vakatubura noda vakabauta.
Me ikuri, e vica na ka e tara cake na vakabauta mai na noda dau dromuci keda ena iVola i Momani. E sega na ivola e vakadinadinataki Jisu Karisito ena kaukauwa kei na dodonu me vakaoqo. Sai ira na parofita, ni ra uqeti mai vua na Turaga, era a raica mai na noda siga oqo ka digitaka na vunau kei na dina ena vukei keda vakalevu. Na iVola i Momani sa noda idusidusi veivakabulai ena siga oqo.
E dina, na noda taqomaki cecere e yaco mai ni da vakaivuataki keda vua na Tamada Vakalomalagi kei Jisu Karisito. Na bula ke sega na Kalou sa bula sa sinai ena rere. Na bula vata kei na Kalou sa bula sa sinai ena vakacegu. Oqo sa baleta ni kalougata vakayalo sa yaco vei ira na yalodina. Na ciqomi ni ivakatakila ki na tamata yadua sa dua vei ira na kalougata cecere oqori.
Sa yalataka na Turaga ni kevaka meda kerea, sa rawa meda na ciqoma “na ivakatakila ena ivakatakila.” 20 Au yalataka ni ko toroya cake na nomu igu mo ciqoma na ivakatakila, na Turaga ena vakalougatataki iko ena veidusimaki torocake ni nomu bula kei na isolisoli tawayalani ni Yalo.
iVakavuvuli Naba Tolu: Kakua ni Muduka Nomu Vakavakarau
Ena gauna mada ga ni yaco na veika vinaka, a tomana tikoga na o Kavetani Moronai nodra vakarautaki na nona tamata. E sega ni muduka o koya. A sega ni tiko marau voli.
O vunimeca e sega ni muduka na nona ravuravu. Meda sa qai kakua ni muduka na vakavakarau! Na levu ga ni noda bula rawati keda—vakayago, vakasama, kei na yaloda—na levu ni noda vakavakarau meda tarova na ravuravu tikoga nei Setani.
Kemuni na marama, ko ni sa kenadau ni tauyavutaki ni vanua ni veitaqomaki baleti kemuni kei ira ko ni lomana. Me ikuri, ko ni sa vakaedaumeni vakalou mo ni rawa ni vakavure vakabauta vei ira eso ena sala veiuqeti eso. 21 Ka ko ni sa sega ni muduka. Ko ni sa vakaraitaka tale oqori ena yabaki oqo.
Yalovinaka, ni toso tikoga! Na nomuni qaqa ena veitaqomaki ena nomuni itikotiko ka vakatiko vakabauta e lomadra nomuni daulomani era na kunevinaka kina na itabatamata e tarava.
Kemuni na ganequ lomani, sa tiko e levu sara na veika meda kakavaka yani! Na Turaga sa mai vakatikori kemuni eke baleta ni kila na nomuni gugumatua mo ni tudonutaka na veimedreyaki ni mua ni iotioti ni gauna oqo. E kila o Koya ko ni na umanaka na totoka ni Nona cakacaka ka guta mo ni vukea mera na yaco.
Au sega ni kaya ni veimataka era na rawarawa, ia au yalataka vei kemuni ni veimataka era na lagilagi vei ira sa tu vakarau kei ira era tomana tiko mera vakarau iyaya ni cakacaka ena liga ni Turaga.
Kemuni na ganequ lomani, meda sa kakua walega ni gugumatua ena gauna oqo. Meda sa qai karona na veimataka ena vakabauta! Na veigauna dredre sa madigi tiko meda tubu vakayalo. Era sa gauna ni noda veiuqeti mera na titobu cake sara mai na veigauna malumu.
Au sa yalataka ni da tauyavutaka na vanua ni veitaqomaki, vakarautaka noda vakasama meda yalodina vua na Kalou, ka sega ni mudu na vakarau, na Kalou ena vakalougatataki keda. Ena “vakabulai [keda] vakaidina; io, [ena] vosa ni veivakacegui ena [yaloda], ka [na] vakaukauwataka na [noda] vakabauta, sa …vakavuna me [da rawa] ni vakanuinui ki na veivuke mai vei koya.” 22
Ni ko vakavakarau mo karona na veimataka ena vakabauta, na veiyalayala oqo ena nomuni! Sa noqu ivakadinadina oqo, vata kei na noqu loloma veikemuni, kau sa nuitaki kemuni tiko, ena yaca tabu i Jisu Karisito, emeni.