E veivosaki tiko kei Konilio o Pita

17–23 ni Jiulai

Cakacaka 10–15

“Ia Sa Tubu Ga na Vosa ni Kalou Me Levu Sara Mai”

Vulica na Cakacaka 10–15 ena masumasu, ka vakasamataki ira na gone ena nomu kalasi. Na cava o kunea ena veiwase oqo e vakauqeti iko mo vakavulica vei ira na gone?

ivakatakilakila ni veiwasei

Sureta na Veiwasei

Me vukea nodra wasea na gone na veika era vulica ka vakila tiko, e rawa ni o kerei ira me ra wasea na veika era cakava tiko me vakaraitaka ni ra vakabauti Jisu Karisito.

ivakatakilakila ni veivakavulici

Vakavulica na iVunau: Gone Sobu

Cakacaka 10:34–35

Na Tamada Vakalomalagi e lomani ira taucoko na Luvena.

E dua na ivunau bibi ka rawa sara mada ga ni ra kila na gone lalai sa ikoya ni tamata kece e luvena na Kalou ka lomani ira kece na Luvena o Koya.

iTaviqaravi e Rawa ni Caka

• Vakaraitaka na iyaloyalo Na Karisito kei Ira na Gone mai na Veiyasai Vuravura (iVola ni iYaloyalo Vakosipeli, naba 116) ni o wilika na Cakacaka 10:34–35. Vakamacalataka ni ena gauna nei Pita eso na tamata era vakabauta ni veivakalougatataki ni kosipeli e sega ni baleta na tamata kecega. Ia a vulica o Pita ni lomani ira kece na Luvena na Kalou ka vinakata o Koya me ra vulica kece sara na kosipeli.

• Sureti ira na gone me ra droinitaka e dua na kedra iyaloyalo. Ni ra wasea na kedra iyaloyalo, veivosakitaka e dua na ka o taleitaka me baleta na gone yadua. Wasea nomu ivakadinadina ni lomani ira yadua kei ira kece na Luvena na Tamada Vakalomalagi, se vakacava na kedra irairai se evei na vanua era lako mai kina.

• Lagata vata kei ira na gone e dua na sere me baleta na lomani ira na tani—me vakataka na, “Meu Lako Tu kei Iko” (iVolanisere ni Gonelalai, 78). Sureti ira na gone me ra wasea na sala eso e rawa ni ra vakaraitaka kina na loloma vei ira na tamata kecega, me vaka ga a vakayacora o Jisu.

• Dusia na gone yadua ka kaya, “O Tamada Vakalomalagi e lomani [yacana].” Me ra qai veivukevuke na gone ena nodra veidusi ka cavuta na malanivosa oqo.

Cakacaka 11:26

Koi au e dua na lotu va-Karisito baleta ni’u vakabauti ka muri Jisu Karisito.

Mo vukei ira vakacava na gone me ra vulica na kena ibalebale ni ra sa lotu va-Karisito?

iTaviqaravi e Rawa ni Caka

• Wilika na Cakacaka 11:26 vei ira na gone, ka sureti ira me ra tucake ni ra rogoca ni o cavuta na vosa itokani i Karisito. Tarogi ira na gone se cava nodra nanuma ni sa kena ibalebale me dua e lotu va-Karisito. Vakamacalataka ni dua e vakabauti ka dau muri Jisu Karisito sa vakatokai me lotu va-Karisito, okoya eda sa lotu va-Karisito vakakina.

• Lagata kei ira na gone e dua na sere me baleta na muri Jisu Karisito, me vaka na “Au Lewe ni Lotu I Jisu Karisito” (iVolanisere ni Gonelalai, 48). Eda na vakaraitaka vakacava ni da sa daumuri Jisu Karisito ka lewena na Nona Lotu? Vukei ira na gone mera vakasamataka na veika e rawa ni ra cakava mera muri Jisu kina e vale, e koronivuli, kei na veivanua tale eso.

masumasu tiko na marama kei na goneyalewa

E lomani keda o Tamada Vakalomalagi ka na sauma noda masu.

Cakacaka 12:1–17

Na Tamada Vakalomalagi sa dau rogoca ka sauma na masu.

Na italanoa ni agilosi ka a sereki Pita mai valeniveivesu e vakavulica vakaukauwa ni dau sauma na Tamada Vakalomalagi na masu.

iTaviqaravi e Rawa ni Caka

• Sureti ira na gone me ra dramataka na italanoa ni nona sereki mai valeniveivesu o Pita ena Cakacaka 12:1–17 ni o vakalekalekataka na italanoa. A sauma vakacava na Tamada Vakalomalagi na nodra masu o ira era a masulaki Pita tiko?

• Lagata e dua na sere ni masu—me vaka na, “Keimami Cuva Masu No” (iVolanisere ni Gonelalai, 18b)—ka vakatura na ivukivuki eso me salavata kei na qaqana ka na rawa ni vukea nodra vulica na gone na ivakarau ni masu. Sureti ira na gone me ra wasea na ivakaraitaki ni veika e rawa ni ra vakavinavinakataka vei Tamada Vakalomalagi ka kerea Vua ena masu.

• Vakaraitaka na kedra iyaloyalo na tamata era masu tiko (raica, me vaka na, iVola ni iYaloyalo Vakosipeli, naba 111–12) ni o wasea e dua na gauna a sauma kina na Tamada Vakalomalagi na nomu masu.

ivakatakilakila ni veivakavulici

Vakavulica na iVunau: Gone Qase Cake

Cakacaka 10:34–35; 15:6–11

“Sa sega ni digitaki ira vakailoa na tamata na Kalou.”

Era gadreva me kila na gone o vakavulica ni o Tamada Vakalomalagi e lomani ira kece na Luvena, se vakacava tu na kedra irairai, se ra lako mai vei, se digidigi cava era cakava.

iTaviqaravi e Rawa ni Caka

• Tarogi ira na gone kevaka e rawa ni ra tukuna nona ivakarau e dua na tamata ena nodra raici koya ga se nodra rawa ni kila na vanua e lako mai kina. Me vaka na Cakacaka 10:35, e kila vakacava na Kalou kevaka e dua na tamata sa “vinaka vua”?

• Wilika na Cakacaka 10:34–35; 15:6–11 vata kei ira na gone. Vakamacalataka ni ena gauna nei Pita, era vakabauta na Jiu ni sega ni vakadonuya na Kalou o ira era sega ni Jiu (o ira oqori a vakatokai na Veimatanitu Tani). Ia qai vakavulica na Kalou vei Pita ni sa lomani ira kece na Luvena na Kalou, o ira ruarua na Jiu kei na Veimatanitu Tani. Lagata vata na “Au Luve ni Kalou” (iVolanisere ni Gonelalai, 2). Sureti ira na gone me ra sosomitaka ena dui yacadra na vosa me vaka na au se meu.

• Sureti ira na gone me ra wasea e dua na ka e duatani kina e dua na gone ena kalasi. Vakamacalataka ni iyatuvosa “Sa sega ni digitaki ira vakailoa na tamata na Kalou” sa kena ibalebale ni lomani ira kece na luvena na Tamada Vakalomalagi, ka baleta ni sa lomani ira, e vinakati ira kece na Luvena o Koya me ra rogoca na kosipeli.

Cakacaka 11:26

Na tamata lotu va-Karisito sa ikoya e dua e vakabauti ka muri Jisu Karisito.

E rawa vakacava mo vukei ira na gone me ra kila ni nodra vosa kei na nodra ivalavala sa vakaraitaka ni ra lotu va-Karisito?

iTaviqaravi e Rawa ni Caka

• Sureti ira na gone me ra wilika na Cakacaka 11:26; 3 Nifai 27:3–8; kei na Vunau kei na Veiyalayalati 115:4. Vola Lotu va-Karisito ena papa ka toqa toka na tikina e tukuna “Karisito.” Tarogi ira na gone se cava nodra nanuma ni sa kena ibalebale me dua e lotu va-Karisito.

• Kerei ira na gone me ra wasea na yaca ni ilawalawa duidui era lewena, me vaka na nodra matavuvale se matanitu. Sureti ira me ra wasea na vuna era vakavinavinakataka kina ni ra lotu va-Karisito ka lewena na Lotu i Jisu Karisito ni Yalododonu Edaidai. Me da vakaraitaka beka vakacava vei ira na tani ni da lotu va-Karisito?

• Vakaraitaka e vica na iyaya se iyaloyalo e matataka na dina eso e duatani ki na Lotu i Jisu Karisito, me vaka na iyaloyalo ni vakalesui mai ni matabete (raica na iVola ni iYaloyalo Vakosipeli, naba 93–94). Kerea e dua na gone me digitaka e dua na iyaya se iyaloyalo ka vakamacalataka se sa dua na veivakalougatataki vakacava ki na noda Lotu na ka oqori. Vakamacalataka ni dina ga ni o ira na lotu va-Karisito e vuravura era lewena e vuqa na veimatalotu duidui, o keda eda lewena na Lotu vata ga a tauyavutaka o Jisu Karisito e vuravura.

• Vakaraitaka na vidio “True Christianity” (ChurchofJesusChrist.org). Sureti ira na gone me ra droinitaka na veika era rawa ni cakava me ra lotu va-Karisito dina kina.

Cakacaka 12:1–17

Ni’u masu ena vakabauta, ena sauma mai na Tamada Vakalomalagi.

Vakasamataka mada na gauna a sauma kina nomu masu na Tamada Vakalomalagi. Mo na vakayagataka vakacava na veika a yaco oqori mo vakavulica kina vei ira na gone ni Tamada Vakalomalagi ena rogoca ka sauma nodra masu ena Nona ivakarau kei na gauna?

iTaviqaravi e Rawa ni Caka

• Sureti ira na gone me ra matanataka na italanoa ni agilosi ni sereki Pita mai vale ni veivesu ni wilika tiko e dua tale na gone na italanoa ena Cakacaka 12:1–17.

• Tarogi ira na gone na cava nodra nanuma ni sa ibalebale ni “daumasulaki koya tiko” (Cakacaka 12:5). A saumi vakacava na nodra masu na tamata? Sureti ira na gone me ra wasea na veika era sotava ka a sauma kina o Tamada Vakalomalagi na nona masu e dua se nona matavuvale. Sa rawa talega mo wasea e dua na gauna a sauma kina o Koya na nomu masu. E rawa ni o okata na veika o sotava ka yaco mai kina na isaunitaro ena dua na sala sega ni namaki. Vakadinadinataka ni lomani keda na Kalou, ka na sauma o Koya na noda masu ena ivakarau kei na gauna e vinaka duadua vei keda.

ivakatakilakila ni vuli

Vakauqeta na Vuli e Vale

Sureti ira na gone me ra cakava e dua na ka e vakananuma vei ira na veika era sa vulica nikua, me vaka na ivakananumi ni masu.

Vakatoroicaketaki na Noda Veivakavulici

Vakadinadinataka na veivakalougatataki yalataki. Ni o sureti ira na gone ena Lalai me ra bulataka e dua na ivakavuvuli, wasea na yalayala eso sa vakayacora na Kalou vei ira era bulataka na ivakavuvuli oya. Me kena ivakaraitaki, e rawa ni o wasea na ivakadinadina ni veivakalougatataki yalataki o sa ciqoma ni ko a masu ena vakabauta.

tabana ni itaviqaravi: Koi au e dua na Lotu va-Karisito baleta ni’u vakabauta ka muri Jisu Karisito