e vuqa na tamata ena bati ni uciwai ka papitaiso ena uciwai

Siga ni Penitiko, mai vei Sidney King

3–9 ni Jiulai

Cakacaka 1–5

“Dou na Qai Dautukuni Au”

Tekivuna nomu vakavakarau ena wiliki ni Cakacaka 1–5. Segata ena yalomasumasu mo kila na nodra gagadre na gone o vakavulica. Na Lako Mai, Mo Muri Au—Me Baleti Ira na Tamata Yadua kei na Matavuvale kei na ituvatuva oqo sa rawa talega ni vukei iko.

ivakatakilakila ni veiwasei

Sureta na Veiwasei

Vola O cei koi au? ena papa. Vakarautaka e vica na itukutuku baleti Pita ka tarogi ira na gone se sa baleti cei na itukutuku. Na cava tale era kila me baleti Pita?

ivakatakilakila ni veivakavulici

Vakavulica na iVunau: Gone Sobu

Cakacaka 1:1–11

Sa liutaka na Nona Lotu o Jisu Karisito mai vei ira na parofita kei na iapositolo.

Na vulici ni ivakarau a liutaka kina na Nona Lotu e liu na iVakabula mai vei ira na iapositolo sa rawa ni vukea na nodra rawata na gone na ivakadinadina me baleti ira na parofita kei na iapositolo ni noda gauna.

iTaviqaravi e Rawa ni Caka

• Vakaraitaka na tabana taucoko ni iyaloyalo ena ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale. Tarogi ira na gone na cava era nanuma era rai tiko kina ki lomalagi na tamata. Vakalekalekataka na itukutuku mai na Cakacaka 1:1–11. (Raica talega na “Wase e 55: Liutaka na Lotu o Iratou na iApositolo,” e Na iTukuni ena na Veiyalayalati Vou, 145–47, se na kena vidio ena ChurchofJesusChrist.org.) Sureta e dua na gone me taura cake tu e dua na kedra iyaloyalo na iApositolo edaidai. O cei e vukei Jisu Karisito me liutaka na Lotu ni sega ni tiko e vuravura o Koya?

• Qitora e dua na qito ni vakasotari vata e rua na wase iyaloyalo ni Mataveiliutaki Taumada kei na iApositolo Le Tinikarua era bula tiko. Ni sa vakasotari rawa e dua, wasea na yacana na iApositolo se Peresitedi kei na dua na ka baleti koya.

• Ena daku ni dua na iyaloyalo ni Peresitedi ni Lotu, vakabira kina na iyaloyalo lalai ni veika e vakavulica o koya, me vaka na iVakabula, papitaiso, se dua na valetabu. Me ra veivukevuke na gone yadua ni raica e dua vei ira na iyaloyalo ka tukuna vei ira na vo ni kalasi, “Sa vakavulici keda na parofita me baleta na [ulutaga ena iyaloyalo].” Vakadinadinataka ni o ira na parofita kei na iapositolo era vakavulica vei keda na veika e vinakata o Jisu meda kila ka cakava.

Cakacaka 3:1–10

Sa rawa ni vakalougatataki ira na tani na Tamada Vakalomalagi mai vei au.

Na cava o rawa ni cakava mo vukei ira kina na gone me ra kila na sala eso e rawa ni ra vakalougatataki ira kina na tu wavoliti ira? Vukei ira me ra vuli mai na ivakaraitaki nei Pita kei Joni ena nodrau vakabula na tamata lokiloki.

iTaviqaravi e Rawa ni Caka

• Sureti ira na gone me ra matanataka na italanoa ena Cakacaka 3:1–10, me vaka na dodoki ni ligadra ena kere ilavo kei na lade ena reki. A vakalougatataka vakacava na tamata ka sega ni lako rawa na Tamada Vakalomalagi?

• Kauta mai e dua na kato era tu kina na iyaloyalo ka matataka na sala eso eda rawa ni vakalougatataki ka qaravi ira kina na tani. Me ra veivukevuke na gone ni digitaka na iyaloyalo mai na kato ka wasea na ivakarau era rawa ni vakalougatataki ira kina na tani ena sala oya.

• Kerei ira na gone me ra wasea e dua na gauna era a vukea kina e dua.

Cakacaka 5:1–11

Au rawa ni dau yalodina.

Era a dau wasea na vakabauta Vakarisito taumada na veika a tu vei ira mera veivukei kina vakai ira. O ira era a taukei ni qele era volitaka ka solia na ilavo vei ira na iApositolo me wasei vei ira na Yalododonu me vaka nodra gagadre. Erau a sega ni yalodina o Ananaiasa kei Savaira ena nodrau isolisoli, ni rau nanuma ni rawa ni rau lawakitaki ira na italai ni Turaga.

iTaviqaravi e Rawa ni Caka

• Vukei ira na gone me ra matanataka na kedrau italanoa o Ananaiasa kei Savaira. Vakamacalataka ni dina ga eda na sega ni mate ni da lasu, e vakaraitaki ena italanoa oqo na bibi ni noda dau yalodina vua na Tamada Vakalomalagi.

• Lagata vata e dua na sere baleta na yalodina, me vaka na “I Believe in Being Honest” (Children’s Songbook, 149). Vukei ira na gone me ra kila ni da yalodina sa ikoya me da dautukuna ga na ka dina ka da sega ni dau taura na veika e nona tale e dua.

• Vakayagataka na matakau pepa eso me matanataki kina na gauna eso e yalodina se sega ni yalodina kina e dua. Kerei ira na gone me ra tucake kevaka a yalodina tiko na tamata oya se dabe ena fuloa kevaka a sega ni yalodina tiko o koya. Vukei ira na gone me kila na vuna e bibi kina me da dau yalodina.

ivakatakilakila ni veivakavulici

Vakavulica na iVunau: Gone Qase Cake

Cakacaka 1:8, 22–26

O Jisu Karisito sa liutaka na Nona Lotu mai vei ira na parofita kei na iapositolo.

O na vukei ira vakacava na gone me ra kila ni ra sa liutaka tiko na Lotu ni iVakabula nikua na parofita kei na iapositolo, me vaka ga ena gauna makawa?

iTaviqaravi e Rawa ni Caka

• Vola ena papa E liutaka vakacava o Jisu Karisito na Lotu ni sa sega ni tiko o Koya e vuravura? Sureti ira na gone me ra vakarogoca na isau ni taro ni o wilika na vosa ni iVakabula kivei ira na iApositolo ena Cakacaka 1:8. Vukei ira na gone me ra kila ni sa digitaki ira na parofita kei na iapositolo o Jisu me ra liutaka na Lotu nikua, me vaka a vakayacora ena gauna makawa.

• Wilika vata na Cakacaka 1:22-26. Ni vakatakila vakalasi, na ivakarau era kaciva kina e dua na iapositolo vou na iApositolo.

• Ni se bera na gauna, kerea e dua na gone kei na nona itubutubu me vulica mai me baleta e dua na iApositolo se qai kacivi vou ga (e rawa ni ra raica na itukutuku me baleti ira na iApositolo ena “Quorum of the Twelve Apostles,” ChurchofJesusChrist.org). Sureta na gone oqori me wasea na ka sa vulica vei ira na kalasi ka, kevaka e rawa, na ka e a tukuna na iApositolo me baleta na nona ilesilesi ena itukutuku ni imatai ni nona koniferedi raraba.

Era dabe vata na iApositolo ka veivosaki tiko

Era a liutaka na Lotu na iApositolo ni oti na lako cake ki lomalagi i Jisu.

Cakacaka 2:36–47

Na Yalo Tabu e dau vakadinadinataka ki lomaqu na dina ni kosipeli.

Ni ra vulica na gone me ra kila na ivakarau e dau vosa kina vei ira na Yalo Tabu, era na vakauqeti me ra vakarorogo ka cakacakataka na veivakauqeti era ciqoma.

iTaviqaravi e Rawa ni Caka

• Wilika vata na Cakacaka 2:36-37. E vakaevei na ka eda vakila ni dau tukuna e dua na ka ki na yaloda na Yalo Tabu?

• Ni cakava vata vakalasi e dua na ivolakabi ka volai tu kina Na cava me da cakava? e cake. Dau vakaraitaka e veimacawa na ivolakabi, ka vakuria na sala eso era rawa ni cakacakataka kina na gone na ka era vulica ena lesoni ni veimacawa yadua.

• Sureti ira na gone me ra wilika na Cakacaka 2:41–47 ka vakaraica na veika vinaka era a cakava na tamata ni oti nodra papitaiso. Na cava na veika vinaka eda rawa ni cakava me vakaraitaka ni da sa vakavinavinakataka na isolisoli ni Yalo Tabu eda a ciqoma ena gauna eda papitaiso kina?

Cakacaka 3:1–10

Sa rawa ni vakalougatataki ira na tani na Tamada Vakalomalagi mai vei au.

O na vakavulica vakacava vei ira na gone ni sa rawa me ra vakalougatataki ira na tani, kevaka sara mada ga e sega vei ira na “siliva kei na koula”? (Cakacaka 3:6). O na vukei ira vakacava me ra raica na madigi eso ni qaravi Kalou ena nodra qaravi ira na tani? (raica na Mosaia 2:17).

iTaviqaravi e Rawa ni Caka

• Kerea e dua na gone me wilika na Cakacaka 3:1–10 ni ra matanataka na vo ni gone na italanoa. (Me veivuke, raica talega na “Wase e 56: Vakabula e Dua na Tamata o Pita,” e Na iTukuni ena Veiyalayalati Vou, 148–149, se na kena vidio ena ChurchofJesusChrist.org.) E rawa talega ni o vakaraitaka na vidio “Peter and John Heal a Man Crippled Since Birth” (ChurchofJesusChrist.org). Na sala cava a cecere cake kina na veivakalougatataki a ciqoma na tamata oqo mai na ilavo a kerea o koya?

• Solia wavoki e dua na taga ilavo siliva. Ni ra taura tu na taga na gone, tarogi ira se cava e rawa ni ra volia ena ilavo. Tarogi ira na gone na cava e tu vei keda me da solia vei ira na tani ka sega ni saumi vakailavo. Sureti ira me ra wasea na sala e rawa ni ra vukei ira kina na tani me ra toro voleka vua na iVakabula—e dua na isolisoli e sega ni gadrevi kina na ilavo (Cakacaka 3:6).

ivakatakilakila ni vuli

Vakauqeta na Vuli e Vale

Vakauqeti ira na gone me ra tuva e dua na sala e rawa ni ra qarava kina na Tamada Vakalomalagi ena nodra vukea e dua na lewe ni nodra matavuvale ena macawa oqo.

Vakatorocaketaki ni Noda Veivakavulici

Cavuqaqataka e dua na ivolanikalou. Digitaka e dua na mala ni ivolanikalou o nanuma ni rawa ni vukei ira na gone ena nomu kalasi, me vaka na Cakacaka 2:38 se Cakacaka 3:19, ka vukei ira ni cavuqaqataka e dua na malanivosa mai na ivolanikalou. Na iyaloyalo, matanataki liga, sa rawa talega ni vukei ira na gone ni vakadeitaka na ivolanikalou ki na nodra vakasama.

tabana ni itaviqaravi: sa liutaka na Nona Lotu o Jisu Karisito mai vei ira na parofita kei na iapositolo