4–10 Septanm

1 Korentyen 14–16

“Bondye Pa Yon Bondye Konfizyon, men Li Se Yon Bondye Lapè”

Ekri enpresyon w resevwa pandan w ap li 1 Korentyen 14–16. Priye konsènan sa Lespri a te anseye ou, epi mande Pè Selès la si gen plis bagay li ta renmen w aprann.

Ekri Enpresyon w yo

Paske Legliz la ak doktrin li an te relativman nouvo nan Korent, sa konpreyansib ke Sen Korentyen yo te nan konfizyon. Pòl te anseye yo verite fondamantal nan levanjil la anvan sa: “Ke Kris la te mouri pou peche nou… epi yo te antere li, epi ke l te leve ankò nan twazyèm jou a” (1 Korentyen 15:3–4). Men, gen kèk manm ki te vit kòmanse anseye ke “pa gen rezirèkson pou mò yo” (1 Korentyen 15:12). Pòl te enplore yo pou yo “sonje” verite l te anseye yo (1 Korentyen 15:2). Lè nou rankontre opinyon kontrè konsènan verite levanjil yo, li ta bon pou nou sonje “Bondye pa yon Bondye konfizyon, men li se yon Bondye lapè” (1 Korentyen 14:33). Koute sèvitè otorize Senyè a yo epi kenbe fèm nan verite senp yo toujou ap anseye nou yo kapab ede nou jwenn lapè ak “kanpe fèm nan lafwa” (1 Korentyen 16:13).

Ide pou Etid Ekriti Pèsonèl

1 Korentyen 14

M ka chèche don pwofesi a.

Kisa ki don pwofesi a? Èske se kapasite pou predi lavni? Oubyen èske nenpòt moun ka resevwa don sa a? Èske tout moun ka resevwa don sa a?

Medite sou kesyon sa yopandan w ap etidye 1 Korentyen 14:3, 31, 39–40. Ou ta ka li tou Revelasyon 19:10 ak “Pwofesi, Pwofetize” nan Gid pou Ekriti yo (scriptures.ChurchofJesusChrist.org). Baze sou sa ou aprann, kijan ou t ap defini don pwofesi a? Kisa Pòl dwe te vledi lè l te envite Korentyen yo pou yo “chèche pwofetize”? (1 Korentyen 14:39). Kijan w ka aksepte envitasyon sa a?

Gade tou Joel 2:28–29; Alma 17:3; Doktrin ak Alyans 11:23–28.

1 Korentyen 14:34–35

Kijan deklarasyon konsènan fi yo nan vèsè sa yo aplike jodia?

Nan epòk Pòl la, te genyen atant diferan konsènan fason fi yo te patisipe nan sosyete a, ki enkli reyinyon legliz yo. Kèlkeswa sa ansman yo nan 1 Korentyen:14:34–35 te vledi nan epòk Pòl la, nou pa ta dwe konprann ke yo vledi ke fi yo pa ka pale ak dirije nan Legliz la jodia (gade Tradiksyon Joseph Smith, 1 Korentyen 14:34 [nan 1 Korentyen 14:34, referans b]). Prezidan Russell M. Nelson te di fi yo nan legliz la jodia: “Nou … bezwen fòs nou, konvèsyon nou, konviksyon nou, kapasite nou pou dirije, sajès nou, ak vwa nou yo. Wayòm Bondye a pa konplè e pa ka konplè san fi ki fè alyans sakre yo epi apresa respekte yo, fi ki ka pale avèk pouvwa ak otorite Bondye!” (“Yon Egzòtasyon pou Sè M yo,” Lyawona, Nov. 2015, 96).

1 Korentyen 15:1–34, 53–58

Jezikri te gen laviktwa sou lanmò.

Rezirèksyon Jezikri a si fondamantal nan Krisyanis la ke yon moun ta ka di san li, pa gen Krisyanis —pou n itilize pawòl Pòl yo, “enben, predikasyon nou an initil, epi lafwa nou initil tou” (1 Korentyen 15:14). Men, kèk nan Sen Korentyen yo t ap anseye ke pa t ap gen “rezirèksyon pou mò yo” (1 Korentyen 15:12). Lè w ap li repons Pòl la nan 1 Korentyen 15, pran yon moman pou medite sou kijan lavi ou t ap diferan si ou pa te kwè nan Rezireksyon an (gade 2 Nefi 9:6–19; Alma 40:19–23; Dotktrin ak Alyans 93:33–34). Kisa fraz “Si Kris pa te resisite, lafwa ou tap initil ” lan vledi pou ou? (vèsè 17).

Sa vo lapèn tou pou nou note ke PòI te fè referans a batèm pou mò yo kòm prèv sou reyalite rezirèksyon an (gade 1 Korentyen 15:29). Kijan travay tanp ak istwa familyal te fòtifye lafwa ou nan doktrin rezirèksyon an?

Gade tou Doktrin ak Alyans 138:11–37.

1 Korentyen 15:35–54

Kò resisite yo diferan de kò mòtèl yo.

Èske w janm konn mande tèt ou a kisa yon kò resisite sanble? Selon 1 Korentyen 15:35, gen kèk Korentyen ki t ap mande menm bagay la. Li repons Pòl la nan vèsè 36–54, epi note mo ak fraz ki dekri diferans ant kò mòtèl ak kò resisite yo. Pandan w fè sa, ou gendwa konpare vèsè 40–42 avèk Doktrin ak Alyans 76:50–112. Kisa revelasyon Pwofèt Joseph Smith sa a ajoute sou konpreyansyon ou? (gade tou Tradiksyon Joseph Smith, 1 Korentyen 15:40 [nan 1 Korentyen 15:40, referans a]). Poukisa verite sa yo enpòtan pou ou?

Gade tou Lik 24:39; Alma 11:43–45; Doktrina ak Alyans 88:14–33.

“Laglwa solèy la se youn” (1 Korentyen 15:41).

Ide pou Etid Ekriti Familyal ak Sware Familyal

1 Korentyen 15:29.Nou aprann nan vèsè 29 la ke ansyen Sen yo te patisipe nan batèm pou mò, menmjan nou fè jodia. Kijan nou tap eksplike lòt moun poukisa nou batize pou zansèt nou yo? (gade “Kisa Batèm pou Mò yo Ye?,” [videyo], ChurchofJesusChrist.org). Kisa n ap fè nan fanmi nou pou ofri òdonans tanp yo pou zansèt nou ki mouri yo ki bezwen yo? Ou ka jwenn plis resous sou sijè sa nan atik Sijè yo nan Levanjil la “Batèm pou Mò yo” (topics.ChurchofJesusChrist.org) ak nan FamilySearch.org.

1 Korentyen 15:35–54.Ki objè oubyen imaj ou ta ka montre pou ede fanmi ou konprann kèk nan tèm Pòl te itilize pou dekri fason kò mòtèl yo diferan de kò resisite yo? Paregzanp, pou demontre diferans ant kòriptib ak enkòriptib (gade vèsè 52–54) ou ta ka montre yo metal ki wouye ak metal ki pa wouye Oubyen ou ta ka konpare yon bagay fèb avèk yon bagay puisan (gade vèsè 43

1 Korentyen 15:55–57.Yon diskisyon sou vèsè sa yo ka espesyalman siyifikan si fanmi w konn yon moun ki mouri. Manm fanmi yo ta ka rann temwayaj sou fason Jezikri retire “epin lanmò a” (vèsè 56).

1 Korentyen 16:13.Pou ede manm fanmi yo konprann vèsè sa a, ou ta ka desine yon sèk atè a epi mande yon manm nan fanmi an pou “kanpe fèm” andedan li ak je l fèmen. Apresa lòt yo ta ka eseye pouse oswa rale l soti nan sèk la. Ki diferans sa fè lè moun nan sèk la gen je l louvri epi l ka “gade”? Kisa nou ka fè pou nou “kanpe fèm” lè nou tante pou n fè move chwa? (gade tou “Rete nan Bato a epi Kenbe Fèm!,” [videyo], ChurchofJesusChrist.org).

Pou plis ide pou anseye timoun yo, gade plan leson semèn sa a nan Vini, Suiv Mwen—Pou Primèa.

Chan ki sigjere: “Chantons tous, plein d alégresse,” Cantiques, no. 121.

Amelyore Etid Pèsonèl

Chèche modèl. Nan ekriti yo, nou jwenn modèl ki montre kijan Senyè a fè travay li. Ki modèl ou jwenn nan 1 Korentyen 14 ki ede nou konprann kijan pou nou youn edifye lòt?

Poukisa w ap kriye, © Simon Dewey 2021. Itilize avèk pèmisyon Altus Fine Art/www.altusfineart.com