Vakavulici Ira na Gonelalai

Kevaka era tiko na gonelalai ena nomu matavuvale, oqo eso na itaviqaravi ena rawa ni vukei ira me ra vuli:

• Lagasere. Na Sere ni Lotu kei na sere mai na iVolanisere ni Gonelalai e vakavulica vagumatua na ivunau. Vakayagataka na ituvatuva ni ulutaga ena daku ni iVolanisere ni Gonelalai mo kunea kina na sere era sema ki na ivakavuvuli ni kosipeli o vakavulica tiko. Vukei ira na luvemu me ra semata na itukutuku ni sere ki na nodra bula. (Raica talega na “Okati na Sere Tabu ena Nomu Vulica na Kosipeli” ena ivurevure oqo.)

• Vakarogoca se matanataka e dua na italanoa. Era dau taleitaka na gonelalai na italanoa—mai na ivolanikalou, mai na nomu bula, mai na itukutuku makawa ni Lotu se nomu matavuvale, se mai na mekasini ni Lotu. Vakasaqara na sala mera vakaitavi ena tukuni ni italanoa. E rawa ni ra taura tu na iyaloyalo se iyaya, droinitaka na iyaloyalo ni veika era rogoca tiko, matanataka na italanoa, se veivuke ena tukuni ni italanoa. Vukei ira na luvemu me ra raica donu na dina vakosipeli ena italanoa o wasea.

• Wilika e dua na ivolanikalou. Era na rairai sega ni rawa ni wilivola vakalevu sara na gone lalai, ia o se na rawa tikoga ni vakaitavitaki ira ena vulici ni ivolanikalou. O na rairai gadreva mo vakanamata ki na dua na tikina, malanivosa bibi, se vosa. Ena rawa sara mada ga ni ra cavuqaqataka na gone e vica na malanivosa leleka mai na ivolanikalou kevaka era tokaruataka toka vakavica. Ni ra rogoca na vosa ni Kalou, era na vakila na Yalo.

• Raica e dua na iyaloyalo se sarava e dua na vidio. Ni o vakaraitaka vei ira na luvemu e dua na itaba se iyaloyalo e veisemati kei na ivakavuvuli ni kosipeli se italanoa vakaivolanikalou, tarogi ira ena taro ena vukei ira me ra vuli mai na veika era raica tiko. Me ivakaraitaki, e rawa ni o taroga, “Na cava e yaco tiko ena iyaloyalo se vidio oqo? Na cava o a vakila kina?” Na porokaramu ni talevoni veikauyaki ni iTukutuku Vakaraitaki ni Vakosipeli, GospelMedia.ChurchofJesusChrist.org , kei na children.ChurchofJesusChrist.org era sa vanua vinaka mo raica kina na iyaloyalo kei na vidio.

• Bulia. O ira na gone era rawa ni bulia, droinitaka, se rokataka e dua na ka e semati ki na italanoa se ivakavuvuli era vulica tiko.

• Vakaitavi ena lesoni ivakaraitaki. E dua na lesoni ivakaraitaki ena rawa ni vukei ira na luvemu me ra kila vinaka na ivakavuvuli ni kosipeli ena via dredre me ra kila. Ni vakayagataki tiko na lesoni ivakaraitaki, vakasaqara na sala me ra vakaitavi kina na gonelalai. Era na vuli sara vakalevu ena nodra veimaliwai vakaicaba mai na kena saravi tu ga e dua na iwalewale.

• Vakatasuasua. Ni ra vakatasuasuataka na gone e dua na ituvaki e rawa ni ra sotava ena nodra bula, sa rawa me ra kila vakavinaka cake na iwalewale ena yaga kina ena nodra bula e dua na ivakavuvuli ni kosipeli.

• Tokaruataka na itaviqaravi. Era na rairai gadreva na gone lalai sobu mera rogoca vakavuqa na ivakavuvuli me ra kilai vinaka kina. Kakua ni rere me tokaruataki wasoma na italanoa se itaviqaravi eso. Me kena ivakaraitaki, ena rawa mo na wasea beka e dua na italanoa mai na ivolanikalou vakavica vata ena sala duidui eso—me vaka na wiliwili mai na ivolanikalou, vakalekalekataka ena nomu vosa ga, vakaraitaka e dua na vidio, vakatara me ra vukei iko na gone mo talanoataka na italanoa, ka sureti ira me ra matanataka na italanoa, kei na so tale.