Okati na Sere Tabu ena Nomu Vulica na Kosipeli

Na lagati ni nodra sere na Lalai kei na serenilotu e rawa ni vakalougatataki iko kei na nomu matavuvale ena vuqa na sala. Na veivakasama oqo e rawa ni vukei iko mo vakayagataka na sere tabu ena nomu segata mo vulica ka bulataka na kosipeli.

• Vulica na ivakavuvuli vakaivunau. Vakasaqara na dina e vakavulici ena sere o lagata se rogoca. Oqo e rawa ni muataki ki na veivosakitaki ni kosipeli me baleta na dina oqo ena siga taucoko. Lagata se vakarorogo ki na nodra sere na Lalai se serenilotu e vakavulica na veika baleti Jisu Karisito kei na Nona kosipeli. Vakarorogo ki na sala e dau vakadinadinataka kina na Yalo Tabu na iVakabula kei na Nona ivakavuvuli.

• Kila na kaukauwa ni sere. Na lagasere se vakarorogo ki na nodra sere na Lalai kei na serenilotu e rawa ni veivakalougatataki ena gauna ni leqa. Me vakataka, na lagati ni dua na sere ena rawa ni lomavinaka kina e dua na gone ena gauna ni moce, vakavuna na reki ni dou cakacaka vata vakamatavuvale, laveta cake e dua na wekamu e tauvimate, se vakaceguya e dua e lomaleqa.

• Wasea na veika sotavi. Wasea na veika o ni dui sotava vakamatavuvale e sema ki na itukutuku ni sere. Sa rawa talega ni o wasea na italanoa veisemati ni ivolanikalou.

• Vakaitavitaki iratou nomu matavuvale. Ena vuli vakalevu cake na nomu matavuvale mai na sere kevaka era sa vakaitavi tiko vagumatua. Me ra vakaitavi na lewe ni matavuvale, sa rawa mo sureta e dua na gone qase cake me veivuke ena kena vakavulici e dua na sere vei ira na tacidra gone se sureti ira na gone me ra vakavulica na matavuvale ena dua na sere era vulica ena Lalai. Sa rawa talega mera veitarataravi liutaka e dua na sere na lewe ni matavuvale.

• Dau cakava na veika vovou. Vakayagataka na veisala duidui eso me vulici kina vakamatavuvale na sere tabu eso. Me vakataka, e rawa ni o vakayagataka na imoimoi e salavata kei na vosa kei na malanivosa ena dua na sere. Se mo ni veitarataravi matanataka e dua na tiki ni sere ka ra tovolea na vo ni matavuvale mera vakilakila na sere. Ena rawa ni marautaka na nomu matavuvale na lagasere ena duidui ni totolo se na levu ni rorogo. Na app ni Valenivola ni Kosipeli kei na app ni Kosipeli vei ira na Gone era tiko kina na rorogo katoni kei na vidio ka rawa ni vukei iko mo vulica na sere. E rawa talega ni o cakava e dua na lisi ni sere tabu mo vakarorogo kina.

Me baleta na vakasama tale eso, raica na iwasewase ena “Vakayagataki ni sere me Vakavulici na iVunau” kei na “Vukei ira na Gone me ra Vulica ka Nanuma tiko na Nodra Sere na Lalai kei na Serenilotu,” e tiko ena “iDusidusi me baleta na Gauna ni Lagasere kei na Nodra Gauna na Lalai ena Soqoni ni Sakaramede ” ena Lako Mai, Mo Muri Au—Me Baleta na Lalai.