era sara itaba na matavuvale

26 ni Tiseba–1 ni Janueri

E sa Noda iTavi na Noda Vuli Vakai Keda

Na inaki ni ivolanikalou o ya me vukei iko mo lako mai vua na Karisito ka yaco mo saumaki vakatitobu sara ki na Nona kosipeli. Na Lako Mai, Mo Muri Au—Me Baleta na Tamata Yadua kei na Matavuvale ena rawa ni vukei iko mo kila vinaka kina na ivolanikalou ka mo kunea kina na kaukauwa vakayalo e dou gadreva vaka vuvale. Ena nomu kalasi ena Lotu, ena soli vei iko na madigi mo wasea na nomu rai ka vakayaloqaqataki ira na wekamu Yalododonu ena nodra sasaga me ra muria na Karisito.

Vola na Veika o Vakauqeti Kina

“A cava dou sa vakasaqara?” A taroga o Jisu vei iratou na tisaepeli i Joni na Dauveipapitaisotaki (Joni 1:38). Ena rawa ni o tarogi iko ena taro vata ga oya—ni veika o na kunea ena Veiyalayalati Vou ena yabaki oqo ena vakatau vakalevu saraga ena veika o vakasaqara. “Dou vakasaqara, ka dou na kunea” na iyalayala ni Vakabula (Maciu 7:7). Mo taroga na taro e votu mai na nomu vakasama ni o vulica tiko, ka qai vakasaqara vakagumatua na kena isau. Ena Veiyalayalati Vou o na wilika na veika vakayalo kaukauwa era sotava na tisaepeli i Jisu Karisito. Ni o nona tisaepeli yalodina na iVakabula, ena rawa ni o sotava talega na veika vakayalo kaukauwa ni o ciqoma na veisureti ni iVakabula, e kune tu ena loma ni tukutuku tabu oqo, “Lako Mai, Mo Muri Au” (Luke 18:22).

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Me’u vuli vakaidina mai vua na iVakabula, e dodonu me’u ciqoma na Nona veisureti, “Lako Mai, Mo Muri Au.”

Na veisureti ni iVakabula, “Lako Mai, Mo Muri Au,” e baleti keda taucoko—kevaka eda se qai vou mai ena salatu ni bula vakatisaepeli se eda sa taubaletaka tiko ena noda bula taucoko. Oqo na Nona veisureti ki vua e dua na cauravou vutuniyau e sasaga tiko vakagumatua me muria na ivunau (raica na Maciu 19:16–22; Luke 18:18–23). Na ka a vulica o cauravou—kei na veika e dodonu me da vulica kece—sa ikoya ni da tisaepeli sa kena ibalebale me da solia na yaloda taucoko ki vua na Tamada Vakalomalagi kei Jisu Karisito. Eda toso cake tiko ena noda bula vakatisaepeli ni da liaca na veika eda leqa tiko kina, vakayaco veisau, ka qai vakasaqara me da vakamuri Rau vakataucoko.

Na noda vuli mai vua na iVakabula e tekivu ena noda sasaga me da kila vakavinaka na veika e vakavulica o Koya. Me ivakaraitaki, e vakatitobutaki vakacava na nomu kila vinaka mo yalomalumalumu ni ko vakadikeva na veika oqo?

• Na ivakavuvuli ni iVakabula (raica na Maciu 18:1–5; Luke 18:9–14)

• E dua nai vakaraitaki mai na Nona bula (raica na Joni 13:1–15)

Kevaka o via vulica vakalevu cake, vakayacora na itaviqaravi oqo kei na dua tale na ivakavuvuli vakosipeli, me vaka na loloma se veivosoti.

E sa noqu itavi na noqu vuli vakai au.

E vakavulica o Elder David A. Bednar: “Me da kakua ni namaka na Lotu me vaka e dua na isoqosoqo me vakavulica se tukuna vei keda na ka kecega e dodonu me da kila ka cakava me rawa kina ni yaco me da tisaepeli yalodina ka vosota ena yaloqaqa me yacova na ivakataotioti. Ia, sa noda dui lesilesi ga me da vulica na ka e dodonu me da vulica, ka bula me vaka eda sa kila ni dodonu me da bula vaka, ka yaco me da vakataka na tamata sa gadreva na iVakavuvuli me da na vakataka. Ka yaco na noda itikotiko me sa usutu ni vanua ni vuli, bula voli, kei na noda bula vaka me da vakataka Koya” (“Vakarautaki me Rawati na Veika Kece e Ganiti; Liaona, Me 2019, 102).

Na cava na ibalebale ni sa noda itavi na noda vuli yadudua? Vakasaqara na isau ni taro eso ena itukutuku nei Elder Bednar ena ivolanikalou eso oqo: Joni 7:17; 1 Cesalonaika 5:21; Jemesa 1:5–6, 22; 2:17; 1 Nifai 10:17–19; 2 Nifai 4:15; Alama 32:27; kei na Vunau kei na Veiyalayalati 18:18; 58:26–28; 88:118. Na cava o vakauqeti kina mo cakava me rawa ni o gumatua vakalevu ena vulici ni kosipeli?

Au gadreva me‘u kila vakai au na dina.

Eso beka na tamata o kila era na sega ni vakayalia na nodra vakabauta, veitalia na cava e yaco ena nodra bula. Era na rawa ni ra ivakananumi vei iko me baleta na vosa vakatautauvata ni iVakabula me baleti iratou na yalewa vuku (raica na Maciu 25:1–13). O na sega beka ni raica na nodra sasaga vakagumatua me vakaqaqacotaki tikoga na nodra ivakadinadina ni dina.

Eda na rawata ka susuga cake vakacava na noda ivakadinadina? Vola na nomu vakanananu ni ko vakasamataka vakatitobu na veivolanikalou oqo: Luke 11:9–13; Joni 5:39; 7:14–17; Cakacaka 17:10–12; 1 Korinica 2:9–11; kei na Alama 5:45–46. (Raica talega na Gospel Topics, “Testimony,” topics.ChurchofJesusChrist.org.)

o goneyalewa ena salatu

O keda yadua me da rawata e dua na noda ivakadinadina vakai keda.

Na cava me‘u cakava ni tiko na noqu vakatataro?

Ni o vakasaqara na kila-ka vakayalo, ena yaco mai ena nomu vakasama na vei taro eso. Na ivakavuvuli eso oqo ena rawa ni vukei iko mo walia na vakatataro ena sala e tarai cake kina na vakabauta kei na ivakadinadina:

• Vakasaqara na kila-ka mai vua na Kalou. Sa ivurevure ni dina taucoko na Kalou, ka vatakila na dina mai vua na Yalo Tabu, na ivolanikalou, kei ira na Nona parofita kei na iapositolo.

• Cakacaka ena vakabauta. Kevaka e sega ni yaco mai na kena isau ena gauna totolo, nuitaka tiko na Turaga ni na vakatakila mai na isau ni taro ena kena gauna donu. Ena gauna madaga oqo, bulataka tiko na dina o sa kila tiko.

• Mo raica tikoga na veika sa tawamudu. Tovolea mo raica na veika eso ena ivakarau ni rai ni Turaga, ka segai ena itovo ni rai ni vuravura. Raica na nomu taro ena ituvaki ni nona ituvatuva ni veivakabulai na Tamada Vakalomalagi.

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Maciu 13:1–23.E dua na sala vinaka me vukei kina na nomu vuvale me vakavakarau me vuli mai na Veiyalayalati Vou ena yabaki oqo, sa rawa mo wilika mada na italanoa vakaibalebale ni dauteitei. Ena rairai vinaka vei iratou na nomu vuvale me ratou gole ki tautuba ka vakasaqara na veimataqali qele e vakamacalataki tiko ena vosa vakatautauvata. Eda na cakava vakacava na yaloda me vaka na “vanua vinaka” e vakamacalataka tiko o Jisu? (Maciu 13:8).

Kalatia 5:22–23; Filipai 4:8.Sa sureti iko o Peresitedi Russell M. Nelson mo “veisautaka na nomu itikotiko me vanua tabu ni vakabauta” ka “vakavoutaka na nomu itikotiko me vanua ni vulici ni kosipeli.” Ki vei kemuni o ni vakayacora na veika oqo, e yalataka o koya: “Era na marautaka na luvemu me ra vulica ka bulataka na ivakavuvuli ni iVakabula, ka na yaco me na vakalailaitaka na veitemaki ni meca ena nomuni bula vakakina ena nomuni itikotiko. Na veisau ena nomu vuvale ena yaco me gumatua ka veitokoni” (“Mo iVakaraitaki Uasivi ni Yalododonu Edaidai,” Liaona, Nove. 2018, 113).

Na itekivu ni yabaki vou e gauna vinaka me vakayacori kina na matabose vakavuvale me baleta na kena caka na nomu itikotiko me “vanua ni vakabauta” ka “me itikotiko ni vulici ni kosipeli.” Na vakasama cava soti me baleta na veika me vakayacori me ra yaco mai kina na vakasama oqo ni da wilika na Kalatia 5:22–23 kei na Filipai 4:8? De na vinaka me ratou vakarautaka na nomu matavuvale na lalawa ni tamata yadua kei na matavuvale ena kena vulici na Veiyalayalati Vou ena yabaki mai oqo. Na cava eda rawa ni cakava me vakananumi keda ena noda lalawa?

Me baleta na ikuri ni vakasama ni nodra vakavulici na gone, raica na ituvatuva ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Tuberi Au E Nona Loloma,” iVolanisere ni Lalai, 70.

Vakatoroicaketaki ni Vuli ni Tamata Yadua

Vakasaqara na ivunau. Na ivunau e dua na dina tawamudu, e sega ni veisau. E cauraka o Peresitedi Boyd K. Packer ni “vunau dina, e kilai vinaka, e veisautaka na noda itovo kei na ivakarau ni bula” (“Little Children,” Ensign, Nove. 1986,17). Ni o vulica vata kei na nomu vuvale na ivolanikalou, dou vakasaqara na dina ena rawa ni vukei kemudou mo dou bula vakalevu cake me vaka nai Vakabula.

Jisu Karisito

Rarama kei Vuravura, mai vei Brent Borup