Ide pou Amelyore Etid Ekriti Familyal ou

Etid ekriti familyal se yon fason pwisan pou ede fanmi yo santi enfliyans Sentespri a ak aprann levanjil la. Kantite w li ak dire lekti ou fè kòm fanmi pa osi enpòtan ke konsistans nan efò w yo. Lè w fè etid ekriti yo vin yon pati enpòtan nan lavi familyal ou, w ap ede manm fanmi w yo rapwoche yo de Papa nou ki nan Syèl la ak Jezikri epi bati temwayaj yo sou fondasyon pawòl Bondye a. Konsidere pou w konseye ansanm sou kesyon suivan yo:

• Kouman manm fanmi yo ka ankouraje yonn lòt pou etidye ekriti yo endividyèlman?

• Kisa w ka fè pou ankouraje manm fanmi w pataje sa y ap aprann yo?

• Kijan w ka mete aksan sou prensip w ap aprann nan Nouvo Testaman yo nan moman ansèyman chak jou yo?

Sonje ke fwaye a se kote ideyal pou moun aprann levanjil la. Ou ka aprann ak anseye levanjil lakay ou nan fason ki pa posib nan yon sal klas nan Legliz la. Se pou w kreyatif lè w ap panse sou fason pou w ede fanmi w aprann nan ekriti yo. Itilize kèk nan ide sa yo pou anrichi etid ekriti familyal ou.

Itilize mizik.

Chante kantik ki ranfòse prensip yo anseye nan ekriti yo. Gen yon kantik oubyen chan pou timoun ki sigjere nan plan leson pou chak semèn. Ou ta ka poze manm fanmi yo kesyon sou pawòl oubyen fraz ki nan tèks kantik yo. Anplis de chante, fanmi w ka fè aksyon ki mache avèk kantik yo oubyen koute kantik yo kòm fon mizik pandan y ap fè lòt aktivite. Pou plis ide, gade nan “Enkli Mizik Sakre nan Aprantisaj Levanjil Ou a” nan resous sa a.

Pataje Ekriti ki Siyikatif

Bay manm fanmi w tan pou yo pataje pasaj ekriti yo jwenn ki siyifikatif nan etid pèsonèl yo.

Itilize Pwòp Mo Pa w

Envite manm fanmi yo pou yo fè rezime sa yo aprann nan ekriti w ap etidye yo nan pwòp mo pa yo.

Aplike Ekriti yo nan Lavi W

Lè w fin li yon pasaj ekriti, mande manm fanmi yo pou yo eksplike ki fason pasaj sa a aplike avèk lavi yo.

Poze Yon Kesyon

Envite manm fanmi yo pou yo poze yon kesyon sou levanjil la, epi apre sa, pran tan pou w chèche vèsè ki kapab ede reponn kesyon an.

Afiche yon Ekriti

Chwazi yon vèsè ou twouve ki siyifikatif, epi afiche l kote tout manm fanmi an ka wè l souvan. Envite lòt manm fanmi yo pou yo chak chwazi yon ekriti pou yo afiche lè se tou pa yo tou.

Fè yon lis Ekriti

Antanke fanmi, chwazi plizyè vèsè nou ta renmen diskite pandan semèn k ap vini an.

Memorize Ekriti yo

Chwazi yon pasaj ekriti ki enpòtan pou fanmi w epi mande yo pou yo memorize li kote y ap repete l chak jou oubyen y ap jwe yon jwèt memwa.

Pataje Objè Leson yo

Chèche objè ki an rapò avèk prensip levanjil ki nan pasaj ekriti nou ap li an fanmi an. Envite manm fanmi yo pou yo di kijan chak objè anrapò avèk ansèyman nan ekriti yo.

Chwazi yon sijè

Fè chak manm fanmi w yo chwazi yon sijè fanmi an ap etidye ansanm lè tou pa yo rive. Itilize Gid pa Sijèa, Diksyonè Bib la, oubyen Gid Ekriti yo (scriptures.ChurchofJesusChrist.org) pou n ka jwenn pasaj ekriti sou sijè a.

Fè yon Desen

Li kèk vèsè an fanmi, epi bay tan pou manm fanmi yo desine yon bagay ki anrapò avèk sa w ap li a. Pran tan pou nou chak diskite sou desen lòt.

Jwe wòl yon istwa

Lè w fin li yon istwa, envite manm fanmi yo pou yo fè yon senaryo avèk li. Apre sa, pale sou fason istwa a anrapò avèk sa n ap viv endividyèlman oubyen antanke fanmi.

Prezidan Russell M. Nelson te di: “Mwen pwomèt ke pandan w ap travay avèk dilijans pou w remodle fwaye ou pou fè l vin yon sant aprantisaj levanjil la, avèk letan, jou Saba w yo ap vrèman vin yon delis. Pititou yo ap kontan pou yo aprann ak viv ansèyman Sovè a, epi enfliyans advèsè a nan lavi ou ak nan fwaye ou ap diminye. Chanjman nan fanmi w yo ap anpil ak dirab” (“Vin tounen Sen Dènye Egzanplè,” Lyawona, Nov. 2018, 113).