Paglakip sang Sagrado nga Musika sa Inyo Pagtuon sang Ebanghelyo

Ang pagkanta sang mga ambahanon kag mga himno sa Primary magabugay sa inyo kag sa inyo pamilya sa madamo nga paagi. Ining mga ideya makabulig sa inyo nga gamiton ang sagrado nga musika samtang inyo ginatinguhaan nga tun-an kag ipangabuhi ang ebanghelyo.

• Tun-i ang mga prinsipyo sa doktrina. Pangitaa ang mga kamatuoran nga ginatudlo sa mga kanta nga inyo ginakanta ukon ginapamatian. Mahimo nga magapadulong ini sa pang-ebanghelyo nga mga diskusyon parte sa sining mga kamatuoran sa bilog nga adlaw. Magkanta ukon magpamati sang mga kalantahon sa Primary ukon mga himno nga nagatudlo parte kay Jesucristo kag sa Iya ebanghelyo. Bantayi ang mga paagi nga nagamapatuod ang Balaan nga Espiritu parte sa Manluluwas kag sa Iya mga pinanudlo.

• Kilalaha ang gahum sang musika. Ang pagkanta ukon pagpamati sa mga kalantahon sa Primary kag mga himno sarang nga mangin bugay sa tion sang pagpanginahanglan. Halimbawa, ang pagkanta mahimo nga makapakalma sa bata antes magtulog, maghatag sang kasadya samtang ululupod nga nagaobra ang inyo pamilya, makapapagsik sa kasilingan nga nagamasakit, ukon makapasulhay sa tawo nga ginakulbaan.

• Magpaambit sang mga eksperiyensya. Magpaambit sang personal kag pang-pamilya nga mga eksperiyensya nga may kaangtanan sa mga mensahe sang mga kanta. Mahimo man kamo nga magpaambit sang naangot nga mga istorya sa balaan nga mga kasulatan.

• Paentraha ang inyo pamilya. Mas makatuon ang inyo pamilya sa mga kanta kon aktibo sila nga nagapartisipar. Para makapasakop ang mga miyembro sang pamilya, pwede ninyo hagaron ang mas magulang nga bata sa pagbulig tudlo sang kanta sa mga manghod ukon hagaron ang mga bata nga tudloan ang pamilya sang kanta nga ila natun-an sa Primary. Pwede man ninyo pabulos-buluson ang mga miyembro sang pamilya sa pagpanguna sa pagkanta.

• Mangin matugahon [creative]. Maggamit sang lainlain nga pamaagi agud tun-an ang sagrado nga musika bilang pamilya. Halimbawa, pwede kamo maggamit sang mga aksyon nga nagakabagay sa mga tinaga kag dinalan sa kanta. Ukon pwede kamo magbulos-bulos sa pag-arte sang mga parte sang kanta samtang ginapakot sang iban nga miyembro sang pamilya ang kanta. Basi masadyahan ang inyo pamilya sa pagkanta sang mga kanta sa lainlain nga kadasigon ukon katunugon. Ang Librarya sang Ebanghelyo nga app kag ang Gospel for Kids [Ebanghelyo para sa Kabataan] nga app may audio recording kag mga video nga makabulig sa ila nga matun-an ang mga kanta. Pwede man kamo maghimo sang mga playlist sang sagrado nga musika nga pamatian.