Disyembre 26–Enero 1

Responsable Kita para sa Aton Kaugalingon nga Pagtuon

Ang katuyuan sang balaan nga mga kasulatan amo ang buligan ka nga magkari kay Cristo kag mas mangin madalom ang pagkahaylo sa Iya ebanghelyo. Ang Dali, Magsunod sa Akon—Para sa Mga Indibidwal kag Mga Pamilya makabulig sa imo nga maintiendihan ang balaan nga mga kasulatan kag makita diri ang espirituhanon nga kusog nga ginakinahanglan mo kag sang imo pamilya. Dayon, sa imo mga klase sa Simbahan, makaangkon ka sang mga oportunidad sa pagpaambit sang mga panghunahuna kag sa pagpaisog sang imo kaupod nga mga Santos sa ila pagpaninguha nga magsunod kay Cristo.

Isulat Ang Imo Mga Panghunahuna

“Ano bala ang ginapangita ninyo?” Pamangkot ni Jesus sa mga disipulo ni Juan Bautista (Juan 1:38). Pwede mo man ini ipamangkot sa imo kaugalingon—kay ang imo makita sa Bag-ong Katipan sini nga tuig magadepende gid sa kon ano ang imo ginapangita. “Pangita, kag kamo makakita” amo ang promisa sang Manluluwas (Mateo 7:7). Gani ipamangkot ang mga pamangkot nga magasulod sa imo kaisipan samtang ikaw nagatuon, kag dayon maukod nga pangitaa ang mga sabat. Sa Bag-ong Katipan magabasa ka parte sa mabaskog nga espirituhanon nga mga eksperiyensya sang mga disipulo ni Jesucristo. Bilang matinuohon nga disipulo sang Manluluwas, pwede ka nga makaangkon sang imo kaugalingon nga espirituhanon nga mga eksperiyensya sa imo pagbaton sang imbitasyon sang Manluluwas, nga makita sa kabug-osan sining sagrado nga kasulatan, “Dali, magsunod sa akon” (Lucas 18:22).

Mga Ideya para sa Personal nga Pagtuon sang Balaan nga mga Kasulatan

Agud matuod-tuod nga makatuon halin sa Manluluwas, dapat ko batunon ang Iya imbitasyon nga, “Dali, magsunod sa akon.”

Ang imbitasyon sang Manluluwas nga, “Dali, magsunod sa akon,” para sa tanan—bisan bag-o kita sa dalan sang pagkadisipulo ukon ginausoy na naton ini sa bilog naton nga mga kabuhi. Amo ini ang Iya imbitasyon sa isa ka manggaranon nga pamatan-on nga nagatinguha sa pagsunod sang mga kasuguan (tan-awa sa Mateo 19:16–22; Lucas 18:18–23). Ang natun-an sang pamatan-on—kag dapat man naton tanan matun-an—amo nga ang pagkadisipulo nagakahulugan sang paghatag sang aton bug-os nga mga kalag sa Amay nga Langitnon kag kay Jesucristo. Nagauswag kita sa aton pagkadisipulo sa aton pagkilala sang aton kakulangan, paghimo sang mga pagbag-o, kag pagtinguha nga mas sundon pa gid Sila sing lubos.

Ang pagtuon halin sa Manluluwas nagasugod kon ginatinguhaan naton nga intiendihon ang Iya ginpanudlo. Halimbawa, paano nagadalom ang imo pag-intiendi sang pagkamapainubuson samtang imo ginatun-an ang masunod?

• Ang mga pinanudlo sang Manluluwas (tan-awa sa Mateo 18:1–5; Lucas 18:9–14)

• Ang ehemplo halin sa Iya kabuhi (tan-awa sa Juan 13:1–15)

Kon gusto mo nga magtuon pa gid, tilawi ining kahiwatan upod ang isa pa ka prinsipyo sang ebanghelyo, pareho sang pagpalangga ukon pagpatawad.

Responsable ako para sa akon kaugalingon nga pagtuon.

Si Elder David A. Bednar nagtudlo: “Indi kita magpaabot nga ang Simbahan bilang isa ka organisasyon magtudlo ukon maghambal sa aton sang tanan nga kinahanglan naton mahibal-an kag himuon agud mangin matutom nga mga disipulo kag magpadayon nga maisog tubtob sa katapusan. Kundi, ang aton personal nga responsibilidad amo nga tun-an ang dapat naton tun-an, magkabuhi suno sa nahibal-an naton nga nagakadapat nga pagpangabuhi, kag mangin mga tawo nga luyag sang Agalon nga mangin kita. Kag ang aton mga puluy-an amo ang pinakabagay nga lugar sa pagtuon, pagpangabuhi, kag mangin” (“Prepared to Obtain Every Needful Thing,” Liahona, Mayo 2019, 102).

Ano ang kahulugan sang pag-ako sang responsibilidad para sa imo kaugalingon nga pagtuon? Magpangita sang posible nga mga sabat sa pahayag ni Elder Bednar kag sa masunod nga balaan nga mga kasulatan: Juan 7:17; 1 Mga Taga-Tesalonica 5:21; Santiago 1:5–6, 22; 2:17; 1 Nefi 10:17–19; 2 Nefi 4:15; Alma 32:27; kag Doktrina kag mga Kasugtanan 18:18; 58:26–28; 88:118. Ano ang nabatyagan mo nga maayo himuon para mas mangin aktibo sa pagtuon sang ebanghelyo?

Kinahanglan ko nga mahibal-an ang kamatuoran sa akon kaugalingon.

Ayhan may mga kilala ka nga daw wala nagakawad-an sang pagtuo, bisan ano pa ang nagakatabo sa ila mga kabuhi. Mahimo nga ginapadumdom ka nila sang parte sa lima ka mainandamon nga mga ulay sa paanggid sang Manluluwas (tan-awa sa Mateo 25:1–13). Mahimo nga wala mo makita ang ila mapisan nga pagtinguha nga pabakuron ang ila mga panaksihon sang kamatuoran.

Paano naton maangkon kag patubuon ang aton kaugalingon nga mga panaksihon? Isulat ang imo mga panghunahuna samtang ginapadaluman mo ang masunod nga balaan nga mga kasulatan: Lucas 11:9–13; Juan 5:39; 7:14–17; Mga Binuhatan 17:10–12; 1 Mga Taga-Corinto 2:9–11; kag Alma 5:45–46.  

Ang kada isa sa aton dapat nga mag-angkon sang aton kaugalingon nga panaksihon.

Ano ang dapat ko himuon kon may mga pamangkot ako?

Sa imo pagpangita sang espirituhanon nga ihibalo, may mga pamangkot nga magasulod sa imo kaisipan. Ang masunod nga mga prinsipyo makabulig sa imo nga atubangon ang mga pamangkot sa paagi nga nagapatubo sang pagtuo kag panaksihon:

• Magpangayo sang paghangop halin sa Dios. Ang Dios amo ang ginhalinan sang tanan nga kamatuoran, kag Iya ginapahayag ang kamatuoran paagi sa Balaan nga Espiritu, sa balaan nga mga kasulatan, kag sa Iya mga propeta kag mga apostoles.

• Mag-akto nga may pagtuo. Kon ang mga sabat wala dayon nagaabot, magsalig nga ang Ginuo magapahayag sang mga sabat kon husto na ang tion. Pero sa karon, padayuna nga ipangabuhi ang kamatuoran nga imo na nahibal-an.

• Maghupot sang wala katubtuban nga perspektibo. Tinguhai nga tan-awon ang mga butang pareho sang pagtan-aw sang Ginuo sa mga ini, indi pareho sang panan-aw sang kalibutan. Tuloka ang imo mga pamangkot sa konteksto sang plano sang kaluwasan sang Amay nga Langitnon.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mateo 13:1–23.Para mabuligan ang imo pamilya nga maghanda sa pagtuon halin sa Bag-ong Katipan sini nga tuig, pwede ninyo basahon ang paanggid sang manugsab-og (sower). Mahimo nga masadyahan ang imo pamilya nga maglakat sa gwa kag sa pagpangita sang lain-lain nga klase sang duta nga ginalaragway sa paanggid. Paano naton himuon ang aton mga tagipusuon nga pareho sa “maayong duta” nga ginlaragway ni Jesus? (Mateo 13:8).

Mga Taga-Galacia 5:22–23; Mga Taga-Filipos 4:8.Si Pangulong Russell M. Nelson nag-agda sa inyo nga “himuon ang [inyo] puluy-an nga isa ka santuaryo sang pagtuo” kag “panamion ang inyo puluy-an agud mangin sentro sang pagtuon sang ebanghelyo.” Sa mga nagahimo sining mga butang, nagpromisa sia: “Ang inyo kabataan malangkag sa pagtuon kag sa pagpangabuhi sang mga pinanudlo sang Manluluwas, kag ang impluwensya sang kaaway sa inyo kabuhi kag sa inyo puluy-an magabuhin. Ang mga pagbag-o sa inyo pamilya mangin talalupangdon kag dalayon” (“Becoming Exemplary Latter-day Saints,” Liahona, Nob. 2018, 113).

Ang pagsugod sang bag-ong tuig isa ka maayo nga tion para maghiwat sang pangpamilya nga konseho kon paano himuon ang inyo puluy-an nga “santuaryo sang pagtuo” kag “sentro sang pagtuon sang ebanghelyo.” Ano nga mga ideya parte sa kon paano ini himuon ang nagasulod sa imo kaisipan samtang aton ginabasa ang Mga Taga-Galacia 5:22–23 kag Mga Taga-Filipos 4:8? Basi pwede magpahamtang ang inyo pamilya sang personal kag pang-pamilya nga mga lalab-uton nga tun-an ang Bag-ong Katipan sining manugsulod nga tuig. Ano ang sarang naton himuon para padumdumon ang aton mga kaugalingon parte sa aton mga lalab-uton?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary .

Ginapanugyan nga kanta: “Teach Me to Walk in the Light [Tudloi Ako sang Iya Gugma],” Mga Himno kag mga Ambahanon sang Kabataan, 66.

Pagpauswag sang Personal nga Pagtuon

Pangitaa ang doktrina. Ang doktrina isa ka wala katapusan, wala nagabag-o nga kamatuoran. Si Pangulong Boyd K. Packer nagpahayag nga ang “matuod nga doktrina, kon naintiendihan, nagabag-o sang mga pangginawi kag pamatasan” (“Little Children,” Ensign, Nob. 1986, 17). Samtang ikaw kag ang imo pamilya nagatuon sang balaan nga mga kasulatan, pangitaa ang mga kamatuoran nga makabulig sa inyo nga magpangabuhi nga mas pareho sa Manluluwas.

Light of the World [Kapawa sang Kalibutan], ni Brent Borup