Enero 16–22

Juan 1

Nakita Namon ang Mesias

Samtang imo ginabasa kag ginapamensar sang maayo ang Juan 1, isulat ang mga panghunahuna nga imo mabaton. Ano nga mga mensahe ang nakita mo nga mangin may bili para sa imo kag sa imo pamilya? Ano ang pwede mo masugid sa imo mga klase sa Simbahan?

Isulat Ang Imo Mga Panghunahuna

Nakapamensar ka bala kon makilala mo ayhan si Jesus sang Nazaret bilang anak sang Dios kon buhi ka sa tion sang Iya mortal nga pagpangalagad? Sa sulod sang mga tinuig, ang matinuohon nga mga Israelnon, lakip na sanday Andres, Pedro, Felipe, kag Natanael, naghulat kag nagpangamuyo para sa pag-abot sang ginpromisa nga Mesias. Sang nakilala nila Sia, paano nila nahibal-an nga Sia na ang Isa nga ila ginapangita? Sa pareho man nga paagi nga ang tanan sa aton makakilala sa Manluluwas—paagi sa pagbaton sang imbitasyon nga “kari kag tan-awa” para sa aton kaugalingon (Juan 1:39). Nagabasa kita parte sa Iya sa balaan nga mga kasulatan. Nagapamati kita sa Iya doktrina. Ginasunod naton ang Iya pamaagi sa pagpangabuhi. Nagakabatyagan naton ang Iya Espiritu. Sa paghimo naton sang mga ini, madiskubrehan naton, pareho kay Natanael, nga ang Manluluwas nakakilala sa aton kag nagapalangga sa aton kag gusto kita ihanda sa pagbaton sang “dalagko pa nga mga butang” (Juan 1:50).

Mga Ideya para sa Personal nga Pagtuon sang Balaan nga mga Kasulatan

Sin-o si Juan?

Si Juan isa ka disipulo ni Juan Bautista kag sang ulihi nangin isa sa una nga mga sumulunod ni Jesucristo kag isa sa Iya Dose ka mga Apostoles. Sia ang nagsulat sang Ebanghelyo ni Juan, pila ka mga sulat, kag sang libro nga Bugna. Sa iya Ebanghelyo, gintumod niya ang kaugalingon bilang ang disipulo nga “ginhigugma ni Jesus” kag ang “isa pa ka gintutun-an” (Juan 13:23; 20:3). Ang kapursigido ni Juan sa pagwali sang ebanghelyo tuman kabaskog nga ginpangayo niya nga magpabilin sa duta tubtob sa Ika-duhang Pagkari sang Manluluwas para makadala sia sang mga kalag kay Cristo (tan-awa sa Doktrina kag mga Kasugtanan 7:1–6).

 

Juan 1:1–5

Si Jesucristo “sa ginsuguran kaupod sa Dios.”

Ginsugdan ni Juan ang iya Ebanghelyo paagi sa paglaragway sang buluhaton nga ginhikot ni Cristo antes Sia matawo: “Sa ginsuguran … ang Pulong [Jesucristo] kaupod sa Dios.” Ano ang imo matun-an sa mga bersikulo 1–5 parte sa Manluluwas kag sa Iya buluhaton?   Sa pagsugod mo sang imo pagtuon sang kabuhi sang Manluluwas, ngaa importante nga hibaluon ang parte sa Iya buluhaton antes pa sa mortal nga kabuhi?

 

Juan 1:1–18

Si Jesucristo amo ang “matuod nga kapawa,” ang Anak sang Dios.

Nangin inspirado si Juan nga pangitaon ang Maluluwas tungod sang panaksihon ni Juan Bautista, nga nagpahayag nga sia “nagkari agud magsaksi … sa matuod nga Kapawa” (Juan 1:8–9). Si Juan mismo naghatag man sang mabaskog nga panaksihon parte sa kabuhi kag misyon sang Manluluwas.

Ayhan manami kon ilista ang mga kamatuoran nga ginlakip ni Juan sa iya pangbukas nga panaksihon kay Cristo (mga bersikulo 1–18). Ngaa sa banta mo nga ginsugdan ni Juan ang iya Ebanghelyo sa sining mga kamatuoran? Pamensara nga isulat ang imo pamatuod kay Jesucristo—ano ang gusto mo nga ipaambit? Ano nga mga eksperiyensya ang nagbulig sa imo nga makilala kag sundon ang Manluluwas? Sin-o ayhan ang mabugayan sa pagpamati sa imo panaksihon?

Juan 1:11–13

Si Jesucristo nagahatag sa aton sing “gahum [nga magmangin]” mga anak nga lalaki kag anak nga babayi sang Dios.

Bisan nga kita tanan espirituhanon nga mga anak nga lalaki kag babayi sang Dios nga Amay, kon makasala kita nagakahamulag, ukon nagapalayo, kita sa Iya. Si Jesucristo nagatanyag sa aton sang dalan pabalik paagi sa Iya nagabayad-sala nga sakripisyo. Binagbinaga kon ano ang ginatudlo sang Juan 1:11–13 parte sa pagkamangin anak nga babayi kag lalaki sang Dios. Pamensara man kon ano ang ginatudlo sining balaan nga mga kasulatan parte sa kon paano naton mabaton ining dulot: Mga Taga-Roma 8:14–18; Mosias 5:7–9; Doktrina kag mga Kasugtanan 25:1. Ano ang buot silingon sa imo sang makaangkon sang “gahum [nga magmangin]” anak nga babayi ukon lalaki sang Dios?

Juan 1:18

Ang Amay nagapamatuod sa Iya Anak.

Ang Juan 1:18 nagasiling nga wala pa sing may nakakita sa Dios. Ugaling, ang Joseph Smith Translation sining bersikulo nagaklaro nga “wala pa sing tawo nga nakakita sa Dios sa bisan ano nga panahon, magluwas nga nagpamatuod sia parte sa Anak”. Pamensara nga rebyuhon ang masunod nga mga higayon sang ang Dios nga Amay nabatian nga nagapamatuod parte sa Anak: Mateo 3:17; 17:5; 3 Nefi 11:6–7; Joseph Smith—Kasaysayan 1:17.

Ngaa isa ka bugay nga may ari sining mga panaysayon? Ano ang ginatudlo sini sa imo parte sa relasyon ni Jesucristo sa Iya Amay?

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Samtang nagatuon kita sang balaan nga mga kasulatan, makabaton kita sang inspirasyon para sa aton mga kabuhi.

Juan 1:4–10.Paano mo buligan ang imo pamilya nga mapanan-aw ang ila ginbasa parte sa kasanag sa sining mga bersikulo? Mahimo mo pabulos-buluson ang mga miyembro sang pamilya nga magpasilak sang suga sa madulom nga kwarto kag magsugid kon paano ang Manluluwas nangin Kasanag sang ila mga kabuhi. Dayon, samtang ginabasa ninyo ang Juan 1:4–10, basi may dugang nga mga ideya ang mga miyembro sang pamilya parte sa panaksihon ni Juan kay Jesucristo, ang Kasanag sang Kalibutan.

Juan 1:35–36.Ngaa ayhan nga gintawag ni Juan Bautista si Jesus nga “Cordero sang Dios”? Ano ang aton matun-an parte sa sini nga titulo halin sa mensahe ni Elder Jeffrey R. Holland “Tan-awa ang Kordero sang Dios” (Liahona, Mayo 2019, 44–46, 97–101)

Juan 1:35–46.Ano ang nangin mga resulta sang testimonya ni Juan? Ano ang matun-an sang imo pamilya sa mga tawo nga ginalaragway sa sining mga bersikulo sa kon paano ipaambit ang ebanghelyo?  

Juan 1:45–51.Ano ang ginhimo ni Natanael nga nagbulig sa iya nga makaangkon sang panaksihon parte sa Manluluwas? Agdaha ang mga miyembro sang pamilya nga hambalan kon paano nila nabaton ang ila mga testimonya.

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

 

Pagpauswag sang Aton Pagpanudlo

Magpaambit sang mga leksyon gamit ang isa ka bagay. Imbitara ang mga miyembro sang pamilya nga magpangita sang mga bagay nga magamit nila para buligan sila nga maintiendihan ang mga prinsipyo nga makita sa balaan nga mga kasulatan nga inyo ginabasa bilang pamilya. Halimbawa, pwede sila maggamit sang kandila bilang simbolo sang Kasanag ni Cristo (tan-awa sa Juan 1:4).

Jehovah Creates the Earth [Si Jehova Nagatuga sang Kalibutan], ni Walter Rane