Si Juan Bautista nga Nagabunyag kay Jesus

Stained-glass nga bintana sa Templo sang Nauvoo Illinois, ni Tom Holdman

Enero 23–29

Mateo 3; Marcos 1; Lucas 3

“Ihanda Ninyo ang Dalan sang Ginuo”

Magsugod paagi sa pagbasa sang Mateo 3; Marcos 1; kag Lucas 3. Sa imo pagpangamuyo nga buligan ka sang Balaan nga Espiritu nga maintiendihan ining mga bersikulo, hatagan ka Niya sang mga ideya nga para gid sa imo. Isulat ang ining mga pagpabatyag, kag magplano nga aktuhan ang mga ini.

Isulat Ang Imo Mga Panghunahuna

Si Jesucristo kag ang Iya ebanghelyo sarang magbag-o sa imo. Si Lucas nagsambit sang isa ka dumaan nga propesiya ni Isaias nga nagalaragway sang mangin epekto sang pagkari sang Manluluwas: “Ang tagsa ka nalupyakan tampukan, kag ang tagsa ka bukid kag bakulod panubuon; kag ang tiko tadlungon, kag ang mga dalanon nga kudul-kudol tapanon” (Lucas 3:5; tan-awa man sa Isaias 40:4). Isa ini ka mensahe para sa aton tanan, lakip na ang mga nagapamensar nga indi na sila magbag-o. Kon ang isa ka butang nga pareho ka permanente sang bukid pwede matapan, sigurado gid nga ang Ginuo makasarang magbulig sa aton nga tadlungon ang aton tiko nga mga banas (tan-awa sa Lucas 3:4–5). Sa aton pagbaton sang imbitasyon ni Juan Bautista nga maghinulsol kag magbag-o, ginahanda naton ang aton mga kaisipan kag mga tagipusuon nga batunon si Jesucristo para nga kita man “makakita sang kaluwasan sang Dios” (Lucas 3:6).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Sin-o si Marcos?

Sa mga manunulat sang Mga Ebanghelyo, pinakadiutay ang aton nahibal-an parte kay Marcos. Nahibal-an naton nga misyonero sia nga kaupod nanday Pablo, Pedro, kag sang pila pa ka mga misyonero. Madamo nga mga iskolar sang biblia ang nagapati nga ginsugo ni Pedro si Marcos nga isulat ang mga hitabo sa kabuhi sang Manluluwas. Ang Ebanghelyo ni Marcos laban-laban nga nasulat antes pa sa tatlo [ka mga ebanghelyo].

 

Mateo 3:1–12; Marcos 1:1–8; Lucas 3:2–18

Ang paghinulsol amo ang dako nga pagbag-o sa kaisipan kag tagipusuon.

Ang misyon ni Juan Bautista amo nga ihanda ang mga tagipusuon sang mga tawo para batunon ang Manluluwas kag mangin mas pareho sa Iya. Paano niya ini ginhimo? Sia nagwali, “Hinulsol kamo” (Mateo 3:2). Kag naggamit sia sang mga imahe pareho sang prutas kag trigo sa pagtudlo parte sa paghinulsol (tan-awa sa Lucas 3:9, 17).

Ano ang iban pa nga mga imahe ang imo makita sa mga sinulatan parte sa pagpangalagad ni Juan Bautista? (tan-awa sa Mateo 3:1–12; Marcos 1:1–8; Lucas 3:2–18). Pamensara nga markahan ang mga ini sa imo balaan nga mga kasulatan ukon idrowing ang mga ini. Ano ang ginatudlo sining mga imahe parte sa doktrina kag kakinahanglanon sang paghinulsol?

Ang matuod-tuod nga paghinulsol isa ka “pagbag-o sang kaisipan kag tagipusuon nga nagadala sang bag-o nga panan-aw sa Dios, sa kaugalingon, kag sa kabuhi sa kalibutan. … [Nagakahulugan ini] sang pagliso sang tagipusuon kag kabubut-on sa Dios” (Bible Dictionary, “Repentance”). Sa Lucas 3:7–14, ano nga mga pagbag-o ang gin-imbitar ni Juan nga himuon sang mga tawo para maghanda sa pagbaton kay Cristo? Paano ayhan ang ining laygay magamit sa imo? Paano mo mapakita nga matuod-tuod ka nga naghinulsol? (tan-awa sa Lucas 3:8).

Tan-awa man sa Russell M. Nelson, “Sarang Kita Maghimo sing Mas Maayo kag Mangin Mas Maayo,” Liahona, May 2019, 67–69.

Mateo 3:7; Lucas 3:7

Sin-o ang mga Fariseo kag mga Saduceo?

Ang mga Fariseo mga miyembro sang relihiyoso nga partido sang mga Judio nga ginapabugal ang ila istrikto nga pagsunod sang layi ni Moises kag sang mga ritwal sini. Ang mga Saduceo mga manggaranon nga grupo sang mga Judio nga may dako nga impluwensya sa relihiyon kag pulitika; wala sila nagapati sa doktrina sang pagkabanhaw. Ang pareho nga mga grupo naglayo na sa orihinal nga tinutuyo sang mga layi sang Dios.

Tan-awa man sa Mateo 23:23–28.

Mateo 3:11, 13–17; Marcos 1:9–11; Lucas 3:15–16, 21–22

Si Jesucristo ginbunyagan sa “pagtuman sang bug-os nga pagkamatarong.”

Sang ikaw ginbunyagan, ginsunod mo ang ehemplo sang Manluluwas. Ikumparar ang imo natun-an sa mga sinulatan parte sa bunyag sang Manluluwas sa kon anong natabo sa imo bunyag.

Bunyag sang Manluluwas	Akon Bunyag
Bunyag sang Manluluwas Sin-o ang nagbunyag kay Jesus, kag ano nga awtoridad ang iya ginkaptan?	Akon Bunyag Sin-o ang nagbunyag sa imo, kag ano nga awtoridad ang iya ginkaptan?
Bunyag sang Manluluwas Sa diin ginbunyagan si Jesus?	Akon Bunyag Sa diin ka ginbunyagan?
Bunyag sang Manluluwas Paano ginbunyagan si Jesus?	Akon Bunyag Paano ka ginbunyagan?
Bunyag sang Manluluwas Ngaa ginbunyagan si Jesus?	Akon Bunyag Ngaa ginbunyagan ka?
Bunyag sang Manluluwas Paano ginpakita sang Amay nga Langitnon nga nalipay Sia kay Jesus?	Akon Bunyag Paano ginpakita sang Amay nga Langitnon nga nalipay Sia sang ikaw ginbunyagan? Paano Niya ginpakita ang Iya kahamuot sumugod sadto?

Tan-awa man sa 2 Nefi 31; Mosias 18:8–11; Doktrina kag mga Kasugtanan 20:37, 68–74.

Mateo 3:16–17; Marcos 1:9–11; Lucas 3:21–22

Ang mga miyembro sang Pangulohan sang Dios tatlo ka separado nga mga persona.

Ang Biblia nagaunod sang madamo nga mga ebidensya nga ang mga miyembro sang Panguluhan sang Dios tatlo ka separado nga mga persona. Ang mga sinulatan parte sa bunyag sang Manluluwas isa ka halimbawa. Samtang imo ginabasa ining mga panaysayon, binagbinaga kon ano ang imo matun-an parte sa pangulohan sang Dios. Ngaa importante ining mga doktrina sa imo?

Tan-awa man sa Genesis 1:26; Mateo 17:1–5; Juan 17:1–3; Mga Binuhatan 7:55–56; Doktrina kag mga Kasugtanan 130:22.

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mateo 3.Si Juan Bautista nagakapot sang Pagkapari ni Aaron. Ano ang aton matun-an sa ehemplo ni Juan parte sa mga katuyuan sang Pagkapari ni Aaron? Ano nga mga bugay ang aton nabaton tungod sa Pagkapari ni Aaron? Kon may solterito sa inyo pamilya, mahimo nga hatagan mo sang tiyempo para buligan sia nga maintiendihan kon paano niya magamit ang Pagkapari ni Aaron para bugayan ang iban. (Tan-awa man sa Doktrina kag mga Kasugtanan 13:1; 20:46–60.)

pamatan-on nga nagabunyag sang isa pa ka pamatan-on

Sang kita ginbunyagan, ang aton mga sala ginhugasan.

Mateo 3:11–17; Marcos 1:9–11; Lucas 3:21–22.Nakakita na bala ang mga miyembro sang inyo pamilya sang tawo nga ginabunyagan ukon ginakumpirma nga miyembro sang Simbahan? Ano ang nabatyagan sang mga miyembro sang pamilya? Basi pwede mo sila tudloan parte sa simbolismo sang bunyag kag kumpirmasyon. Sa ano nangin pareho ang mabunyagan kag makumpirma sa bag-ong pagkabun-ag? Ngaa nga ginatugmaw gid kita sa tubig kon ginabunyagan kita? Ngaa nagasuksok kita sing puti kon ginabunyagan kita? Ngaa ang regalo sang Balaan nga Espiritu ginalaragway nga “bunyag sa kalayo”? (Doktrina kag mga Kasugtanan 20:41.

Mateo 3:17; Marcos 1:11; Lucas 3:22Sang san-o naton nabatyagan nga ang Dios nalipay sa aton? Ano ang pwede naton himuon bilang pamilya para palipayon ang Dios?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

 

Pagpauswag sang Personal nga Pagtuon

Magpangayo sa Ginuo sang bulig. Ang balaan nga mga kasulatan ginhatag paagi sa rebelasyon, kag para matuod-tuod nga maintiendihan ang mga ini kinahanglan naton sang personal nga rebelasyon. Ang Ginuo nagpangako, “Pangayo, kag kamo hatagan; pangita, kag kamo makakita; panuktok, kag kamo pagabuksan” (Mateo 7:7).

Si Juan Bautista nga nagabunyag kay Jesus

John the Baptist Baptizing Jesus [Si Juan Bautista nga Nagabunyag kay Jesus], ni Greg K. Olsen