“Enero 30–Pebrero 5. Mateo 4; Lucas 4–5: ‘Ang Espiritu sang Ginuo Yari sa Akon,’” Dali, Magsunod sa Akon—Para sa Mga Indibidwal kag Mga Pamilya: Bag-ong Katipan 2023 (2022)

“Enero 30–Pebrero 5. Mateo 4; Lucas 4–5,” Dali, Magsunod sa Akon—Para sa Mga Indibidwal kag Mga Pamilya: 2023

Litrato

Si Jesus nga nagatindog sa kamingawan

Into the Wilderness [Pakadto sa Kamingawan], ni Eva Koleva Timothy

Enero 30–Pebrero 5

Mateo 4; Lucas 4–5

“Ang Espiritu sang Ginuo Yari sa Akon”

Gingamit sang Manluluwas ang balaan nga mga kasulatan agud pareho nga mapakigbatuan ang mga tentasyon ni Satanas kag magpamatuod sa Iya kaugalingon nga diosnon nga misyon (tan-awa sa Lucas 4:1–21). Binagbinaga kon paano mapatubo sang balaan nga mga kasulatan ang imo pagtuo kag ang imo pangako nga pakigbatuan ang tentasyon.

Isulat Ang Imo Mga Panghunahuna

Halin sa Iya pagkabata, si Jesus daw nakahibalo na nga daan nga may isa Sia ka pinasahi, sagrado nga misyon. Pero sang nagahanda si Jesus nga umpisahan ang Iya dutan-on nga pag-alagad, ang kaaway nagtinguha nga tamnan sang pagduda ang kaisipan sang Manluluwas. “Kon ikaw ang Anak sang Dios,” siling ni Satanas (Lucas 4:3, mga italics gindugang). Pero nakighambal na ang Manluluwas sa Iya Amay sa Langit. Nahibal-an Niya ang balaan nga mga kasulatan, kag kilala Niya kon sin-o Sia. Para sa Iya, ang tanyag ni Satanas—“Sa imo ihatag ko ini tanan nga pagbulut-an” (Lucas 4:6)—wala sing kahulugan, tungod ang bilog-nga-kabuhi nga preparasyon sang Manluluwas nagtugot sa Iya nga mabaton “ang gahum sang Espiritu” (Lucas 4:14). Gani wala sapayan sang tentasyon, mga pagtilaw, kag pagsikway, si Jesucristo wala gid nagpangduhaduha sa ginhatag sa Iya nga buluhaton “Kinahanglan ako magwali sang ginharian sang Dios … kay sa sining katuyuan ginpadala ako” (Lucas 4:43).

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Mateo 4:1–2

Ang pagpakighambal sa Dios nagahanda sa akon nga mag-alagad sa Iya.

Para maghanda sa Iya misyon, si Jesus nagkadto sa kamingawan “agud makaupod ang Dios” (tan-awa sa Joseph Smith Translation, Matthew 4:1). Pamensara kon ano ang imo ginahimo para makabatyag nga malapit sa Dios. Paano ini nagahanda sa imo sa buluhaton nga gusto Niya ipahimo sa imo?

Mateo 4:1–11; Lucas 4:1–13

Si Jesucristo nagpahamtang sang ehemplo sa akon paagi sa pagpakigbato sa pagsulay.

Kon kaisa ang mga tawo nagakakonsensya kon ginatentar sila nga makasala. Pero bisan ang Manluluwas, nga nagkabuhi nga “wala nagpakasala” (Mga Hebreo 4:15), gintentar. Nakahibalo si Jesucristo sang mga tentasyon nga aton ginaatubang kag kon paano kita buligan nga malampuwasan ang mga ini (tan-awa sa Mga Hebreo 2:18; Alma 7:11–12).

Sa imo pagbasa sang Mateo 4:1–11 kag Lucas 4:1–13, ano ang imo matun-an nga makabulig sa imo kon nagaatubang ka sang mga tentasyon? Pwede mo iplastar ang imo pamensaron sa isa ka tsart pareho sini:

Jesucristo	Ako
Jesucristo Ano ang gintentar ni Satanas nga himuon ni Cristo?	Ako Ano ang ginatentar ni Satanas nga himuon ko?
Jesucristo Paano naghanda si Cristo agud mapakigbatuan ang tentasyon?	Ako Paano ako mangin handa para mapakigbatuan ang tentasyon?

Tan-awa sa 1 Mga Taga-Corinto 10:13; Alma 13:28; Moises 1:10–22.

Lucas 4:16–32

Si Jesucristo amo ang ginpropesiya nga Mesias.

Kon pangabayon ka nga ilaragway kon anong rason nga ginpadala si Jesucristo sa duta, ano ang imo ihambal? Paagi sa pagsambit sang isa sa mga propesiya ni Isaias parte sa Mesias, ginlaragway sang Manluluwas ang mga aspeto sang Iya kaugalingon nga misyon (tan-awa sa Lucas 4:18–19; Isaias 61:1–2). Ano ang imo matun-an parte sa Iya misyon samtang ginabasa mo ining mga bersikulo?

Ano ang pila sa mga paagi nga ginaagda ka sang Manluluwas nga magpartisipar sa Iya buluhaton?

Litrato

Si Jesus nga nagatindog sa sinagoga

Bisan pa nga ang mga Judio naghulat sa sulod sang mga dinag-on sang katumanan sang propesiya ni Isaias, madamo ang wala nagbaton nga si Jesus amo ang Mesias sang Sia nagsiling, “Karon natuman ining kasulatan sa inyo igdulungog” (Lucas 4:21). Samtang imo ginabasa ang Lucas 4:20–30 (tan-awa man sa Marcos 6-:1–6), tilawi nga ibutang ang imo kaugalingon sa lugar sang mga taga-Nazaret. May butang bala nga mahimo magpugong sa imo nga batunon si Cristo sing lubos bilang imo personal nga Manluluwas?

Tan-awa man sa Mosias 3:5–12.

Mateo 4:18–22; Lucas 5:1–11

Mientras nagasalig ako sa Ginuo, mabuligan Niya ako nga malab-ot ang akon diosnon nga potensyal.

Si Pangulong Ezra Taft Benson nagtudlo, “Ang mga lalaki kag babayi nga nagatugyan sang ila mga kabuhi sa Dios makadiskubre nga madamo Sia sang mahimo sa ila mga kabuhi sangsa ila masarangan” (Teachings of Presidents of the Church: Ezra Taft Benson [2014], 42). Tandai kon paano ini natabo kanday Simon Pedro kag sa iya isigka-mangingisda. May nakita si Jesus sa ila nga mas dako sangsa ila nakita sa ila mga kaugalingon. Luyag Niya sila himuon nga “mga mangingisda sang tawo” (Mateo 4:19; tan-awa man sa Lucas 5:10).

Samtang imo ginabasa ang Mateo 4:18–22 kag Lucas 5:1–11, binagbinaga kon ano ang ginabuligan ni Jesucristo nga ikaw mangin. Ano ang imo nabatyagan sa Iya pagpangagda sa imo nga magsunod sa Iya? Paano mo mapakita sa Ginuo nga handa ka nga bayaan ang tanan nga butang para sundon Sia? (tan-awa sa Lucas 5:11).

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mateo 4:1–2; Lucas 4:1–2.Ano nga mga paghangop ang aton maagom sa sining kasaysayan parte sa gahum sang pagpuasa? Pwede nga mag-istorya ang mga miyembro sang pamilya sang ila mga eksperiyensya sa pagpuasa. Mahimo kamo nga magplano sing mainampuon nga magpuasa sing dulungan para sa isa ka partikular nga katuyuan.

Mateo 4:3–4; Lucas 4:3–4.Sang gintentar ni Satanas si Cristo nga himuon nga tinapay ang bato, ginhangkat niya ang diosnon nga pagkatawo ni Cristo paagi sa pagsiling, “Kon ikaw ang Anak sang Dios” (Mateo 4:3, mga italics gindugang). Ngaa ginahimulatan ni Satanas nga magduda kita sa aton diosnon nga pagkatawo—kag sa pagkatawo sang Manluluwas? Ngaa ginatinguhaan niya nga himuon ini? (Tan-awa man sa Moises 1:10–23.)

Paglubad ni Joseph Smith, Mateo 4:11.Pagkatapos nga gintilawan si Jesus sa pisikal kag sa espirituhanon, ang Iya panghunahuna nagliso sa mga panginahanglan ni Juan Bautista, nga ara sa prisuhan: “Kag karon nahibal-an ni Jesus nga si Juan ginsulod sa prisuhan, kag nagpadala sia sang mga anghel, kag, yari karon, nag-abot sila kag nag-alagad sa iya [Juan]” (tan-awa sa Joseph Smith Translation, Matthew 4:11). Paano kita ginabugayan samtang aton ginasunod ang halimbawa ni Cristo nga pagpanumdom sang iban?

Lucas 4:16–21.May kilala bala kita nga nawad-an sang paglaum ukon nagakinahanglan nga “hilwayon sa pagpigos”? (Lucas 4:18). Paano naton buligan ang iban nga mabaton ang pagpang-ayo kag paghilway sang Manluluwas? Mahimo man ninyo hambalan kon paano ang paghikot sang mga ordinansa sa templo nagabulig “pagbuhi sa mga bihag” (Lucas 4:18).

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Pagpauswag sang Aton Pagpanudlo

Ipangabuhi ang ebanghelyo ni Jesucristo. “Ayhan ang pinakaimportante nga butang nga imo mahimo [bilang ginikanan ukon titser] amo ang … ipangabuhi ang ebanghelyo sa imo bug-os nga tagipusuon. … Amo ini ang mayor nga paagi para mangin kalipikado para sa pagpakig-upod sang Balaan nga Espiritu. Indi mo kinahanglan nga mangin perpekto, kundi matutom lamang nga nagatinguha—kag nagapangayo sang kapatawaran paagi sa Pagbayad-Sala sang Manluluwas kon ikaw masandad” (Teaching in the Savior’s Way, 13).