Jesus Teaching the People by the Seashore [Si Jesus Nagapanudlo sang Katawhan sa Baybayon], ni James Tissot

Pebrero 20–26

Mateo 6–7

“Nagpanudlo Sia sa Ila nga Subong sang Isa nga May Awtoridad”

Kon basahon naton ang balaan nga mga kasulatan nga may ginapensar nga pamangkot kag may sinsero nga handum nga intiendihon kon ano ang gusto sang Amay nga Langitnon nga aton mahibal-an, ginaimbitar naton ang Balaan nga Espiritu nga mag-inspirar sa aton. Sa imo pagbasa sang Mateo 6–7, hatagi sing atensyon ining mga pagpabatyag.

Isulat Ang Imo Mga Panghunahuna

Ang Wali sa Bukid isa sa pinakabantog nga diskurso sa Kristiyanismo. Ang Manluluwas nagpanudlo gamit ang maathag nga mga imahe, pareho sang siyudad nga nahamtang sa bakulod, mga lirio sa latagon, kag mga lobo nga nagapakuno-kuno nga mga carnero. Pero ang Wali sa Bukid masobra pa sa matahum nga pamulong-pulong. Ang gahum sang mga panudlo sang Manluluwas sa Iya mga disipulo pwede magbag-o sang aton mga kabuhi, labi na kon ginapangabuhi naton ang mga ini. Nian ang Iya mga pulong mangin labaw pa sangsa pulong; ini mangin sigurado nga pundasyon sang kabuhi nga, pareho sang balay sang mainandamon nga tawo, makabato sa mga hangin kag baha (tan-awa sa Mateo 7:24–25).

Mga Ideya para sa Personal nga Pagtuon sang Balaan nga mga Kasulatan

Mateo 6–7

Ang pagpangabuhi sang mga pinanudlo sang Manluluwas makabulig sa akon nga mangin pareho sa Iya.

Ang Wali sa Bukid nagaunod sang madamo nga mga prinsipyo sang ebanghelyo. Samtang imo ginatun-an ining mga kapitulo, pamangkuta ang Ginuo kon ano ang gusto Niya nga imo matun-an.

Isa ka prinsipyo nga mahimo mo makita amo ang kakinahanglan nga unahon ang mga butang sang Dios sangsa mga butang sang kalibutan. Diin sa mga pinanudlo sang Manluluwas sa Mateo 6–7 ang nagabulig sa imo nga magtutok sa langitnon nga mga butang? Ano ang iban mo pa nga panghunahuna ukon pamatyagan? Ano ang ginpabatyag sa imo nga imo himuon? Pamensara nga isulat ang imo mga panghunahuna. Halimbawa:

Mateo 6:1–4	Gusto ko nga mas ulikdan kon ano ang ginapensar sang Dios sa akon sangsa ginapensar sang iban.

Isa pa ka prinsipyo sa Mateo 6–7 amo ang pangamuyo. Hatagi sang tion nga binagbinagon ang imo mga pangamuyo. Kumusta ang imo pagpaninguha nga maglapit pa gid sa Dios paagi sa pangamuyo? Ano nga mga panudlo sa Mateo 6–7 ang nagainspirar sa imo nga pauswagon ang imo pagpangamuyo? Isulat ang mga panghunahuna nga imo mabaton. Halimbawa:

Mateo 6:9	Kon magpangamuyo ako, gusto ko nga tratuhon ang ngalan sang Amay nga Langitnon sing may pagtahod.
Mateo 6:10	Kon magpangamuyo ako, sarang ko ihambal ang akon handum nga matuman ang pagbuot sang Ginuo.

Pwede mo basahon liwat ang Wali sa Bukid, nga ginapangita ang iban pa nga nagabalik-balik nga tema ukon mensahe nga para gid sa imo. Isulat ang imo makita sa isa ka sululatan sang mga tinun-an, lakip na ang imo mga panghunahuna kag impresyon.

Mahimo kita nga magpalapit sa Dios paagi sa pangamuyo.

Mateo 6:7

Ano ang kahulugan sang paggamit sang “pagsulitsulit nga walay pulos” sa pangamuyo?

Masami ang pag-intiendi sang mga tawo sang “pagsulitsulit nga walay pulos” amo ang pagsulitsulit sang mga tinaga. Pero, ang tinaga nga walay pulos pwede maglaragway sang isa ka bagay nga wala sing bili. Ang paggamit sang “pagsulitsulit nga walay pulos” sa pangamuyo mahimo nga nagakahulugan sang pagpangamuyo nga wala sang sinseridad ukon wala sa buot (tan-awa sa Alma 31:12–23).

Mateo 7:1–5

Sarang ako maghusga sing matarong.

Sa Mateo 7:1, ang Manluluwas dawsa nagasiling nga indi gid kita maghusga, pero sa iban nga balaan nga mga kasulatan (lakip na ang iban nga mga bersikulo sining kapitulo), nagahatag Sia sa aton sang panulin kon paano maghusga. Kon daw makalilibog ina, ang Paglubad ni Joseph Smith sining bersikulo mahimo makabulig: Indi maghukom sing indi matarong, agud indi kamo paghukman; kundi maghukom sing matarong nga paghukom (tan-awa sa Joseph Smith Translation Matthew 7:1 sa Guide to the Scriptures). Ano ang imo makita sa Mateo 7:1–5, upod ang iban pa sa sining kapitulo, nga nagabulig sa imo kon paano “maghukom sang matarong nga paghukom”?

Mateo 7:21–23

Makilala ko si Jesucristo paagi sa pagtuman sang Iya pagbuot.

Ang dinalan nga “Wala gid ako makakilala sa inyo” sa Mateo 7:23 ginbag-o sa Paglubad ni Joseph Smith sa “Wala gid ninyo ako makilala”. Paano ka nabuligan sining pagbag-o nga mas maintiendihan ang gintudlo sang Ginuo sa mga bersikulo 21–22 parte sa pagtuman sang Iya pagbuot? Sa pamatyag mo daw ano mo kakilala ang Ginuo? Ano ang himuon mo para mas makilala pa Sia?

Mateo 7:24–27

Ang pagtuman sang mga pinanudlo sang Manluluwas nagapasad sang mabakod nga pundasyon para sa akon kabuhi.

Ang pagpangabuhi sang ebanghelyo wala nagakakas sang mga kabudlayan sa aton mga kabuhi. Ang duha ka balay sa paanggid sang Manluluwas sa Mateo 7:24–27 nakaeksperiyensya sang pareho nga unos. Pero ang isa sa mga balay nakabato sini. Paano ang pagpangabuhi sang mga pinanudlo sang Manluluwas nagpasad sang mabakod nga pundasyon para sa imo? Ano ang nabatyagan mo nga dapat mo himuon para ipatindog ang imo “balay sa ibabaw sang [bato]”? (tan-awa sa bersikulo 24).

Tan-awa man sa Helaman 5:12.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mateo 6:5–13.Ano ang aton matun-an parte sa pangamuyo halin sa paagi nga nagpangamuyo ang Manluluwas? Paano naton gamiton ang Iya pangamuyo bilang modelo agud pauswagon ang aton personal kag pang-pamilya nga mga pangamuyo? (Tan-awa man sa Lucas 11:1–13.) Kon may magagmay ka nga kabataan, pwede kamo magpraktis mangamuyo sing ululupod.

Mateo 6:33.Ano ang kahulugan sang “pangitaa … anay ang ginharian sang Dios”? Paano naton ini ginahimo bilang indibidwal kag bilang pamilya?

Mateo 7:1–5.Para mapanan-aw ang mga pinanudlo sa sining mga bersikulo, pwede magpangita ang inyo pamilya sang puling (gamay nga liniak nga kahoy) kag isa ka balayan (dako nga kahoy). Ano ang ginatudlo sa aton sang pagkumparar sining duha parte sa paghusga sa iban?  

Mateo 7:24–27.Agud buligan ang imo pamilya nga mas maintiendihan ang paanggid sang Manluluwas parte sa mainandamon kag buangbuang nga tawo, pwede mo pabubuan sa ila sang tubig ang balas kag dayon ang bato. Paano kita magpatukod sang aton espirituhanon nga mga pundasyon sa bato?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Pagpauswag sang Personal nga Pagtuon

Magpaambit sang mga panghunahuna. Ang paghambalanay parte sa mga prinsipyo nga imo natun-an sa imo personal nga pagtuon indi lamang maayo nga paagi sa pagtudlo sa iban; nagabulig man ini nga pabakuron ang imo kaugalingon nga pag-intiendi. Tilawi ang magpaambit sang isa ka prinsipyo nga imo natun-an sining semana sa isa ka miyembro sang pamilya ukon sa inyo mga klase sa Simbahan.

I Have Prayed for Thee [Nagpangamuyo Ako para sa Imo], ni Del Parson