Si Jesus nga nagapabangon sang lalaki sa iya hiligdaan

Pebrero 27–Marso 5

Mateo 8; Marcos 2–4; Lucas 7

“Ang Imo Pagtuo Nagluwas sa Imo”

Halungi nga indi mo pagdali-dalion ang imo pagtuon sang balaan nga mga kasulatan. Hatagi sing tiyempo ang mainampuon nga pagbinagbinag, bisan pa nga magakahulugan ini nga maubusan ka sang tiyempo sa pagbasa sang tagsa ka bersikulo. Ini nga tinion sang pagbinagbinag masami nagadala sang personal nga rebelasyon.

Isulat Ang Imo Mga Panghunahuna

Isa sa pinakamaathag nga mensahe sa Bag-ong Katipan amo nga si Jesucristo isa ka manugbulong. Kadamo sang mga panaysayon parte sa Manluluwas nga nagapaayo sang nagamasakit kag ginalisdan—halin sa babayi nga may hilanat pakadto sa anak sang balo nga napatay. Ngaa ginatutokan gid ang pisikal nga pagpang-ayo? Ano ayhan ang mga mensahe para sa aton sining mga milagro? Sigurado nga ang isa sa maathag nga mensahe amo nga si Jesucristo Anak sang Dios, nga may gahum sa tanan nga butang, lakip na ang aton pisikal nga mga kasakit kag pagkadi-perpekto. Pero isa pa ka kahulugan ang makita sa Iya mga pulong sa nagaduda nga mga eskriba: “Agud nga inyo mahibaluan nga ang Anak sang tawo may [gahum] sa duta sa pagpatawad sang mga sala” (Marcos 2:10). Gani kon makabasa ka parte sa isa ka bulag ukon aruon nga nag-ayo, pwede mo pamensaron ang pagpang-ayo—pareho espirituhanon kag pisikal—nga imo mabaton sa Manluluwas kag mabatian Sia nga nagahambal sa imo, “Ang imo pagtuo nagluwas sa imo” (Lucas 7:50).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Mateo 8; Marcos 2–3; Lucas 7

Ang Manluluwas sarang magpaayo sang mga kahuyang kag mga balatian.

Ining pila ka mga kapitulo nagarekord sang madamo nga tion sang milagroso nga pagpang-ayo nga ginhimo sang Manluluwas. Samtang imo ginatun-an ang ining mga pagpang-ayo, pangitaa ang posible nga mga mensahe para sa imo. Pwede mo pamangkuton ang imo kaugalingon: Ano ang ginatudlo sining istorya parte sa pagtuo kay Jesucristo? Ano ang ginatudlo sining istorya parte sa Manluluwas? Ano ang gusto sang Dios nga akon matun-an sa sining milagro? Ari ang pila ka mga halimbawa, pero mahimo nga may madamo pa:

• Isa ka aruon (Mateo 8:1–4

• Suluguon sang kapitan (Mateo 8:5–13; Lucas 7:1–10)

• Ugangan ni Pedro (Mateo 8:14–15

• Tawo nga paralitiko (Marcos 2:1–12)

• Tawo nga itos ang iya kamot (Marcos 3:1–5)

• Lalaking anak sang balo sang Nain (Lucas 7:11–16)

Marcos 2:15–17; Lucas 7:36–50

Nagkari si Jesucristo indi agud kondenahon ang mga makasasala kundi para paayuhon sila.

Samtang imo ginabasa ining mga bersikulo parte sa mga inter-aksyon ni Jesus sa mga eskriba kag mga Fariseo, mahimo mo binagbinagon kon bala makita mo ang imo kaugalingon sa sining mga panaysayon. Halimbawa, ang imo bala mga panghunahuna kag mga aksyon pareho sang sa iya ni Simon nga Fariseo? Paano mo ilaragway ang kinalain sang panan-aw ni Jesus sa mga makasasala kag sa panan-aw sa ila sang mga Fariseo pareho kay Simon? Pamensara kon ano ayhan ang mabatyagan sadtong mga ginabug-atan tungod sang sala kon kaupod nila ang Manluluwas. Ano ang ila mabatyagan kon kaupod ka nila?

Pwede mo man binagbinagon kon paano ka nangin pareho sa babayi nga ginalaragway sa Lucas 7:36–50. San-o mo naeksperiyensyahan ang kalulo kag kaluoy nga ginpakita sang Manluluwas sa iya? Ano ang imo matun-an sa iya ehemplo sang pagtuo, pagpalangga, kag pagpaubos?

Tan-awa man sa Juan 3:17; Lucas 9:51–56.

Mateo 8:18–22; Marcos 3:31–35

Ang mangin disipulo ni Jesucristo nagakahulugan nga unahon ko Sia sa akon kabuhi.

Sa sining mga bersikulo, ginpanudlo ni Jesus nga ang mangin Iya mga disipulo nagapangayo nga unahon naton Sia sa aton mga kabuhi, bisan pa nga kon kaisa nagakahulugan ina nga isakripisyo naton ang iban nga mga butang nga malahalon para sa aton. Sa imo pagtuon sining mga dinalan, pamensara sing maayo ang imo kaugalingon nga pagkadisipulo. Ngaa kinahanglan nga ang mga disipulo mangin handa nga unahon ang Manluluwas? Ano ayhan ang kinahanglan mo buy-an para unahon si Jesus? (Tan-awa man sa Lucas 9:57–62.)

Mateo 8:23–27; Marcos 4:35–41

Si Jesucristo may gahum nga magdala sang paghidaet sa tunga sang mga bagyo sang kabuhi.

Nakabatyag ka na bala sang nabatyagan sang mga disipulo ni Jesus sang nagabagyo sa dagat—nga nagatulok sa mga balod nga nagapuno sa baruto kag nagapamangkot, “Manunudlo, wala ka bala kabalaka nga mawala kita?”

Sa Marcos 4:35–41, makita mo ang apat ka mga pamangkot. Ilista ang kada isa, kag panumduma sing maayo kon ano ang ginatudlo sini sa imo parte sa pag-atubang sang mga hangkat sang kabuhi nga may pagtuo kay Jesucristo. Paano ang Manluluwas nagadala sang kalinong sa mga bagyo sang imo kabuhi?

Si Jesus sa baruto nga ginapakalma ang bagyo

From Fear to Faith [Halin sa Kahadlok Pakadto sa Pagtuo], ni Howard Lyon

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mateo 8; Marcos 2–4; Lucas 7.Pamensara ang paghimo sang listahan sang mga milagro nga ginlaragway sa sining mga kapitulo. Tinguhai ang pagpangita ukon pagdrowing sang mga litrato sang pila sini (tan-awa sa Libro sang mga Larawan nga Pang-Ebanghelyo ukon sa ChurchofJesusChrist.org). Ang tagsa ka miyembro sang pamilya pwede maggamit sang mga litrato sa pag-istorya parte sa isa sang mga milagro kag ipaambit ang ila natun-an diri. Mahimo ka magpaambit sang pila ka halimbawa sang mga milagro nga imo nakita ukon nabasahan sa aton panahon karon.

Mateo 8:5–13; Lucas 7:1–10.Ano ang ara sa pagtuo sang kapitan nga nanamian ni Jesus? Paano naton mapakita ang pareho nga pagtuo kay Jesucristo?

Marcos 2:1–12.    Paano kita mangin pareho sa mga abyan sang tawo nga indi makalakat? Sin-o ang daw pareho sina nga abyan sa aton?

Marcos 4:35–41.Makabulig bala ang istorya nga ini sa mga miyembro sang pamilya kon nahadlok sila? Basi pwede nila basahon ang bersikulo 39 kag ipaambit ang mga eksperiyensya sang ginbuligan sila sang Manluluwas nga makabatyag sang kalinong.

Mahimo nga masadyahan ang kabataan sinang kuno-abi ara sila sa bangka sa dagat nga ginabagyo samtang may nagabasa sang Marcos 4:35–38. Dayon, kon mabasahan na ang bersikulo 39, pwede sila mag-akto nga kuno abi ang bangka ara sa matawhay nga dagat.    

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Pagpauswag sang Aton Pagpanudlo

Mangin yara kag madali palapitan. Ang pila sa pinakamaayo nga tion sa pagtudlo nagasugod bilang mga pamangkot ukon palaligban sa mga tagipusuon sang mga miyembro sang pamilya. Ipahibalo sa mga miyembro sang pamilya paagi sa imo mga pulong kag mga aksyon nga handa ka nga mamati sa ila. (Tan-awa sa Teaching in the Savior’s Way, 16.)

Si Jesus upod ang masakiton nga tawo sa hiligdaan nga ginpaagi sa atop

Christ and the Palsied Man [Si Cristo kag ang Lalaking Paralitiko], ni J. Kirk Richards