Bag-ong Katipan 2023
Marso 6–12. Mateo 9–10; Marcos 5; Lucas 9: “Ining Dose Ginpadala ni Jesus”


“Marso 6–12. Mateo 9–10; Marcos 5; Lucas 9: ‘Ining Dose Ginpadala ni Jesus,’” Dali, Magsunod sa Akon—Para sa Mga Indibidwal kag Mga Pamilya: Bag-ong Katipan 2023 (2022)

“Marso 6–12. Mateo 9–10; Marcos 5; Lucas 9,” Dali, Magsunod sa Akon—Para sa Mga Indibidwal kag Mga Pamilya: 2023

Litrato
Si Jesus nga ginaordinan si Pedro

Marso 6–12

Mateo 9–10; Marcos 5; Lucas 9

“Ining Dose Ginpadala ni Jesus”

Ang mga ideya sa pagtuon sa sining outline gintuyo para buligan ka nga makakita sang personal nga kahulugan sa balaan nga mga kasulatan. Ini ugaling, indi dapat magbulos sa personal nga rebelasyon nga mahimo mo mabaton parte sa kon ano nga mga dinalan ang tun-an ukon kon paano ini tun-an.

Isulat Ang Imo Mga Panghunahuna

Ang impormasyon parte sa nagapang-ayo nga mga milagro ni Jesus madasig nga naglapta. Guban-guban sang mga tawo ang nagsunod sa Iya, nga nagalaum sang kasulhayan sa ila mga balatian. Pero sang gintulok sang Manluluwas ang mga kadam-an, masobra pa sangsa ila mga pisikal nga balatian ang Iya nakita. Nga napuno sing kaluoy, nakita Niya ang “mga carnero nga walay manugpahalab” (Mateo 9:36). “Sa pagkamatuod ang alanyon bugana,” siling Niya, “apang pila lamang ang mangangani” (Mateo 9:37). Gani nagtawag Sia sang dose ka mga Apostoles, “ginhatagan sila sang pagbulut-an,” kag ginpadala sila sa pagtudlo kag pag-alagad “sa mga tawo sang Israel nga kaangay sang mga carnero nga nagkaladula” (Mateo 10:1, 6). Sa karon nga panahon ang kakinahanglan sang mas madamo nga trabahador para mag-alagad sa kabataan sang Amay nga Langitnon pareho man kadako. May Dose ka mga Apostoles man sa gihapon, pero may mas madamo nga mga disipulo ni Cristo sa karon sangsa sang una—mga tawo nga sarang magdeklarar sa bilog nga kalibutan, “Ang ginharian sang langit malapit na” (Mateo 10:7).

Litrato
icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Mateo 9:18–26; Marcos 5:22–43

“Indi ka magkahadlok, kundi magtuo ka lang.”

Sang primero nga ginpangabay ni Jairo si Jesus nga paayuhon ang iya anak nga babayi, nga “tagumatayon,” naghambal si Jairo nga nagadali pero nagalaum: “Kari ka kag pandungan mo sia sang imo kamot, … kag mabuhi [sia]” (Marcos 5:23). Pero sang nagapakadto na sila, isa ka mensahero ang naghambal kay Jairo nga ulihi na sila: “Ang imo anak nga babayi patay na: ngaa bala budlayon mo pa ang Manunudlo?” (bersikulo 35). Sa amo man, mahimo nga ulihi na kaayo para sa babayi nga ginlaragway sa Marcos 5:25–34, nga nag-antos sang isa ka balatian sing 12 ka tuig.

Samtang imo ginabasa ining mga panaysayon, mahimo nga makapamensar ka sang mga butang nga nagakinahanglan sang pag-ayo sa imo kabuhi ukon sa imo pamilya—lakip na ang mga butang nga daw “tagumatayon” ukon tama na kalala para mag-ayo. Ano ang nanamian mo sa mga pagpahayag sang pagtuo sa sining mga sinulatan? Tandai man ang ginsiling ni Jesus sa babayi kag kay Jairo. Ano sa pamatyag mo ang Iya ginasiling sa imo?

Tan-awa man sa Lucas 8:41–56; Russell M. Nelson, “[Pagdala] sang Gahum ni Jesucristo sa Aton mga Kabuhi,” Liahona, Mayo 2017, 39–42.

Litrato
babayi nga nagalab-ot sang kunop ni Jesus

Trust in the Lord [Magsalig sa Ginuo], ni Liz Lemon Swindle

Mateo 10; Lucas 9:1–6

Ang Ginuo nagahatag sa Iya mga alagad sang gahum para himuon ang Iya buluhaton.

Ang mga panulin nga ginhatag ni Jesus sa Mateo 10 sa Iya mga Apostoles sarang man magamit sa aton, tungod kita tanan may bahin sa buluhaton sang Ginuo. Ano nga gahum ang ginhatag ni Cristo sa Iya mga Apostoles para buligan sila nga tumanon ang ila misyon? Paano mo mabaton ang Iya gahum sa buluhaton nga ginapahimo sa imo? (tan-awa sa 2 Mga Taga-Corinto 6:1–10; Doktrina kag mga Kasugtanan 121:34–46).

Samtang imo ginabasa ang panulin nga ginhatag ni Cristo sa Iya mga Apostoles, mahimo nga makabaton ka sang mga pagpabatyag parte sa buluhaton nga gusto sang Ginuo nga ipahimo sa imo. Ang tsart nga pareho sang masunod makabulig sa imo nga plastaron ang imo panghunahuna:

Mateo 10

Mga pagpabatyag nga akon nabaton

Ang Manluluwas naghatag sa Iya mga disipulo sang gahum.

Hatagan ako sang Dios sang gahum nga akon kinahanglan para himuon ang akon buluhaton.

Tan-awa man sa Marcos 6:7–13; Mga Artikulo sang Pagtuo 1:6..

Mateo 10:17–20

Kon ara ako sa pag-alagad sang Ginuo, buligan Niya ako nga mahibal-an ang akon ihambal.

Nakita na nga daan sang Ginuo nga pagahingabuton ang Iya mga disipulo kag pagadudahan sa ila pagtuo—bagay nga ginaagyan man sang mga disipulo sa karon. Pero nagpromisa Sia sa mga disipulo nga mahibal-an nila kon ano ang ihambal paagi sa Espiritu. May mga eksperiyensya ka na bala nga natuman ining diosnon nga promisa sa imo kabuhi, ayhan sang nagpaambit ka sang imo panaksihon, naghatag sang bendisyon, ukon nagaistorya sa isa ka tawo? Pamensara nga isugid ang imo mga eksperiyensya sa isa ka mahal sa kabuhi ukon isulat ang mga ini sa journal. Ano ang ginainspirar sa imo nga himuon para masami nga makaangkon sang amo sini nga mga eksperiyensya?

Tan-awa man sa Lucas 12:11–12; Doktrina kag mga Kasugtanan 84:85.

Mateo 10:34–39

Ano ang buot silingon ni Jesus sang “wala ako magkari sa pagdala sing paghidaet, kundi sing espada”?

Si Elder D. Todd Christofferson nagtudlo: “Nagapati ako nga ang madamo sa inyo ginlikawan kag ginsikway sang amay kag iloy, sang mga kauturan sang inyo ginbaton ang ebanghelyo ni Jesucristo kag nagsulod sa Iya kasugtanan. Sa isa ka bahin, ang imo nagapangibabaw nga pagpalangga kay Cristo nagkinahanglan nga isakripisyo ang mga relasyon nga malahalon sa imo, kag nagtulo ang madamo mo nga luha. Pero upod ang wala nagaugdaw nga pagpalangga, nagapadayon ka sa idalom sining krus, nga ginapakita ang imo kaugalingon nga wala nagakahuya sa Anak sang Dios” (“Finding Your Life,” Ensign, Mar. 2016, 28).

Ining kahanda nga madulaan sang ginapakamahal nga mga relasyon para sundon ang Manluluwas may kaupod nga promisa nga “ang nagadula sang iya kabuhi bangud sa akon makita niya ini” (Mateo 10:39).

Litrato
icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Marcos 5:22–43.Samtang ginabasa sang imo pamilya ining istorya sing ululupod, pwede ka magpundo agud pamangkuton ang mga miyembro sang pamilya kon ano ayhan ang ila mabatyagan kon sila si Jairo, ang babayi, ukon ang iban pa nga mga tawo sa istorya. Pwede ka man magpakita sang litrato parte sa istorya nga ini, pareho sa nalakip sa sining outline. Paano ginapakita sining mga litrato ang pagtuo sang mga tawo sa mga istorya?   Pwede man ninyo pamensaron ang pila sa mga hangkat nga ginaatubang sang inyo pamilya. Paano naton magamit ang Iya mga pulong, “Indi ka magkahadlok, kundi magtuo ka lang”? (Marcos 5:36).

Mateo 10:39; Lucas 9:23–26.Ano ayhan ang buot silingon sang “magdula” sang aton kabuhi kag sang “makita” ini? (Mateo 10:39). Basi pwede magpaambit ang mga miyembro sang pamilya sang mga eksperiyensya nga nagalarawan sang mga pinanudlo ni Jesus sa sining mga bersikulo.

Mateo 10:40.Kamusta kamo sang imo pamilya sa pagbaton kag pagsunod sang mga laygay sang mga Apostoles sa sining panahon? Paano ang aton pagtuman sang ila mga laygay mas nagapalapit sa aton kay Jesucristo?

Lucas 9:61–62.Ano ang buot silingon sang magbalikid pagkatapos nga magkapot sa arado? Ngaa ining batasan magahimo sa aton nga indi takos sa ginharian sang Dios?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Pagpauswag sang Personal nga Pagtuon

Pamatii ang Espiritu. Sa imo pagtuon, hatagi sing atensyon ang imo pamensaron kag mga balatyagon (tan-awa sa Doktrina kag mga Kasugtanan 8:2–3), bisan pa nga daw wala ini sing kaangtanan sa imo ginabasa. Basi inang mga pagpabatyag amo mismo ang mga butang nga gusto sang Dios nga imo mahibal-an kag himuon.

Litrato
Si Jesus nga nagapabangon sang bata nga babayi sa iya hiligdaan

Talitha Cumi, ni Eva Koleva Timothy

I-print