Be Not Afraid [Indi Magkahadlok], ni Michael Malm

Marso 13–19

Mateo 11–12; Lucas 11

“Papahuwayon Ko Kamo”

Si Pangulong Dallin H. Oaks nagtudlo: “Ang balaan nga mga kasulatan, nga amo ang mga rebelasyon sang una, indi mahangpan kon wala sang pagbaton sang mga rebelasyon sa karon. … Ang pagtuon sang balaan nga mga kasulatan nagatugot sa mga lalaki kag mga babayi nga makabaton sang mga rebelasyon” (“Scripture Reading and Revelation,” Ensign, Ene. 1995, 7).

Isulat Ang Imo Mga Panghunahuna

Sa madamo nga paagi, ang mga Fariseo kag mga eskriba naghimo sang pagsimba kay Jehova nga mabudlay. Masami nila ginapasulabi ang istrikto nga mga patakaran sangsa wala katapusan nga mga kamatuoran. Ang mga patakaran sa Adlaw nga Inugpahuway, nga gintuyo nga mangin adlaw sang kapahuwayan, nahimo na nga kabudlayan.

Kag dayon, si Jehova Mismo nagkari sa Iya katawhan. Gintudlo Niya sa ila nga ang tunay nga katuyuan sang relihiyon indi ang magtuga sang mga kabudlayan kundi para pamag-anon ang mga ini. Gintudlo Niya nga ginhatagan kita sang Dios sang mga kasuguan, lakip na ang pagtahod sang Adlaw nga Inugpahuway, indi para piguson kita kundi para bugayan kita. Huo, ang banas pakadto sa Dios makitid kag masipot, pero ang Ginuo nagkari agud ipahibalo nga indi naton kinahanglan nga maglakat nga nagaisahanon. “Magkari kamo sa akon,” pakitluoy Niya. Ang Iya imbitasyon, sa tanan nga nagabatyag nga “ginabug-atan” tungod sang bisan ano nga rason, amo nga magtindog sa tupad Niya, nga iangot naton ang aton mga kaugalingon sa Iya, kag tugotan Sia nga makigbahin sa aton mga kabudlayan. Ang Iya promisa amo nga “Makakita kamo sang kapahuwayan sa inyo mga kalag.” Kon ikumparar sa iban nga mga alternatibo—ang pagtinguha nga magpadayon nga nagaisahanon ukon ang pagsalig sa dutan-on nga mga solusyon—ang Iya “gota mahapos, kag ang [Iya] karga mamag-an.” (Mateo 11:28–30.)

Mga Ideya para sa Personal nga Pagtuon sang Balaan nga mga Kasulatan

Mateo 11:28–30

Hatagan ako ni Jesucristo sang kapahuwayan samtang nagasalig ako sa Iya.

Tanan kita may ginapas-an nga mga kabudlayan—ang iban resulta sang aton kaugalingon nga mga sala kag sayop, ang iban tuga sang mga pagpili sang iban, kag ang iban kabahin lang gid sang kabuhi sa duta kag indi sala sang bisan sin-o. Bisan ano pa ang rason sang aton mga kabudlayan, si Jesus nagapangabay sa aton nga magpalapit sa Iya para mabuligan Niya kita nga pamag-anon ang aton mga kabudlayan kag maumpawan (tan-awa sa Mosias 24). Si Elder David A. Bednar nagtudlo, “Ang paghimo kag pagtipig sang sagrado nga mga kasugtanan nagabugkos sa aton sa kag upod kay Ginuong Jesucristo” (Bear Up Their Burdens with Ease,” Liahona, Mayo 2014, 88). Nga ginapanumdom ini, hunahunaa sing maayo ang mga pamangkot pareho sa masunod para maintiendihan ang mga pulong sang Manluluwas sa sining mga bersikulo: Paano ako ginabugkos sang akon mga kasugtanan sa kag upod sa Manluluwas? Ano ang kinahanglan ko himuon para magpalapit kay Cristo? Sa ano nga paagi nangin mahulas ang gota sang Manluluwas kag ang Iya karga mamag-an?

Ano ang iban pa nga mga pamangkot nga nagasulod sa imo kaisipan samtang ikaw nagabasa? Isulat ang mga ini, kag magpangita sang mga sabat sining semana sa balaan nga mga kasulatan kag sa mga pulong sang mga propeta. Mahimo ka nga makakita sang pila ka sabat sa imo mga pamangkot sa mensahe ni Elder David A. Bednar nga gin-sambit sa ibabaw.

Tan-awa man sa John A. McCune, “Magkari kay Cristo—Pagpangabuhi bilang mga Santos sa Ulihing mga Adlaw,” Liahona, May 2020, 36–38.

The Disciples Eat Wheat on the Sabbath [Ang Mga Disipulo Nagakaon sang Trigo sa Adlaw nga Inugpahuway], ni James Tissot

Mateo 12:1–13

“Maghimo sing kaayohan sa adlaw nga inugpahuway.”

Ang mga pinanudlo sang mga Fariseo lain sangsa iya sang Manluluwas sa madamo nga aspeto, kag ilabi na gid sa kon paano tahuron ang Adlaw nga Inugpahuway. Samtang imo ginabasa ang Mateo 12:1–13, mahimo mo pamensaron kon paano nagabagay ang imo mga pamatasan kag pangginawi tuhoy sa Adlaw nga Inugpahuway sa mga pinanudlo sang Manluluwas. Para himuon ini, pwede mo binagbinagon ang mga pahayag pareho sini:

• “Buot ko ang kaluoy, kag indi ang halad” (bersikulo 7; tan-awa sa Oseas 6:6).

• “Ang Anak sang tawo Ginuo [bisan sang] adlaw nga inugpahuway” (bersikulo 8).

• “Tugot ang paghimo sing kaayohan sa adlaw nga inugpahuway” (bersikulo 12).

Paano ayhan makaimpluwensya ining mga panudlo sa paagi nga imo ginaatubang ang Adlaw nga Inugpahuway?

Tan-awa man sa Marcos 2:23–3:5.

Mateo 12:34–37; Lucas 11:33–44

Ang akon mga pulong kag aksyon nagapakita sang kon ano ang ara sa akon tagipusuon.

Isa sa mayor nga ginasaway sang Manluluwas sa mga Fariseo amo nga ginatinguhaan nila nga mangin matarong tulukon pero ang ila mga intensyon indi matarong. Samtang imo ginatun-an ang mga paandam sang Manluluwas sa mga Fariseo sa Mateo 12:34–37 kag Lucas 11:33–44, binagbinaga ang koneksyon sang aton mga tagipusuon kag sang aton mga aksyon. Ano ang kahulugan sa imo sang dinalan nga “maayo nga manggad nga yara sa iya tagipusuon”? (Mateo 12:35). Paano kita ginapakamatarong ukon ginakondenar sang aton mga pulong? (tan-awa sa Mateo 12:37). Ano ayhan ang buot silingon sang imo mata “maayo”? (Lucas 11:34). Binagbinaga kon paano ka mangin “puno sing kapawa” (Lucas 11:36) paagi sa gahum sang Manluluwas.

Tan-awa man sa Alma 12:12–14; Doktrina kag mga Kasugtanan 88:67–68.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mateo 11:28–30Mabuligan mo ang imo pamilya nga mapanan-aw ang mga pinanudlo sang Manluluwas sa sining mga bersikulo paagi sa pagpabulos-bulos sa ila sa pagguyod sang mabug-at nga butang, una nga sila lang kag dayon nga may nagabulig sa ila. Ano ang pila sa mga palas-anon nga aton ginakarga? Ano ang buot silingon sang itakod ang gota ni Cristo sa aton kaugalingon? Ang litrato sa katapusan sining outline makabulig sa imo nga ipaathag kon ano ang gota.

Mateo 12:10–13.Samtang inyo ginabasa ang parte kay Jesus nga ginaayo ang isa ka tawo sa Adlaw nga Inugpahuway, pwede nga hambalan sang imo pamilya kon paano kita “naulian” paagi sa Manluluwas. Paano ang Adlaw nga Inugpahuway mangin adlaw sang pag-ayo para sa aton?

Nga inspirado sang halimbawa sang Manluluwas sa sining mga bersikulo, pwede maghimo ang inyo pamilya sang listahan sang mga paagi nga kamo “maghimo sang kaayohan sa adlaw nga inugpahuway” (bersikulo 12). Siguroha nga malakip ang mga oportunidad sa pagserbisyo sa iban. Makabulig nga tipigan ninyo ang inyo listahan kag balikan ini sa madason nga mga Domingo.

Lucas 11:33–36.Binagbinaga kon paano mo itudlo sa imo pamilya ang kahulugan sang “puno sing kapawa” (mga bersikulo 34, 36). Makabulig ayhan ang leksyon gamit ang isa ka bagay? Pwede man ninyo hambalan ang mga paagi agud madala ang kasanag sang Manluluwas sa aton mga kabuhi, sa aton balay, kag sa kalibutan.  

Lucas 11:37–44.Basi pwede nga hambalan sang inyo pamilya ining mga bersikulo samtang nagapanghugas sang mga plato nga ululupod. Pwede ninyo mahambalan kon ngaa indi maayo nga ideya nga hugasan lamang ang sa gwa sang mga butang pareho sang yahong kag mga baso. Dayon pwede ninyo ini iangot sa kakinahanglan nga mangin matarong indi lamang sa gwa nga mga binuhatan kundi sa aton man pangsulod nga panghunahuna kag mga balatyagon.

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Pagpauswag sang Personal nga Pagtuon

Mangin tayuyon. Mahimo nga may mga adlaw ka nga ang pagtuon sang balaan nga mga kasulatan daw mas mabudlay ukon daw diutay ang epekto sangsa imo ginapaabot. Indi magpangampo. Si Elder David A. Bednar nagtudlo: Ang aton katayuyon sa paghimo sang ginakabig nga magagmay nga mga butang ang mahimo magdala sang dalagko nga espirituhanon nga mga resulta” (“More Diligent and Concerned at Home,” Liahona, Nob. 2009, 20).

“Itakod ang akon gota sa inyo, kag magtuon kamo sa akon; kay ako mapainubuson kag malulo sa tagipusuon: kag makakita kamo sang kapahuwayan sa inyo mga kalag.” (Mateo 11:29). Photograph © iStockphoto.com/wbritten