1 Kag natabo ini nga naangkon ni Amulon ang kahamuot sa mga mata sang hari sang mga Lamanhon; gani, ang hari sang mga Lamanhon nagtugot sa iya kag sa iya mga kauturan nga sila ang pilion nga mga manunudlo sang iya katawhan, huo, bisan sang katawhan nga yara sa duta sang Semlon, kag sa duta sang Silom, kag sa duta sang Amulon.

2 Kay gin-angkon sang mga Lamanhon ining tanan nga duta; gani, ang hari sang mga Lamanhon nagpili sang mga hari sa ining tanan nga duta.

3 Kag karon ang ngalan sang hari sang mga Lamanhon amo si Laman, nga gintawag sunod sa ngalan sang iya amay; kag gani gintawag sia nga si haring Laman. Kag nangin hari sia sang madamo nga katawhan.

4 Kag nagpili sia sang mga manunudlo halin sa mga kauturan ni Amulon sa tagsa ka duta nga gin-angkon sang iya katawhan; kag gani ang lengguahe ni Nefi nagsugod nga itudlo sa tanan nga katawhan sang mga Lamanhon.

5 Kag isa sila ka katawhan nga mainabyanon sa isa kag isa; apang wala sila makakilala sa Dios; wala man sila pagtudloi sang mga kauturan ni Amulon sing bisan ano parte sa Ginuo nga ila Dios, kag sang layi ni Moises; kag wala man sila pagtudloi sang mga pulong ni Abinadi;

6 Kundi nga gintudloan nila sila nga dapat sila magtipig sang ila kasulatan, kag makasulat sila sa isa kag isa.

7 Kag gani ang mga Lamanhon nagsugod nga madugangan sa manggad, kag nagsugod sa pagbinaligyaanay sa isa kag isa kag nag-uswag, kag nagsugod nga mangin isa ka tuso kag maalam nga katawhan, suno sa kaalam sang kalibutan, huo, isa ka tuman katuso nga katawhan, nga nagakalipay sa tanan nga sari sang kalainan kag pagpangagaw, luwas sa ila kaugalingon nga mga kauturan.

8 Kag karon natabo ini nga si Amulon nagsugod sa paggamit sang awtoridad kanday Alma kag sa iya mga kauturan, kag nagsugod sa paghingabot sa iya, kag nagsugo nga hingabuton sang iya mga anak ang ila mga anak.

9 Kay nakilal-an ni Amulon si Alma, nga sia isa anay sang mga pari sang hari, kag sia amo sadto ang nagpati sa mga pulong ni Abinadi kag gintabog sa atubang sang hari, kag gani akig sia sa iya; kay sakop sia ni haring Laman, apang naggamit sia sang awtoridad sa ila, kag ginhatagan sila sang mga hilimuon, kag ginbutangan sila sang mga kabo.

10 Kag natabo ini nga sa pagkadako sang ila mga pag-antos nga nagsugod sila sa pagpakitluoy sing tuman sa Dios.

11 Kag ginsugo sila ni Amulon nga untaton nila ang ila mga pagpakitluoy; kag ginbutangan niya sila sing mga bantay agud bantayan sila, agud nga patyon ang kon sin-o man nga makita nga nagapanawag sa Dios.

12 Kag si Alma kag ang iya katawhan wala nagbayaw sang ila mga tingug sa Ginuo nga ila Dios, kundi nga ginbubo nila ang ila mga tagipusuon sa iya; kag nahibal-an niya ang mga panghunahuna sang ila mga tagipusuon.

13 Kag natabo ini nga nabatian nila ang tingug sang Ginuo sa ila mga pag-antos nga nagasiling: Ibayaw ang inyo mga ulo kag mangin malipayon kay nahibal-an ko ang kasugtanan nga inyo ginhimo sa akon; kag magapakighisugot ako sa akon katawhan kag hilwayon ko sila halin sa pagkaulipon.

14 Kag pahapuson ko man ang mga palas-anon nga ginbutang sa inyo mga abaga, nga indi gani ninyo mabatyagan ang mga ini sa inyo mga likod, bisan samtang yara kamo sa pagkaulipon; kag ini akon pagahimuon agud nga magtindog kamo bilang mga saksi para sa akon pagkatapos sini, kag mahibal-an sing pat-od nga ako, nga Ginuong Dios, nagabisita sa akon katawhan sa ila mga pag-antos.

15 Kag karon natabo ini nga ang mga palas-anon nga ginbutang kanday Alma kag sa iya mga kauturan ginhimo nga mamag-an; huo, ginpakusog sila sang Ginuo agud nga madala nila ang ila mga palas-anon sing mahapos, kag nagpaidalom sila sing malipayon kag may pagpaumod sa tanan nga pagbuot sang Ginuo.

16 Kag natabo ini nga sa pagkadako sang ila pagtuo kag sang ila pagpaumod nga nabatian nila liwat ang tingug sang Ginuo nga nagasiling: Magkalipay, kay sa buwas pagahilwayon ko kamo halin sa pagkaulipon.

17 Kag nagsiling sia kay Alma: Pangunahan mo ining katawhan, kag magaupod ako sa imo kag hilwayon ining katawhan halin sa pagkaulipon.

18 Karon natabo ini nga si Alma kag ang iya katawhan sang pagkagab-i nagpanipon sang ila mga panong, kag sang ila man mga uyas; huo, bisan sa bilog nga gab-i nagapanipon sila sang ila mga panong.

19 Kag pagkaaga ginpahanabo sang Ginuo ang mahamuok nga katulogon sa mga Lamanhon, huo, kag ang tanan nila nga kabo yara sa mahamuok nga katulogon.

20 Kag si Alma kag ang iya katawhan nagkadto sa kamingawan; kag pagkatapos nga nakapanglakaton sila sa bilog nga adlaw nagpatindog sila sang ila mga tolda sa isa ka patag, kag gintawag nila ang patag nga Alma bangod sia ang nagpanguna sa ila alagyan sa kamingawan.

21 Huo, kag sa patag sang Alma ginbubo nila ang ila mga pagpasalamat sa Dios bangod nangin maluluy-on sia sa ila, kag ginpamag-an ang ila mga palas-anon, kag ginhilway sila halin sa pagkaulipon; kay yara sila sa pagkaulipon, kag wala sing makaluwas sa ila kundi ang Ginuo nga ila Dios.

22 Kag naghatag sila sing mga pagpasalamat sa Dios, huo, ang tanan nila nga lalaki kag ang tanan nila nga babayi kag ang tanan nila nga kabataan nga makahambal nagbayaw sang ila mga tingug sa mga pagdayaw sang ila Dios.

23 Kag karon ang Ginuo nagsiling kay Alma: Magdali ka kag maghalin ka kag ining katawhan sa sini nga duta kay ang mga Lamanhon nagbulugtaw na kag nagalagas sa inyo; gani maghalin kamo sa sini nga duta, kag punggan ko ang mga Lamanhon sa sini nga patag agud nga indi na sila makalab-ot sa paglagas sa sining katawhan.

24 Kag natabo ini nga naghalin sila sa patag, kag nagpanglakaton padulong sa kamingawan.

25 Kag pagkatapos nga nagtinir sila sa kamingawan sing dose ka adlaw nakaabot sila sa duta sang Zarahemla; kag ginbaton man sila ni haring Mosias sing malipayon.