1 Karon may isa ka lugar sa Semlon nga sa diin ang mga anak nga babayi sang mga Lamanhon nagatililipon sang ila mga kaugalingon agud magkinanta, kag agud magsinaot, kag agud maglipay sang ila mga kaugalingon.

2 Kag natabo ini nga isa ka adlaw may diutay lamang sa ila nga nagtililipon agud magkinanta kag agud magsinaot.

3 Kag karon ang mga pari ni haring Noe, nga nahuya nga magbalik sa siyudad sang Nefi, huo, kag nahadlok man nga pamatyon sila sang katawhan, gani wala sila nagbalik sa ila mga asawa kag sa ila mga kabataan.

4 Kag tungod nagpabilin sa kamingawan, kag tungod nakita ang mga anak nga babayi sang mga Lamanhon, nagpanago sila kag naglantaw sa ila;

5 Kag sang may diutay lamang sa ila ang nagtililipon agud magsinaot, naggwa sila sa ila mga palanagoan kag pilit sila nga ginkuha kag gindala sa kamingawan; huo, beynte-kwatro sang mga anak nga babayi sang mga Lamanhon ang ila gindala sa kamingawan.

6 Kag natabo ini nga sang nahibal-an sang mga Lamanhon nga nagkaladula ang ila mga anak nga babayi, naakig sila sa katawhan ni Limhi kay naghunahuna sila nga kahimoan ini sang katawhan ni Limhi.

7 Gani ginpadala nila ang ila mga kasoldadohan; huo, bisan ang hari mismo naglakat sa unahan sang iya katawhan; kag nagkadto sila sa duta sang Nefi agud pamatyon ang katawhan ni Limhi.

8 Kag karon nakita sila ni Limhi halin sa tore, bisan ang tanan nila nga mga pagpanghanda para sa inaway iya nakita; gani ginpanipon niya ang iya katawhan, kag patago nga naghulat sa ila sa mga patag kag sa mga lasang.

9 Kag natabo ini nga sang nag-abot ang mga Lamanhon, nga ang katawhan ni Limhi nagsugod sa pagsalakay sa ila halin sa ila mga lugar nga ginahulatan, kag nagsugod sa pagpamatay sa ila.

10 Kag natabo ini nga nangin tuman kagrabe sang inaway kay nag-inaway sila pareho sang mga leon para sa ila mga tulukbon.

11 Kag natabo ini nga ang katawhan ni Limhi nagsugod sa pagpanabog sang mga Lamanhon sa ila atubang; bisan pa nga wala sing katunga ang ila kadamuon sa mga Lamanhon. Apang nag-away sila para sa ila mga kabuhi, kag para sa ila mga asawa, kag para sa ila mga kabataan; gani nagpanikasog sila sa ila mga kaugalingon kag pareho sang mga dragon nakig-away sila.

12 Kag natabo ini nga nasalapoan nila ang hari sang mga Lamanhon sa kadamuon sang ila mga patay; apang indi sia patay, nga napilasan lamang kag ginbayaan sa duta, sa pagkadasig sang pagpalagyo sang iya katawhan.

13 Kag ginkuha nila sia kag ginbugkosan ang iya mga pilas, kag gindala sia sa atubang ni Limhi, kag nagsiling: Tan-awa, yari ang hari sang mga Lamanhon; sia kay napilasan natumba upod sa ila mga patay, kag ginbayaan nila sia; kag yari karon, gindala namon sia sa imo atubang; kag karon tugoti kami nga patyon sia.

14 Apang si Limhi nagsiling sa ila: Indi ninyo sia pagpatyon, kundi dal-a sia diri agud makita ko sia. Kag gindala nila sia. Kag si Limhi nagsiling sa iya: Ano ang kabangdanan nga nagpakig-away kamo batok sa akon katawhan? Tan-awa, ang akon katawhan wala naglapas sang panumpa nga ginhimo ko sa inyo; gani, ngaa ginlapas ninyo ang panumpa nga ginhimo ninyo sa akon katawhan?

15 Kag karon ang hari nagsiling: Ginlapas ko ang panumpa bangod pilit nga ginkuha sang imo katawhan ang mga anak nga babayi sang akon katawhan; gani, sa akon kaakig ginsugo ko ang akon katawhan nga magpakig-away batok sa imo katawhan.

16 Kag karon si Limhi wala sing nabalitaan parte sini nga bagay; gani nagsiling sia: Usisaon ko sa akon katawhan kag kon sin-o man ang naghimo sini nga butang mapatay. Gani nagsugo sia sang pagpangusisa nga himuon sa iya katawhan.

17 Karon sang nabatian ni Gideon ining mga butang, sia nga kapitan sang hari, nagkadto sia kag nagsiling sa hari: Ginaampo ko sa imo nga magpakatawhay, kag indi pag-usisaa ini nga katawhan, kag indi pag-ipasibangod ini nga butang sa ila.

18 Kay wala mo bala madumdumi ang mga pari sang imo amay nga gintinguhaan sining katawhan nga pamatyon? Kag indi bala nga yara sila sa kamingawan? Kag indi bala nga sila amo ang pilit nga nagkuha sang mga anak nga babayi sang mga Lamanhon?

19 Kag karon, tan-awa, kag sugiri ang hari sining mga butang agud masugiran niya ang iya katawhan agud mapakalma sila tuhoy sa aton; kay tan-awa nagahanda na sila sa pagsalakay batok sa aton; kag tan-awa man diutay na lamang kita.

20 Kag tan-awa, magaabot sila upod ang ila madamo nga kasoldadohan; kag luwas lang nga ang hari magpakalma sa ila tuhoy sa aton pat-od gid nga magkalamatay kita.

21 Kay indi bala nga natuman na ang mga pulong ni Abinadi nga ginpropesiya niya batok sa aton—kag ini tanan bangod indi kita mamati sa mga pulong sang Ginuo, kag magtalikod sa aton mga kalainan?

22 Kag karon pakalmahon naton ang hari, kag tumanon naton ang panumpa nga ginhimo naton sa iya; kay mas maayo pa nga yara kita sa pagkaulipon sangsa madulaan kita sang aton mga kabuhi; gani, untatan naton ang pagpaagay sang tuman nga dugo.

23 Kag karon ginsugiran ni Limhi ang hari sang tanan nga butang parte sa iya amay, kag sang mga pari nga nagpalagyo sa kamingawan, kag ginbasol ang pilit nga pagkuha sang ila mga anak nga babayi sa ila.

24 Kag natabo ini nga ang hari napakalma tuhoy sa iya katawhan; kag nagsiling sia sa ila: Maggwa kita agud sugataon ang akon katawhan nga wala sing mga armas; kag ginapromisa ko sa inyo upod ang isa ka panumpa nga ang akon katawhan indi magpamatay sang imo katawhan.

25 Kag natabo ini nga ginsunod nila ang hari, kag naggwa nga wala sing mga armas agud sugataon ang mga Lamanhon. Kag natabo ini nga ginsugata nila ang mga Lamanhon; kag ang hari sang mga Lamanhon nagduko sa ila atubang, kag nagpakitluoy para sa katawhan ni Limhi.

26 Kag sang nakita sang mga Lamanhon ang katawhan ni Limhi nga wala sila sing mga armas, naluoy sila sa ila kag napakalma tuhoy sa ila, kag nagbalik sing matawhay upod sa ila hari sa ila kaugalingon nga duta.