1 Kag karon natabo ini nga sanday Amon kag haring Limhi nagsugod sa pagpamangkot sa katawhan kon paano nila mahilway ang ila mga kaugalingon halin sa pagkaulipon; kag sa pagkamatuod nagsugo sila nga ang tanan nga katawhan magtililipon sang ila mga kaugalingon; kag ini ila ginhimo agud nga makuha nila ang tingug sang katawhan parte sa amo nga bagay.

2 Kag natabo ini nga wala sila sing makita nga paagi sa paghilway sang ila mga kaugalingon halin sa pagkaulipon, luwas lang nga ini amo ang pagdala sang ila mga babayi kag mga kabataan, kag sang ila mga panong, kag sang ila mga baka, kag sang ila mga tolda, kag magkadto sa kamingawan; kay ang mga Lamanhon tuman kadamo, indi mahimo para sa katawhan ni Limhi ang magpakig-away sa ila nga nagahunahuna sa paghilway sang ila mga kaugalingon halin sa pagkaulipon paagi sa espada.

3 Karon natabo ini nga si Gideon nagkadto kag nagtindog sa atubang sang hari, kag nagsiling sa iya: Karon O hari, nagpamati ka halin sadto sa akon mga pulong sa madamo nga beses sang nagapakig-away kita sa aton mga kauturan, ang mga Lamanhon.

4 Kag karon O hari, kon wala mo ako ginakabig nga isa ka di-mapuslanon nga alagad, ukon kon nagpamati ka halin sadto sa akon mga pulong bisan paano, kag ang mga ini nangin mapuslanon sa imo, sa amo man ginapangabay ko nga pamatian mo ang akon mga pulong sa sini nga tion, kag ako mangin imo alagad kag hilwayon ining katawhan halin sa pagkaulipon.

5 Kag ang hari nagtugot sa iya nga maghambal sia. Kag si Gideon nagsiling sa iya:

6 Tan-awa ang alagyan sa likod, lusot sa likod nga pader, sa likod nga bahin sang siyudad. Ang mga Lamanhon, ukon ang mga bantay sang mga Lamanhon, sa gab-i mga hubog; gani magpadala kita sing pabantala sa tanan sining katawhan nga panipunon nila ang ila mga panong kag mga baka agud mapanabog nila ang mga ini sa kamingawan sa gab-i.

7 Kag malakat ako suno sa imo sugo kag magbayad sang katapusan nga buwis nga bino sa mga Lamanhon, kag magakalahubog sila; kag magaagi kita lapos sa sekreto nga alagyan sa wala nayon sang ila kampo kon hubog na sila kag nagakatulog.

8 Gani mahalin kita upod ang aton mga babayi kag ang aton mga kabataan, ang aton mga panong, kag ang aton mga baka padulong sa kamingawan; kag magapanglakaton kita palibot sa duta sang Silom.

9 Kag natabo ini nga ang hari nagpamati sa mga pulong ni Gideon.

10 Kag si haring Limhi nagsugo nga panipunon sang iya katawhan ang ila mga panong; kag nagpadala sia sang buwis nga bino sa mga Lamanhon; kag nagpadala man sia sing dugang nga bino bilang regalo sa ila; kag nagpagusto sila sa pag-inom sang bino nga ginpadala ni haring Limhi sa ila.

11 Kag natabo ini nga ang katawhan ni haring Limhi naghalin sa gab-i padulong sa kamingawan upod ang ila mga panong kag ang ila mga baka, kag naglakat sila palibot sa duta sang Silom sa kamingawan, kag nagliko sila padulong sa duta sang Zarahemla, nga ginapangunahan ni Amon kag sang iya mga kauturan.

12 Kag gindala nila ang tanan nila nga bulawan, kag pilak, kag ang ila malahalon nga mga butang, nga madala nila, kag amo man ang ila mga pagkaon, padulong sa kamingawan; kag nagpadayon sila sang ila pagpanglakaton.

13 Kag pagkatapos sang madamo nga inadlaw sa kamingawan nag-abot sila sa duta sang Zarahemla, kag nagbuylog sa katawhan ni Mosias, kag napaidalom sa iya.

14 Kag natabo ini nga ginbaton sila ni Mosias sing may kalipay; kag ginbaton man niya ang ila mga kasulatan, kag amo man ang mga kasulatan nga nasalapoan sang katawhan ni Limhi.

15 Kag karon natabo ini nga sang natukiban sang mga Lamanhon nga ang katawhan ni Limhi naghalin sa duta sa gab-i, nga nagpadala sila sang kasoldadohan padulong sa kamingawan agud lagson sila;

16 Kag pagkatapos nga ginlagas nila sila sing duha ka adlaw, indi na nila masunod ang ila mga gin-agyan; gani nagtalang sila sa kamingawan.