1 Kag karon, natabo ini nga pagkatapos nga nakahambal si Abinadi sining mga pulong gin-untay niya ang iya kamot kag nagsiling: Magaabot ang tion nga ang tanan makakita sang kaluwasan sang Ginuo; kon ang tagsa ka nasyon, kaliwat, lengguahe, kag katawhan makakita sing mata sa mata kag magakilala sa atubang sang Dios nga matarong ang iya mga paghukom.

2 Kag dayon ang mga malain panabugon, kag may kabangdanan sila agud magtangis, kag maghibi, kag magnguyngoy, kag magbagrot sang ila mga ngipon; kag ini bangod indi sila magpamati sa tingug sang Ginuo; gani ang Ginuo indi magtubos sa ila.

3 Kay mga dutan-on kag yawan-on sila, kag ang yawa may gahum sa ila; huo, bisan inang dumaan nga man-og nga nagsulay sang aton una nga mga ginikanan, nga amo ang kabangdanan sang ila pagkahulog; nga amo ang kabangdanan sang tanan nga tawo nga mangin dutan-on, lawasnon, yawan-on, nga nakahibalo sang malain sa maayo, nga nagpaidalom sang ila mga kaugalingon sa yawa.

4 Gani ang tanan nga tawo nagtalang; kag tan-awa, lubos sila kuntani nga nagtalang kon wala pagtubosa sang Dios ang iya katawhan halin sa ila nagtalang kag nalaglag nga kahimtangan.

5 Apang dumduma nga sia nga mapiliton sa iya kaugalingon nga dutan-on nga kinaugali, kag nagapadayon sa mga dalanon sang sala kag pagrebelde batok sa Dios, nagapabilin sa iya nalaglag nga kahimtangan kag ang yawa may tanan nga gahum sa iya. Gani daw pareho nga wala sing pagtubos nga nahimo sa iya, bangod nangin isa sia ka kaaway sang Dios; kag amo man ang yawa isa ka kaaway sang Dios.

6 Kag karon kon si Cristo wala nagkari sa kalibutan, nga nagahambal sang mga butang nga magaabot nga daw nag-abot na ang mga ini, wala kuntani sing natabo nga pagtubos.

7 Kag kon si Cristo wala nagbangon halin sa mga minatay, ukon nagbugto sang mga gapos sang kamatayon agud ang lulubngan mangin wala sing kadalag-an, kag ang kamatayon mangin wala sing kasakit, wala kuntani sing natabo nga pagkabanhaw.

8 Apang may yara sang pagkabanhaw, gani ang lulubngan wala sing kadalag-an, kag ang kasakit sang kamatayon nadaug tungod kay Cristo.

9 Sia ang kasanag kag ang kabuhi sang kalibutan; huo, isa ka kasanag nga nagapadayon nga indi gid magdulom; huo, kag isa man ka kabuhi nga nagapadayon agud nga mangin wala na sing kamatayon pa.

10 Bisan ining lawas nga may kamatayon magasul-ob sang kawala’y kamatayon, kag ining madunot magasul-ob sang indi madunot, kag pagadal-on sa pagtindog sa atubang sang hukmanan sang Dios, agud hukman niya suno sa ila mga binuhatan kon bala ang mga ini maayo ukon ang mga ini malain—

11 Kon ang mga ini maayo, sa pagkabanhaw sang nagapadayon nga kabuhi kag kalipayan; kag kon ang mga ini malain, sa pagkabanhaw sang nagapadayon nga silot, nga ginatugyan sa yawa, nga nagsakop sa ila, nga amo ang silot—

12 Nga naglakat suno sa ila kaugalingon nga dutan-on nga mga kabubut-on kag mga kaluyag; nga wala gid nagtawag sa Ginuo samtang ang mga butkon sang kaluoy nagauntay sa ila; kay ang mga butkon sang kaluoy gin-untay sa ila, kag indi sila; sila nga ginpaandaman parte sang ila mga kalainan apang indi sila magtalikod sa mga ini; kag ginsugo sila sa paghinulsol apang indi sila maghinulsol.

13 Kag karon, indi bala kamo dapat magkurog kag maghinulsol sang inyo mga sala, kag dumdumon nga tungod lamang kag paagi kay Cristo nga mahimo kamo maluwas?

14 Gani, kon nagatudlo kamo sang layi ni Moises, itudlo man nga ini landong sang mga butang nga magaabot—

15 Tudloi sila nga ang pagtubos magaabot paagi kay Cristo nga Ginuo, nga amo mismo ang Wala’y Katapusan nga Amay. Amen.