1 Karon si Alma, nga ginpaandaman sang Ginuo nga ang mga kasoldadohan ni haring Noe magasalakay sa ila, kag ginpahibalo ini sa iya katawhan, gani ginpanipon nila ang ila mga panong, kag ginpangdala ang ila mga uyas, kag nagkadto sa kamingawan antes mag-abot ang mga kasoldadohan ni haring Noe.

2 Kag ginpabakod sila sang Ginuo, sa bagay nga ang katawhan ni haring Noe indi makalab-ot sa ila agud pamatyon sila.

3 Kag nagpalagyo sila sa walo ka adlaw nga pagpanglakaton padulong sa kamingawan.

4 Kag nakaabot sila sa isa ka duta, huo, bisan sa isa ka tuman katahum kag makaluluyag nga duta, isa ka duta nga may matinlo nga tubig.

5 Kag nagpatindog sila sang ila mga tolda, kag nagsugod sa pag-uma sang duta, kag nagsugod sa pagpatindog sang mga bilding; huo, mga mapisan sila, kag nagpangabudlay sing tuman.

6 Kag luyag sang katawhan nga si Alma mangin hari nila kay pinalangga sia sang iya katawhan.

7 Apang nagsiling sia sa ila: Tan-awa, indi kinahanglanon nga may hari kita; kay amo ini ang siling sang Ginuo: Indi ninyo pagkabigon ang isa ka unod nga labaw sa isa, ukon ang isa ka tawo indi maghunahuna sang iya kaugalingon nga labaw sa isa; gani ginasiling ko sa inyo indi kinahanglanon nga may hari kamo.

8 Apang, kuntani kon may matarong kamo nga mga tawo sa tanan nga tion nga mangin inyo mga hari mangin maayo para sa inyo ang may yara sang hari.

9 Apang dumduma ang kalainan ni haring Noe kag sang iya mga pari; kag ako mismo nadakpan sa isa ka siod, kag naghimo sing madamo nga butang nga makangilil-ad sa panulok sang Ginuo, nga nangin rason sang akon tuman nga paghinulsol;

10 Apang, pagkatapos sang madamo nga pag-antos, ginpamatian sang Ginuo ang akon mga pagpakitluoy, kag ginsabat ang akon mga pangamuyo, kag ginhimo ako nga isa ka instrumento sa iya mga kamot sa pagdala sing madamo kaayo sa inyo sa ihibalo sang iya kamatuoran.

11 Apang, sa sini wala ako nagapadayaw kay indi ako nagakaangay nga magpadayaw sang akon kaugalingon.

12 Kag karon ginasiling ko sa inyo, ginpigos kamo ni haring Noe, kag ginpaidalom sa pagkaulipon sa iya kag sa iya mga pari, kag gindala nila sa kalainan; gani nahigtan kamo sang mga gapos sang kalainan.

13 Kag karon bangod nahilway kamo paagi sa gahum sang Dios halin sa sining mga gapos; huo, bisan halin sa mga kamot ni haring Noe kag sang iya katawhan, kag amo man sa mga gapos sang kalainan, sa amo man luyag ko nga magpabilin kamo nga malig-on sa sining kahilwayan kon sa diin nahilway kamo, kag wala sing bisan sin-o nga tawo nga inyo saligan nga mangin hari ninyo.

14 Kag amo man wala sing bisan sin-o nga inyo saligan nga mangin manunudlo ninyo ukon alagad ninyo, luwas lang nga tawo sia sang Dios, nga nagalakat sa iya mga dalanon kag nagatuman sang iya mga kasugoan.

15 Gani nagpanudlo si Alma sa iya katawhan, nga dapat palanggaon sang tagsa ka tawo ang iya isigkatawo pareho sang iya kaugalingon, nga wala dapat sing pagbinaisay sa ila.

16 Kag karon, si Alma ang ila mataas nga pari, sia nga amo ang tagtukod sang ila simbahan.

17 Kag natabo ini nga wala sing nakabaton sing awtoridad nga magwali ukon magtudlo luwas lang nga ini paagi sa iya halin sa Dios. Gani gin-ordinan niya ang tanan nila nga pari kag ang tanan nila nga manunudlo; kag wala sing gin-ordinan luwas lang nga sila matarong nga mga tawo.

18 Gani ginbantayan nila ang ila katawhan, kag ginsagod sila sang mga butang nga parte sa pagkamatarong.

19 Kag natabo ini nga nagsugod sila sa pag-uswag sing tuman sa duta; kag gintawag nila ang duta nga Helam.

20 Kag natabo ini nga nagdamo sila kag nag-uswag sing tuman sa duta sang Helam; kag nagtukod sila sing isa ka siyudad nga ila gintawag nga siyudad sang Helam.

21 Apang ginatan-aw sang Ginuo nga nagakabagay nga pinahan ang iya katawhan; huo, ginatilawan niya ang ila pagpaumod kag ang ila pagtuo.

22 Apang—kon sin-o man ang magbutang sang iya pagsalig sa iya ang amo man pagabayawon sa katapusan nga adlaw. Huo, kag amo man ini sa sining katawhan.

23 Kay tan-awa, ipakita ko sa inyo nga gindala sila sa pagkaulipon, kag wala sing makaluwas sa ila kundi ang Ginuo nga ila Dios, huo, bisan ang Dios ni Abraham kag ni Isaac kag ni Jacob.

24 Kag natabo ini nga ginhilway niya sila, kag ginpakita ang iya dako nga gahum sa ila, kag dako ang ila pagkinasadya.

25 Kay tan-awa, natabo ini nga samtang yara sila sa duta sang Helam, huo, sa siyudad sang Helam, samtang nagauma sang duta sa palibot, tan-awa isa ka kasoldadohan sang mga Lamanhon ang yara sa mga dulonan sang duta.

26 Karon natabo ini nga ang mga kauturan ni Alma nagpalagyo halin sa ila mga uma, kag nagtipon sang ila mga kaugalingon sa siyudad sang Helam; kag tuman sila nga nahadlok tungod sang pagpakita sang mga Lamanhon.

27 Apang naggwa si Alma kag nagtindog sa tunga nila, kag ginlaygayan sila nga indi sila dapat magkahadlok, kundi nga dapat nila dumdumon ang Ginuo nga ila Dios kag pagaluwason niya sila.

28 Gani gintapna nila ang ila mga kahadlok, kag nagsugod sa pagpakitluoy sa Ginuo nga pahumokon niya ang mga tagipusuon sang mga Lamanhon agud nga kaluoyan nila sila, kag ang ila mga asawa, kag ang ila mga kabataan.

29 Kag natabo ini nga ginpahumok sang Ginuo ang mga tagipusuon sang mga Lamanhon. Kag si Alma kag ang iya mga kauturan naggwa kag gintugyan ang ila mga kaugalingon sa ila mga kamot; kag gin-angkon sang mga Lamanhon ang duta sang Helam.

30 Karon ang mga kasoldadohan sang mga Lamanhon, nga naglagas sang katawhan ni haring Limhi, nagtalang sa kamingawan sa sulod sang madamo nga adlaw.

31 Kag tan-awa, nasalapoan nila yadtong mga pari ni haring Noe sa isa ka lugar nga ila gintawag nga Amulon; kag nagsugod sila sa pagpanag-iya sang duta sang Amulon kag nagsugod sa pag-uma sang duta.

32 Karon ang ngalan sang lider sadtong mga pari amo si Amulon.

33 Kag natabo ini nga si Amulon nagpakitluoy sa mga Lamanhon; kag iya man ginpadala ang ila mga asawa, nga mga anak nga babayi sang mga Lamanhon, agud magpakitluoy sa ila mga kauturan nga indi nila pagpamatyon ang ila mga bana.

34 Kag ang mga Lamanhon naluoy kay Amulon kag sa iya mga kauturan, kag wala sila ginpamatay, tungod sang ila mga asawa.

35 Kag si Amulon kag ang iya mga kauturan nagbuylog sa mga Lamanhon, kag nagapanglakaton sila sa kamingawan sa pagpangita sang duta sang Nefi sang masalapoan nila ang duta sang Helam nga ginpanag-iyahan ni Alma kag sang iya mga kauturan.

36 Kag natabo ini nga ang mga Lamanhon nagpromisa kay Alma kag sa iya mga kauturan nga kon itudlo nila sa ila ang alagyan padulong sa duta sang Nefi ihatag nila sa ila ang ila mga kabuhi kag ang ila kahilwayan.

37 Apang pagkatapos nga gintudlo ni Alma sa ila ang alagyan nga nagapadulong sa duta sang Nefi ang mga Lamanhon indi na magtuman sang ila promisa; kundi nga nagbutang sila sang mga bantay sa palibot sang duta sang Helam, sa ila nanday Alma kag sa iya mga kauturan.

38 Kag ang nabilin sa ila nagkadto sa duta sang Nefi; kag ang isa ka bahin sa ila nagbalik sa duta sang Helam, kag gindala man upod sa ila ang mga asawa kag mga kabataan sang mga bantay nga nabilin sa duta.

39 Kag ang hari sang mga Lamanhon nagtugot kay Amulon nga mangin hari sia kag tagdumala sang iya katawhan nga yara sa duta sang Helam; apang wala sia sing gahum sa paghimo sing bisan ano nga batok sa pagbuot sang hari sang mga Lamanhon.