1 Kag karon, natabo ini nga pagkatapos nga nakaagom si haring Mosias sang dalayon nga paghidaet sa sulod sing tatlo ka tuig, luyag niya nga mahibal-an ang parte sa katawhan nga nagtaklad agud magpuyo sa duta sang Lehi-Nefi, ukon sa siyudad sang Lehi-Nefi; kay ang iya katawhan wala na makabalita halin sa ila halin sa tion nga nagbiya sila sa duta sang Zarahemla; gani, gintublag nila sia tungod sang ila mga pagpanabad.

2 Kag natabo ini nga gintugotan ni haring Mosias ang disesais sang ila mabukod nga mga lalaki nga magtaklad sa duta sang Lehi-Nefi agud mag-usisa parte sa ila mga kauturan.

3 Kag natabo ini nga pagkadason nga adlaw nagsugod sila sa pagtaklad nga kaupod sa ila ang isa nga si Amon, sia nga isa ka mabukod kag makusog nga lalaki, kag isa ka kaliwat ni Zarahemla; kag sia man ang ila lider.

4 Kag karon, wala sila makatultol sang banas nga dapat nila agyan sa kamingawan agud magtaklad sa duta sang Lehi-Nefi; gani naglibot-libot sila sing madamo nga inadlaw sa kamingawan, bisan kwarenta ka adlaw nga sila naglibot-libot.

5 Kag sang naglibot-libot sila sa kwarenta ka adlaw nakaabot sila sa isa ka bungyod, nga sa norte sang duta sang Silom, kag didto nagpatindog sila sang ila mga tolda.

6 Kag si Amon nagdala sing tatlo sang iya mga kauturan, kag ang ila mga ngalan amo sanday Amaleki, Helem, kag Hem, kag nagdulhog sila sa duta sang Nefi.

7 Kag tan-awa, nasugat-an nila ang hari sang katawhan nga yara sa duta sang Nefi, kag sa duta sang Silom; kag ginlibutan sila sang mga bantay sang hari, kag gindala, kag ginpanggapos, kag ginhunong sa bilanggoan.

8 Kag natabo ini nga sa ika-duha nila nga adlaw sa bilanggoan gindala sila liwat sa atubang sang hari, kag ang ila mga gapos ginhubad; kag nagtindog sila sa atubang sang hari, kag gintugotan, ukon sa mas maathag ginsugo, nga sabton nila ang mga pamangkot nga ipamangkot niya sa ila.

9 Kag nagsiling sia sa ila: Tan-awa, ako si Limhi, ang anak ni Noe, nga anak ni Zenif, nga nagtaklad pagwa sa Zarahemla sa pagpanubli sini nga duta, nga amo sadto ang duta sang ila mga amay, nga ginhimo nga isa ka hari paagi sa tingug sang katawhan.

10 Kag karon, luyag ko nga mahibal-an ang kabangdanan kon ngaa nangin tuman kamo kaisog sa pagpalapit sa mga pader sang siyudad, nga ako, mismo, may kaupod nga akon mga bantay sa gwa sang ganhaan?

11 Kag karon, sa sini nga kabangdanan gintugotan ko nga mabuhi kamo agud mahimo ako nga makausisa sa inyo, kay kon indi ginsugo ko na kuntani ang akon mga bantay nga pamatyon kamo. Ginatugotan kamo sa paghambal.

12 Kag karon, sang nakita ni Amon nga gintugotan sia sa paghambal, nagpalapit sia kag nagduko sa atubang sang hari; kag sang nagtindog sia liwat nagsiling sia: O hari, nagapasalamat gid ako sa atubang sang Dios sa sini nga adlaw nga buhi pa ako, kag ginatugotan sa paghambal; kag magatinguha ako sa paghambal sing may kaisog;

13 Kay sigurado ako nga kon nakilal-an lamang ninyo ako wala kuntani ninyo pag-itugot nga pagagapuson ako sining mga higot. Kay ako si Amon, kag isa ako ka kaliwat ni Zarahemla, kag nagtaklad pagwa sa duta sang Zarahemla agud mag-usisa parte sang amon mga kauturan nga gindala ni Zenif pagwa sa sina nga duta.

14 Kag karon, natabo ini nga pagkatapos nga nabatian ni Limhi ang mga pulong ni Amon, nalipay sia sing tuman, kag nagsiling: Karon, nahibal-an ko sing may kapat-uran nga ang akon mga kauturan nga yara sa duta sang Zarahemla buhi pa. Kag karon, magakasadya ako; kag sa buwas ipasugo ko nga magkasadya man ang akon katawhan.

15 Kay tan-awa, yara kami sa pagkaulipon sa mga Lamanhon, kag ginabuwisan sing buwis nga grabe pas-anon. Kag karon, tan-awa, ang aton mga kauturan magaluwas sa aton halin sa aton pagkaulipon, ukon halin sa mga kamot sang mga Lamanhon, kag mangin mga ulipon nila kita; kay mas maayo pa nga mangin mga ulipon kita sang mga Nefinhon sangsa magbayad sing buwis sa hari sang mga Lamanhon.

16 Kag karon, ginsugo ni haring Limhi ang iya mga bantay nga indi na nila paggapuson si Amon ukon ang iya mga kauturan, kundi nga nagsugo nga magkadto sila sa bungyod nga yara sa norte sang Silom, kag dal-on ang ila mga kauturan sa siyudad, agud nga sa sini mahimo sila nga makakaon, kag makainom, kag makapahuway ang ila mga kaugalingon halin sa mga kabudlay sang ila pagpanglakaton; kay nag-antos sila sing madamo nga butang; nag-antos sila sang kagutom, kauhaw, kag kakapoy.

17 Kag karon, natabo ini pagkadason nga adlaw nga si haring Limhi nagpadala sing isa ka pagbantala sa tunga sang iya tanan nga katawhan, nga sa sini mahimo sila nga magtipon sang ila mga kaugalingon sa templo, sa pagpamati sang mga pulong nga ihambal niya sa ila.

18 Kag natabo ini nga sang natipon na nila ang ila mga kaugalingon nga naghambal sia sa ila sa sini nga paagi nga nagasiling: O kamo, katawhan ko, ibayaw ang inyo mga ulo kag magkalipay; kay tan-awa, ang tion nagahilapit na, ukon indi na malayo, nga indi na kita mapaidalom sa aton mga kaaway sa pihak sang aton madamo nga pagpanikasog nga nangin wala’y kapuslanan; apang nagasalig ako nga may nabilin pa nga isa ka epektibo nga pagpanikasog nga himuon.

19 Gani, ibayaw ang inyo mga ulo, kag magkasadya, kag ibutang ang inyo pagsalig sa Dios, sa sinang Dios nga amo ang Dios ni Abraham, kag ni Isaac, kag ni Jacob; kag amo man, inang Dios nga nagdala sang mga anak ni Israel pagwa sa duta sang Egipto, kag ginpahanabo nga maglakat sila patabok sa Pula nga Dagat sa mamala nga duta, kag ginpakaon sila sang mana agud nga indi sila magkalamatay sa kamingawan; kag madamo nga iban pa nga mga butang ang iya ginhimo para sa ila.

20 Kag sa liwat, inang amo man nga Dios ang nagdala sa aton mga amay pagwa sa duta sang Jerusalem, kag nagtipig kag nag-amlig sang iya katawhan bisan tubtob subong; kag tan-awa, ini tungod sang aton mga kalainan kag mga kangil-aran nga gindala niya kita sa pagkaulipon.

21 Kag kamo tanan mga saksi sini nga adlaw, nga si Zenif, nga ginhimo nga hari sining katawhan, bangod tuman ang iya kaluyag sa pagpanubli sang duta sang iya mga amay, gani ginpatalang sia sang pagkatuso kag pagkadaya ni haring Laman, nga nagsulod sa isa ka kasugtanan upod kay haring Zenif, kag gintugyan sa iya mga kamot ang mga pagpanag-iya sing isa ka bahin sang duta, ukon bisan ang siyudad sang Lehi-Nefi, kag ang siyudad sang Silom; kag ang duta sa palibot—

22 Kag ini tanan iya ginhimo, para sa katuyoan gid lang nga dal-on ining katawhan nga mapaidalom sa iya ukon sa pagkaulipon. Kag tan-awa, sa sini nga tion nagabayad kita sing buwis sa hari sang mga Lamanhon, sa kadamuon nga katunga sang aton mais, kag sang aton barley, kag bisan tanan sang aton uyas sang tagsa ka sahi, kag katunga sang buto sang aton mga panong kag sang aton mga kasapatan; kag bisan katunga sang tanan nga yara sa aton ukon ginapanag-iyahan naton ginasukot sa aton sang hari sang mga Lamanhon, ukon ang aton mga kabuhi.

23 Kag karon, indi bala ini grabe nga pas-anon? Kag indi bala ini, ang aton pag-antos, dako? Karon tan-awa, daw ano kadako ang kabangdanan nga magpangalisud kita.

24 Huo, ginasiling ko sa inyo, dako ang mga kabangdanan agud magpangalisud kita; kay tan-awa daw ano kadamo sang aton mga kauturan ang ginpamatay, kag ang ila dugo naula sa wala’y kapuslanan, kag ang tanan tungod sang kalainan.

25 Kay kon ini nga katawhan wala nahulog sa kalapasan ang Ginuo wala kuntani magtugot nga ining dako nga kalainan magtupa sa ila. Apang tan-awa, indi sila magpamati sa iya mga pulong; kundi nga may nagtuhaw nga mga pagbinaisay sa tunga nila, bisan tubtob nga nagpaagay sila sing dugo sa tunga nila.

26 Kag isa ka propeta sang Ginuo ang ila ginpatay; huo, isa ka pinili nga tawo sang Dios nga naghambal sa ila parte sang ila kalainan kag mga kangil-aran, kag nagpropesiya sing madamo nga butang nga magaabot, huo, bisan ang pagkari ni Cristo.

27 Kag bangod nagsiling sia sa ila nga si Cristo amo ang Dios, ang Amay sang tanan nga butang, kag nagsiling nga magaangkon sia sang dagway sang tawo, kag amo ini ang dagway nga ginsundan sang pagtuga sang tawo sa ginsuguran; ukon sa iban nga pulong, nagsiling sia nga ang tawo gintuga suno sa dagway sang Dios, kag ang Dios magapanaog sa tunga sang mga anak sang katawhan, kag magaangkon sia sang unod kag dugo, kag magalakat sa ibabaw sang duta—

28 Kag karon, bangod nagsiling sia sini, ginpatay nila sia; kag madamo pa nga butang ang ila ginhimo nga nagdala sang kaakig sang Dios sa ila. Gani, sin-o ang magakatingala nga yara sila sa pagkaulipon, kag ginsakit sila sing tuman nga pag-antos?

29 Kay tan-awa, ang Ginuo nagsiling: Indi ko pagbuligan ang akon katawhan sa adlaw sang ila kalapasan; kundi nga balabagan ko ang ila mga alagyan agud nga indi sila mag-uswag; kag ang ila mga ginahimo mangin pareho sing isa ka kasandaran sa ila atubang.

30 Kag sa liwat, nagasiling sia: Kon ang akon katawhan magasab-og sang kahigkoan magaani sila sang upa sang humay sini sa buhawi; kag ang epekto sini hilo.

31 Kag sa liwat nagasiling sia: Kon ang akon katawhan magasab-og sang kahigkoan magaani sila sang hangin nga kaangay sang desyerto, nga nagadala sing gilayon nga kalaglagan.

32 Kag karon, tan-awa, ang promisa sang Ginuo natuman, kag ginasakit kamo kag ginapaantos.

33 Apang kon magliso kamo sa Ginuo sa bug-os nga katuyoan sang tagipusuon kag magbutang sang inyo pagsalig sa iya, kag mag-alagad sa iya sa bug-os nga katutum sang kaisipan, kon himuon ninyo ini, sia, suno sa iya kaugalingon nga kabubut-on kag ikalipay, magahilway sa inyo pagwa sa pagkaulipon.