1 Ako, si Zenif, nga natudloan sa tanan nga lengguahe sang mga Nefinhon, kag may ihibalo parte sa duta sang Nefi, ukon parte sang duta nga una nga ginpanubli sang amon mga amay, kag ginpadala bilang isa ka espiya sa tunga sang mga Lamanhon agud nga mapanilagan ko ang ila mga puwersa, agud nga ang amon kasoldadohan makasalakay sa ila kag laglagon sila—apang sang nakita ko inang maayo sa ila luyag ko nga indi na sila paglaglagon.

2 Gani, nakigbais ako sa akon mga kauturan sa kamingawan, kay luyag ko nga ang amon tagdumala maghimo sing isa ka kasugtanan upod sa ila; apang sia nga isa ka mapintas kag uhaw-sa-dugo nga tawo nagsugo nga patyon ako; apang naluwas ako paagi sa pagpaagay sang madamo nga dugo; kay ang amay nakig-away batok sa amay, kag ang utod batok sa utod, tubtob nga ang dako nga bahin sang amon kasoldadohan nalaglag sa kamingawan; kag nagbalik kami, inang mga naluwas sa amon, sa duta sang Zarahemla, agud isaysay inang natabo sa ila mga asawa kag sa ila mga anak.

3 Apang, ako nga tuman ang kaluyag sa pagpanubli sang duta sang amon mga amay, nagtipon sang tanan nga maluyag magtaklad agud panag-iyahan ang duta, kag nagsugod liwat sa amon pagpanglakaton padulong sa kamingawan agud magtaklad sa duta; apang gin-igo kami sang tiggulutom kag tuman nga pag-antos; kay mahinay kami sa pagdumdum sang Ginuo nga amon Dios.

4 Apang, pagkatapos sang madamo nga inadlaw nga paglibot-libot sa kamingawan nagpatindog kami sang amon mga tolda sa lugar nga sa diin nagkalamatay ang amon mga kauturan, nga malapit sa duta sang amon mga amay.

5 Kag natabo ini nga nagsulod ako liwat sa siyudad upod ang apat sang akon mga tinawo, pakadto sa hari, agud mahibal-an ko ang kabubut-on sang hari, kag agud mahibal-an ko kon makasulod ako upod ang akon katawhan kag mapanag-iyahan ang duta sing matawhay.

6 Kag nagkadto ako sa hari, kag nakighisugot sia sa akon nga mahimo ko panag-iyahan ang duta sang Lehi-Nefi, kag ang duta sang Silom.

7 Kag nagsugo man sia nga maghalin sa duta ang iya katawhan, kag ako kag ang akon katawhan nagsulod sa duta agud panag-iyahan ini.

8 Kag nagsugod kami sa pagpatindog sang mga bilding, kag sa pagkay-o sang mga pader sang siyudad, huo, bisan ang mga pader sang siyudad sang Lehi-Nefi, kag sang siyudad sang Silom.

9 Kag nagsugod kami sa pag-uma sang duta, huo, bisan tanan nga sari sang binhi, mga binhi sang mais, kag sang trigo, kag sang barley, kag sang mga nea, kag sang seum, kag sang mga binhi sang tanan nga sari sang bungang-kahoy; kag nagsugod kami sa pagdamo kag pag-uswag sa duta.

10 Karon ang pagkatuso kag pagkadaya ni haring Laman, nga dal-on ang akon katawhan sa pagkaulipon, amo ang kon ngaa gintugyan niya ang duta agud panag-iyahan namon ini.

11 Gani natabo ini nga pagkatapos nga nagpuyo kami sa duta sa sulod sang dose ka tuig nga si haring Laman nagsugod nga di-mahim-os, kay basi sa ano man nga paagi ang akon katawhan magbakod sa duta, kag indi na nila sila madaug kag madala sa pagkaulipon.

12 Karon isa sila ka matamad kag idolatroso nga katawhan; gani nagahandum sila sa pagdala sa amon sa pagkaulipon agud nga mahimo nila nga busgon ang ila mga kaugalingon sa mga pagpangabudlay sang amon mga kamot; huo, nga mahimo sila nga magpaayaw sang ila mga kaugalingon sa mga panong sang amon mga uma.

13 Gani natabo ini nga ginsugdan ni haring Laman ang pagsugyot sa iya katawhan nga makig-away sila batok sa akon katawhan; gani may nagsugod nga mga giyera kag mga pag-ilinaway sa duta.

14 Kay, sa ika-trese nga tuig sang akon pagginahum sa duta sang Nefi, didto nayon sa sur sang duta sang Silom, sang nagapatubig kag nagapahalab ang akon katawhan sang ila mga panong, kag nagauma sang ila mga duta, isa ka dako kaayo nga kasoldadohan sang mga Lamanhon ang nagsalakay sa ila kag nagsugod sa pagpamatay sa ila, kag sa pagpanguha sang ila mga panong, kag sang mais sang ila mga uma.

15 Huo, natabo ini nga nalagyo sila, ang tanan nga wala malab-ot, bisan pasulod sa siyudad sang Nefi, kag nagtawag sa akon para sa pangapin.

16 Kag natabo ini nga gin-armasan ko sila sang mga pana, kag sang mga baslay, sang mga espada, kag sang mga sundang, kag sang mga inuglampos, kag sang mga tirador, kag sang tanan nga sari sang mga armas nga mahimo namon maimbento, kag ako kag ang akon katawhan nagsulong agud magpakig-away batok sa mga Lamanhon.

17 Huo, sa kusog sang Ginuo nagsulong kami agud magpakig-away batok sa mga Lamanhon; kay ako kag ang akon katawhan nagpakitluoy sing hugot sa Ginuo nga luwason niya kami halin sa mga kamot sang amon mga kaaway, kay napukaw kami sa pagdumdum sang pagkaluwas sa amon mga amay.

18 Kag ginpamatian sang Dios ang amon mga pagpakitluoy kag ginsabat ang amon mga pangamuyo; kag nagsulong kami sa iya kusog; huo, nagsulong kami batok sa mga Lamanhon, kag sa isa ka adlaw kag isa ka gab-i nakapatay kami sing tatlo ka libo kag kwarenta’y-tres; ginpamatay namon sila bisan tubtob nga napanabog namon sila pagwa sa amon duta.

19 Kag ako mismo, sa akon kaugalingon nga mga kamot, nagbulig sa paglubong sang ila mga patay. Kag tan-awa, sa amon dako nga kasubo kag pagkanugon, duha ka gatos kag sitenta’y-nuebe sang amon mga kauturan ang nagkalamatay.