1 Kag karon natabo ini nga ginhatag ni Zenif ang ginharian kay Noe, isa sang iya mga anak nga lalaki; gani nagsugod si Noe sa pagginahum bulos sa iya; kag wala sia naglakat sa mga dalanon sang iya amay.

2 Kay tan-awa, wala sia nagtuman sang mga kasugoan sang Dios, kundi nga naglakat sia suno sa mga handum sang iya kaugalingon nga tagipusuon. Kag may madamo sia nga mga asawa kag mga oloasawa. Kag ginpahanabo niya nga ang iya katawhan magpakasala, kag maghimo sinang makangilil-ad sa panulok sang Ginuo. Huo, naghimo sila sang mga pagpakighilawas kag tanan nga sari sang kalainan.

3 Kag nagpatuman sia sing buwis nga ika-lima nga bahin sang tanan nga ila ginapanag-iyahan, ika-lima nga bahin sang ila bulawan kag sang ila pilak, kag ika-lima nga bahin sang ila zif, kag sang ila tumbaga, kag sang ila saway kag sang ila salsalon; kag ika-lima nga bahin sang ila mga pinatambok; kag ika-lima man nga bahin sang ila tanan nga uyas.

4 Kag ini tanan iya ginhimo sa pagsuporta sang iya kaugalingon, kag sang iya mga asawa kag sang iya mga oloasawa; kag amo man sang iya mga pari, kag sang ila mga asawa kag sang ila mga oloasawa; sa amo nga paagi ginliwat niya ang mga butang parte sa ginharian.

5 Kay ginpahalin niya ang tanan nga pari nga ginkonsagrar sang iya amay, kag nagkonsagrar sang mga bag-o bulos sa ila, sang sahi sinang mga nag-alsa sa bugal sang ila mga tagipusuon.

6 Huo, gani ginsuporta sila sa ila katamad, kag sa ila pagkamadios-dioson, kag sa ila mga pagkamakihilawason, paagi sa mga buwis nga ginpabayad ni haring Noe sa iya katawhan; tungod sini ang katawhan nagpangabudlay sing tuman agud suportahan ang kalainan.

7 Huo, nangin idolatroso man sila, bangod napatalang sila sang wala’y pulos kag nagapanginto nga mga pulong sang hari kag mga pari; kay naghambal sila sang nagapanginto nga mga butang sa ila.

8 Kag natabo ini nga si haring Noe nagpatindog sang madamo nga matahum kag maligwa nga mga bilding; kag gindekorahan niya ang mga ini sing pulido nga mga hinimo sa kahoy, kag sang tanan nga sari sang malahalon nga mga butang, sang bulawan, kag sang pilak, kag sang salsalon, kag sang saway, kag sang zif, kag sang tumbaga;

9 Kag nagpatindog man sia sing isa ka maligwa nga palasyo, kag isa ka trono sa tunga-tunga sini, nga ang tanan sini hinimo sa maayo nga kahoy kag gindekorahan sang bulawan kag pilak kag sang malahalon nga mga butang.

10 Kag nagsugo man sia nga ang iya mga mamumugon maghimo sang tanan nga sari sang maayo nga pagpanghimo sa sulod sang mga dingding sang templo, sang maayo nga kahoy, kag sang tumbaga, kag sang saway.

11 Kag ang mga pulongkuan nga ginpain para sa mga mataas nga pari, nga naibabaw sa tanan nga iban pa nga mga pulongkuan, gindekorahan niya sang puraw nga bulawan; kag nagsugo sia nga isa ka halambuyan ang patindugon sa ila atubang agud nga mahambuyan sang ila mga lawas kag sang ila mga butkon samtang nagahambal sila sang binutig kag wala’y pulos nga mga pulong sa iya katawhan.

12 Kag natabo ini nga nagpatindog sia sing isa ka tore malapit sa templo; huo, isa ka tuman kataas nga tore, bisan sa pagkataas nga makatindog sia sa ibabaw sini kag malantawan ang duta sang Silom, kag amo man ang duta sang Semlon nga ginapanag-iyahan sang mga Lamanhon; kag mahimo pa gani sia nga makalantaw sa tanan nga duta sa palibot.

13 Kag natabo ini nga nagsugo sia nga magpatindog sang madamo nga bilding sa duta sang Silom; kag nagsugo sia nga isa ka dako nga tore ang patindugon sa bungyod sa norte sang duta sang Silom nga nangin isa ka palanagoan sang mga anak ni Nefi sa panahon nga nalagyo sila pagwa sa duta; kag amo ini ang iya ginhimo sa mga manggad nga iya nakuha paagi sa pagbuwis sang iya katawhan.

14 Kag natabo ini nga ginbutang niya ang iya tagipusuon sa iya mga manggad, kag ginhinguyang niya ang iya tion sa patuyang nga pagpangabuhi upod sa iya mga asawa kag sa iya mga oloasawa; kag sa amo man ang iya mga pari naghinguyang sang ila tion upod sa mga makihilawason.

15 Kag natabo ini nga nagtanom sia sang mga ulubasan sa palibot sang duta; kag nagpahimo sia sang mga pulugaan sang ubas, kag naghimo sing madamo kaayo nga bino; kag gani nangin palahubog sia, kag amo man ang iya katawhan.

16 Kag natabo ini nga ang mga Lamanhon nagsugod sa pagsalakay sang iya katawhan, sa ginagmay nga kadamuon, kag sa pagpamatay sa ila sa ila mga uma, kag samtang nagatatap sila sang ila mga panong.

17 Kag si haring Noe nagpadala sang mga bantay sa palibot sang duta agud indi sila makapalapit; apang wala sia nagpadala sing bastante nga kadamuon, kag ginsalakay sila kag ginpamatay sang mga Lamanhon, kag ginpanabog ang madamo sang ila mga panong pagwa sa duta; gani ang mga Lamanhon nagsugod sa paglaglag sa ila, kag sa pagpakita sang ila dumot sa ila.

18 Kag natabo ini nga ginpadala ni haring Noe ang iya kasoldadohan batok sa ila, kag napanabog sila pabalik, ukon napanabog nila sila pabalik sa makadali; gani, nagbalik sila nga nagakasadya sa ila mga naagaw.

19 Kag karon, tungod sining dako nga kadalag-an nag-alsa sila sa bugal sang ila mga tagipusuon; naghinambog sila sa ila kaugalingon nga kusog, nga nagasiling nga ang ila singkwenta makatindog batok sa linibo sang mga Lamanhon; kag gani naghinambog sila, kag nagkalipay sa dugo, kag sa pagpaagay sang dugo sang ila mga kauturan, kag ini tungod sang kalainan sang ila hari kag mga pari.

20 Kag natabo ini nga may isa ka lalaki sa tunga nila nga ang ngalan amo si Abinadi; kag naglibot sia sa tunga nila, kag nagsugod sa pagpropesiya nga nagasiling: Tan-awa, ini ang siling sang Ginuo, kag amo ini ang ginsugo niya sa akon nga nagasiling, Maglakat ka, kag isiling sa sining katawhan, ini ang siling sang Ginuo—Kalisud sa sining katawhan kay nakita ko ang ila mga kangil-aran, kag ang ila kalainan, kag ang ila mga pagkamakihilawason; kag luwas lang nga maghinulsol sila pagabisitahan ko sila sa akon kaakig.

21 Kag luwas lang nga maghinulsol sila kag magliso sa Ginuo nga ila Dios, tan-awa, itugyan ko sila sa mga kamot sang ila mga kaaway; huo, kag pagadal-on sila sa pagkaulipon; kag pagasakiton sila sang kamot sang ila mga kaaway.

22 Kag matabo ini nga makilal-an nila nga ako amo ang Ginuo nga ila Dios, kag ako isa ka maimon nga Dios nga nagabisita sang mga kalainan sang akon katawhan.

23 Kag matabo ini nga luwas lang nga ining katawhan maghinulsol kag magliso sa Ginuo nga ila Dios, pagadal-on sila sa pagkaulipon; kag wala sing magaluwas sa ila luwas lang nga ini amo ang Ginuo, ang Dios nga Makagagahum.

24 Huo, kag matabo ini nga kon magpakitluoy sila sa akon mangin mahinay ako sa pagpamati sa ila mga pagpakitluoy; huo, kag tugotan ko sila nga sakiton sila sang ila mga kaaway.

25 Kag luwas lang nga maghinulsol sila nga may panapton nga sako kag mga abo, kag magpangamuyo sing hugot sa Ginuo nga ila Dios, indi ko pagpamatian ang ila mga pangamuyo, kag indi ko man sila pagluwason sa ila mga pag-antos; kag ini ang siling sang Ginuo, kag amo ini ang ginsugo niya sa akon.

26 Karon natabo ini nga sang nahambal ni Abinadi ining mga pulong sa ila naakig sila sa iya, kag nagtinguha sa pagkuha sang iya kabuhi; apang ginluwas sia sang Ginuo halin sa ila mga kamot.

27 Karon sang nabatian ni haring Noe ang mga pulong nga ginhambal ni Abinadi sa katawhan, naakig man sia; kag nagsiling sia: Sin-o bala si Abinadi, nga ako kag ang akon katawhan pagahukman niya, ukon sin-o bala ang Ginuo, nga magapatupa sa akon katawhan sing amo sina kadako nga pag-antos?

28 Ginasugo ko kamo nga dal-on diri si Abinadi agud mapatay ko sia kay nagsiling sia sining mga butang agud masugyot niya ang akon katawhan nga maakig sa isa kag isa, kag magtuga sang mga pagbinaisay sa akon katawhan; gani patyon ko sia.

29 Karon ang mga mata sang katawhan nabulagan; gani ginpatig-a nila ang ila mga tagipusuon batok sa mga pulong ni Abinadi, kag nagtinguha sila sugod sadto nga tion nga dakpon sia. Kag si haring Noe nagpatig-a sang iya tagipusuon batok sa pulong sang Ginuo, kag wala sia naghinulsol sang iya malain nga mga hinimoan.