1 Kag karon sang nabatian sang hari ining mga pulong, nagsiling sia sa iya mga pari: Dal-a ini nga tawo, kag patya sia; kay ano ang makuha naton sa iya kay buang sia.

2 Kag nagtindog sila kag nagtinguha nga dakpon sia; apang nagbato sia sa ila, kag nagsiling sa ila:

3 Indi ako pagtanduga, kay sakiton kamo sang Dios kon dakpon ninyo ako, kay wala ko pa mapahayag ang mensahe nga ginsugo sang Ginuo sa akon nga ipahayag; kag wala ko pa man masugid sa inyo inang inyo ginpangayo nga isugid ko sa inyo; gani, ang Dios indi magtugot nga mapatay ako sa sini nga tion.

4 Apang kinahanglan gid nga tumanon ko ang mga kasugoan nga ginsugo sang Dios sa akon; kag bangod ginsugiran ko kamo sang kamatuoran naakig kamo sa akon. Kag sa liwat, bangod naghambal ako sang pulong sang Dios ginhukman ninyo ako nga buang ako.

5 Karon natabo ini nga pagkatapos nga nahambal ni Abinadi ining mga pulong nga ang katawhan ni haring Noe wala na nagtinguha sa pagdakop sa iya kay ang Espiritu sang Ginuo yara sa iya; kag ang iya nawong nagsanag sing may tuman nga kasilak, bisan pareho kay Moises samtang didto sa bukid nga Sinai, samtang nagapakighambal sa Ginuo.

6 Kag naghambal sia nga may gahum kag awtoridad halin sa Dios; kag nagpadayon sia sang iya mga pulong nga nagasiling:

7 Inyo nakita nga wala kamo sing gahum sa pagpatay sa akon, gani tapuson ko ang akon mensahe. Huo, kag nahibal-an ko nga nagahiwa ini sa inyo mga tagipusuon bangod ginasugiran ko kamo sang kamatuoran parte sang inyo mga kalainan.

8 Huo, kag ang akon mga pulong nagapuno sa inyo sing katingala kag kakibot, kag sang kaakig.

9 Apang tapuson ko ang akon mensahe; kag dayon indi importante kon diin man ako makadto basta nga maluwas ako.

10 Apang ini lamang ang masiling ko sa inyo, kon ano ang inyo himuon sa akon, pagkatapos sini, mangin sulundan kag landong sang mga butang nga magaabot.

11 Kag karon basahon ko sa inyo ang nabilin sang mga kasugoan sang Dios, kay nahibal-an ko nga ang mga ini wala nasulat sa inyo mga tagipusuon; nahibal-an ko nga nagtuon kamo kag nagpanudlo sang kalainan sa laban nga bahin sang inyo mga kabuhi.

12 Kag karon, dumdumon ninyo nga nagsiling ako sa inyo: Indi ka maghimo sa imo kaugalingon sing bisan ano nga tinigib nga imahen, ukon bisan ano nga kaanggid sang mga butang nga yara sa langit sa ibabaw, ukon yara sa duta sa idalom, ukon yara sa tubig sa idalom sang duta.

13 Kag sa liwat: Indi ka magluhod sa ila, ukon mag-alagad sa ila; kay ako nga Ginuo nga imo Dios isa ka maimon nga Dios nga nagabisita sang mga kalainan sang mga amay sa mga kabataan tubtob sa ika-tatlo kag ika-apat nga mga henerasyon nila nga nagadumot sa akon;

14 Kag nagapakita sang kaluoy sa linibo sinang mga nagapalangga sa akon kag nagatuman sang akon mga kasugoan.

15 Indi ka maggamit sang ngalan sang Ginuo nga imo Dios sa wala’y kapuslanan; kay indi sia pagkabigon sang Ginuo nga wala sing sala nga nagagamit sang iya ngalan sa wala’y kapuslanan.

16 Dumduma ang adlaw nga inugpahuway, sa pagpakabalaan sini.

17 Sa anum ka adlaw magpangabudlay ka, kag maghimo sang tanan mo nga buluhaton;

18 Apang sa ika-pito nga adlaw, sa inugpahuway sang Ginuo nga imo Dios, indi ka maghimo sing bisan ano nga buluhaton, ikaw, ukon ang imo anak nga lalaki, ukon ang imo anak nga babayi, ang imo alagad nga lalaki, ukon ang imo alagad nga babayi, ukon ang imo kasapatan, ukon ang pangayaw nga yara sa sulod sang imo mga ganhaan;

19 Kay sa anum ka adlaw ginhimo sang Ginuo ang langit kag ang duta, kag ang dagat, kag ang tanan nga yara sa mga ini; gani ginpakamaayo sang Ginuo ang adlaw nga inugpahuway, kag ginpakabalaan ini.

20 Tahura ang imo amay kag ang imo iloy agud nga ang imo mga inadlaw magalawig sa duta nga ginhatag sa imo sang Ginuo nga imo Dios.

21 Indi ka magpatay.

22 Indi ka magpanglahi. Indi ka magpangawat.

23 Indi ka magsaksi sing di-matuod batok sa imo isigkatawo.

24 Indi ka magkaibog sang balay sang imo isigkatawo, indi ka magkaibog sang asawa sang imo isigkatawo, ukon sang iya alagad nga lalaki, ukon sang iya alagad nga babayi, ukon sang iya baka, ukon sang iya asno, ukon sang bisan ano nga butang nga iya sang imo isigkatawo.

25 Kag natabo ini nga sang makatapos si Abinadi sining mga ginpanghambal nga nagsiling sia sa ila: Gintudloan bala ninyo ining katawhan nga dapat sila magbantay sa paghimo sang tanan sining mga butang agud tumanon ining mga kasugoan?

26 Ginasiling ko sa inyo, Wala; kay kon ginhimo ninyo ini, wala na kuntani pag-ipahanabo sang Ginuo nga magkadto ako kag magpropesiya sang malain parte sining katawhan.

27 Kag karon nagsiling kamo nga ang kaluwasan nagaabot paagi sa layi ni Moises. Ginasiling ko sa inyo nga kinahanglanon nga magtuman kamo sang layi ni Moises sa sini nga tion; apang ginasiling ko sa inyo nga ang tion magaabot nga indi na kinahanglanon nga magtuman sang layi ni Moises.

28 Kag dugang pa sina, ginasiling ko sa inyo, nga ang kaluwasan indi matigayon paagi sa layi lamang; kag kon indi tungod sa pagbayad-sala, nga himuon sang Dios mismo para sa mga sala kag mga kalainan sang iya katawhan, pat-od gid nga di-malikawan nga madula sila, sa pihak sang layi ni Moises.

29 Kag karon ginasiling ko sa inyo nga kinahanglanon nga may layi nga mahatag sa mga anak ni Israel, huo, bisan isa ka tuman kaistrikto nga layi; kay isa sila ka batinggilan nga katawhan nga maabtik sa paghimo sang kalainan, kag mahinay sa pagdumdum sang Ginuo nga ila Dios;

30 Gani may isa ka layi nga ginhatag sa ila, huo, isa ka layi sang pagpanghikot kag sang mga ordinansa, isa ka layi nga ginapatuman sa ila sing maid-id adlaw-adlaw agud padayon sila sa pagpanumdum sa Dios kag sang ila tulumanon sa iya.

31 Apang tan-awa, ginasiling ko sa inyo nga ining tanan nga butang mga simbolo sang mga butang nga magaabot.

32 Kag karon, nahangpan bala nila ang layi? Ginasiling ko sa inyo, Wala, wala nila mahangpi tanan ang layi; kag ini tungod sang katig-a sang ila mga tagipusuon; kay wala nila mahangpi nga wala sing tawo nga maluwas kon indi paagi sa pagtubos sang Dios.

33 Kay tan-awa, wala bala si Moises nagpropesiya sa ila parte sa pagkari sang Mesias, kag nga ang Dios magatubos sang iya katawhan? Huo, kag bisan ang tanan nga propeta nga nagpropesiya halin pa sang pagsugod sang kalibutan—wala bala sila naghambal sing kapin ukon kulang parte sining mga butang?

34 Wala bala sila nagsiling nga ang Dios mismo magapanaog sa tunga sang mga anak sang katawhan, kag magdala sa iya kaugalingon sang dagway sang tawo, kag maglakat sa dako nga gahum sa ibabaw sang duta?

35 Huo, kag wala bala sila nagsiling man nga ipahanabo niya ang pagkabanhaw sang mga minatay, kag nga sia, mismo, pagapigoson kag paantuson?