1 Karon sang nahimo ini ni Mosias nagpabantala sia sa bug-os nga duta, sa tanan nga katawhan, nga luyag mahibal-an ang ila kabubut-on parte sa kon sin-o dapat ang ila mangin hari.

2 Kag natabo ini nga ang tingug sang katawhan nagpahayag nga nagasiling: Luyag namon nga si Aaron nga imo anak amo ang amon mangin hari kag amon tagdumala.

3 Karon si Aaron nagtaklad padulong sa duta sang Nefi, gani indi mahatag sa iya sang hari ang ginharian; kag indi man pagbatonon ni Aaron ang ginharian; kag wala man sing bisan sin-o sa mga anak nga lalaki ni Mosias nga sugot magbaton sang ginharian.

4 Gani si haring Mosias nagpabantala liwat sa katawhan; huo, bisan isa ka sinulat nga pulong ang iya ginpadala sa katawhan. Kag amo ini ang mga pulong nga sinulat nga nagasiling:

5 Tan-awa, O kamo nga akon katawhan, ukon akon mga kauturan, kay ginakabig ko kamo sing amo sina, luyag ko nga binag-binagon ninyo ang kabangdanan nga sa diin gintawag kamo sa pagbinag-binag—kay maluyag kamo nga may yara kamo sang hari.

6 Karon ginapahayag ko sa inyo nga sia nga may kinamatarong sa pagpanag-iya sang ginharian nagbalibad, kag indi sia magbaton sang ginharian.

7 Kag karon kon may pilion nga iban nga magbulos sa iya, tan-awa ginakahadlokan ko nga basi may magtuhaw nga mga pagbinaisay sa inyo. Kag basi nga ang akon anak, nga amo ang may kinamatarong sa paggahum sang ginharian, magsugod nga maakig kag magganyat sing bahin sining katawhan nga magsunod sa iya, nga magtuga sang mga giyera kag mga pagbinaisay sa inyo, nga mangin kabangdanan sang pagpaagay sang madamo nga dugo kag pagpatiko sang dalanon sang Ginuo, huo, kag maglaglag sang mga kalag sang madamo nga katawhan.

8 Karon ginasiling ko sa inyo nga mangin maalam kita kag binag-binagon ining mga butang, kay wala kita sing kinamatarong sa paglaglag sang akon anak, kag wala man kita sing kinamatarong sa paglaglag sing isa pa kon sia ang pagapilion nga magbulos sa iya.

9 Kag kon ang akon anak magbalik liwat sa iya bugal kag wala’y pulos nga mga butang pagabawion niya ang mga butang nga iya nasiling, kag angkonon ang iya kinamatarong sa ginharian, nga amo ang mangin kabangdanan nga sia kag amo man ining katawhan maghimo sang madamo nga sala.

10 Kag karon mangin maalam kita kag magpaabot sa sining mga butang, kag himuon inang makapaluntad sing paghidaet sining katawhan.

11 Gani ako ang inyo mangin hari sa nabilin ko pa nga mga inadlaw; apang, magpili kita sang mga hukom, nga maghukom sining katawhan suno sa aton layi; kag plastaron naton sing panibag-o ang mga butang nga may kahilabtanan sa sining katawhan, kay magapili kita sang maalam nga mga tawo nga mangin mga hukom nga magahukom sining katawhan suno sa mga kasugoan sang Dios.

12 Karon mas maayo pa nga ang isa ka tawo pagahukman sang Dios sangsa sang tawo kay ang mga paghukom sang Dios pirme nga matarong, apang ang mga paghukom sang tawo indi pirme nga matarong.

13 Gani, kon mahimo nga may yara kamo sang matarong nga mga tawo nga mangin inyo mga hari, nga magpalig-on sang mga layi sang Dios, kag maghukom sining katawhan suno sa iya mga kasugoan, huo, kon may yara kamo sang mga tawo agud mangin inyo mga hari nga maghimo bisan pareho sang ginhimo sang akon amay nga si Benjamin para sa sining katawhan—ginasiling ko sa inyo, kon mahimo nga pirme amo sini ang matabo gani mangin maayo nga pirme kamo may mga hari nga maggahum sa inyo.

14 Kag bisan ako mismo nagpangabudlay upod ang tanan nga kusog kag mga ikasarang nga yari sa akon agud magtudlo sa inyo sang mga kasugoan sang Dios, kag agud magpaluntad sang paghidaet sa bug-os nga duta, agud wala sing mga giyera ukon mga pagbinaisay, wala sing kinawatay, ukon pagpangagaw, ukon pagpamatay, ukon ano pa man nga sari sang kalainan;

15 Kag kon sin-o man ang nakahimo sing kalainan, sia akon ginsilotan suno sa krimen nga iya nahimo, suno sa layi nga ginhatag sa aton sang aton mga amay.

16 Karon ginasiling ko sa inyo, nga bangod ang tanan nga tawo indi matarong indi maayo nga may hari kamo ukon mga hari nga maggahum sa inyo.

17 Kay tan-awa, ano kadako nga kalainan ang mapahimo sing isa ka malain nga hari, huo, kag ano kadako nga kalaglagan!

18 Huo, dumduma si haring Noe, ang iya kalainan kag ang iya mga kangil-aran, kag amo man ang kalainan kag mga kangil-aran sang iya katawhan. Tan-awa daw ano kadako nga kalaglagan ang nag-abot sa ila; kag amo man tungod sang ila mga kalainan gindala sila sa pagkaulipon.

19 Kag kon indi tungod sang pagpatunga sang ila labing maalam nga Tagtuga, kag ini tungod sang ila sinsero nga paghinulsol, pat-od gid nga indi malikawan nga magapabilin sila sa pagkaulipon tubtob subong.

20 Apang tan-awa, ginluwas niya sila bangod ginpaubos nila ang ila mga kaugalingon sa iya atubang; kag bangod nagpakitluoy sila sing hugot sa iya ginluwas niya sila halin sa pagkaulipon; kag gani ang Ginuo nagahikot paagi sa iya gahum sa tanan nga sirkumstansya sa mga anak sang katawhan, nga nagatanyag sang butkon sang kaluoy tuhoy sa ila nga nagabutang sang ila pagsalig sa iya.

21 Kag tan-awa, karon ginasiling ko sa inyo, indi ninyo mapapanaog sa trono ang isa ka malain nga hari luwas lang nga ini paagi sa madamo nga pagbinaisay, kag sang pagpaagay sang madamo nga dugo.

22 Kay tan-awa, may mga kaabyanan sia sa kalainan, kag ginahuptan niya ang iya mga bantay sa iya palibot; kag ginagisi niya ang mga layi sadtong mga naggahum sa pagkamatarong nga nauna sa iya; kag ginalapakan niya sa idalom sang iya mga tiil ang mga kasugoan sang Dios;

23 Kag nagahimo sia sang mga layi, kag ginapadala ang mga ini sa iya katawhan, huo, mga layi suno sa sari sang iya kaugalingon nga kalainan; kag kon sin-o man ang indi magtuman sang iya mga layi ginapahanabo niya nga malaglag; kag kon sin-o man ang magrebelde batok sa iya padal-an niya sang iya mga kasoldadohan batok sa ila agud magpakig-away, kag kon mahimo niya pagalaglagon niya sila; kag gani ang isa ka di-matarong nga hari nagapatiko sang mga dalanon sang tanan nga pagkamatarong.

24 Kag karon tan-awa ginasiling ko sa inyo, indi nagakaigo nga ang amo sina nga mga kangil-aran mag-abot sa inyo.

25 Gani, magpili kamo paagi sa tingug sining katawhan, sang mga hukom, agud nga mahukman kamo suno sa mga layi nga ginhatag sa inyo sang aton mga amay, nga husto, kag ginhatag sa ila paagi sa kamot sang Ginuo.

26 Karon indi kinaandan nga ang tingug sang katawhan magakaluyag sa ano man nga supak sa sinang husto; kundi nga kinaandan para sa mas diutay nga bahin sang katawhan ang magakaluyag sa sinang indi husto; gani ini tumanon ninyo kag himuon nga inyo layi—ang himuon ang inyo tulumanon paagi sa tingug sang katawhan.

27 Kag kon mag-abot ang tion nga ang tingug sang katawhan magapili sang kalainan, sa amo sina nga tion nga ang mga paghukom sang Dios magatupa sa inyo; huo, sa amo sina nga tion nga bisitahan niya kamo nga may dako nga kalaglagan bisan pareho sang iya pagbisita halin pa sadto sining duta.

28 Kag karon kon may mga hukom kamo, kag wala sila nagahukom sa inyo suno sa layi nga ginhatag, mahimo ninyo sila mapahukman sa isa ka mas mataas nga hukom.

29 Kon ang inyo mas mataas nga mga hukom wala nagahukom sang matarong nga mga paghukom, patipona ninyo ang diutay nga kadamuon sang inyo mas manubo nga mga hukom, kag pagahukman nila ang inyo mas mataas nga mga hukom, suno sa tingug sang katawhan.

30 Kag ginasugo ko kamo sa paghimo sining mga butang sa kahadlok sa Ginuo; kag ginasugo ko kamo sa paghimo sining mga butang, kag nga wala kamo sang hari; agud kon ining katawhan maghimo sang mga sala kag mga kalainan pagasabton ang mga ini sa ila kaugalingon nga mga ulo.

31 Kay tan-awa ginasiling ko sa inyo, ang mga sala sang madamo nga katawhan gintuga sang mga kalainan sang ila mga hari; gani ang ila mga kalainan pagasabton sa mga ulo sang ila mga hari.

32 Kag karon luyag ko nga ining indi pagkapalareho madula na sa sini nga duta, ilabi na gid sa sining akon katawhan; apang luyag ko nga ini nga duta mangin isa ka duta sang kahilwayan, kag ang tagsa ka tawo mahimo nga mag-agom sang iya mga kinamatarong kag mga pribilihiyo sing palareho, samtang nga makita sang Ginuo nga nagakaangay nga mabuhi kita kag mapanubli ang duta, huo, bisan samtang nga ang bisan sin-o man sang aton kaliwat nagapabilin sa ibabaw sang duta.

33 Kag madamo pa gid nga butang ang ginsulat ni haring Mosias sa ila, nga nagapahayag sa ila sang tanan nga pagtilaw kag kabudlayan sing isa ka matarong nga hari, huo, ang tanan nga pag-antos sang kalag para sa ila katawhan, kag amo man ang tanan nga pagkulomuron sang katawhan sa ila hari; kag ginpaathag niya ini tanan sa ila.

34 Kag ginhambalan niya sila nga ining mga butang indi dapat matabo; kundi nga ang kabudlayan dapat nga magtupa sa tanan nga katawhan agud ang tagsa ka tawo magdala sang iya bahin.

35 Kag ginpahayag man niya sa ila ang tanan nga disbentaha nga ila pagaantuson kon may di-matarong nga hari nga maggahum sa ila;

36 Huo, ang tanan niya nga kalainan kag kangil-aran, kag ang tanan nga giyera, kag pagbinaisay, kag pagpaagay sang dugo, kag ang kinawatay, kag ang pagpangagaw, kag ang pagkamakihilawason, kag ang tanan nga sari sang kalainan nga indi maisa-isa—nga ginahambalan sila nga ining mga butang indi dapat matabo, nga ang mga ini hayag nga supak sa mga kasugoan sang Dios.

37 Kag karon natabo ini nga pagkatapos nga napadala ni haring Mosias ining mga butang sa katawhan napapati sila sang kamatuoran sang iya mga pulong.

38 Gani gintalikdan nila ang ila mga handum nga may hari, kag tuman nga naghangad nga ang tagsa ka tawo dapat nga makaangkon sing palarehas nga kahigayunan sa bug-os nga duta; huo, kag ang tagsa ka tawo nagpahayag sing pagsugot sa pagsabat para sa iya kaugalingon nga mga sala.

39 Gani, natabo ini nga nagtililipon sila sang ila mga kaugalingon sa mga grupo sa bug-os nga duta agud magpahayag sang ila mga tingug parte sa kon sin-o ang dapat nila nga mangin mga hukom, nga maghukom sa ila suno sa layi nga ginhatag sa ila; kag nagkasadya sila sing tuman tungod sang kahilwayan nga ginhatag sa ila.

40 Kag nagbakod sila sa gugma tuhoy kay Mosias; huo, ginkabig nila sia nga labaw pa sangsa bisan sin-o nga tawo; kay wala sila nagtulok sa iya bilang isa ka manugpigos nga nagahangad nga makapamintaha, huo, tungod sinang manggad nga nagapalain sang kalag; kay wala sia nanukot sang manggad halin sa ila, kag wala sia nagkalipay sa pagpaagay sang dugo; kundi nga ginpaluntad niya ang paghidaet sa duta, kag gintugotan niya ang iya katawhan nga mahilway sila halin sa tanan nga sari sang pagkaulipon; gani gintahod nila sia, huo, sing tuman, nga wala’y tupong.

41 Kag natabo ini nga nagpili sila sing mga hukom nga maggahum sa ila, ukon maghukom sa ila suno sa layi; kag ini ila ginhimo sa bug-os nga duta.

42 Kag natabo ini nga si Alma ang napilian nga mangin una nga puno nga hukom, sia nga amo man ang mataas nga pari, nga ang iya amay ang naghatag sang palangakoan sa iya, kag naghatag sa iya sing responsibilidad parte sa tanan nga butang nga may kahilabtanan sa simbahan.

43 Kag karon natabo ini nga si Alma naglakat sa mga dalanon sang Ginuo, kag nagtuman sang iya mga kasugoan, kag naghukom sia sang matarong nga mga paghukom; kag may nangin dalayon nga paghidaet sa bug-os nga duta.

44 Kag gani nagsugod ang pagginahum sang mga hukom sa bug-os nga duta sang Zarahemla, sa tanan nga katawhan nga gintawag nga mga Nefinhon; kag si Alma amo ang una kag puno nga hukom.

45 Kag karon natabo ini nga napatay ang iya amay, nga otsenta’y dos anyos, nga nagkabuhi sa pagtuman sang mga kasugoan sang Dios.

46 Kag natabo ini nga si Mosias napatay man, sa ika-treinta’y tres nga tuig sang iya pagginahum, sa edad nga sisenta’y-tres anyos; nga nagahimo sa kabug-osan sang lima ka gatos kag siyam ka tuig halin sa tion nga si Lehi nagbiya sa Jerusalem.

47 Kag gani nagtapos ang pagginahum sang mga hari sa katawhan ni Nefi; kag gani nagtapos ang mga inadlaw ni Alma nga amo ang tagtukod sang ila simbahan.