1 Karon natabo ini nga pagkatapos nga nahimo sang mga anak nga lalaki ni Mosias ining tanan nga butang, nagdala sila sing diutay lamang upod sa ila kag nagbalik sa ila amay, ang hari, kag nagpangabay sa iya nga tugotan niya sila nga kon mahimo, upod ining ila ginpamili, makataklad sila sa duta sang Nefi agud makawali sila sang mga butang nga ila nabatian, kag makapaambit sila sang pulong sang Dios sa ila mga kauturan, ang mga Lamanhon—

2 Agud basi pa lang madala nila sila sa ihibalo parte sa Ginuo nga ila Dios, kag kumbinsihon sila parte sa kalainan sang ila mga amay; kag basi pa lang mabulong nila sila sang ila pagdumot tuhoy sa mga Nefinhon, agud nga madala man sila sa pagkasadya sa Ginuo nga ila Dios, agud nga mangin mainabyanon sila sa isa kag isa, kag wala na sing mga pagbinaisay sa bug-os nga duta nga ginhatag sang Ginuo nga ila Dios sa ila.

3 Karon nagahandum sila nga ang kaluwasan mapahayag sa tagsa ka tinuga kay indi nila mabatas nga ang bisan sin-o nga tawhanon nga kalag madula; huo, bisan ang hunahunaon mismo nga ang bisan sin-o nga kalag magabatas sang nagapadayon nga pagpaantos nangin rason agud mauyog sila kag magpalangurog.

4 Kag gani ang Espiritu sang Ginuo naghikot sa ila kay sila nangin ang pinakamalain sang mga makasasala. Kag nakita sang Ginuo nga nagakaangay sa iya wala’y dulonan nga kaluoy ang pagluwas sa ila; apang nag-antos sila sang dako nga kalisud sang kalag tungod sang ila mga kalainan, nga nagaantos sing tuman kag nagakahadlok nga isikway sila sa wala’y katapusan.

5 Kag natabo ini nga nagpakitluoy sila sa ila amay sa madamo nga inadlaw agud makataklad sila sa duta sang Nefi.

6 Kag si haring Mosias namangkot sa Ginuo kon dapat niya tugotan ang iya mga anak nga lalaki nga magtaklad sa mga Lamanhon agud magwali sang pulong.

7 Kag ang Ginuo nagsiling kay Mosias: Tugoti sila nga magtaklad kay madamo ang magapati sa ila mga pulong, kag makaangkon sila sang kabuhi nga wala’y katapusan; kag pagaluwason ko ang imo mga anak halin sa mga kamot sang mga Lamanhon.

8 Kag natabo ini nga gintugotan sila ni Mosias nga maglakat kag maghimo suno sa ila pangabay.

9 Kag nagpanglakaton sila padulong sa kamingawan pataklad agud magwali sang pulong sa mga Lamanhon; kag ihatag ko ang kasaysayan sang ila mga kahimoan pagkatapos sini.

10 Karon si haring Mosias wala sing bisan isa nga mahatagan sang ginharian kay wala sing bisan sin-o sa iya mga anak nga lalaki ang magabaton sang ginharian.

11 Gani ginkuha niya ang mga kasulatan nga nakurit sa mga lamina nga saway, kag amo man ang mga lamina ni Nefi, kag ang tanan nga butang nga iya gintago kag gin-amligan suno sa mga kasugoan sang Dios, pagkatapos nga malubad kag mapasulat ang mga kasulatan nga yara sa mga lamina nga bulawan nga nasalapoan sang katawhan ni Limhi, nga gintugyan sa iya sang kamot ni Limhi;

12 Kag ini iya ginhimo tungod sang dako nga pagpaabot sang iya katawhan; kay tuman ang ila handum nga mahibal-an ang parte sadtong katawhan nga nalaglag.

13 Kag karon ginlubad niya ang mga ini paagi sinang duha ka bato nga natabid sa duha ka balayan.

14 Karon ining mga butang ginhanda halin sa ginsuguran, kag ginpasa-pasa sa tanan nga henerasyon para sa katuyoan sang pagpatpat sang mga lengguahe;

15 Kag gintago kag gin-amligan ang mga ini sang kamot sang Ginuo agud iya mapahibalo sa tagsa ka tinuga nga magapanag-iya sang duta ang mga kalainan kag mga kangil-aran sang iya katawhan;

16 Kag kon sin-o man ang may amo sining mga butang ginatawag nga manugpanan-aw, suno sa pamaagi sang dumaan nga panahon.

17 Karon sang natapos ni Mosias ang paglubad sining mga kasulatan, tan-awa, naghatag ini sang kasaysayan sang katawhan nga ginlaglag, halin sa tion nga ginlaglag sila pabalik sa pagpatindog sang dako nga tore, sa tion nga ginlabugay sang Ginuo ang lengguahe sang katawhan kag naglinapta sila sa iban nga lugar sa ibabaw sang duta, huo, bisan halin sa sina nga tion pabalik tubtob sa pagtuga kay Adan.

18 Karon ini nga kasaysayan nangin kabangdanan nga nagpangalisud ang katawhan ni Mosias sing tuman, huo, napuno sila sang kasubo; apang naghatag ini sa ila sing dako nga ihibalo, nga sa diin sila nagkasadya.

19 Kag ini nga kasaysayan pagasulaton pagkatapos sini; kay tan-awa, ginakinahanglan nga ang tanan nga katawhan makahibalo sang mga butang nga ginsulat sa sini nga kasaysayan.

20 Kag karon, pareho sang ginsiling ko sa inyo, nga pagkatapos nga nahimo ni haring Mosias ining mga butang, gindala niya ang mga lamina nga saway, kag ang tanan nga butang nga iya gintago, kag ginhatag ang mga ini kay Alma, nga anak ni Alma; huo, ang tanan nga kasulatan, kag amo man ang mga instrumento sa paglubad, kag ginhatag ang mga ini sa iya, kag ginsugo sia nga dapat niya taguon kag amligan ang mga ini, kag magtipig man sing isa ka kasulatan sang katawhan, nga ipasa-pasa ang mga ini halin sa isa ka henerasyon pakadto sa isa, bisan pareho nga ang mga ini ginpasa-pasa halin sa tion nga si Lehi nagbiya sa Jerusalem.