Marso 20–26

Mateo 13; Lucas 8; 13

“Ang May Mga Idulungog sa Pagpamati, Magpamati Sia”

Samtang imo ginabasa ang Mateo 13 kag Lucas 8; 13, pamensara kon paano mo ihanda ang imo kaugalingon sa “pagpamati” kag paghatag sang bili sa mga pinanudlo sang Manluluwas sa sining mga paanggid. Ano ang imo himuon para gamiton ining mga panudlo sa imo kabuhi?

Isulat Ang Imo Mga Panghunahuna

Ang pila sa pinaka-indi malimtan nga mga panudlo sang Manluluwas amo ang simple nga mga istorya nga ginatawag nga mga paanggid. Indi lang ini sila makawiwili nga mga istorya parte sa ordinaryo nga mga butang ukon hitabo. Nagaunod ang mga ini sang dalagko nga mga kamatuoran parte sa ginharian sang Dios para sa mga nakahanda sa espirituhanon. Isa sang una nga mga paanggid nga nasulat sa Bag-ong Katipan—ang paanggid sang manugsab-og [sower] (tan-awa sa Mateo 13:3–23)—nagaimbitar sa aton nga usisaon ang aton kahanda sa pagbaton sang pulong sang Dios. “Kay ang sin-o man nga magabaton,” hambal ni Jesus, “sia pagahatagan, kag magabugana sia” (tan-awa sa Paglubad ni Joseph Smith sang Mateo 13:10 sa Ingles). Gani sa aton paghanda nga tun-an ang mga paanggid sang Manluluwas—ukon ang bisan ano sa Iya mga pinanudlo—maayo nga panugod ang pag-usisa sang aton mga tagipusuon kag hibal-on kon ginahatagan naton ang pulong sang Dios sang “maayong duta” (Mateo 13:8) para magtubo, magpamulak, magdako, kag magbunga nga magabugay sa aton kag sa aton mga pamilya sing bugana.

Mga Ideya para sa Personal nga Pagtuon sang Balaan nga mga Kasulatan

Mateo 13:3–23; Lucas 8:4–15; 13:6–9

Ang akon tagipusuon kinahanglan mahanda sa pagbaton sang pulong sang Dios.

Ngaa nga kon kaisa ang aton mga tagipusuon madali magbaton sang kamatuoran samtang kon kaisa daw ginatentar kita nga sikwayon ini? Ang pagbasa sang paanggid sang manugsab-og makahatag sang maayo nga oportunidad para pamensaron kon ano kamaayo mo ginabaton ang kamatuoran halin sa Ginuo. Basi makabulig nga pareson ang mga bersikulo 3–8 sang Mateo 13 sa mga interpretasyon nga ginhatag sa mga bersikulo 18–23. Ano ang pwede mo himuon para magkultibar sang “maayong duta” sa imo kaugalingon? Ano ayhan ang pila sa mga “tunok” nga nagapugong sa imo nga makabati kag magsunod sa pulong sang Dios? Paano mo malampuwasan ining mga “tunok”?

Ang imo pagtuon sining paanggid makaimpluwensya man sa kon paano mo basahon ang paanggid sa Lucas 13:6–9. Ano ang “bunga” nga ginapaabot sang Ginuo sa aton? Paano naton saguron ang aton duta para “mamunga” kita?

Tan-awa man sa Mosias 2:9; Alma 12:10–11; 32:28–43; Dallin H. Oaks, “Ang Paanggid Parte sa Manugsab-og,” Liahona, Mayo 2015, 32–35.

Mateo 13:24–35, 44–52; Lucas 13:18–21

Ang mga paanggid ni Jesus nagabulig sa akon nga maintiendihan ang pagdako kag ang kapalaran sang Iya Simbahan.

Ang Propeta nga si Joseph Smith nagpanudlo nga ang mga paanggid sa Mateo 13 nagalaragway sang pagdako kag kapalaran sang Simbahan sa ulihing mga adlaw. Pamensara kon ano ang ginatudlo sa imo sang masunod nga mga paanggid parte sa Simbahan sang Ginuo:

• Ang trigo kag ang mga bugang (13:24–30, 36–43)

• Ang liso sang mustasa (13:31–32)

• Ang tapay [leaven] (13:33)

• Ang tinago nga bahandi kag perlas nga bilidhon (13:44–46)

• Ang pukot (13:47–50)

• Ang amay sang panimalay (13:52)

Pagkatapos nga mapamensar sing maayo ining mga paanggid, ano ang nabatyagan mo nga dapat mo himuon para mas magpasakop sa buluhaton sang Simbahan ni Cristo sa ulihing mga adlaw?

Ang ebanghelyo ni Jesucristo isa ka “perlas nga bilidhon” (Mateo 13:46).

Mateo 13:24–30, 36–43

Ang matarong kinahanglan magtubo upod sa malaut tubtob sa katapusan sang kalibutan.

Isa ka paagi para analisahon ining paanggid amo nga drowingon ini kag butangan sang mga interpretasyon sa Mateo 13:36–43 kag Doktrina kag mga Kasugtanan 86:1–7. Ang bugang [tare] isa ka “makahililo nga hilamon, nga, tubtob mamunga ini, daw pareho sa trigo kon tulukon”. Ano nga mga kamatuoran sa sining paanggid ang nagapaisog sa imo nga magpabilin nga matinuohon wala sapayan sang kalautan sa kalibutan?

Lucas 8:1–3

Sa ano nga pamaagi nag-alagad sa Manluluwas ang “pila ka babayi”?

“Ang babayi nga mga disipulo nagpanglakaton upod kay Jesus kag sa Dose, nga nagatuon halin [kay Jesus] sa espirituhanon kag nagaalagad sa Iya sa temporal. … Dugang pa sa pagbaton sang pagpangalagad ni Jesus—sang maayong balita sang Iya ebanghelyo kag sang mga bugay sang Iya nagapang-ayo nga gahum—ining mga babayi nag-alagad sa Iya, nga nagapakigbahin sang ila kabuhian kag debosyon” (Daughters in My Kingdom [2017], 4).  

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mateo 13.Samtang ginabasa sang mga miyembro sang imo pamilya ang mga paanggid sang Manluluwas, mahimo nga masadyahan sila sa pagpamensar sang ila kaugalingon nga mga paanggid nga nagatudlo sang pareho man nga mga kamatuoran parte sa ginharian sang langit (ang Simbahan), nga nagagamit sang mga bagay ukon sitwasyon nga pamilyar sa ila.

Mateo 13:3–23; Lucas 8:4–15.Matapos nga basahon ang paanggid sang manugsab-og sing ululupod, mahimo nga hambalan sang inyo pamilya ang mga pamangkot pareho sini: Ano ang makahimo sang aton nga “duta” (aton mga tagipusuon) nga “batuhon” ukon “lumsan” ang pulong? Paano naton masiguro nga ang aton duta maayo kag mabungahon?

Kon may magagmay nga kabataan sa imo pamilya, mangin masadya kon imbitaron mo ang mga miyembro sang pamilya nga drama-dramahon ang lainlain nga mga paagi sa paghanda sang aton mga tagipusuon sa pagpamati sa pulong sang Dios samtang ginapakot sang iban nga mga miyembro sang pamilya ang ila ginahimo.

Mateo 13:13–16.Paano mo buligan ang mga miyembro sang imo pamilya nga maintiendihan ang importansya sang pagbaton sing handa sang pulong ni Cristo? Para ipakita ang “[mga dulunggan nga] halos makabati,” pwede mo nga takpan ang dulunggan sang isa ka miyembro sang pamilya samtang malinong mo nga ginabasa ang Mateo 13:13–16. Ano ang naintiendihan sinang miyembro sang pamilya sa mga bersikulo? Ano ang mga pamaagi nga ginabuksan naton ang aton mga mata, dulunggan, kag tagipusuon sa pulong sang Dios?

Mateo 13:44–46.Ano ang palareho sa duha ka mga tawo sa sining mga paanggid? May dugang pa bala nga mga butang nga dapat kita himuon bilang mga indibidwal kag bilang pamilya para unahon ang ginharian sang Dios sa aton mga kabuhi?

Lucas 13:11–17.May mga eksperiyensya bala ang mga miyembro sang pamilya nga nakapabatyag sa ila nga indi nila “matadlong [ang ila mga kaugalingon]”? May kilala bala kita nga nakabatyag sang amo sini? Paano kita makabulig? Paano kita “ginahukasan” sang Manluluwas sang aton mga balatian?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Pagpauswag sang Aton Pagpanudlo

Magsaulo sang balaan nga kasulatan. Magpili sang dinalan sa balaan nga kasulatan nga makahulugan sa imo pamilya, kag agdaha ang mga miyembro sang pamilya nga sauluhon ini. Si Elder Richard G. Scott nagpanudlo, “Ang saulado nga balaan nga kasulatan mangin isa ka nagapadayon nga abyan nga wala nagaluya sa pagligad sang panahon” (“The Power of Scripture,” Liahona, Nob. 2011, 6).

Parable of the Sower [Paanggid sang Manugsab-og], ni George Soper