Marso 27–Abril 2

Mateo 14; Marcos 6; Juan 5–6

“Indi Kamo Magkahadlok”

Samtang imo ginabasa ang Mateo 14; Marcos 6; kag Juan 5–6, pangitaa ang mga kamatuoran nga makahulugan para sa imo. Mahimo mo pamangkuton ang imo kaugalingon pareho sang “Paano ang mga istorya sa sining mga kapitulo maangot sa akon?” “Ano nga mga mensahe ang makita ko para sa akon pangabuhi?” ukon “Ano ang gusto ko ipaambit sa akon pamilya ukon sa iban?”

Isulat Ang Imo Mga Panghunahuna

Ano ayhan ang nag-inspirar kay Pedro nga bayaan ang seguridad sang iya baruto sa tunga sang Dagat sang Galilea sa tion sang mabaskog nga bagyo? Ano ang nagtulod sa iya nga magpati nga kon makalakat si Jesus sa tubig, masarangan man niya? Wala kita makahibalo, pero siguro naintiendihan ni Pedro nga ang Anak sang Dios nagkari indi lamang sa paghimo sang dalayawon nga mga butang para sa katawhan kundi nga paisugon ang mga tawo nga pareho kay Pedro nga maghimo man sang dalayawon nga mga butang. Ang imbitasyon ni Jesus, kon pamensaron gid, amo ang “Kari, magsunod sa akon” (Lucas 18:22). Ginbaton na ni Pedro ang ining imbitasyon sang una, kag handa sia nga batunon ini liwat, bisan pa nga nagakahulugan ini sang pag- atubang sang iya mga kahadlok kag paghimo sang butang nga daw kaimposible. Ayhan indi kita pagpangabayon sang Ginuo nga magpanaog sa baruto sa tunga sang bagyo ukon maghatag sang aton diutay nga natigana nga tinapay kon linibo ang kinahanglan pakaunon, pero mahimo Sia nga magpangabay sa aton nga magbaton sang mga direksyon bisan pa nga wala naton ini lubos nga maintiendihan. Bisan ano pa ang Iya imbitasyon sa aton, kon kaisa makapakibot ukon makahaladlok ini sa aton. Pero nagakatabo ang mga milagro kon kita, pareho kay Pedro, magpahigad sang aton mga kahadlok, sang aton mga pagduda, kag sang aton limitado nga pag-intiendi kag sundon Sia nga may pagtuo.

Mga Ideya para sa Personal nga Pagtuon sang Balaan nga mga Kasulatan

Juan 5:16–47

Si Jesucristo nagatahod sang Iya Amay.

Ang relasyon sa tunga sang Amay nga Langitnon kag sa tagsa sang Iya kabataan gintuyo nga mangin sagrado. Sa sining mga bersikulo, naghatag si Jesucristo sa aton sang makainspirar nga sulundan sa aton relasyon sa Amay nga Langitnon. Basaha ang Juan 5:16–47, kag markahi ukon tandai ang tagsa ka pagmitlang sang tinaga nga Amay. Paano ginatahod sang Anak ang Amay, kag paano mo sundon ang Iya ehemplo? Ano ang imo matun-an parte sa kon ano ang balatyagon sang Amay para sa Anak? Ano ang ginainspirar sa imo nga himuon para pabakuron ang imo relasyon sa imo Amay nga Langitnon?

Tan-awa man sa Juan 17.

Milagroso nga ginpakaon ni Jesus ang lima ka libo ka tawo gamit ang lima ka tinapay kag duha ka isda.

Mateo 14:15–21; Marcos 6:33–44; Juan 6:5–14

Ang Manluluwas sarang magpadako sang akon kubos nga mga halad para matuman ang Iya mga katuyuan.

Nakabatyag ka na bala nga kulang ang ikasarang agud sabton ang mga panginahanglan nga imo nakita sa imo palibot—sa imo puluy-an, sa imo mga kaangtanan, ukon sa sosyedad? Sigurado nga ang mga disipulo ni Jesus nakabatyag sang kakulangan sang nangabay Sia sa ila nga pakan-on ang masobra lima ka libo ka gutom nga mga tawo nga may lima lamang ka tinapay kag duha ka isda. Samtang imo ginabasa ang parte sa milagro nga nagsunod, pamensara sing madalom kon paano mahimo nga gamiton sang Dios ang imo kubos nga mga halad sang pagserbisyo agud bugayan ang ara sa imo palibot. Paano Niya ginpadako ang imo mga pagpaninguha samtang nagaserbe ka sa Iya? Pamensara ining pahayag halin kay Sister Michelle D. Craig: “Ikaw kag ako sarang maghatag kay Cristo sang kon ano nga yara sa aton, kag himuon niya nga epektibo ang aton mga pagpaninguha. Ang imo matanyag masobra pa sa bastante—sa pihak sang imo tawhanon nga kaluyahon kag mga kahuyang—kon magsandig ka sa grasya sang Dios” (“Divine Discontent,” Liahona, Nob. 2018, 54).

Mateo 14:22–33; Marcos 6:45–52; Juan 6:15–21

Ginaimbitar ako ni Jesucristo nga ipahigad ang akon mga kahadlok kag mga pangduhaduha kag magtuo sa Iya.

Hunahunaa ang mga detalye sang eksena nga ginlaragway sa Mateo 14:22–33; Marcos 6:45–52; kag Juan 6:15–21. Hunahunaa kon ano ayhan ang nabatyagan ni Pedro kag sang iban pa nga mga disipulo. Ano ang imo matun-an parte sa pagkadisipulo sa mga pulong kag aksyon sang Manluluwas sa sining mga bersikulo? Ano ang imo matun-an sa mga pulong kag aksyon ni Pedro? (Tan-awa man sa 1 Nefi 3:7.) Ano ayhan ang ginaimbitar sang Ginuo nga imo himuon nga daw pareho sang paggwa sa baruto? Ano ang imo makita sa sining mga bersikulo nga nagahatag sa imo sang kaisog nga magtuo kay Jesucristo?

Juan 6:22–71

Bilang disipulo ni Jesucristo, kinahanglan handa ako nga magpati kag magbaton sang kamatuoran, bisan pa nga mabudlay ini himuon.

Sang gintumod ni Jesus ang Iya Kaugalingon bilang “tinapay nga nagahatag sang kabuhi” (Juan 6:48), madamo ang nagkabig sini nga “mabudlay nga pagtulun-an” (Juan 6:60). Paano makabulig sa imo ang mga pulong ni Pedro sa Juan 6:68–69 sa tinion nga ang mga doktrina sang Manluluwas daw kabudlay batunon ukon ipangabuhi? Ano ang nanamian mo parte sa testimonya ni Pedro? Ano ang pila sa “mga pulong sang kabuhi nga walay katapusan” (Juan 6:68) ang nagabulig sa imo nga magpadayon nga nakapangako sa pagsunod sa Manluluwas?

 

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mateo 14:15–21.Pamensara kon paano mo ayhan mabuligan ang imo pamilya nga mapanan-aw kon ano kadamo ang kinahanglan nga tinapay kag isda agud pakan-on ang lima ka libo ka tawo. Ano ang ginatudlo sa aton sang milagro sa Mateo 14:15–21 parte sa Manluluwas? Pamensara ang pagpaambit sang isa ka eksperiyensya sang pamatyag mo kulang ang imo mahatag kag ginpadako sang Manluluwas ang imo mga pagpaninguha.

Mateo 14:22–33.Mahimo nga masadyahan ang imo pamilya sa pagdrama-drama sang istorya sa sining mga bersikulo. Ngaa ayhan nga nahadlok ang mga disipulo? Ngaa nalampuwasan ni Pedro ang iya kahadlok kag naggwa sa baruto? Paano niya ginpakita ang iya pagtuo bisan pa nga nagaamat na sia lugdang? Sa ano kita nangin pareho kay Pedro kon kaisa?

Juan 5:1–16.Agdaha ang mga miyembro sang pamilya nga tandaan ang pulong nga “nag-ayo” sa sining mga bersikulo. Sa ano nga paagi mapaayo ni Jesucristo ang mga tawo? Sang san-o kag paano Niya kita gin-ayo?

Juan 6:28–58.Hatagi ang tagsa ka miyembro sang pamilya sang tinapay para kaunon, kag hambali ang mga benepisyo nga makuha naton sa tinapay kag sa iban pa nga masustansya nga pagkaon. Dayon basaha ining mga bersikulo sing ululupod, nga ginapangita kon ngaa gintawag ni Jesucristo ang Iya Kaugalingon nga “tinapay sang kabuhi” (Juan 6:35). Ano ayhan ang buot silingon sang “magkaon” sang tinapay sang kabuhi?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Ginapanugyan nga himno: “How Great the Wisdom and the Love [Dakong Kaalam kag Gugma],” Mga Himno kag mga Ambahanon sang Kabataan, no. 19.

Pagpauswag sang Personal nga Pagtuon

Pangitaa ang imo kaugalingon nga espirituhanon nga paghangop. Sa imo personal kag pang-pamilya nga pagtuon, indi paglimitahi ang imo kaugalingon sa mga balasahon sa balaan nga mga kasulatan nga nalista sa sining mga outline. Mahimo nga ang Ginuo may mga mensahe para sa imo sa sining mga kapitulo nga wala mahambalan diri. Pangitaa ang mga ini sing mainampuon.

Against the Wind [Kontra sa Hangin], ni Liz Lemon Swindle