The Good Samaritan [Ang Maayong Samariahanon], ni Dan Burr

Abril 17–23

Mateo 18; Lucas 10

“Ano Bala ang Himuon Ko sa Pagpanubli sang Kabuhi nga Walay Katapusan?”

Samtang mainampuon mo nga ginabasa kag ginahunahuna sing maayo ang Mateo 18 kag Lucas 10, hatagi sing atensyon ang malinong nga pagpabatyag sang Balaan nga Espiritu. Hambalon ka Niya kon paano ining mga panudlo kag mga istorya magamit para sa imo. Isulat ang mga panghunahuna nga imo mabaton.

Isulat Ang Imo Mga Panghunahuna

Kon mamangkot ka sa Ginuo, pwede ka makabaton sang sabat nga wala mo ginapaabot. Sin-o ang akon kasilingan? Bisan sin-o nga nagakinahanglan sang imo bulig kag pagpalangga. Sin-o bala ang labing dako sa ginharian sang langit? Isa ka bata. Tama na bala nga patawaron ang nakasala sing pito ka beses? Indi, dapat ka nga magpatawad sing kapituan ka pito. (Tan-awa sa Lucas 10:29–37; Mateo 18:4, 21–22.) Ang wala ginapaabot nga mga sabat halin sa Ginuo sarang makaimbitar sa aton nga liwaton ang pamaagi naton sa pagpamensar, pagbatyag, kag pag-akto. Kon ginapangita mo ang pagbuot sang Ginuo tungod gusto mo gid nga magtuon halin sa Iya, tudloan ka sang Ginuo kon paano magkabuhi sa paagi nga padulong sa kabuhi nga wala katapusan upod sa Iya.

Mga Ideya para sa Personal nga Pagtuon sang Balaan nga mga Kasulatan

Mateo 18:21–35

Kinahanglan ko nga patawaron ang iban kon gusto ko nga makabaton sang kapatawaran halin sa Ginuo.

Ang panugyan ni Pedro nga pwede sia magpatawad sang isa ka tawo sing pito ka beses daw maalwan na kaayo, pero nagpanudlo si Jesus sang mas mataas nga layi. Ang Iya sabat nga, “Wala ako nagasiling sa imo tubtob sa makapito, kundi tubtob sa kapituan ka pito,” (bersikulo 22), wala nagatudlo kon makapila ka beses kundi sa pagpatubo sang Cristohanon nga pamatasan sang pagpatawad. Samtang imo ginabasa ang paanggid sang indi maluluy-on nga suluguon, panumduma sing maayo ang mga tion sang nabatyagan mo ang kaluoy kag kaayo sang Dios. May tawo bala nga nagakinahanglan sang kaluoy kag kaayo halin sa imo?

Si Elder David E. Sorensen naghatag sining importante nga paandam: “Bisan pa nga kinahanglan naton nga patawaron ang kasilingan nga nakasakit sa aton, dapat naton gihapon tinguhaan sing positibo nga mapunggan inang pagpanakit nga masulit. … Ang pagpatawad wala nagapangayo sa aton nga batunon ukon konsintehon ang kalainan. … Pero samtang nagapakig-away kita sa sala, indi naton pagtugotan ang dumot ukon kaakig nga magpangibabaw sa aton mga panghunahuna ukon mga aksyon” (“Forgiveness Will Change Bitterness to Love,” Liahona, Mayo 2003, 12).

Lucas 10:1–20

Sin-o ang Kapituan (Seventy)?

Nga nagasunod sa sulundan nga ginpahamtang sang tiyempo sang Daan nga Katipan (tan-awa sa Exodo 24:1; Numeros 11:16), si Jesucristo “nagpili sang iban nga kapituan,” dugang sa Iya Dose ka mga Apostoles, agud magsaksi sa Iya, magwali sang Iya ebanghelyo, kag magbulig sa Iya sa Iya buluhaton. Ang ining sulundan nagapadayon sa ginpanumbalik nga Simbahan. Ang mga kapituan gintawag sa pagbulig sa Dose sa ila misyon bilang espesyal nga mga saksi ni Jesucristo sa bilog nga kalibutan.

Tan-awa man sa Doktrina kag mga Kasugtanan 107:25–26, 33–34, 97.

Lucas 10:25–37

Agud makabaton sang kabuhi nga wala katapusan, kinahanglan ko nga palanggaon ang Dios kag palanggaon ang akon kasilingan pareho sang akon kaugalingon.

Makabulig ang pagpanumdom nga ang paanggid sang maayong Samariahanon isa ka paagi ni Jesus agud sabton ang duha ka mga pamangkot: “Ano bala ang himuon ko sa pagpanubli sang kabuhi nga walay katapusan?” kag “Sin-o ang akon [kasilingan]?” (Lucas 10:25, 29). Sa imo pagbasa sining paanggid, tandai ining mga pamangkot. Ano ang mga sabat nga imo nakita?

Sang tiyempo ni Jesus, ang kaawayon sa tunga sang mga Judio kag mga Samariahanon naglawig na sing pila ka dinag-on. Ang mga Samariahanon mga kaliwat sang mga Judio nga nagaestar sa Samaria nga nagpalakasal sa mga Gentil. Sa pamatyag sang mga Judio ang mga Samariahanon nangin mahigko na tungod sa ila pagpakigsimpon sa mga Gentil kag nagtalikod na sa kamatuoran. Ang mga Judio nagalikaw sing pila ka kilometro para indi mag-agi sa Samaria. (Tan-awa man sa Lucas 9:52–54; 17:11–18; Juan 4:9; 8:48.)

Ngaa sa banta mo nga ginpili sang Manluluwas ang Samariahanon, nga ginakaugtan sang mga Judio, bilang ehemplo sang kaluoy kag pagpalangga sa iya kasilingan? Ano ang ginainspirar sining paanggid nga imo himuon?

Tan-awa man sa Mosias 2:17.

Lucas 10:38–42

Ginapili naton “ang maayong bahin” paagi sa paghimo sang adlaw-adlaw nga mga pagpili nga nagadul-ong sa kabuhi nga wala katapusan.

Sa Lucas 10:38–42, malulo nga gin-agda ni Jesus si Marta nga liwaton ang iya panghunahuna parte sa iya paggamit sang iya tiyempo. Pagkatapos nga sambiton ining mga bersikulo, si Sister Carol F. McConkie nagtudlo: “Kon luyag naton nga mangin balaan, kinahanglan naton matun-an nga magpungko sa tiilan sang Balaan sang Israel kag maghatag sang tion para sa pagkabalaan. Ginapahigad bala naton ang telepono, ang wala katapusan nga listahan sang ulobrahon, kag ang mga palaligban sang pagkakalibutanon? Ang pangamuyo, pagtuon, kag paghatag sing pagtamod sa pulong sang Dios nagaagda sang Iya nagatinlo kag nagapaayo nga pagpalangga sa aton mga kalag. Hatagan naton sang tiyempo nga mangin balaan, agud mapuno kita sang Iya sagrado kag nagapakabalaan nga Espiritu” (“The Beauty of Holiness,” Liahona, Mayo 2017, 11). Basi gusto mo nga usisaon kon paano mo ginagamit ang imo oras—bisan sa maayo nga mga butang. May butang pa bala nga mas “kinahanglan” (bersikulo 42) nga nagakabagay nimo hatagan sing mas daku nga atensyon?

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mateo 18:1–11.Ngaa gusto ni Jesus nga mangin pareho kita sa gamay nga bata? Ano nga mga kinaiya ang ara sa kabataan nga kinahanglan naton patubuon agud mangin mas Cristohanon? (tan-awa sa Mosias 3:19).

Gusto ni Jesus nga ang Iya mga disipulo mangin pareho sang magagmay nga kabataan.

Mateo 18:15.Paano naton magamit ang laygay sa Mateo 18:15 sa mga inter-aksyon sang aton pamilya? Paano ang paghimo sini makabugay sang aton pamilya?

Mateo 18:21–35.Ano ang ginatudlo sining paanggid sa aton parte kay Jesucristo? Ano ang ginatudlo sini sa aton parte sa kon paano tratuhon ang iban?

Lucas 10:25–37.Mahimo nga masadyahan ang mga miyembro sang pamilya nga magbayo-bayo kag idrama-drama ining paanggid. Paano kita kon kaisa nangin pareho sa lainlain nga mga tawo sa paanggid? Paano ang Manluluwas daw nangin pareho sang maayong Samariahanon? Paano kita mangin mas pareho sa maayong Samariahanon?

Pwede ninyo pamensaron nga magkanta sing ululupod sang himno ukon pang-bata nga kalantahon nga nagasuporta sang mga kamatuoran sa sining paanggid.   Basi masadyahan ang mga miyembro sang pamilya sa pagpangita sang himno ukon kanta kag ipaathag kon paano ini maangot sa paangid.

Lucas 10:38–42.Mabudlay bala nga paiguon ang espirituhanon nga mga butang sa iskedyul sang imo pamilya? Ang istorya nanday Maria kag Marta mahimo nga makainspirar sang konseho sang pamilya ukon home evening kon paano himuon ini sing mas maayo. Bilang pamilya, pwede kamo maglista sang mga paagi kon paano pilion “ang maayong bahin” (Lucas 10:42).

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

 

Pagpauswag sang Aton Pagpanudlo

Magpatubo sang mapinalanggaon nga palibot. Ang balatyagon kag pagtratar sang mga miyembro sang pamilya sa kada isa makaimpluwensya sang espiritu sa inyo puluy-an. Buligi ang tanan nga miyembro sang pamilya nga himuon ang ila bahin agud magtukod sang mapinalanggaon, matinahuron nga puluy-an para ang tanan makabatyag nga hilway sa pagpaambit sang mga eksperiyensya, mga pamangkot, kag mga testimonya. (Tan-awa sa Teaching in the Savior’s Way, 15.)

Christ in the Home of Mary and Martha [Si Cristo sa Puluy-an nanday Maria kag Marta], ni Walter Rane