“Abril 24–30. Juan 7–10: ‘Ako ang Maayong Manugpahalab,’” Dali, Magsunod sa Akon—Para sa Mga Indibidwal kag Mga Pamilya: Bag-ong Katipan 2023 (2022)

“Abril 24–30. Juan 7–10,” Dali, Magsunod sa Akon—Para sa Mga Indibidwal kag Mga Pamilya: 2023

Litrato

Si Jesus upod ang babayi nga nagaluhod sa duta

Neither Do I Condemn Thee [Bisan Ako Wala Nagakondenar sa Imo], ni Eva Koleva Timothy

Abril 24–30

Juan 7–10

“Ako ang Maayong Manugpahalab”

Samtang imo ginabasa ang Juan 7–10, mahimo ka nga makabaton sang mga pagpabatyag halin sa Balaan nga Espiritu parte sa mga pang-doktrina nga mga prinsipyo sa sining mga kapitulo. Ang pagsulat sang imo mga panghunahuna makabulig sa imo sa pagplano nga aktuhan ang mga ini.

Isulat Ang Imo Mga Panghunahuna

Bisan nga nagkari si Jesucristo agud magdala sang “paghidaet [kag] maayong kabubut-on sa tunga sang mga tawo” (Lucas 2:14), may mga “pagbinahinbahin sa katawhan bangud sa iya” (Juan 7:43). Ang mga tawo nga nakasaksi sang pareho nga mga hitabo nakaangkon sang lainlain nga mga konklusyon kon sin-o si Jesus. Ang iban nagsiling, “Maayo sia nga tawo,” samtang ang iban nagsiling, “Nagapatalang sia sang katawhan” (Juan 7:12). Sang gin-ayo Niya ang bulag sa Adlaw nga Inugpahuway, ang iban nagpamilit, “Ining tawo indi naggikan sa Dios, bangud nga wala sia nagabantay sang adlaw nga inugpahuway,” samtang ang iban nagapamangkot, “Paano bala nga makahimo ang isa ka tawo nga makasasala sang kasubong nga mga [milagro]?” (Juan 9:16). Pero bisan sa tunga sang tanan nga kagamo, ang mga nagapangita sang kamatuoran nakakilala sang gahum sa Iya mga pulong, kay “wala pa gid sing tawo nga nagpamulong subong sining tawo” (Juan 7:46). Sang ginpangabay sang mga Judio si Jesus nga “sugiri kami sing maathag” kon sia bala ang Cristo, ginpahayag Niya ang isa ka prinsipyo nga makabulig sa aton nga mahibal-an ang kinalain sang matuod sa sayop: “Ang akon mga carnero nagapamati sang akon tingug,” siling Niya, “kag nakilala ko sila, kag nagasunod sila sa akon” (Juan 10:24, 27).

Litrato

icon sang personal nga pagtuon

Mga Ideya para sa Personal nga Pagtuon sang Balaan nga Mga Kasulatan

Juan 7:14–17

Sa akon pagpangabuhi sang mga kamatuoran nga ginpanudlo ni Jesucristo, mahibal-an ko nga matuod ang mga ini.

Natingala ang mga Judio nga kadamo sang nahibal-an ni Jesus, nga wala man Sia nakatuon (tan-awa sa bersikulo 15)—kon hambalon, sa paagi nga pamilyar sa ila. Sa sabat ni Jesus, nagtudlo Sia sang lain nga paagi para mahibal-an ang kamatuoran nga matigayon sang tanan, wala sapayan sang iniskwelahan ukon kinadak-an. Suno sa Juan 7:14–17, paano mo mahibal-an nga ang doktrina nga gintudlo ni Jesus matuod? Paano ining proseso nagbulig sa imo nga magpatubo sang imo panaksihon sang ebanghelyo?

Juan 8:2–11

Ang kaluoy sang Manluluwas para sa tanan.

Sa paghambalanay parte sa inter-aksyon sang Manluluwas sa babayi nga nadakpan sa pagpanglahi, si Elder Dale G. Renlund nagsiling: “Sigurado gid, ang Manluluwas wala nagtolerar sang pagpanglahi. Pero wala man Niya ginkondenar ang babayi. Ginpaisog Niya sia nga bag-uhon ang iya kabuhi. Nangin inspirado sia nga magbag-o bangud sang Iya kaayo kag kaluoy. Sa Paglubad ni Joseph Smith sang Biblia nagapamatuod nga sia nangin disipulo: ‘Kag ang babayi naghimaya sa Dios sumugod sadto nga oras, kag nagtuo sa iya ngalan’ [tan-awa sa Juan 8:11].

Sang san-o ka nakabatyag pareho sang babayi, nga nagbaton sang kaluoy imbes sang pagkondenar halin sa Manluluwas? Sang san-o ka nangin pareho sa mga eskriba kag mga Fariseo, nga nagaakusar ukon nagahusga sa iban bisan pa nga makasasala ka man? (tan-awa sa Juan 8:7). Ano pa ang imo matun-an sa pamaagi nga nakighambal ang Manluluwas sa mga eskriba kag mga Fariseo kag sa babayi nga nadakpan sa pagpanglahi? Ano ang imo matun-an parte sa kapatawaran sang Manluluwas samtang ginabasa mo ining mga bersikulo?

Juan 9

Kon may pagtuo kita, sarang nga ipahayag sang Dios ang Iya Kaugalingon sa aton mga kabudlayan.

Anong ginatudlo sang Juan 9:1–3 sa imo parte sa mga hangkat kag mga kabudlayan sang pangabuhi? Samtang imo ginabasa ang Juan 9, binagbinaga kon paano “ang mga buhat sang Dios [gina]pahayag” sa kabuhi sang tawo nga nabata nga bulag. Paano ginpahayag ang mga ini sa imo kabuhi—lakip na sa imo mga kabudlayan?

Juan 10:1–30

Si Jesucristo amo ang Maayong Manugpahalab.

Bisan pa nga indi ka pamilyar sa carnero kag sa pagtatap sang carnero, ang pagbasa sang Juan 10, kon sa diin nagsiling ang Manluluwas nga, “Ako ang maayong manugpahalab,” makatudlo sa imo sang importante nga mga kamatuoran parte sa Iya. Para makita ining mga kamatuoran, pangitaa ang mga dinalan nga nagalaragway kon daw ano ang mangin maayo nga manugpahalab kag dayon pamensara kon paano inang mga dinalan magamit sa Manluluwas. Sa idalom ang pila ka mga halimbawa:

Bersikulo 3: “Ginatawag niya ang iya kaugalingon nga mga carnero sa ngalan kag ginapaguwa niya sila.”
Bersikulo 11: Sia “nagahatag sang iya kabuhi tungod sa mga carnero.”
Bersikulo 16: “Mangin-isa ang panong, isa ang manugpahalab.”

Ari ang dugang pa nga mga pamangkot para mabuligan ka sa pagbinagbinag sining kapitulo: Sa ano nangin pareho si Jesus sa pwertahan? (tan-awa sa bersikulo 7–9). Paano ka Niya ginhatagan sang “kabuhi … [nga] may kabugana”? (bersikulo 10). Sang san-o mo nabatyagan nga kilala ka Niya sing personal? (tan-awa sa bersikulo 14). Paano mo makilala ang tingug sang Maayong Manugpahalab? (tan-awa sa bersikulo 27).

Tan-awa man sa Salmo 23; Ezequiel 34; Alma 5:37–39; 3 Nefi 15:21–16:5.

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Juan 7:24.Para buligan ang imo pamilya nga maintiendihan ang pinanudlo ni Jesus sa Juan 7:24, pwede mo nga ipakita sa ila ang isa ka butang nga lain ang hitsura sa gwa sangsa sa sulod. Ukon pwede magpaambit ang mga miyembro sang pamilya sang mga eksperiyensya nga nagtudlo sa ila nga indi maghusga sa panggwa nga hitsura. Pwede man kamo maglista sang mga kalidad sang kada miyembro sang pamilya nga indi makita sa panulukan (tan-awa man sa 1 Samuel 16:7).

Juan 8:31–36.Ano ang buot silingon sang mangin “alagad sang sala”? (tan-awa man sa Moroni 7:11). Ano nga mga kamatuoran nga ginpanudlo ni Jesus ang makahilway sa aton?

Jesus Healing the Blind [Si Jesus Nagaayo sang Bulag], ni Carl Heinrich Bloch

Juan 9.Paano mo mabuligan ang imo pamilya nga mapanan-aw ang istorya ni Jesus nga nagaayo sang bulag nga tawo sa Imbitaha sila nga tandaan ang mga leksyon nga ila matun-an sa istorya, pareho abi sang kahulugan sang mahaylo [converted] sa ebanghelyo ni Jesucristo.

Juan 10:1–18, 27–29.Para makapartisipar ang mga miyembro sang pamilya sa pagtuon parte sa paanggid sang maayong manugpahalab, pangabaya ang tagsa sa ila nga magdrowing sang litrato sang isa sa mga masunod: kawatan, pwertahan, manugpahalab, manugbantay (binayaran nga trabahador), lobo, kag carnero. Imbitaha sila nga basahon ang Juan 10:1–18, 27–29, kag dayon hambali bilang pamilya kon ano ang gintudlo sang Manluluwas parte sa mga butang nga ila gindrowing.

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Pagpauswag sang Personal nga Pagtuon

Magpangita sang nagainspirar nga mga tinaga kag mga dinalan. Sa imo pagbasa, ang Espiritu sarang magtudlo sang imo atensyon sa pila ka mga tinaga ukon dinalan nga makainspirar kag makapaisog sa imo ukon nga daw ginsulat gid para sa imo. Pamensara nga tandaan ang bisan ano nga tinaga ukon dinalan nga nagainspirar sa imo sa Juan 7–10.