“Mayo 1–7. Lucas 12–17; Juan 11: ‘Magkalipay Kamo upod sa Akon; kay Nakita Ko ang Akon Carnero nga Nadula,’” Dali, Magsunod sa Akon—Para sa Mga Indibidwal kag Mga Pamilya: Bag-ong Katipan 2023 (2022)
“Mayo 1–7. Lucas 12–17; Juan 11,” Dali, Magsunod sa Akon—Para sa Mga Indibidwal kag Mga Pamilya: 2023
The Prodigal Son [Ang Waldas nga Anak], by Liz Lemon Swindle
Mayo 1–7
Lucas 12–17; Juan 11
“Magkalipay Kamo upod sa Akon; kay Nakita Ko ang Akon Carnero nga Nadula”
Samtang imo ginabasa ang Lucas 12–17 kag Juan 11, mainampuon nga pangitaa kon ano ang gusto sang Amay nga Langitnon nga imo mahibal-an kag buhaton. Ang imo pagtuon sining mga kapitulo magabukas sang imo tagipusuon sa mga mensahe nga para gid sa imo.
Isulat Ang Imo Mga Panghunahuna
Sa kalabanan nga mga sitwasyon, ang 99 sa 100 makabig nga pinakamaayo—pero indi amo sina kon ining numero nagarepresentar sang pinalangga nga mga anak sang Dios (tan-awa sa Doktrina kag mga Kasugtanan 18:10). Sa sina nga kaso, bisan ang isa ka kalag takos sa maid-id, dedikado nga pagpangita “tubtob nga makita [naton] ini” (Lucas 15:4), pareho sa ginpanudlo sang Manluluwas sa paanggid sang nadula nga carnero. Dayon nagasugod ang pagkinalipay, kay “may kalipay sa langit tungod sang isa ka makasasala nga nagahinulsol labi pa sa nubentay nwebe nga matarong nga wala nagakinahanglan sang paghinulsol” (Lucas 15:7). Kon daw indi ina patas, makabulig ang panumdumon nga, sa matuod, wala sang bisan isa nga “wala nagakinahanglan sang paghinulsol.” Kita tanan nagakinahanglan nga salbaron. Kag tanan kita pwede magpartisipar sa pagpangsalbar, nga nagakalipay sing ululupod sa tagsa ka kalag nga nasalbar (tan-awa sa Doktrina kag mga Kasugtanan 18:15–16).
Mga Ideya para sa Personal nga Pagtuon sang Balaan nga mga Kasulatan
Ginabugayan ako samtang ginapahamtang ko ang akon tagipusuon sa wala katapusan nga mga butang.
Ngaa mahambal ang Dios nga “Buangbuang” sa isa ka mapisan, madinalag-on nga tawo nga nagpatukod sang dalagko nga mga kamalig kag nagpuno sang mga ini sang bunga sang iya pinangabudlayan? (tan-awa sa Lucas 12:16–21). Sa sining mga kapitulo sa Lucas, nagatudlo ang Manluluwas sang pila ka mga paanggid nga makabulig sa aton nga bayawon ang aton panulok lampas sa kalibutanon padulong sa wala katapusan. Ang pila sining mga paanggid nalista diri. Paano mo palip-uton ang mensahe sang kada isa? Ano sa banta mo ang ginahambal sang Ginuo sa imo?
-
Ang buang-buang nga manggaranon nga tawo (Lucas 12:13–21)
-
Ang dakong sinalu-salo (Lucas 14:12–24)
-
Ang waldas nga anak (Lucas 15:11–32)
-
Ang indi matarong nga salaligan (Lucas 16:1–12)
-
Ang manggaranon nga tawo kag si Lazaro (Lucas 16:19–31)
Tan-awa man sa Mateo 6:19–34; 2 Nefi 9:30; Doktrina kag mga Kasugtanan 25:10.
Ang Amay nga Langitnon nagakalipay kon ang mga nadula makita.
Samtang imo ginabasa ang mga paanggid nga gintudlo ni Jesus sa Lucas 15, ano ang imo matun-an parte sa kon ano ang nabatyagan sang Amay nga Langitnon sa mga nakasala ukon indi gani “nadula”? Ano dapat ang mabatyagan sang isa ka espirituhanon nga lider—ukon sang bisan sin-o sa aton—tuhoy sa ila? Pamensara kon paano ayhan sabton sang mga Fariseo kag mga eskriba ining mga pamangkot (tan-awa sa Lucas 15:1–2). Ang sabat ni Jesus makita sa tatlo ka mga paanggid sa Lucas 15. Sa imo pagbasa, hunahunaa kon ano ang ginatudlo ni Jesus sa mga eskriba kag mga Fariseo sa sining mga paanggid.
Pwede mo man pamensaron nga maghimo sang listahan sang mga pagpulupareho kag mga kinalain sa sining mga paanggid. Halimbawa, pwede mo tan-awon kon ano ang nadula sa kada paanggid kag kon ngaa nadula ini, paano ini nakita, kag kon ano ang reaksyon sang mga tawo sang makita ini. Ano ang mga mensahe ni Jesus sa mga “nadula”—lakip na ang mga wala nagahunahuna nga nadula sila? Ano ang mga mensahe ni Jesus para sa mga tawo nga nagapangita sang mga nadula?
Tan-awa man sa Doktrina kag mga Kasugtanan 18:10–16.
The Lost Piece of Silver [Ang Nadula nga Sinsilyo nga Pilak], ni James Tissot
Ano ang ginatudlo ni Cristo sa paanggid sang indi matarong nga salaligan?
Si Elder James E. Talmage nagpaathag sang isa ka leksyon nga aton matun-an sa paanggid: “Magmangin matutom; kay ang adlaw nga magamit ninyo ang inyo dutan-on nga manggad madali na lang matapos. Magtuon sang leksyon bisan pa halin sa dayaon kag sa malaut; kay kon mahinalungon sila nga nagapanigana sang amo lang nga bwas-damlag nga ila nahibal-an, mas dapat kamo nga magpanigana, nga nagapati sa wala katapusan nga bwas-damlag! Kon wala kamo nagtuon sang kaalam kag paghalong sa paggamit sang ‘manggad nga di-matarong,’ paano kamo saligan sa mas nagadugay nga mga manggad?” (Jesus the Christ [1916], 464). Ano pa nga mga leksyon ang imo nakita sa sining paanggid?
Ang kapasalamatan sa akon mga bugay mas magapalapit sa akon sa Dios.
Kon nangin isa ka sa pulo ka mga aruon, sa banta mo nagbalik ka para pasalamatan ang Manluluwas? Ano ang dugang nga mga bugay nga nabaton sang mapinasalamaton nga aruon tungod nagpasalamat sia?
Pwede mo man binagbinagon ang mga pulong sang Manluluwas nga, “Ang imo pagtuo nag-ayo sa imo” (bersikulo 19). Sa imo opinyon, paano nagaangot ang pagpasalamat kag pagtuo? Paano ini sila nagabulig sa aton nga mag-ayo?
Tan-awa man sa Dale G. Renlund, “Binagbinaga ang Kaayo kag Pagkawala Tupong sang Dios,” Liahona, Mayo 2020, 41–44.
Si Jesucristo amo ang Pagkabanhaw kag ang Kabuhi.
Ang milagro sang pagbanhaw kay Lazaro halin sa minatay isa ka mabaskog kag indi mabali nga panaksihon nga si Jesus matuod nga Anak sang Dios kag ang ginpromisa nga Mesias. Ano nga mga tinaga, dinalan, ukon detalye sa Juan 11:1–46 ang nagapabakod sang imo pagtuo nga si Jesucristo amo “ang pagkabanhaw, kag ang kabuhi”? Ano ang kahulugan para sa imo sang si Jesus amo “ang pagkabanhaw kag ang kabuhi”?
Mga Ideya para sa Pang-pamilya nga Pagtuon sang Balaan nga mga Kasulatan kag Home Evening
-
Lucas 15:1–10.Naintiendihan bala sang mga miyembro sang imo pamilya kon ano ang balatyagon sang madulaan—ukon madula? Ang pag-istoryahanay parte sa ila mga eksperiyensya mahimo nga magsugod sang paghambalanay parte sa mga paanggid sang nadula nga carnero kag nadula nga sinsilyo nga pilak. Ukon pwede kamo maghampang sang panaguay nga may manago kag pangitaon sia sang iban nga miyembro sang pamilya. Paano makabulig ining kahiwatan nga maintiendihan naton ining mga paanggid?
-
Lucas 15:11–32.Sa ano kita mangin pareho sa amay sa sining istorya kon kita may mga mahal sa kabuhi nga nagkaladula? Ano ang aton matun-an sa eksperiyensya sang magulang nga bata nga makabulig sa aton nga mangin mas Cristohanon? Sa ano nga mga paagi ang amay sa sining paanggid pareho sa aton Amay nga Langitnon?
-
Lucas 17:11–19Agud buligan ang mga miyembro sang pamilya nga ipangabuhi ang istorya sang pulo ka mga aruon, pwede mo sila hagaron nga magbilin sang sekreto nga mga sulat sang pagpasalamat para sa kada isa. Pwede man ninyo kantahon sing ululupod ang “Kon sa Balod sang Kabuhi” (Mga Himno kag mga Ambahanon sang Kabataan, no. 8) kag isipa ang mga bugay nga nabaton sang inyo pamilya.
-
Juan 11:1–46.Ang mga miyembro sang pamilya pwede nga magpaambitanay sang ila nga panaksihon kay Jesucristo.
Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.
Pagpauswag sang Aton Pagpanudlo
Maggamit sang mga istorya kag mga halimbawa para itudlo ang mga prinsipyo sang ebanghelyo. Ang Manluluwas sa masami nagatudlo sang mga prinsipyo sang ebanghelyo paagi sa paggamit sang mga istorya kag mga paanggid. Magpamensar sang mga halimbawa kag mga istorya halin sa imo kaugalingon nga kabuhi nga makapatubo sang interes sang imo pamilya sa isa ka prinsipyo sang ebangheyo (tan-awa sa Teaching in the Savior’s Way, 22).
Where Are the Nine [Sa Diin ang Siyam], ni Liz Lemon Swindle