tawo nga ara sa kahoy sang nagapalapit si Jesus

Zacchaeus in the Sycamore Tree [Si Zaqueo sa Kahoy nga Sicomoro], ni James Tissot

Mayo 15–21

Mateo 21–23; Marcos 11; Lucas 19–20; Juan 12

“Yari karon, Ang Imo Hari Nagakari”

Antes basahon ang mga ideya sa sining outline, basaha ang Mateo 21–23; Marcos 11; Lucas 19–20; kag Juan 12. Isulat ang mga panghunahuna nga pwede mo ipaambit sa imo pamilya ukon sa imo mga klase sa Simbahan.

Isulat Ang Imo Mga Panghunahuna

Ang Manluluwas gingutom pagkatapos magbiyahe halin sa Betania pakadto sa Jerusalem, kag ang kahoy nga higuera sa unhan daw pwede makuhaan sang makaon. Pero sang nagpalapit si Jesus sa puno, nakita niya nga wala ini sing bunga (tan-awa sa Mateo 21:17–20; Marcos 11:12–14, 20). Kon ipaanggid, ang kahoy nga higuera daw pareho sa mga hipokrito nga lideres sang relihiyon sa Jerusalem: ang ila wala sing kahulugan nga pagpanudlo kag pagpakita-kita nga pagkabalaan wala nagahatag sang espirituhanon nga sustansya. Ang mga Fariseo kag mga eskriba daw nagatuman sang madamo nga mga kasuguan pero nalimtan ang duha ka pinakadalagko nga kasuguan: ang higugmaon ang Dios kag palanggaon ang imo kaingod pareho sa imo kaugalingon (tan-awa sa Mateo 22:34–40; 23:23).

Sa kabaliskaran, madamo nga tawo ang nagsugod sa pagkilala sang maayo nga bunga sa mga pinanudlo ni Jesus. Sang Sia mag-abot sa Jerusalem, gin-abiabi nila Sia gamit ang inutod nga mga sanga sang kahoy nga ginhanig sa Iya alagyan, nga nagakasadya nga sang ulihi, sa nasiling sa dumaan nga propesiya, “Ang Imo Hari Nagaabot” (Zacarias 9:9). Sa imo pagbasa sining semana, pamensara ang mga bunga sang mga pinanudlo sang Manluluwas kag sang Iya nagabayad-sala nga sakripisyo sa imo kabuhi kag kon paano ka “magapamunga sing madamo” (Juan12:24).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Lucas 19:1–10

Ang Ginuo wala nagahusga sang panggwa nga hitsura kundi sang mga handum sang tagipusuon.

Sang tiyempo ni Jesus, madamo nga mga tawo ang naghaumhaum nga ang mga publikano, ukon manugsukot sang buhis, indi tampad kag nagapangawat sa mga tawo. Gani bangud si Zaqueo, ang hepe nga publikano, manggaranon, mas labi sia nga ginadudahan. Pero si Jesus nagtulok sa tagipusuon ni Zaqueo. Ano ang ginapakita sa Lucas 19:1–10 parte sa tagipusuon ni Zaqueo? Pwede mo tandaan ang mga tinaga sa sining mga bersikulo nga nagalaragway sang ginhimo ni Zaqueo para ipakita ang iya debosyon sa Manluluwas. Ano ang mga handum sang imo tagipusuon? Ano ang imo ginahimo agud pangitaon ang Manluluwas, pareho sa ginhimo ni Zaqueo?

Tan-awa man sa Doktrina kag mga Kasugtanan 137:9.

Mateo 23; Lucas 20:45–47

Si Jesus nagapakamalaut sang pagkahipokrito.

Ang inter-aksyon sang Manluluwas sa mga eskriba kag mga Fariseo nagapakita sang makawiwili nga kinalain sa iya inter-aksyon kay Zaqueo. Sa ginpaathag ni Pangulong Dieter F. Uchtdorf, “[Si Jesus] nagtindog nga may matarong nga kaakig batok sa mga eskriba, mga Fariseo, kag mga Saduceo—sa mga nagapakita nga matarong para mabaton ang pagdayaw, impluwensya, kag manggad sang kalibutan, mientras ginapigos ang mga tawo nga dapat kuntani bugayan nila” (“Sa Pagkamangin-tunay,” Liahona, Mayo 2015, 81).

Sa Mateo 23, naggamit ang Manluluwas sang pila ka simbolo agud ilaragway ang pagkahipokrito. Pamensara nga markahan ukon ilista ining mga simbolo kag tandaan kon ano ang gintudlo sang mga ini parte sa pagkahipokrito. Ano ang kinalain sang pagkahipokrito kag sang tawhanon nga kahuyang nga aton tanan ginaatubang samtang ginatinguhaan naton nga ipangabuhi ang ebanghelyo? Ano ang ginapabatyag sa imo nga lainon sa paghimo bangud sang mga pinanudlo sang Manluluwas?

 

Mateo 21:1–11; Marcos 11:1–11; Lucas 19:29–44; Juan 12:1–8, 12–16

Si Jesucristo amo ang akon Hari.

Sang mag-abot si Jesus sa Jerusalem pila lang ka ladlaw antes Niya mahuman ang Iya Pagbayad-Sala, ang mga nagkilala sa Iya bilang ila Hari nagpakita sang ila debosyon paagi sa paghaplas [anoint] sa Iya, sa pagbutang sang mga biste kag mga sanga sang kahoy sa Iya alagyan pasulod sa Jerusalem, kag pagsinggit sang mga pagdayaw. Pamensara kon sa ano ang masunod nga mga balasahon makadugang sang imo pag-intiendi sining mga hitabo, nga nagsugod sang katapusan nga semana sang kabuhi sang Manluluwas.

• Dumaan nga halimbawa sang paghaplas sang hari: 2 Mga Hari 9:1–6, 13

• Dumaan nga propesiya sang madinalag-on nga pagsulod: Zacarias 9:9

•  

• Mga propesiya kon paano ang Manluluwas magakari liwat: Bugna 7:9–12

Paano mo tahuron kag batunon ang Manluluwas bilang imo Ginuo kag Hari?

Tan-awa man sa Gerrit W. Gong, “Hosana kag Aleluya—Ang Buhi nga Jesucristo: Ang Sentro sang Pagpanumbalik kag Paskwa sang Pagkabanhaw,” Liahona, Mayo 2020, 52–55.

Mateo 22:34–40

Ang duha ka dalagko nga mga sugo amo ang higugmaon ang Dios kag higugmaon ang iban pareho sang akon kaugalingon.

Kon nagabatyag ka nga ginabudlayan samtang ginatinguhaan mo nga sundon si Jesucristo, ang mga pulong sang Manluluwas sa abogado sa Mateo 22 makabulig sa imo nga pasimplehon kag itutok ang imo pagkadisipulo. Ari ang isa ka paagi para himuon ini: Maglista sang pila sa mga kasuguan sang Ginuo. Paano ang kada isa sa imo listahan naangot sa duha ka dako nga mga kasuguan? Sa ano makabulig sa imo ang pagtutok sa duha ka dako nga mga kasuguan nga tumanon ang iban?

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mateo 21:12–14.Paano ang mga pulong kag aksyon ni Jesus sa Mateo 21:12–14 nagapakita kon ano ang Iya nabatyagan parte sa templo. Paano naton ginapakita kon ano ang aton nabatyagan parte sa templo? Ano ang pwede naton “tabugon” (bersikulo 12) sa aton mga kabuhi para himuon ang aton puluy-an nga mas daw pareho sa templo?  

Mateo 21:28–32.Ano nga mga leksyon gikan sa paanggid sang tawo nga may duha ka anak ang makabulig sa imo pamilya? Halimbawa, pwede mo gamiton ang istorya para hambalan ang importansya sang sinsero nga pagtuman kag paghinulsol. Ayhan ang imo pamilya pwede maghimo sang isa ka script para drama-dramahon ang paanggid kag magbulos-bulos sa pag-arte sang lainlain nga mga papel.

Mateo 22:15–22; Lucas 20:21–26.Mahimo nga masadyahan ang mga kabataan sa paghimo sang halampangan nga sinsilyo nga may “laragway kag ngalan” ni Jesus sa mga ini. Pwede nila isulat sa likod sang mga sinsilyo ang pila sa mga “butang nga iya sang Dios” (Mateo 22:21) nga sarang naton mahatag sa Iya. Pwede man ninyo hambalan kon ano ang buot silingon sang may “laragway kag ngalan” sang Manluluwas nga nasulat sa aton (Mateo 22:20; tan-awa man sa Mosias 5:8; Alma 5:14).

Juan 12:1–8.Paano ginpakita ni Maria ang iya pagpalangga sa Manluluwas? Paano naton ipakita ang aton pagpalangga para sa Iya?

babayi nga nagapahid sang mga tiil ni Jesus sang iya buhok

Washing Jesus’s Feet [Paghugas sang mga Tiil ni Jesus], ni Brian Call

Juan 12:42–43.Ano nga sosyal nga mga konsikwensya ang nagapatalaw sa aton kon kaisa nga magpahayag ukon pangapinan ang aton pagtuo kay Cristo? Para sa mga halimbawa sang mga tawo nga wala nagapadala sa pag-ipit sang sosyedad, tan-awa sa Daniel 1:3–20; 3; 6; Juan 7:45–53; 9:1–38; kag Mosias 17:1–4. Paano naton ipakita ang respeto sa iban sa ila pagpahayag ukon pagpangapin sang ila relihiyoso nga mga pagpati?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

 

Pagpauswag sang Aton Pagpanudlo

Maggamit sang art para paentrahon ang mga miyembro sang pamilya. “Ang Libro sang mga Larawan nga Pang-Ebanghelyo kag ang Gospel Media Library sa ChurchofJesusChrist.org nagaunod sang madamo nga mga imahe kag mga video nga makabulig sa [imo pamilya] nga makita ang mga konsepto ukon mga hitabo” (Teaching in the Savior’s Way, 22).

Ang madinalag-on nga pagsulod ni Cristo

Triumphal Entry [Madinalag-on nga Pagsulod], ni Walter Rane