Ika-duhang Pagkari

The Second Coming [Ang Ika-Duhang Pagkari}, ni Harry Anderson

Mayo 22–28

Joseph Smith—Mateo 1; Mateo 24–25; Marcos 12–13; Lucas 21

“Magakari ang Anak sang Tawo”

Samtang imo ginabasa ang Joseph Smith—Mateo 1; Mateo 24–25; Marcos 12–13; kag Lucas 21, mahimo ka magpamangkot, “Ano ang mga mensahe sining mga kapitulo para sa akon? para sa akon pamilya? para sa akon calling?”

Isulat Ang Imo Mga Panghunahuna

Siguro ginkakibot sang mga disipulo ni Jesus ang Iya propesiya: ang dako nga templo sang Jerusalem, ang espirituhanon kag pang-kultura nga sentro sang katawhan nga Judio, mawasak sing lubos nga “wala [gid] sing mabilin … nga isa ka bato nga nagapatong sa isa pa ka bato.” Natural nga gusto sang mga disipulo nga makahibalo sing dugang pa. “San-o matabo ang mga ini?” pamangkot nila. “Kag ano ang tanda sang imo pagkari?” (Joseph Smith—Mateo 1:2–4). Ang mga sabat sang Manluluwas nagpahayag nga ang dako nga kalaglagan sang Jerusalem—isa ka propesiya nga natuman sang AD 70—mangin gamay kaayo ikumparar sa mga tanda sang Iya pagkari sa ulihing mga adlaw. Ang mga butang nga mas mabakod pa sangsa templo sa Jerusalem mangin temporaryo—ang adlaw, ang bulan, ang mga bituon, ang mga nasyon, kag ang dagat. Bisan “ang mga gahum sang langit magatay-og” (tan-awa sa Joseph Smith—Mateo 1:33). Kon alerto kita sa espirituhanon, ining komosyon makatudlo sa aton nga ibutang ang aton pagsalig sa bagay nga matuod nga permanente. Sa ginpromisa ni Jesus, “Ang langit kag ang duta magataliwan; apang ang akon mga pulong indi magataliwan. … Kag ang bisan sin-o nga nagatipig sang akon pulong, indi mapatalang” (tan-awa sa Joseph Smith—Mateo 1:35, 37).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Ano ang Joseph Smith—Mateo?

Ang Joseph Smith—Mateo, nga makita sa Perlas nga Bilidhon, amo ang Paglubad ni Joseph Smith sang katapusan nga bersikulo sang Mateo 23 kag tanan sang Mateo 24. Ang inspirado nga mga pagliwat ni Joseph Smith nagapanumbalik sang malahalon nga mga kamatuoran nga nagkaladula. Ang mga bersikulo 12–21 nagatumod sa kalaglagan sang Jerusalem sa dumaan nga panahon; ang mga bersikulo 21–55 nagaunod sang mga propesiya parte sa ulihing mga adlaw.

Joseph Smith—Mateo 1:21–37; Marcos 13:21–37; Lucas 21:25–38

Ang mga propesiya parte sa Ika-duhang Pagkari sang Manluluwas makabulig sa akon nga atubangon ang palaabuton nga may pagtuo.

Mahimo nga makahaladlok basahon ang parte sa mga hitabo padulong sa Ika-duhang Pagkari ni Jesucristo. Pero sang ginpropesiya ni Jesus ining mga hitabo, ginhambalan Niya ang Iya mga disipulo nga “indi magkahadlok” (Joseph Smith—Mateo 1:23). Paano ka “indi magkahadlok” kon imo mabatian ang parte sa mga linog, mga giyera, mga pagpatalang, kag mga gutom? Pamensara ining pamangkot samtang imo ginabasa ining mga bersikulo. Markahi ukon tandai ang bisan ano nga nagapaumpaw nga laygay nga imo makita.

 

Joseph Smith—Mateo 1:26–27, 38–55; Mateo 25:1–13; Lucas 21:29–36

Kinahanglan ko nga mangin handa pirme para sa Ika-duhang Pagkari sang Manluluwas.

Wala ginpahayag sang Dios “ang adlaw ukon takna [sa diin magaabot ang Anak sang tawo]” (Mateo 25:13). Pero indi Niya gusto nga mag-abot inang adlaw sa aton nga “wala nakapanghanda” (Lucas 21:34), gani ginhatagan Niya kita sing laygay kon paano magpanghanda.

Samtang imo ginabasa ining mga bersikulo, pangitaa ang mga paanggid kag iban pa nga pagkumparar nga gingamit sang Manluluwas para tudloan kita nga mangin handa pirme para sa Iya Ika-duhang Pagkari. Ano ang imo matun-an sa mga ini? Ano ang nainspirar ka nga himuon?

Pwede mo man pamensaron kon sa ano ka luyag sang Manluluwas nga magbulig handa sang kalibutan para sa Iya Ika-duhang Pagkari. Ano sa pamatyagan mo ang kahulugan sang mangin handa as pagbaton sang Manluluwas kon Sia mag-abot?  

Mateo 25:14–30

Nagapaabot ang Amay nga Langitnon nga akon gamiton ang Iya mga regalo sing maalamon.

Sa paanggid sang Manluluwas, ang “talento” nagatumod sa kwarta. Pero ang paanggid sang mga talento makatulod sa aton nga binagbinagon kon paano naton ginagamit ang bisan ano naton nga bugay, indi lamang ang kuwarta. Pagkatapos nga basahon ining paanggid, mahimo ka nga maglista sang pila sa mga bugay kag mga responsibilidad nga ginsalig sang Amay nga Langitnon sa imo. Ano ang Iya ginapaabot nga imo himuon sa sining mga bugay? Paano mo gamiton ining mga regalo sing mas maalamon?

Mateo 25:31–46

Kon magserbisyo ako sa iban, nagaserbisyo ako sa Dios.

Kon nagapamangkot ka kon paano hukman sang Ginuo ang imo kabuhi, basaha ang paanggid sang mga carnero kag mga kanding. Ngaa ayhan sa banta mo nga ang pag-atipan sang mga nagakinahanglan magahanda sa imo nga “panublion ang ginharian” sang Dios?

Sa ano nangin pareho ang ining paanggid sa duha pa nga paanggid sa Mateo 25? Ano nga mga mensahe ang komon sa sining tatlo?

Tan-awa man sa Mosias 2:17; 5:13.

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Joseph Smith—Mateo.Para buligan ang imo pamilya nga tun-an ang ining kapitulo, imbitaha sila nga pangitaon ang mga pinanudlo sang Manluluwas parte sa kon paano kita magpanghanda para sa Iya Ika-duhang Pagkari (tan-awa, halimbawa, ang mga bersikulo 22–23, 29–30, 37, 46–48). Ano ang pwede naton himuon para sundon ining laygay? Mahimo nga masadyahan ang inyo pamilya sa pagdrowing sang mga litrato sang kon daw ano sa ila panan-aw ang mangin Ika-duhang Pagkari sang Manluluwas.

Joseph Smith—Mateo 1:22, 37.Ano ang kahulugan sang tipigan ang pulong sang Dios? Paano naton ini himuon sing personal kag bilang pamilya? Paano ang paghimo sini makabulig likaw sa aton nga mapatalang?

Mateo 25:1–13.Pwede mo gamiton ang litrato sang pulo ka mga ulay nga upod sining outline para hambalan ang Mateo 25:1–13 Ano nga mga detalye ang makita naton sa litrato nga ginalaragway sa sining mga bersikulo?

Pwede kamo nga maggunting sang papel nga korte tinulo sang mantika kag taguon ang mga tinulo sa palibot sag inyo balay. Pwede ninyo nga itapik ang mga tinulo sa mga bagay pareho sang balaan nga mga kasulatan ukon larawan sang templo. Kon makita sang mga miyembro sang pamilya ang mga tinulo, pwede ninyo hambalan kon paano kita ginabuligan sining mga butang nga mahanda para sa Ika-duhang Pagkari.

Marcos 12:38–44; Lucas 21:1–4.Ano ang ginatudlo sining mga bersikulo parte sa kon ano ang panan-aw sang Manluluwas sa aton mga halad? Ipakita sa imo pamilya kon paano magbayad sang ika-pulo kag halad-puasa sa Ginuo. Paano nagabulig ining mga halad sa pagtukod sang ginharian sang Dios? Ano ang pila sa mga paagi nga sarang naton matanyag “ang tanan [nga may ara kita]” sa Ginuo? (Marcos 12:44).

babayi nga nagabutang sang sinsilyo sa kahon

Widow’s Mite [Ang Lepta sang Balo], ni Sandra Rast

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

 

Pagpauswag sang Personal nga Pagtuon

Ihanda ang imo palibot. “Ang aton palibot may dako nga epekto sa aton ikasarang sa pagtuon kag pagbatyag sang kamatuoran” (Teaching in the Savior’s Way, 15). Tinguhai nga magpangita sang lugar sa pagtuon sang balaan nga mga kasulatan nga magaagda sang impluwensya sang Balaan nga Espiritu. Ang makainspirar nga musika kag mga litrato sarang man mag-agda sang Espiritu.

mga babayi nga nagabitbit sang mga lampara

Five of Them Were Wise [Lima sa Ila Mainandamon], ni Walter Rane