In Remembrance of Me [Sa Pagpanumdom sa Akon], ni Walter Rane

Mayo 29–Hunyo 4

Mateo 26; Marcos 14; Juan 13

“Sa Pagpanumdom”

Samtang imo ginabasa ang mga hitabo nga ginlaragway sa Mateo 26; Marcos 14; kag Juan 13, hatagi sing atensyon ang bisan ano nga panghunahuna nga imo mabaton, labi na ang mga pagpabatyag nga nagapadalom sang imo pagtuo kay Jesucristo kag sang imo pangako sa Iya.

Isulat Ang Imo Mga Panghunahuna

Sang adlaw antes Sia mapatay, may ginhatag si Jesus sa Iya mga disipulo agud ila Sia madumduman. Sia “nagkuha sing tinapay, kag ginpakamaayo, kag gintipiktipik ini, kag ginhatag sa mga [disipulo], kag nagsiling, Kuha kamo, kaon kamo; ini amo ang akon lawas. Kag nagkuha sia sang tagayan, kag sang nakapasalamat, ginhatag niya ini sa ila, nga nagasiling, Inom kamo tanan sini; kay ini amo ang akon dugo” (Mateo 26:26–28).

Natabo ini mga 2,000 ka tuig na ang nagligad, sa lugar nga kalabanan sa aton wala gid tsansa makakita, sa lenggwahe nga pila lang sa aton ang makaintiendi. Pero karon, kada Domingo sa aton kaugalingon nga mga lugar sang pagtililipon, ang mga nagakapot sang priesthood, nga awtorisado sa pag-akto sa ngalan ni Jesucristo, nagahimo sang Iya sadto ginhimo. Nagakuha sila sang tinapay kag tubig, ginabendisyunan ini, kag ginahatag ini sa kada isa sa aton, nga Iya mga disipulo. Isa ini ka simple nga akto—may mas simple pa bala sangsa sini, mas importante, sangsa pagkaon sang tinapay kag pag-inom sang tubig? Pero ang ina nga tinapay kag tubig sagrado sa aton tungod ginabuligan kita sang mga ini nga madumduman Sia. Ang mga ini amo ang aton paagi sa pagsiling nga, “Indi ko Sia pagkalimtan”—indi lamang nga, “Indi ko gid pagkalimtan ang akon nabasa parte sa Iya mga pinanudlo kag sa Iya kabuhi.” Kundi, ginasiling naton, “Indi ko gid pagkalimtan ang Iya ginhimo para sa akon.” “Indi ko gid pagkalimtan kon paano Niya ako ginsalbar sang nagpangayo ako sing bulig.” Kag “Indi ko gid pagkalimtan ang Iya pangako sa akon kag ang akon pangako sa Iya—ang kasugtanan nga amon ginhimo.”

Mga Ideya para sa Personal nga Pagtuon sang Balaan nga mga Kasulatan

Mateo 26:6–13; Marcos 14:3–9

“Nag-una sia … sa paghaplas sang akon lawas sa paglubong.”

Sa mapainubuson nga akto sang pagsimba, ang babayi nga ginlaragway sa sining mga bersikulo nagpakita nga nakahibalo sia kon sin-o si Jesus kag kon ano ang Iya malapit na nga himuon (tan-awa sa Mateo 26:12). Ngaa sa banta mo nga makahulugan ang iya mga aksyon sa Manluluwas? (tan-awa sa bersikulo 13). Ano ang nanamian mo sa babayi kag sa iya pagtuo? Binagbinaga kon paano mo masunod ang iya halimbawa.

Tan-awa man sa Juan 12:1–8.

Mateo 26:20–22; Marcos 14:17–19

“Ako ayhan, Ginuo?”

Ano ang imo matun-an parte sa mga disipulo base sa ila pamangkot sa Ginuo sa sining mga bersikulo? Ngaa sa banta mo nga namangkot sila sini? Pamensara kon paano mo ayhan ipamangkot sa Ginuo ang, “Ako ayhan?”

Tan-awa man sa Dieter F. Uchtdorf, “Ginuo, Ako Bala?,” Liahona, Nob. 2014, 56–59.

Mateo 26:26–29; Marcos 14:22–25

Ang sakramento isa ka oportunidad sa pagdumdom sa Manluluwas.

Sang ginpakilala sang Manluluwas ang sakramento sa Iya mga disipulo, ano sa banta mo ang ila ginapanumdom kag nabatyagan? Panumduma ini samtang imo ginabasa ang parte sa ila eksperiyensya sa Mateo 26:26–29 kag Marcos 14:22–25. Ngaa sa banta mo nga ginpili ni Jesus ining paagi para aton Sia madumduman? Pwede mo man binagbinagon ang imo mga nangin eksperiyensya sa tion sang sakramento. May pwede ka bala himuon para mangin mas sagrado kag makahulugan ang imo eksperiyensya?

Pagkatapos nga basahon kag binagbinagon ining mga bersikulo, mahimo mo isulat ang pila ka mga butang nga ginapadumdom sa imo parte sa Manluluwas. Pwede mo rebyuhon ining mga butang sa dason nga mag-ambit ka sang sakramento. Mahimo mo man ini rebyuhon sa iban nga mga okasyon, bilang paagi agud “dalayon nga magdumdom sa iya” (Moroni 4:3).

Tan-awa man sa Lucas 22:7–39; 3 Nefi 18:1–13; Doktrina kag mga Kasugtanan 20:76–79.

Juan 13:1–17

Ang Manluluwas amo ang aton halimbawa sang mapainubuson nga pag-alagad sa iban.

Sang panahon ni Jesus, ang paghugas sang tiil sang iban nga tawo isa ka buluhaton sang suluguon, indi sang mga lider. Pero gusto ni Jesus nga lainon ang panghunahuna sang Iya mga disipulo parte sa kahulugan sang pagpanguna kag pagserbisyo. Ano nga mga mensahe ang imo makita sa mga pulong kag aksyon sang Manluluwas sa Juan 13:1–17? Sa inyo kultura, ang paghugas sang tiil sang iban mahimo nga indi kinaandan nga paagi sa pag-alagad. Pero pamensara kon ano ang sarang mo himuon agud sundon ang ehemplo sang Manluluwas sang mapainubuson nga pag-alagad.

Basi manami man nga talupangdon ang mga butang nga nahibal-an kag nabatyagan ni Jesus sa sining sagrado nga tion upod sa Iya mga Apostoles (tan-awa sa mga bersikulo 1 kag 3). Ano ang ginabulig paintiendi sining mga pagpahangop sa imo parte sa Manluluwas?

Tan-awa man sa Lucas 22:24–27.

Juan 13:34–35

Ang akon pagpalangga sa iban isa ka tanda nga isa ako ka matuod nga disipulo ni Jesucristo.

Antes pa, naghatag si Jesus sang kasuguan nga “higugmaa ang imo isigkatawo subong sa imo kaugalingon” (Mateo 22:39). Karon naghatag Sia “sing bag-ong sugo.” Ano sa banta mo ang buot silingon sang higugmaon ang iban pareho sang paghigugma ni Jesus sa imo? (tan-awa sa Juan 13:34).

Mahimo mo man binagbinagon kon paano nakahibalo ang iban nga tawo nga isa ka ka disipulo ni Jesucristo. Paano mo masiguro nga ang gugma amo ang imo nagapakilala nga kinaiya bilang Kristiyano?

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mateo 26:26–29; Marcos 14:22–25.Daw ano ang eksperiyensya sang imo pamilya sa tion sang sakramento kada semana? Ang pagbasa parte sa una nga sakramento makainspirar sang paghinambalanay parte sa importansya sang sakramento kag mga paagi nga pauswagon ang inyo eksperiyensya. Pamensara ang pagpakita sang litrato Pagpasa sang Sakramento (Libro sang mga Larawan nga Pang-Ebanghelyo) no. 108) kag pagpaambitanay sang mga ideya kon ano ang pwede ninyo himuon antes, sa tion sang, kag pagkatapos sang sakramento.

Ang sakramento nagabulig sa aton sa pagdumdum kay Jesucristo.

Mateo 26:30.Pamensara ang pagkanta sang isa ka himno, pareho sang ginhimo ni Jesus kag sang Iya mga Apostoles—siguro isa ka pang-sakramento nga himno. Paano ayhan nangin bugay ang pagkanta sang himno kay Jesus kag sa Iya mga Apostoles sang amo nga tion? Paano ang mga himno nangin bugay sa aton?

Juan 13:1–17.Basi gusto mo nga ipakita sa imo pamilya ang litrato sa katapusan sining outline samtang inyo ginabasa ining mga bersikulo. Ano nga mga kamatuoran ang gintudlo sang Manluluwas paagi sa Iya mga aksyon? Ano nga mga detalye sa litrato ang nagabulig sa aton nga maintiendihan ining mga kamatuoran? Mahimo nga iistorya sang mga miyembro sang pamilya kon paano nagdala sa ila sang kalipayan ang pagpangabuhi sining mga kamatuoran (tan-awa sa Juan 13:17).

Juan 13:34-35.Pagkatapos nga basahon ining mga bersikulo, mahimo ninyo nga hambalan sing ululupod kon paano nahibal-an sang iban nga mga disipulo kamo ni Jesucristo. Paano ang gusto sang Manluluwas nga makilal-an ang Iya mga sumulunod? Pwede mo pangabayon ang mga miyembro sang pamilya nga mag-istorya parte sa mga tawo nga ang pagpalangga sa iban nagapakita nga matuod sila nga mga disipulo ni Jesucristo. Mahimo man ninyo hambalan ang mga paagi nga makapakita kamo sing dugang pa gid nga pagpalangga bilang pamilya.

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Ginapanugyan nga kanta: “How Great the Wisdom and the Love [Dakong Kaalam Kag Gugma],” Mga Himno kag mga Ambahanon sang Kabataan, 19.

Pagpauswag sang Personal nga Pagtuon

Magbinagbinag. Ang balaan nga mga kasulatan may espirituhanon nga mga kahulugan nga mahimo malaktawan naton kon kaswal kita kaayo magbasa, pareho sang iban nga mga balasahon. Indi pagdalii nga matapos ang isa ka kapitulo. Hatagi sing tiyempo nga panumdumon sing maayo ang imo ginabasa.

Greatest in the Kingdom [Labing Dako sa Ginharian sang Langit], ni J. Kirk Richards